Men In Katok Ko Kin Wijtak Me Rej Kabuñburuen Jehovah
“Komin lelok enbwinemi men in jurtak emour, ekwojarjar, men in kabuñburuen Anij.”—DRI ROM 12:1.
1. Ta eo Bible ej ba kin men in katok ko me ediklok aorõkiir iumin Kien eo ikijen Moses?
“BWE kien eo, ke iloan anõñin men ko re naj itok, jab eirwõt, e ban kowãppen ro rej kebaktok ñõn e kin men in katok ko rej katok kaki yiõ otemjej.” (Dri Hibru 10:1) Ijo, ilo juõn nan ealikar, ri jilek Paul ej kamol bwe tokjen men in katok ko otemjej rar katok kaki iumin Kien eo ikijen Moses kar jab bed indio ke ear jerbal ñan lomor eo an armij.—Dri Kolosse 2:16, 17.
2. Etke ejjab jettokjen ñan kajeoñ in melele kin tibdik in melele ko ilo Bible kin men in jurtak ko im men in katok ko iumin Kien eo?
2 Ej melelen men in ke bwe kamelele eo ilo Pentateuch ikijen men in jortak im men in katok ko ejelok tokjen ñan Christian ro rainin? Ilo mol, elaplok jidik jen iumin juõn yiõ, ro rej bed ilo Theocratic Ministry School ilo congregation ko an ri Kennan ro an Jehovah ibelakin lal rar read aolepen book ko lalem jinoin Bible eo. Jet rar kate ir ñan read im melele kin aolep tibdik in melele ko. Jibadbad ko air kar ejelok tokjeir ke? Emol ejjab wãwen dein, bwe “jabrewõt men ko ar jeje mokta, ar jeje ken katakin kij, bwe kij kin kijenmij, im kin ainemõn jen Jeje ko, en or ar kejatrikrik.” (Dri Rom 15:4) Inem, kajitõk eo ej, “Ken katakin” im “ainemõn” ta eo jemaroñ bõke jen aolep kamelele ko ilo Kien eo ikijen men in jortak im me in katok ko?
Kin Kein Katakin Kij im Kainemõn
3. Ta men in aikwij eo ewõr ibbed?
3 Meñe ejjab juõn men in aikwij bwe jen katok kin menin mour ko ilo wãwen eo Kien eo ear kakiene, jej aikwiji wõt men eo katok kein kar kõmmane ñan ri Israel ro, melelen, ñan jeorlok bwid ko ad im ñan lañliñ kin buñburu eo an Anij. Kin ad jab lelok men in katok ko, ewi wãwen jemaroñ bõk tokjen rot kein? Elikin an jitõñlok ñan joñan ko kin men in katok in menin mour kein, Paul ej keañ: “Kin men in ke Ej [Jesus] dreloñtok ilo lõl E ba, Men in katok im men in jurtak Kw’ar jab kõnan, a enbwin Kw’ar kapojõk ñõn Iõ: Men in katok ko reyu rej tili im men in katok ko kin jerawiwi, re jab kabuñburuõm: Inem I ar ba, Lo emwij Aõ itok (ilo Buk eo jeje kin Ña) bwe In kõmõnmõn ankil Am, O Anij.”—Dri Hibru 10:5-7.
4. Ewi wãwen Paul ej jerbale Sam 40:6-8 ñan Jesus Christ?
4 Elikin an eliji nan ko jen Sam Ko 40:6-8, Paul ej kalikar bwe Jesus ear jab itok ñan kowõnmanlok “men in katok im men in jurtak,” im “men in katok ko reyu rej tili im men in katok ko kin jerawiwi,” ko tok ñan ien eo Paul ear jeje letter ko an aolepeir Anij ear jab buñburuen kaki. Jen men in, Jesus ear itok kin juõn enbwin me Jemen ilañ ear keboje, juõn eo ear joñan wõt juõn ilo aolep wãwen ko ñan eo Anij ear keboje ke ear kõmanmõn Adam. (Jenesis 2:7; Luk 1:35; 1 Dri Korint 15:22, 45) Ke ej Nejin Anij ewãppen, Jesus ear jerbal einwõt “inen” kõrã eo, einwõt kar kanan kake ilo Jenesis 3:15. Enaj bõk buñten nee ko ñan ‘kokkure bõran Satan,’ bõtab ikijen Jesus make renaj ‘kokkure jimwin neen.’ Ilo wãwen in, Jesus ear erom ial eo Jehovah ear letoke ñan lomoren armij, ikijen eo armij ro retiljek rar reimanlok ñan e jen ran ko an Abel.
5, 6. Ta wãwen eo eutiejlok ñan kebak Anij ej bellok ñan ri Christian ro?
5 Ilo an konono kin jerbal in ejej uan an aorõk me Jesus ear kõmmane, Paul ej ba: “Eo e ar jab jela jerawiwi, [Anij] E ar kõmõn E jerawiwi kin kij, bwe jen erom wãnik in Anij ilo E.” (2 Dri Korint 5:21) Nan ko “kõmõn E jerawiwi” remaroñ bar ukõte einwõt ‘kõmman E einwõt juõn men in katok in jerawiwi.’ Ri jilek John ej ba: “Im E ken mirik kin jerawiwi ko ar, im jab kin ar wõt, a bareinwõt kin aolepen lõl.” (1 Jon 2:2) Kin men in, ke ri Israel ro ear wõr juõn ial in kebak Anij ejedkaju ikijen men in katok ko air, ri Christian ro ewõr juõn bedbed eutiejlok ñan kebak Anij—katok eo an Jesus Christ. (Jon 14:6; 1 Piter 3:18) Elañe jej jerbale tõmak ilo katok in binmour eo eletok in Anij im bokake E, kij bareinwõt jemaroñ bõk jeorlok bwid kin jerawiwi ko ad im lañliñ kin buñburu im jerammõn eo an Anij. (Jon 3:17, 18) Ejjab juõn unjen kainemõn ke? Ak, ewi wãwen jemaroñ kwalok ad tõmak ilo katok in binmour eo?
6 Elikin an kamelele bwe ri Christian ro ewõr juõn bedbed eutiejlok ñan kebak Anij, ri jilek Paul ej kõlajrak, einwõt jej readi ilo Dri Hibru 10:22-25, jilu wãwen ko jemaroñ kwalok tõmak im kamolol eo ad kin men in letok eo ej yokwe an Anij. Meñe kar jitõñlok nan in kauwe in an Paul elaptata ñan ro ewõr ial in “dreloñ iloan jikin kwojarjar eo”—melelen, Christian ri kabit ro me ewõr juõn kejatdikdik kin mour ilañ—ilo mol armij otemjej rej aikwij bokake nan in kakõrmol ko an Paul elañe rekõnan bõk tokjen jen katok in binmour eo an Jesus.—Dri Hibru 10:19.
Lelok Men in Katok ko Rerreo im Jab Etton
7. (a) Ewi wãwen Dri Hibru 10:22 ej kwalok kin ta eo rar kõmmane ke rar katok kin juõn men in katok? (b) Ta eo rar aikwij in kõmmane bwe Anij en buñburuen kin men in katok eo?
7 Mokta, Paul ej rejañ ri Christian ro: “Jen druaklok, im en mol buruer, im tõmak eo ar en bin wõt, im buruer ren bõtũktũk jen bõklikõt enana; im ke emwij kwoli enbwiner kin dren erreo.” (Dri Hibru 10:22) Nan ko ralikar kar kajerbali ijin rej kwalok kin ta eo kar kõmmane ke rar katok kin juõn men in katok iumin Kien eo. Men in ejejjet kinke elañe rar kõnan bwe Anij en buñburuen kake men in katok eo, rar aikwij leloke kin juõn un ejimwe im ej aikwij juõn men erreo im jab etton. Rar aikwij bõk menin mour eo renaj kar katok kake jen bwij eo, melelen jen ian menin mour ko rerreo, im ear aikwij “wãppen,” ejelok likjap. Elañe men in katok eo kar jen bao ko, ear aikwij jen turtledove ak muli ko emõn ded. Elañe ear jejjet ñan men in aikwij kein, enaj kar “bõke jen armij eo bwe en kõmõn kilajrõk ñõn e.” (Livitikõs 1:2-4, 10, 14; 22:19-25) Men in jurtak grain (einwõt wheat) eo ej aikwij ejelok leaven, eo ej kakõllan nana; im ej aikwij ejelok honey, melelen syrup in leen wijki ko, eo ekkã an kauweik mõñã ko. Ke rar katok kin men in katok ko—menin mour ak grain—ion lokatok eo, rar likit salt, juõn men in kejbãrok, kar kobaiki ioni.—Livitikõs 2:11-13.
8. (a) Ta kar men in aikwij eo kin armij eo ear lelok juõn men in jurtak? (b) Ewi wãwen jemaroñ kõmman bwe Jehovah en buñburuen kake kabuñ eo ad?
8 Ta kin armij eo ej kõmman men in katok eo? Kien eo ej ba bwe jabdewõt armij eo ej walok iman Jehovah ear aikwij erreo im jab etton. Eo ear etton kin jabdewõt un ear aikwij mokta lelok juõn men in jurtak in jerawiwi ak men in jurtak in bwid ñan kõmman bwe en bar erreo iman Jehovah bwe En buñburuen kake e. (Livitikõs 5:1-6, 15, 17) Inem, jej kamolol ke kin aorõkin ad kejbãrok juõn jutak erreo iman mejen Jehovah? Elañe jekõnan bwe Jehovah en buñburuen kake kabuñ eo ad, jej aikwij mõkaj im kajimwe jabdewõt bwid ko jej kõmmani nae kien ko an Anij. Jej aikwij mõkaj im kortokjen jabdewõt men in jibañ ko letok in Anij—“elder ro an eklisia” im “ken mirik kin jerawiwi ko ar,” Jesus Christ.—Jemes 5:14; 1 Jon 2:1, 2.
9. Ta kar oktak eo elap ikõtan men in katok ko kar liloki ñan Jehovah im ko kar liloki ñan anij wan ko?
9 Ilo mol, anemkwoj eo jen jabdewõt kain men ko retton kar oktak eo elap ikõtan men in katok ko ñan Jehovah im ko armij ro jen ri ailiñ ko ibelakin Israel rar liloki ñan anij wan ko air. Ilo an konono kin wãwen in einjuõn kin men in katok ko iumin Kien eo ikijen Moses, juõn book in etale ej kile: “Jej lo bwe ejelok kõtan ñan jerbal in kajitõbtõb; ejelok jeparujruj in kabuñ, mwijit enbwinin make, ak mour in kijoñ ekwojarjar, rej lukkun kemo manit ko relã jen joñan kin timõn im orlok; ejelok katok kin armij; ejelok katok kin ro remij.” Men kein aolep rej kalikar kin juõn men: Jehovah ekwojarjar, im ejjab kowãnik ak kamelim jabdewõt kain jerawiwi ak bwid ko. (Habakkuk 1:13, New World Translation) Kabuñ im men in katok ko rej liloki ñan e rej aikwij erreo im ejjab etton—ilo enbwin, ilo mwil emõn, im ilo jitõb.—Livitikõs 19:2; 1 Piter 1:14-16.
10. Ilo burukuk ibben nan in kakabilek eo an Paul emwij je ilo Dri Rom 12:1, 2, etale ta eo kin kij make jej aikwij kõmmane?
10 Ilo lemnak kin men in, jej aikwij etale aolep wãwen ko ilo mour eo ad bwe jen maroñ liki bwe Jehovah ej buñburuen kake jerbal eo ad ñan e. Jen jab lemnak bwe kin an wõr kunad ilo kwelok ko an Christian im ilo jerbal in kwalok nan, ej men in jekdon kin ta eo jej kõmmane ilo mour eo ad make. Jen jab bareinwõt bõk lemnak eo bwe an wõr kunad ilo makitkit ko an Christian ej jolok aikwij eo ñan bokake kien ko an Anij ilo wãwen ko jet ilo mour eo ad. (Dri Rom 2:21, 22) Jejjab maroñ kõtmene ad bõk jerammõn im buñburu an Anij elañe jej kõtlok bwe jabdewõt men ejjab erreo im etton ilo mejen ren katton lemnak im makitkit ko ad. Kememej wõt nan ko an Paul: “Inem ij akwelap ñõn kom, ro jeiõ im jãtiõ, kin tiriamokake ko an Anij, bwe komin lelok men in jurtak emour, ekwojarjar, men in kabuñburuen Anij, eñin ami jerbal men in Jitõb. Im komin jab ilo wãwen dri lõl in: a komin kejakilkil kom ilo kõkãle ami lolãtãt, bwe komin melejoñ ta ankil an Anij emõn im kabuñburuen im wãppen.”—Dri Rom 12:1, 2.
Lelok Wijtak kin Aolepen Buru
11. Nan eo “kwalok,” me Dri Hibru 10:23 ej konono kake ekoba ta eo?
11 Ke ear jeje lok ñan ri Hebrew ro, Paul ear kareilok ir ñan juõn wãwen eaorõk ilo kabuñ eo emol: “Jen drebij wõt kwalok ar kejatrikrik bwe en jab makõtkit; bwe etiljek Eo e ar kalimur.” (Dri Hibru 10:23) Nan eo “kwalok” ej melelen “kwalok buru,” im Paul ej bareinwõt konono kin “katok ñõn Anij kin wijtak.” (Dri Hibru 13:15) Men in ej kakememej kij kin men in katok ko me armij ro einwõt Abel, Noah, im Abraham rar liloki.
12, 13. Juõn ri Israel ear kamol ta eo ke ear lelok juõn men in katok kijeek, im ta eo jemaroñ kõmmane ñan kwalok ejja jitõb eo wõt?
12 Ke juõn ri Israel ear lelok juõn men in katok kijeek, kar kõmmane bwe “en men in mõnõnõ iman Jeova.” (Livitikõs 1:3) Kin juõn men in katok rot in, ear kwalok ilo mõnõnõ, ak kamol, kin jerammõn ko relõñ im joij im yokwe an Jehovah ñan armij ro an. Kememej bwe wãwen eo einjuõn kin men in katok kijeek eo kar bwe aolepen men in katok eo kar tile ion lokatok eo—juõn kakõlle ekkar kakõllan kabuñ kin aolepen buru. Eindein lok, jej kwalok tõmak eo ad ilo katok in binmour eo im kamolol eo ad kin men in letok in ñe jej ilo mõnõnõ im kin aolepen buruõd “katok ñõn Anij [Jehovah] kin wijtak ien otemjej, eñin leen tier.”
13 Ke ri Christian ro rejjab lelok lukkun men in katok ko—menin mour ak leen wijki ko—ewõr ibbeir eddo eo ñan kwalok kin news eo emõn kin Ailiñ eo im ñan kõmman ri kaloran Jesus Christ. (Matu 24:14; 28:19, 20) Kwoj kortokjen ke ien ko remõn ñan bõk kunam in keañ kin news eo emõn kin Ailiñ in Anij bwe en lõñlok armij ren maroñ jelã kin men ko rekabwilõñlõñ me Anij ej keboji ñan armij ro rej bokake? Ilo mõnõnõ kwoj kajerbal ke ien im kajur ko am ñan katakin ro rej itoklimo im jibañ ir ñan erom ri kaloran Jesus Christ? Kunad ilo kijejeto kin jerbal in kwalok nan, einwõt bwin enno kin juõn men in katok kijeek, elap an kabuñburuen Anij.—1 Dri Korint 15:58.
Lañliñ kin Kamao Ibben Anij im Armij
14. Ewi wãwen nan ko an Paul ilo Dri Hibru 10:24, 25 ej einlok wõt karõk eo kin jurtak in ainemõn eo?
14 Eliktata, Paul ej kareilok kij ñan kõtan eo ad ibben ri Christian ro mõttad ñe jej kabuñ ñan Anij. “Im jen lale dron, im kõkãtok dron ñõn yokwe im jerbal ko remõn; Im jen jab likit ar kwelok im jar, einwõt mõnit an jet, a jen kowe dron im kalaplok ar kõmõn men in, bwe jej lo an ran eo ebaktok.” (Dri Hibru 10:24, 25) Nan ko “im kõkãtok dron ñõn yokwe im jerbal ko remõn,” “jen jab likit ar kwelok im jar,” im “jen kowe dron” rej aolep kakememej kij kin ta eo jortak in ainemõn ilo Israel ear kõmmane ñan armij ro an Anij.
15. Ta wãwen ko deinlok wõt jej loi ikõtan jurtak in ainemõn eo im kwelok ko in Christian?
15 Nan ko “jurtak kin ainemõn” jet ien rej ukõte “men in katok kin ainemõn.” Nan in Hebrew eo kin “ainemõn” ej ilo kajin elõñ, bõlen kin an melele bwe air bõk kunair ilo men in katok rot kein ej walok ilo ainemõn ibben Anij im ainemõn ibben ri tõmak ro mõttair. Ikijen jurtak in ainemõn, juõn ri meletlet ej kile: “Emol, kar juõn ien kamao ekalañliñ ibben Anij in Bujen eo, ke Ear kõttãik e make bwe en ri Itok an Israel ilo ien mõñã kin men in katok eo, einwõt ien otemjej ej Iroij in Kwojkwoj eo air.” Men in ej kakememej kij kin kallimur eo an Jesus: “Bwe ijo ruo ak jilu rej kweloklok ilo eta, Ij ber iolapir.” (Matu 18:20) Ien otemjej ñe jej bed ilo juõn kwelok in Christian, jej bõk tokjen jen kamao ko rekõketak, nan in jiroñ ko rej rejañ, im jen lemnak eo bwe Iroij eo ad Jesus Christ ej bed ibbed. Men in ej kõmman bwe juõn kwelok in Christian en juõn ien emol an kalañliñ im kakajur tõmak.
16. Ilo lemnak kin jurtak in ainemõn eo, ta eo ej kõmman bwe kwelok ko in Christian en juõn ien kalañliñ?
16 Ilo jurtak in ainemõn eo, aolep kioeo—eo ej kalibubu mõjñal ko, dreka in jibke ko, jã eo ej ion aj, eo ej i katin, im bareinwõt aolepen lokõn e mãtõk lokõn sheep eo—kar liloki ñan Jehovah ilo air tile kin kijeek. (Livitikõs 3:3-16) Kar watõk kioeo einwõt mõttan eo elaptata an wõr õn ie im mõttan eo emõntata in menin mour eo. Tile kake ion lokatok eo ej kakõllan lelok men ko remõntata ñan Jehovah. Men eo ej kõmman bwe kwelok ko in Christian ren kalañliñ ej bwe jejjab bõk wõt nan in katakin ko ak jej bareinwõt lelok nebar ñan Jehovah. Jej kõmman men in ilo ad bõk kunad—kin jibadbad ko ad rettã ak remõntata—ilo al jen buru, liñõre katak ko, im uak ñe ewõr ien ko remõn. “Komin nebar Jeova!” ri jeje psalm ear keañ. “Komin al ñõn Jeova kin al ekal, im kin nebar eo An ilo jar an ro remõn.”—Sam Ko 149:1.
Buñ-belok kin Jerammõn ko Jen Jehovah Rej Kõttar Kij
17, 18. (a) Ta katok eo elap Solomon ear kõmmane ilo ien aje temple eo ilo Jerusalem? (b) Kwojkwoj eo ilo ien aje in temple eo ear walok ilo ta jerammõn ko ñan armij ro?
17 Ilo ien aje temple eo ilo Jerusalem, ilo alliñ eo kein kajiljilimjuõn ilo yiõ eo 1026 B.C.E., King Solomon ear “katok men in katok iman Jeova,” ejaak in “katok kin katok kijeek, im katok flauo, im kioeo an katok ainemõn ko.” Ijellokin men ko kar katok kaki ilo jurtak in grain ko, juõn oran in 22,000 cow ko im 120,000 sheep ko kar katok kaki ilo ien eo.—1 Kiñ Ro 8:62-65.
18 Kwomaroñ ke kalmenlokjen kin joñan wõnãn ko im jerbal ko kar koba ilo juõn kwojkwoj rot in elap? Ak, alikar jerammõn ko Israel ear bõki elap an kar le jen wõnãn eo. Ilo jemlokin kwojkwoj ko, Solomon e ar “jilkinlok armij rõn; im rar jare kiñ eo, im jeblak ñõn moko imweir, rej lõñliñ im mõnõnõ ilo burueir kin aolepen joij eo Jeova e ar kwalok ñõn Devid dri korijeran, im ñõn dri Israel, dri ailiñ eo An.” (1 Kiñ Ro 8:66) Emol, einwõt Solomon ear ba, “Kejerammõn jen Jeova, ej namweien armij; im E jab kobaik buromõj na iben.”—Jabõn Kennan Ko 10:22.
19. Ta eo jemaroñ kõmmane ñan bõk jerammõn ko relap jen Jehovah kiõ im indio?
19 Jej mour ilo juõn ien ñe “annañin men ko remõn renaj itok” ear oktaklok ñan “men ko remol.” (Hebrews 10:1, NW) Jesus Christ, ilo jerbal eo an einwõt Priest Elap, ededelok an kar deloñ ilo lañ ko im lelok aorõkin bõtõktõkin make ñan kowãnik aolep ro rej jerbale tõmak ilo katok eo an. (Dri Hibru 9:10, 11, 24-26) Ion bedbed in katok in elap im ilo ad lelok ñan Anij men in katok in wijtak erreo im jab etton, kij bareinwõt jemaroñ etal manlok kin “lõñliñ im mõnõnõ in buru,” im reimanlok ñan buñ-belok in jerammõn ko jen Jehovah.—Malachi 3:10, NW.
Ewi Wãwen Kwonaj Kar Uak?
• Ta nan in katakin im nan in kainemõn ko jemaroñ bõki jen kamelele ilo Kien eo ikijen men in katok im men in jurtak ko?
• Ta men in aikwij eo moktata bwe Anij en buñburuen kake juõn men in katok, im ewõr ta melelen ñan kij?
• Ta eo jemaroñ leloke me enaj einlok wõt juõn men in katok kijeek?
• Ilo wãwen ta ko kwelok ko an Christian rej einwõt juõn jurtak in ainemõn?
[Pija ilo page 12]
Katok in binmour eo an Jesus Jehovah ear letoke ñan lomoren armij