“Komin Bin Ilo Iroij”

“Komin bin ilo Iroij, im ilo kajur in maroñ eo An.”​—DRI EPESÕS 6:​10.

1. (a) Ta tarinae eo ejej uan ear walok elõñlok jen 3,000 yiõ ko remotlok? (b) Etke David ear bõk anjo?

ENAÑIN 3,000 yiõ ko remotlok, ruo ri tarinae ro rar jelmaik don ikõtan ruo jar in tarinae ko ilo jikin tarinae eo. Eo edik iair kar juõn ladik ej lale sheep etan David. Eo ear jutak iman kar Goliat, juõn emaan eribin im elap an aetok. Men eo kein binej ubõn ear kõnake kar 125 paun eddon, im ear kotak juõn mõri ekilep im eddo im juõn kein tõrak ekilep. David ear ejelok an nuknuk in tarinae ñan jidik, im kein tarinae eo ibben kar juõn buwat. Ri Pilistia ri inea eo Goliat ear illu bwe Ri Israel ri tarinae eo ear iten jelmae kar baj juõn ladik wõt. (1 Samuel 17:​42-​44) Ekkar ñan lemnak eo an ro rar lale tarinae eo, rar watõk bwe jemlokin tarinae eo ear alikar kin wõn eo enaj kar win. Ak ejjab aolep ien ro rekajur rej wini tarinae eo. (Ekklisiastis 9:​11) David ear bõk anjo kinke kajur eo an Jehovah ear bed ibben ilo tarinae eo. “Tõrinae eo an Jeova,” ear ba. Bwebwenato eo an Bible ej kwalok bwe “Devid e ar bõk anjo ion dri Pilistia kin buat im kin dreka im buat dri Pilistia, im mõne.”​—1 Samuel 17:​47, 50.

2. Ilo kain tarinae rot eo Ri Christian ro rej bõk kunair?

² Ri Christian ro rejjab bõk kunair ilo tarinae eo ilo kanniek. Meñe rej ainemõn ibben armij otemjej, rej bed ilo juõn tarinae ilo jitõb nae ri kijirãt ro relukkun kajur. (Dri Rom 12:18) Ilo chapter eo eliktata ilo letter eo an ñan Ri Epesõs ro, Paul ear kamelele kin juõn tarinae aolep Ri Christian ro rej bed ie. Ear je: “Bwe aruij oktak e jab iben bõtõktõk im kõniek, a iben jiõb ro, iben ro re kajur, iben ro iroij in marok i lõl, iben jaran jitõb renana ijo ko i lõñ.”​—Dri Epesõs 6:​12.

3. Ekkar ñan Dri Epesõs 6:​10, ta eo jej aikwiji ñan lo tõbrak eo ad?

³ “Jitõb ro renana” rej Satan im dimon ro an, me rekõnan kokkure kõtan eo ad ibben Jehovah Anij. Kinke elaplok air kajur jen kij, jej bed ilo juõn wãwen einlok wõt David, im jejjab maroñ bõk anjo elañe jejjab atartar ion Anij ñan bõk kajur jen e. Emol, Paul ej rejañ kij ñan “bin ilo Iroij, im ilo kajur in maroñ eo An.” (Dri Epesõs 6:​10) Elikin an letok nan in kakabilek in, ri jilek eo ej kalikar kin men in letok ko ilo jitõb im kadkad ko kadkadin Christian rej kamaroñ kij ñan bõk anjo.​—Dri Epesõs 6:​11-​17.

4. Ta men ko ruo jenaj etale ilo katak in?

⁴ Jen etale kiõ kin ta eo Jeje ko ilo Bible rej ba kin kajur im kõl ko an ri kijirãt ro ad. Inem jenaj lale ta kõl ko jej aikwiji ñan jojomar im kejbãrok kij. Elañe jej lor nan in jiroñ ko an Jehovah, jemaroñ liki bwe ri kijirãt ro ad rejamin bõk anjo iod.

Juõn Oktaak Nae Jitõb Ro Renana

5. Ewi wãwen nan eo “oktak” ilo Dri Epesõs 6:​12 ej kamaroñ kij ñan kile ta men in etao ko an Satan?

⁵ Paul ej kamelele bwe jej “oktak . . . iben jaran jitõb ro renana ijo ko i lõñ.” Emol bwe, jitõb eo elap an nana ej, Satan Devil eo, “iroij in dimon ro.” (Matu 12:​24-​26) Bible eo ej kwalok bwe tarinae eo ad ej einwõt juõn “oktak,” ak ire pã kin pã. Ilo oktaak ko ilo ailiñ in Greece eo etto, ri ikkure ro kajjojo rej kajeoñ in patõke eo mõttan. Eindein, Devil eo ekõnan bwe jen patpat ilo jitõb. Ewi wãwen an maroñ kõmman men in?

6. Kwalok jen Jeje ko ilo Bible kin ewi wãwen Devil eo ej kajerbal elõñ kain men in etao ko ñan kokkure tõmak eo ad.

⁶ Devil emaroñ emmakit einwõt juõn serpent, juõn lion erorror, ak juõn enjel in meram. (2 Dri Korint 11:​3, 14; 1 Piter 5:8) Emaroñ kajerbal armij ro ñan matõrtõre ak kabwer kij. (Reveles̃õn 2:​10) Kinke Satan ej kajur ion aolepen lal, emaroñ kajerbal aolepen kõnan ko im men in kareelel ko an lal ñan kabo kij. (2 Timote 2:​26; 1 Jon 2:​16; 5:​19) Emaroñ kajerbal lemnak ko an lal ak ro rebukwelok ñan mone kij, einwõt ear kõmmane ñan mõne Eve.​—1 Timote 2:​14.

7. Ewi joñan men ko dimon ro remaroñ kõmmani, im ta jerammõn ko jej lañliñ kaki?

⁷ Meñe kein tarinae ko im kajur eo an Satan im dimon ro an remaroñ lukkun kajur, ewõr joñair. Jitõb rein renana rejjab maroñ jibede kij ñan kõmmani men ko renana me renaj kaburomõj Jemed ilañ. Kar kõmanman kij kin maroñ eo ñan kãlet ta eo emõn im ta eo enana, im jej iroij ion lemnak im makitkit ko ad make. Bareinwõt, jejjab make iad ilo tarinae eo. Einwõt men eo ear walok ilo ran ko an Ilaisha, ej eindein ilo ran kein ad: “Ro rej rie kij relõñ jen ro rie ir.” (2 Kiñ Ro 6:​16) Bible eo ej kallimur bwe elañe jej kõttãik kij ñan Anij im jumae Devil eo, enaj ko jen kij.​—Jemes 4:7.

Kile Makitkit ko an Satan

8, 9. Ta melejoñ ko Satan ear likit ion Job ñan kokkure tiljek eo an, im ta men ko rekauwatata ilo jitõb jej jelmae rainin?

⁸ Jejjab jajelokjen kin makitkit ko an Satan kinke Jeje ko ilo Bible rej kalikar kin wãwen ko an. (2 Dri Korint 2:​11) Devil eo ear kajerbal abañ ko kin wãwen mour, mij eo an jitenburu ro an, jumae jen lio belen, eñtan ko ilo enbwin, im nan in kinaak ko reriap jen ro jeran rewan ñan kajeoñ in kabo emaan eo ewãnik, Job. Job ear buromõj im lemnak bwe Anij ear illok jen e. (Job 10:​1, 2) Meñe Satan ejjab kõmman abañ ko ilo kajju rainin, abañ kein rej jelet elõñ Ri Christian ro, im Devil eo emaroñ kajerbal abañ kein ilo wãwen eo ekõnan.

⁹ Men ko rekauwatata ilo jitõb rej laplok wõt ilo ran kein eliktata. Jej mour ilo lal eo ej kaorõk jibadbad ko ilo kanniek jen ko ilo jitõb. Television im movie ko rej kwalok bwe mour in ejej ej unjen mõnõnõ im jab unjen inebata. Im enañin aolep armij rar oktak im “ro rej yokwe men in kabuñburueir elap jen air yokwe Anij.” (2 Timote 3:​1-5) Lemnak rot in emaroñ jelet jokkin wõt juõn ilo mour in jitõb eo ad elañe jejjab “kate [kij] kin tõmak eo.”​—Jud 3.

10-12. (a) Ta nan in kakkõl eo Jesus ear letok ilo wanjoñok eo an kin juõn ri kallip? (b) Kwalok juõn wanjoñok kin ewi wãwen ad maroñ kautameik men ko raorõk ilo jitõb.

¹⁰ Juõn ian wãwen ko remõntata Satan ej kajerbali ej bwe jen madjake lal in im jibadbad ko an ilo kanniek. Ilo wanjoñok eo an kin ri kallip eo, Jesus ear kakkõl bwe jet ien “lemnok ko kin lõl in, im mon kin mweiuk ko rej koutamek nan [eo an Ailiñ eo].” (Matu 13:18, 22) Nan in Greek eo “kautamek” ej melelen “kuul buru.”

¹¹ Ilo bulen wijki ko, kwomaroñ lo mar eo ej tõbalbal etan strangler fig. Vain eo an ej kabole wijki eo im okran ej kajurlok jidik kin jidik. Okran strangler fig eo ej jorome men ko ilal in wijki eo ej aikwiji im bwilõkin fig eo ej binej meram jen wijki mae ien emij wijki eo.

¹² Ilo wãwen in lok wõt, inebata ko an jukjuk im bed in im jibadbad eo ñan korlok mweie im jibadõk juõn wãwen mour eainemõn im jokane remaroñ kautameik kij im bõk ien im kajur eo ad jidik kin jidik. Ñe jej madjake men ko an lal, emaroñ bidodo ad jerwane katak Bible ibbed make im keini in jako jen kwelok ko an Christian, im kajenolok kij jen men in aikwij ko ilo jitõb. Jibadbad ko an lal kiõ rej bõk jikin jibadbad ko ilo jitõb, im eliktata enaj bidodo an Satan kajjiroroik kij.

Jej Aikwij Jutak Bin

13, 14. Ta eo jej aikwij kõmmane ñe Satan ej jumae kij?

¹³ Paul ear rejañ ri tõmak ro mõttad ñan “jutõk mae etao ko an devil.” (Dri Epesõs 6:​11) Emol bwe, jejjab maroñ kokkure Devil im dimon ro an. Anij ear karõk bwe Jesus Christ en kõmmane men in. (Reveles̃õn 20:​1, 2) Bõtab, mae ien an Satan jako, jej aikwij “jutak” bin nae e bwe jumae ko an ren jab anjo iod.

¹⁴ Bareinwõt ri jilek Piter ear kalikar kin aikwij eo ñan jutak bin nae Satan. “Komin jadõr, komin ekil,” Piter ear je. “Dri kijirãte kom, devil eo, einwõt laiõn e rorror, ej etetal wõt im bukot eo ej maroñ in kõñi. Eo komin jutõk jumae im bin ilo ami tõmak, bwe kom jela bwe iñtan kein, ro jeiõmi im jãtõmi rej bed i lõl, rej iñtan kaki.” (1 Piter 5:​8, 9) Emol bwe, rejetak eo jen ri tõmak emaan im kõrã ro mõttad elukkun aorõk ñan ad jutak bin ñe Devil eo ej jumae kij einwõt juõn lion erorror.

15, 16. Kwalok juõn wanjoñok ilo Bible eo ñan kwalok kin ewi wãwen rejetak eo an ri tõmak ro mõttad emaroñ jibañ kij ñan jutak bin.

¹⁵ Ñe juõn lion ilo ene jemaden ilo Africa ej rorror, juõn antelope ej ebake e emaroñ ilbõk im ko ilo mõkaj mae ien ej etolok jen jikin eo ekauwatata. Bõtab, elephant ko rej juõn joñok emõn kin rejetak don. Book eo etan Elephants​—Gentle Giants of Africa and Asia ej kamelele: “Juõn wãwen jojomar eo elephant ko rej kõmmane ej bwe ren jutak ilo juõn dolul, elephant ko reritto rej reimanlok ñan men eo ej kabañ ir im rej kejbãrok elephant ko nejiir rej bed iloan dolul eo.” Kinke rej jelmae dolul rot in ekajur im rejetake don, ejeja an lion ko kõnan mõn elephant ko redik.

¹⁶ Ñe Satan im dimon ro an rej kalelñoñ kij, jej aikwij bedwõt ibben don, aera ñan aera ibben ri tõmak ro mõttad rej jutak bin ilo tõmak. Paul ear kile bwe jet Ri Christian ro mõttan rar “kainemõne” ke ear kalbuj ilo Rom. (Dri Kolosse 4:​10, 11) Nan in Greek eo rar ukõte “kainemõne” ej walok juõn wõt alen ilo Jeje ko an Christian ilo kajin Greek. Ekkar ñan book eo Vine’s Expository Dictionary of New Testament Words, “nan eo ej jitõñlok ñan uno ko rej kajerbali ñan jolok metak.” Einwõt binneb emõn, rejetak eo an ri kabuñ ro an Jehovah reritto ilo jitõb emaroñ jolok metak ko rej waloktok jen eñtan ko ilo eñjake ak kanniek.

17. Ta eo emaroñ jibañ kij ñan tiljek wõt ñan Anij?

¹⁷ Nan in rejañ jen Ri Christian ro mõttad rainin emaroñ kakajur bebe eo ad ñan karejar ñan Anij ilo tiljek. Elaptata Christian elder ro rej bojak in lelok jibañ ilo jitõb. (Jemes 5:​13-​15) Men in jibañ ko ñan bin wõt ilo tiljek rej koba keini in katak Bible ibbed make im bed ilo kwelok ko an Christian, assembly ko, im convention ko. Juõn kõtan ebak ñan Anij ej jibañ kij ñan tiljek wõt ñan e. Emol, jekdon elañe jej mõñã, idak, ak kõmman jabdewõt men, jekõnan kõmmane men otemjej ñan aibujuij eo an Anij. (1 Dri Korint 10:31) Ilo mol, atartar ion Jehovah ilo jar ej men in aikwij ñan wõnmanlok ilo juõn ial ej kabuñburuen.​—Sam 37:5.

18. Etke jejjab kõnan ebwer meñe melejoñ ko ad rej kamõjnoik kij?

¹⁸ Jet ien jumae ko an Satan rej itok ñe jej mõjno ilo jitõb. Juõn lion ej kelok ion juõn men in mour emõjno. Abañ ko an family, abañ ko kin wõnãn mour, ak nañinmij remaroñ kamõjnoik mour eo ad ilo jitõb. Ak jen jab ebwer jen ad kõmman men ko Anij ej buñburuen kake, kinke Paul ear ba: “Ñe I mõjino, inem I kajur.” (2 Dri Korint 12:10; Dri Galetia 6:9; 2 Dri Tessalonika 3:​13) Kar ta melelen? Ear melelen bwe kajur eo an Anij emaroñ jibañ kij ilo ien ad mõjno, elañe jej reilok ñan Jehovah ñan bõk kajur jen e. Anjo eo an David ion Goliat ear kwalok bwe Anij emaroñ im ej kakajur armij ro an. Ri Kennan ro an Jehovah ilo ran kein remaroñ kamol bwe ilo ien ko rekauwatata, rar eñjake kajur eo jen pein Anij.​—Daniel 10:​19, NW.

19. Kwalok juõn wanjoñok kin ewi wãwen an Jehovah maroñ kakajur ri karejar ro an.

¹⁹ Ikijen wãwen an kar Anij jurake ir, juõn leo im lio emwij air mare rar je: “Iumin elõñ yiõ ko, kim ar karejar ñan Jehovah einwõt leo im lio emwij air mare im kim ar mõnõnõ in lo elõñ jerammõn ko im jelã kajjen elõñ armij ro remõn. Bareinwõt Jehovah ear katakin kim ñan kijenmij iumin melejoñ ko rebin. Einwõt Job, kimar jab aolep ien lukkun melele kin unin an men ko walok, ak kimar jelã bwe Jehovah ear bed ibbam ien otemjej ñan jibañ kim.”

20. Ta Jeje ko ilo Bible rej kamol bwe Jehovah ej jurake armij ro an ien otemjej?

²⁰ Pein Jehovah ejjab likjap in jurake im kakajur armij ro an retiljek. (Aiseia 59:1) Ri jeje sam eo David ear al: “Jeova ej kejerkak im drebij ro otemjej re buñ; im kajutõk ro otemjej re kumliklik.” (Sam 145:14) Emol, Jemed ilañ “Ej ineke inek ko [ad], ran im ran” im kabwe men eo jelukkun aikwiji.​—Sam 68:19.

Jej Aikwij “Kein Tõrinae eo Jen Anij”

21. Ewi wãwen an kar Paul kalikar kin aikwij eo kin kein tarinae eo ilo jitõb?

²¹ Emwij ad etale jet ian wãwen ko an Satan im lo aikwij eo ñan jutak bin nae jumae ko an. Kiõ jej aikwij lale bar juõn men in letok eo ñan jojomare tõmak eo ad. Ruo alen ilo letter eo an ñan Dri Epesõs ro, ri jilek Paul ear kwalok juõn men eaorõk ñan jutak nae wãwen etao ko an Satan im anjo ion oktaak eo ad nae jitõb ro renana. Paul ear je: “Komin kõnõk aolepen ken tõrinae an Anij im jutak mae etao ko an Devil . . . Komin bõk ñõn kom aolepen ken tõrinae an Anij, bwe komin maroñ in jumae ilo ran eo enana, im mõjen kõmõn otemjej, jutõk.”​—Dri Epesõs 6:​11, 13.

22, 23. (a) Kein tarinae eo ad ej koba ta? (b) Ta eo jenaj etale ilo katak eo tok ilal?

²² Aet, jej aikwij kõnak “aolepen ken tõrinae an Anij.” Ke Paul ear je letter eo an ñan Dri Epesõs ro, juõn ri tarinae an Rom ear waje e, im jet ien ear kõnak aolepen kein tarinae eo an. Bõtab, ilo kakõrmol an Anij Paul ear emmakit im bwebwenato kin kein tarinae eo ilo jitõb me ri karejar ro otemjej an Jehovah rar aikwiji.

²³ Kein tarinae in Anij ej letoke ej koba kadkad ko juõn Ri Christian ej aikwiji im men in letok ko ilo jitõb ak karõk ko an Jehovah. Ilo katak eo tok ilal, jenaj etale mõttan ko kajjojo an kein tarinae eo ilo jitõb. Men in enaj kamaroñ kij ñan lale ewi joñan ad bojak kin tarinae eo ad ilo jitõb. Ilo ejja ien eo wõt, jenaj lale ewi wãwen joñok eo eaibujuij an Jesus Christ emaroñ jibañ kij ñan bõk anjo ion Satan Devil eo.

Ewi Wãwen Am Naj Uak?

• Ta tarinae eo aolep Ri Christian ro rej bed iloan?

• Kamelele kin jet ian men in etao ko an Satan.

• Ewi wãwen rejetak eo an ri tõmak ro mõttad emaroñ kakajur kij?

• Jej atartar ion kajur eo an wõn, im etke?

[Pija ko ilo peij 7]

Ri Christian ro rej ‘oktaak ibben jitõb ro renana’

[Pija eo ilo peij 8]

Inebata ko an jukjuk im bed in rej kautameik ennan eo an Ailiñ eo

[Pija eo ilo peij 9]

Ri Christian ro mõttad remaroñ “kainemõne” kij

[Pija eo ilo peij 10]

Kwoj jar ke ñan Anij ñan bõk kajur?