Kwoj Jelã Ke “Kõttar”?

“Ta men eo komin wõjake ilo kõmõn wãnik im kabuñ rokwojarjar, ke komij kõtõmene im lipjerjer an ran in Iroij itok!”​—2 PITER 3:​11, 12.

1, 2. Ewi wãwen ad maroñ kwalok juõn wanjoñok kin “juõn lemnak in kõttar” ikijen ran eo an Jehovah?

BAJ lemnak mõk kin juõn family eo ej kõttar ri lotok ro an bwe ren kejota ibbeir. Ien eo ñan air tõbartok ej ebaktok ilo mõkaj. Kõrã eo ej boub in kamwijlok aolep men ko rej aikwiji ñan mõñã ko kijeir. Leo belen im ajiri ro nejin rej jibañ im lale bwe aolep men ren bojak. Ir otemjej rej kijoror. Aet, aolep ro uan family eo rej kijoror im kõtõmene kin an ri lotok ro bed im rej kijoror in mõñã im kamao ibben don.

² Einwõt Ri Christian ro, jej kõttar juõn men elaplok an aorõk. Kin ta eo? Eokwe, kij aolep jej kõttar “ran in Iroij” eo! Mae ien an tõbraktok, jej aikwij einwõt ri kanan Micah, eo ear ba: “Inaj mimij im bukõt Jehovah. Inaj kõttar Anij Ri Lomor eo aõ.” (Micah 7:​7, NW) Ej melelen ke bwe jejjab aikwij jerbal? Jaab. Elap jerbal jej aikwij kõmmane.

3. Ekkar ñan 2 Piter 3:​11, 12, ta lemnak eo Ri Christian ro rej aikwiji?

³ Ri jilek Peter ej jibañ kij bõk juõn lemnak ejimwe ñe jej kõttar. Ej ba: “Ta men eo komin wõjake ilo kõmõn wãnik im kabuñ rokwojarjar, ke komij kõtõmene im lipjerjer an ran in Iroij itok!” (2 Piter 3:​11, 12) Lale bwe nan in ej juõn nan ejidimkij jab juõn kajitõk. Peter ear jab kwalok juõn kajitõk. Ilo letter ko ruo an rekakõrmol, ear kamelele kin kain armij rot ro rej Ri Christian. Bareinwõt ear kakabilek ir bwe ren etal wõt im “kõmõn wãnik im kabuñ rokwojarjar.” Meñe 30 yiõ ko rar motlok jen ien eo Jesus Christ ear kamelele kin kakõllan jemlokin “lõl,” Ri Christian ro rar aikwij mimij wõt ilo jitõb. (Matu 24:3) Rar aikwij “kõtõmene im lipjerjer” wõt kin ien an ran eo an Jehovah bed.

4. Ñan “kõtõmene im lipjerjer kin an ran in Iroij Jehovah itok,” ta eo ej kitibuj kake?

⁴ Nan in Greek eo ijin “kõtõmene im lipjerjer” ej melelen ‘kamõkajlok.’ Emol, jejjab maroñ lukkun ‘kamõkajlok’ ran eo an Jehovah. Kin mol in, “ran eo im awa eo ejelok juõn e jela kake” ñe Jesus Christ enaj itok im kokkure ri kijirãt ro an Jemen. (Matu 24:36; 25:13) Juõn etale ej kamelele bwe okran nan eo “kamõkajlok” ej melelen ‘ñan kakaiuriur’ im ej ekkeijaklok ñan ‘ad kijejeto, im niknik kin juõn men.’ Inem Peter ear rejañ ri tõmak ro mõttan bwe ren urur ilo kõnan kin an ran eo an Jehovah bed. Remaroñ kar kõmman men in ilo air ekkõl wõt im kememej kake. (2 Piter 3:​12) Kinke “ran eo elap im ekamijak an Jehovah” ej lukkun ebak, jej aikwij bõk ejja lemnak eo wõt.​—Joel 2:​31, NW.

Kõttar im “Kõmõn Wãnik”

5. Ewi wãwen jemaroñ kwalok bwe ewõr juõn “kõnan eurur” ibbed ñan lo “ran in Iroij eo”?

⁵ Elañe jej urur ilo kõnan ñan ellã jen ran eo an Jehovah im mour, jenaj kalikar kõnan in ilo ad “kõmõn wãnik im kabuñ rokwojarjar.” Nan eo “kõmõn wãnik in kabuñ rokwojarjar” emaroñ kakememej kij kin nan in kakabilek eo an Peter: “Einwõt ro nejin jilkaie, komin jab mõke kõmõnmõn kom ekar ñõn mõm ko ami mokta, ilo ien ami jajelokjen; a einwõt Eo e ar kir kom E kwojarjar, komin otemjej ami ber im kõmõn; bwe emwij jeje, Komin kwojarjar; bwe Ña I kwojarjar.”​—1 Piter 1:​14-​16.

6. Ta eo jej aikwij kõmmane bwe jen kwojarjar?

⁶ Ñan kokwojarjar kij, jej aikwij erreo ilo enbwin, lemnak, mour, im jitõb. Jej keboj kij ke kin “ran eo an Jehovah” ilo ar kokwojarjar kij im kwalok kin etan Jehovah? Ilo ran kein ejjab bidodo ñan kejbãrok erreo im kwojarjar kinke kien ko an lal kin mour erreo rej nanalok wõt. (1 Dri Korint 7:​31; 2 Timote 3:​13) Jej lo ke bwe oktak eo ikõtan kien ko ñan mour ilo erreo im kien ko an lal ej laplok wõt? Elañe jejañin, ewõr unin ad aikwij itoklimo kake men in. Emaroñ ke bwe kien ko ad make, meñe reutiejlok jen lal in, rej nanalok wõt? Elañe aet, inem jej aikwij emmakit ilo jimwe im kajimwe lemnak ko ad elañe jekõnan kabuñburuen Anij.

7, 8. (a) Ewi wãwen ad maroñ bilo kin aorõkin bõk kunad ñan “kõmõn wãnik im kabuñ rokwojarjar”? (b) Ta wãwen ko rej aikwij kõmmani ñan kajimwe?

⁷ Kinke elõñ pija in kelwan ko ilo Internet kiõ im kinke jabdewõt armij emaroñ aluiji ilo ittino, jet ian armij ro me rar jab maroñ aluij kain pija rot ko retton mokta rej lo kiõ bwe “ejelok joñan wãwen ko ñan kõmman mour etton jabdewõt ien emõntok,” juõn doctor ear ba. Elañe kwonaj kar bukõt kain pija rot kein ilo Internet eo, emol kwoj kajettokjen nan in kaiñ eo an Bible ñan “jab uñire jabrewõt men etton.” (Aiseia 52:11) Jenaj lukkun ke “kõtõmene im lipjerjer an ran in Iroij itok”? Ak ilo lemnak eo ad jej lemanlok ke ran eo an Jehovah ñan bar juõn ien tokelik, im ba bwe meñe jej katton lemnak eo ad kin pija ko retton, ewõr wõt ien ñan karreoik kij? Elañe jej jelmae juõn abañ einwõt in, jej aikwij kakaiur im kebak Jehovah ilo jar bwe en ‘kajeor mejed jen ad lale wan im kejmour kij ilo ial ko an’!​—Sam 119:37.

⁸ Enañin aolep Ri Kennan ro an Jehovah, jodikdik im ritto, rej eddeb ñan kien ko an Anij kin mour erreo im kejbãrok ir jen men in kabo ko retton an lal. Kinke rej jelã bwe aorõkin ien kein ad im nan in kakkõl eo an Peter bwe “ran eo an Iroij enaj itok einwõt juõn dri kwot,” rej aikwij wõnmanlok im “kõmman wãnik im kabuñ rokwojarjar.” (2 Piter 3:​10) Jerbal ko air rej kamol bwe rej “kõtõmene im lipjerjer an ran in Iroij [Jehovah] itok.”a

Kõttar im Kõmman Jerbal ko an “Kabuñ Rokwojarjar”

9. Ta eo kabuñ ekwojarjar en lujur kij bwe jen kõmmane?

⁹ Jerbal ko an “kabuñ rokwojarjar” rej aorõk bareinwõt elañe jekõnan kememej wõt kin ran eo an Jehovah. “Kabuñ Rokwojarjar” ej kitibuj kabuñ ñan Anij bwe en kamakit kij ñan kõmman men eo ej buñburuen kake. Tiljek ñan Jehovah ej lujure kij ñan kõmman jerbal ko an kabuñ eo ekwojarjar. Ej ankil an bwe en “lomoren armij otemjej, im bwe ren item jela mol.” (1 Timote 2:4) Anij e “jab kõnan bwe jabrewõt en joko; a bwe “ren otemjej itok im ukwelok ibeir.” (2 Piter 3:9) Inem, ejjab kabuñ eo ad ekwojarjar ke bwe en lujure kij ñan kalaplok jerbal ko ad ñan jibañ armij ñan jelã kin Jehovah im kajeoñe?​—Dri Epesõs 5:1.

10. Etke jej aikwij kejbãrok kij nae “mon kin mweiuk ko”?

¹⁰ Mour eo ad enaj obrak kin jerbal ko rekwojarjar elañe jej bukõt mokta Ailiñ eo an Anij. (Matu 6:​33) Men in ej kitibuj ad bõk juõn lemnak ejokkin wõt juõn kin men ko ilo kanniek. Jesus ear kakkõl: “Komin lale, im kejbãrok kom jen jabrewõt arõk mweiuk bwe an armij mour e jab kin an lõñ men ko an.” (Luk 12:15) Meñe ebin lo kij einwõt ro me arõk money ear kabiloik ir, jej aikwij lale bwe “lemnok ko kin lõl in, im mon kin mweiuk ko” remaroñ “koutamek nan in Anij.” (Matu 13:22) Emaroñ jab bidodo ñan kabwe aikwij ko an mour. Ilo jet jikin ko an lal, elõñ rej lemnak bwe ñan mour ilo juõn wãwen emõnlok, rej aikwij emmakit ñan juõn ailiñ emweie, bõlen ilok jen family eo air iumin jejjo yiõ ko. Emen in bwilõñ bwe jet ian armij ro an Anij rej bareinwõt lemnak ilo ejja wãwen in wõt. Ilo air ilok ñan bar juõn ailiñ, remaroñ kar lelok men ko remweie ñan family eo air. Bõtab, ta eo emaroñ walok ñan mour in jitõb eo an jitenburu ro air ilo kabijukneir? Kinke ejelok juõn bõr ilo mweo ñan tel ir ilo jimwe, enaj bwe ke men ko rej aikwiji ilo jitõb ñan lomoren ir ilo ran eo an Jehovah?

11. Ewi wãwen juõn ri jerbal jen bar juõn ailiñ ear kwalok bwe jerbal ko ñan kabuñ eo ekwojarjar elaplok aorõkiir jen men ko remweie?

¹¹ Juõn ri jerbal jen Philippines eo ear emmakit ñan bar juõn ailiñ ñan jerbal ie ear katak Bible ibben Ri Kennan ro an Jehovah ilo Japan. Elikin an katak kin eddo ko ilo Bible eo kin bõran family eo, ear kile bwe ear aikwij jeblak im jibañ ro uan family eo an bwe ren ri kabuñ ro an Jehovah. (1 Dri Korint 11:3) Lio belen ilo Philippines ear lukkun jumae tõmak eo an ekãl im kõnan bwe en wõnmanlok im jerbal im jilkinlok money eo jen an jeblak im katakin family eo an kin katak ko an ilo Bible eo. Bõtab, kin an kile ien ko rekauwatata jej bed iloan im kaorõk jitenburu ro an, ear jeblak ñan kabijuknen. Ear lo tokjen jibañ ro uan family eo an ilo yokwe im meanwõd. Tokelik, family eo an rar burueir wõt juõn ilo kabuñ eo emol, im lio belen ear jerbal full-time ilo kwalok nan.

12. Etke jej aikwij likit men ko lor jitõb mokta ilo mour eo ad?

¹² Wãwen eo ad emaroñ einlok wõt wãwen an armij ro kajjojo bed ilo juõn em ebwil. Enaj juõn bebe emeletlet ke ñan bukõt men ko mweien ilo kanniek ilo juõn em ebwil im eiten wõtlok? Jen men in, ejjab laplok ke an aorõk ñan lomoren mour ko​—ad im mour ko an family ko ad im ro jet rej jokwe ilo mweo? Eokwe, jukjuk im bed in ej jorrãnlok ilo mõkaj, mour ko ad rej bed ilo kauwatata. Ad kile men in, emol ej melelen bwe jen likit men ko ilo jitõb mokta im bõk kunad ilo jerbal in kwalok nan kin Ailiñ eo ilo kijejeto im lomoren armij.​—1 Timote 4:​16.

Ej Aikwij “Ejelok Lipjinjin” Ibbed

13. Enaj ewi wãwen eo ad ñe ran eo an Jehovah ej itok?

¹³ Ñan kalikar aorõkin kejbãrok juõn lemnak in kõttar, Peter ej ba: “Kin men in, ro jitenburu, ke komij kõtõmene kin men kein, komin kate kom bwe En lo bwe komij bed ilo ainemõn im ejelok ami lipjinjin im mãr iman mejen.” (2 Peter 3:​14, NW) Koba ibben nan in rejañ ko an ñan kõmman jerbal ko rewãnik im kwojarjar, Peter ej kalikar kin wãwen an Jehovah kaorõk kij einwõt armij ro Jesus ear karreoik ir kin bõtõktõkin. (Reveles̃õn 7:​9, 14) Men in ej aikwij bwe juõn armij en tõmak ilo katok eo an Jesus im erom ri karejar eo an Jehovah emwij wujleplok an mour im baptais.

14. Ejelok “lipjinjin” ej kitibuj ta?

¹⁴ Peter ej rejañ kij ñan kate kij bwe en ejelok “lipjinjin” ibbed. Jej kõmman ke bwe nuknuk ko ad ilo jitõb ikijen kadkadin im mwilin Christian en ejelok jabdewõt lipjinjin jen lal in? Ñe jej lo juõn lipjinjin ilo nuknuk ko ad, jej kaiur in karreoiki. Ñe elipjinjin juõn nuknuk eo elap ad kaorõke, jej lukkun kejbãrok wãwen ad karreoike. Ej wãwen dein ke ad eñjake ñe ewõr juõn lipjinjin ion nuknuk in kõkkar ko ad einwõt Christian, kinke ewõr juõn likjap ilo kadkadid ak mwilid?

15. (a) Etke Ri Israel ro rar aikwij kiji albok ko itõrerein nuknuk ko air raetok? (b) Etke ej alikar bwe ri karejar ro an Jehovah ilo ran kein reinjuõn jen ro jet?

¹⁵ Ri Israel ro rar aikwij kiji “albok ko ilo nuknuk ko.” Etke? Bwe ren kememeje kien ko an Jehovah, bokake ir, im “kwojarjar” ñan air Anij. (Bwinbwin 15:38-​40) Einwõt ri karejar ro an Jehovah ilo ran kein, jej jutak einwõt armij ro reinjuõn jen ro an lal kinke jej bokake kien ko an Anij. Ñan wanjoñok, jej kejbãrok ad erreo ilo mour, jej kokwojarjar bõktõktõk, im jej kejbãrok kij jen kabuñ ñan ekjap im men in e ko otemjej. (Jerbal 15:28, 29) Elõñ rej kautiej kij kin ad jutak bin ilo juõn bebe ñan kejbãrok kij jen jabdewõt lipjinjin.​—Jemes 1:​27.

Ej Aikwij Ejelok “Lipjinjin” Ibbed

16. Ta eo ej kitibuji an ejelok “mãr” ibbed?

¹⁶ Peter ej ba bareinwõt bwe jej aikwij kejbãrok bwe en ejelok “lipjinjin.” Ewi wãwen emaroñ eindein? Kwomaroñ karreoik juõn lipjinjin ak ejjab eindein kin juõn mãr. Mãr ej juõn men ebed iloan im elaplok an kauwatata. Ri jilek Paul ear kakkõl Ri Christian ro mõttan ilo Philippi: “Komin kõmõnmõn men otemjej kin ejelok lotan ak akwail; bwe en ejelok notami ak ami kokkure, im komin ro nejin Anij im wãppen iolapin ebeben eo e ankeke im bõt, ibeir komij walok einwõt maram ko ilo lõl.” (Dri Pilippai 2:​14, 15) Elañe jej lore nan in kakabilek eo, jejamin alñũrñũr im akwel im jenaj karejar ñan Anij kin juõn un erreo im mol. Enaj lujur kij ñan yokwe Jehovah im ro riturid ñe jej kwalok nan kin “gospel in an ailiñ” eo. (Matu 22:35-​40; 24:14) Bareinwõt, jenaj wõnmanlok im kwalok news eo emõn meñe jarlepju in armij ro rejjab lukkun melele kin unin ad mõnõnõ lelok ien ko ad ilo ejelok wõnãn ñan jibañ armij ro jet bwe ren jelã kin Anij im Nan eo an, Bible eo.

17. En kar ta unin ad jibadõk jerammõn ko ilo congregation in Christian eo?

¹⁷ Elañe jekõnan bwe ejelok “mãr” ibbed, jej aikwij etale un ko unin ad jibadõk jibadbad ko ad. Emwij ad ilok jen wãwen an lal in kõmmane men ko kin un ko rekibbon, einwõt bukõt men ko remweie ak kajur. Elañe jej jibadõk jerbal ko remõn ilo congregation in Christian eo jej aikwij lale bwe un ko unin ad jibadõki ren mol im erreo im jej aikwij kõmman bwe yokwe eo ad kin Jehovah im ro riturid en lujur kij ien otemjej. Ej juõn wãwen ekaemololo ñan lo maan ro reritto ilo jitõb jibadõk jerbal in “dri kaki elap” ilo mõnõnõ im debij juõn kõnan ñan karejar ilo ettã burueir ñan Jehovah im ri tõmak ro mõttair. (1 Timote 3:1; 2 Dri Korint 1:​24) Emol, ro rej tellokin bõk jerbal in elder rej “s̃eperd bwijin Anij . . . jab ilo makoko, a kin [air] kõnan; . . . jab kin wõnan dala, a kin [air] yokwe; im komin jab iroij ion men eo emwij likite na ibemi, a komin mõke joñok ñõn bwij eo.”​—1 Piter 5:​1-4.

Jej Aikwij bed “ilo Ainemõn”

18. Ri Kennan ro an Jehovah rej bõk juõn ãt emõn kin ta kadkad ko kadkadiir?

¹⁸ Eliktata, Peter ear jiroñ kij bwe jen bed “ilo ainemõn.” Ñan mour ekkar ñan aikwij in, jej aikwij ainemõn ibben Jehovah im ro riturid. Peter ej kalikar kin aorõkin ad “kanuij yokwe dron” im debij ainemõn eo ibben Ri Christian ro mõttad. (1 Piter 2:​17; 3:​10, 11; 4:8; 2 Piter 1:​5-7) Ñan kejbãrok ainemõn eo ad, jej aikwij yokwe don. (Jon 13:34, 35; Dri Epesõs 4:​1, 2) Yokwe im ainemõn eo ad rej alikar ñe jej bed ilo kwelok ko relap ak international convention ko. Ilo juõn kwelok elap ilo Costa Rica ilo 1999, juõn ri wia iturin airport eo ear illu kinke Ri Kennan ro an Jehovah rar bineje jikin wia eo an ilo jaje kake ke rar karuwaineneik ri lotok ro air jen ailiñ ko jet. Ilo ran eo kein karuo, ear lo wãwen air kwalok yokwe im ainemõn ke rar karuwaineneik ri lotok ro, meñe Ri Kennan rein rar jaje kajjiir. Ilo ran eo eliktata, ri wia in ear bareinwõt bõk kunan ñan karuwaineneik ri lotok ro im ear kajitõk elañe juõn Ri Kennan emaroñ katak Bible ibben.

19. Etke ej aorõk bwe jen bukõt ainemõn ibben ri tõmak ro mõttad?

¹⁹ Ilo ad bukõt ainemõn ibben ri tõmak maan im kõrã ro mõttad men in emaroñ jelet wãwen ad kõtõmene im kijoror wõt kin ran eo an Jehovah im lal eo ekãl ear kallimur kaki. (Sam 37:11; 2 Piter 3:​13) Ta elañe ejadin bin debij ainemõn ibben juõn ri tõmak eo mõttad. Jemaroñ ke ainemõn wõt ibben ilo Paradise eo? Elañe juõn ri tõmak eo mõttad ej lõkatip kin juõn men jaar kõmmane nae e, jej aikwij ‘bukõt kilen kainemõn e.’ (Matu 5:​23, 24) Ej juõn men eaorõk ñan kõmmane men in elañe jekõnan ainemõn ibben Jehovah.​—Sam 35:27; 1 Jon 4:​20.

20. “Juõn lemnak in kõttar” ej aikwij alikar ilo wãwen et ko?

²⁰ Jej “kõtõmene im lipjerjer an ran in Iroij itok” ke? Kõnan eo ad eurur ñan lo jemlokin nana otemjej enaj alikar ilo ad bedwõt ilo kwojarjar ilo lal in etton. Bareinwõt, ad kijoror kin an ran eo an Jehovah itok im ad mour iumin iroij eo an Ailiñ eo ej alikar ilo jerbal ko ad rekwojarjar. Im kõtõmene eo ad ñan mour ilo juõn lal ekãl im ainemõn enaj alikar ilo ad bukõt kilen kainemõn ri kabuñ ro mõttad kiõ. Ilo wãwen in, jej kwalok bwe ewõr “juõn lemnak in kõttar” ibbed im jej “kõtõmene im lipjerjer kin an ran in iroij eo [Jehovah] itok.”

[Kamelele ko itulal]

Kwoj Kememej Ke?

• Ta melelen “kijerjer kin an ran in Iroij eo itok”?

• Ewi wãwen an mwilid kalikar “juõn lemnak in kõttar”?

• Etke “kõmõn wãnik im kabuñ rokwojarjar” rej aorõk?

• Ta eo jej aikwij kõmmane bwe Jehovah en lo kij einwõt armij ro rej bed “ilo ainemõn im ejelok lipjinjin im mãr [ibbed] iman mejen”?

[Pija eo ilo peij 9]

“Juõn lemnak in kõttar” ej alikar ilo jerbal in kabuñ ko rekwojarjar

[Pija ko ilo peij 10]

Jerbal in kwalok nan kin Ailiñ eo ej lomoren armij

[Pija eo ilo peij 12]

Ñe jej kijoror im kõttar ran eo an Jehovah, jen bukõt ainemõn ibben ro jet