Nan eo an Jeova Ej Mour Wõt
Katak ko Relap Jen Letter ko an Jon im Jud
LETTER ko jilu an dri jilik Jon rar mõtõn buk ko eliktata ilo Jeje ko rekakõrmol kar je ilo Epesõs emaroñ ilo yiõ eo 98. Letter ko ruo mokta rej rejañ dri Kristian ro bwe ren etetal wõt ilo maram im jumae ro rar buñ jen tõmak. Ilo letter eo kein kajilu, Jon ear jab baj konono wõt kin etetal ilo mol ak ear bareinwõt rejañ dri Kristian ro bwe ren juõn wõt buru.
Ilo letter eo ear je jen Palestine emaroñ ilo yiõ eo 65, Jud leo jãtin Jisõs ear kakkõl dri Kristian ro mõtõn kin dri nana ro me rar dreloñ ilo congregation eo im ear lelok nan in tel ko kin wãwen remaroñ jumae kilan ko renana. Ar etale ennan ko ilo letter ko jilu an Jon im letter eo an Jud emaroñ jibõñ kij ñõn jutõk bin wõt ilo tõmak meñe iomin abañ ko rebin.—Hib. 4:12.
ETETAL WÕT ILO MARAM IM ILO YOKWE IM KIN TÕMAK
Jon ear je letter eo an kein kajuõn ñõn aolep ro ilo congregation eo im ej lelok nan in kakabilek ko rejejit ñõn jibõñ dri Kristian ro ñõn jumae ro rar buñ jen tõmak im jutõk bin wõt kin mol eo im kin wãnik. Ear kalikarlok aikwij eo ñõn etetal wõt ilo maram im ilo yokwe im kin tõmak.
Jon ej je: “Elañe jej etetal ilo maram, einwõt [Anij] Ej ilo maram, jej kõmao iben dron.” Im kinke Anij ej unjen yokwe, dri jilik eo ej ba: “Jen yokwe dron.” Ke “yokwe Anij” ej kamakit kij ñõn “kejbãrok kien ko An,” jej bõk anjo ion lõl ikijen “ar tõmak” ilo Jeova Anij, Nan eo an, im Nejin.—1 Jon 1:7; 4:7; 5:3, 4.
Emwij Uaki Kajitõk ko Rej Berber ion Baibel:
2:2; 4:10—Ewi wãwen Jisõs ej juõn “ken mirik”? Jisõs ear lelok mour eo an einwõt juõn ken mirik ilo wãwen eo bwe ej kõmõn men in ñõn kajejit menin aikwij eo kin ekajet jime. Ikijen menin katok in, Anij ear maroñ kwalok an tiriamokake im emaroñ jolok jerawiwi ko an ro rej jerbale air tõmak ilo Jisõs.—Jon 3:16; Rom. 6:23.
2:7, 8—Ta kien eo “eto” im “ekãl” Jon ej konono kake? Jon ej konono kin kien eo ikijen yokwe eo ej karmijete kõnan ko an mõke kin ro jeer im jãter. (Jon 13:34) Ear ba bwe ej kien “eto” kinke Jisõs ear lelok 60 yiõ ko moktalok jen an kar Jon je letter eo an moktata. Inem, dri tõmak ro rar bõk kien in “jen jinoin” mour ko air einwõt dri Kristian ro. Ej bareinwõt kien “ekãl” kinke elaplok jen ‘an juõn yokwe dri turin einwõt e mõke’ im ej kitibuj yokwe eo ej karmijete kõnan ko an mõke.—Liv. 19:18; Jon 15:12, 13.
3:2—Ta eo “e jañin bolel an walok” ñõn dri Kristian dri kabit ro, im wõn eo renaj lo “E wõt E”? Men eo ejañin alikar ñõn ir ej wãwen mour eo air ñe renaj jerkakbiji ñõn lõñ kin enbwinin jitõb. (Pil. 3:20, 21) Bõtab men eo rej jela ej bwe “elañe [Anij] E naj weaktok, [renaj] einwõt E, bwe [renaj] lo E wõt E” melelen “Jitõb eo.”—2 Kor. 3:17, 18.
5:5-8—Ewi wãwen dren, bõtõktõk, im jitõb rar kennan bwe “Jisõs e Nejin Anij”? Dren ear kennan kinke ke Jisõs ear baptais ilo dren, Jeova mõke ear kwalok an buñburuen kin e einwõt Nejin. (Mat. 3:17) Bõtõktõkin ak mour eo an Jisõs, kar lelok einwõt “binmour ñõn armij otemjej,” ear bareinwõt kwalok bwe Jisõs ej Nejin Anij. (1 Tim. 2:5, 6) Im jitõb kwojarjar ear kamol bwe Jisõs ej Nejin Anij ke ear wõnlõltak ion ilo ien eo ear baptais, im kamaroñ e bwe en “etetal im kõmõnmõn emõn, im kemour r’otemjej devil e ar kebioup ir.”—Jon 1:29-34; Jerb. 10:38.
Tokjen Katak ko ñõn Kij:
2:9-11; 3:15. Elañe juõn dri Kristian ej kõtlok bwe jabrewõt men ak armij ren kokkure yokwe eo an ñõn eo jein im jãtin, ej etetal ilo marok ilo an jab jela ia eo ej etal ielok.
‘ETETAL WÕT ILO MOL EO’
Jon ej kebellok letter eo an kein ka ruo ilo an ba: “Ña elder ñõn lio emwij kãlete, im ñõn ro nejin.” Ej kwalok an lõñliñ ke ej lo “jet ian ro [nejin lio] im rej etetal ilo mol.”—2 Jon 1, 4.
Elikin an lelok nan in rejañ ñõn kadrek yokwe, Jon ej je: “Eñin yokwe bwe jen etetal ekar ñõn kien eo An.” Jon ear bar kakkõl kin “dri kejebwãbwe im dri jumae Kraist.”—2 Jon 5-7.
Emwij Uaki Kajitõk ko Rej Berber ion Baibel:
1, 13—Wõn “lio emwij kãlete”? Jon emaroñ kar konono kin juõn kõra etan Kyria, melelen “kõra” ilo kajin Grik. Ak emaroñ kajerbal juõn nan in kõkkar ñõn konono ñõn congregation eo bwe en kabwok dri jumae ro. Elañe eindrein, ajiri ro nejin enaj kar ro uan congregation im ‘ro nejin lio jein im jãten’ enaj kar ro uan bar juõn congregation.
7—Ta “itok” eo an Jisõs me Jon ej konono kake ilo eon in, im ewi wãwen dri kejebwãbwe ro “re jab kwalok” kake? “Itok” eo ejjab konono kin ien eo Jisõs enaj kar itok me mej otemjej reban loe. Jen an eindrein, ej konono kin itok eo an ilo kõniek im ien eo kar kabite einwõt Kraist. (1 Jon 4:2) Dri kejebwãbwe ro rejjab kwalok itok eo an ilo kõniek. Bwelen rej karmijete bwe Jisõs ear jab mour ak rej kejekron bwe e eo emwij kabiti kin jitõb kwojarjar.
Tokjen Katak ko ñõn Kij:
2, 4. Ar jela “mol” eo, melelen aolep katak ko an Kristian ilo Baibel eo, im edrep ñõn men kein, raurõk ñõn ar bõk lomor.—3 Jon 3, 4.
8-11. Elañe jejjab kõnan luji “joij, tiriamokake im ainemõn jen Anij Jemer, im jen Jisõs Kraist,” im ar kõmao iben dri tõmak ro mõtar rej yokwe, jej aikwij “lale” kij mõke ilo jitõb im karmijete ro rejjab “berwõt ilo katak an Kraist.”—2 Jon 3.
JEN EROM “DRI JERBAL IBEIR ÑÕN MOL”
Letter eo an Jon kein kajilu ej konono ñõn Geiõs leo jeran. Ear jeje, “Ejelok lõñliñ iba elap jen in, bwe in roñ kin an ro nejiõ etetal ilo mol.”—3 Jon 4.
Jon ear nebar Geiõs kin “kõmõn jerbal etiljek” ilo an jibõñ ro rej lolok congregation eo. Dri jilik eo ej ba: “Emõn jen jibõñ ro rej eirwõt, bwe jen dri jerbal ibeir ñõn mol.”—3 Jon 5-8.
Emwij Uaki Kajitõk ko Rej Berber ion Baibel:
11—Etke jet rej bõk kunair ilo mwil ko renana? Kin air mõjino ilo jitõb, jet rejjab lo Anij kin mejen burueir. Kinke rejjab maroñ lo kin lukkun mejeir, rej kõmõne men ko einwõt ñe ejjab lo ir.—Ezek. 9:9.
14—Wõn ro kar jitõñlok ñõn ir einwõt “ro jerar”? Nan in “ro jerar” ilo eon in ej kitibuj elaplok jen ro jej ebake ir im mõnõnõ in iiaio ibeir. Jon ej kajerbal men in ñõn jitõñlok ñõn aolep dri tõmak ro mõtar.
Tokjen Katak ko ñõn Kij:
4. Ro reridto ilo jitõb ilo congregation eo rej lo elap lõñliñ ñe rej lo an jodrikdrik ro “etetal ilo mol.” Im jeban keiri lõñliñ eo ro jemen im jinen rej loe ñe rej lo tõbrõk ilo air jibõñ ro nejiir ñõn korijer ñõn Jeova!
5-8. Ibwiljin ro rej kate ir ñõn jibõñ ro jeir im jãtir kin air yokwe ir im yokwe Jeova, rej dri lotok ro, missionary ro, ro rej jerbal ilo Bethel im ro rej pioneer. Ej tellokin bwe jen anõk tõmak ko air im rejetak ir.
9-12. Jen anõke wanjoñok eo etiljek an Demitriõs im jab Diotrepis, eo ear juõn dri ruruwe.
“BER WÕT ILO YOKWE EO AN ANIJ”
(Jud 1–25)
Jud ej kwalok kin ro rej kajebwãbweik congregation eo einwõt “dri lotan, im dri wanõketak, rej etetal ekar ñõn mõm ko air renana.” Rej “ba nan ko re burollap, im rej kaljiklok armij rõn kin wõnan.”—Jud 4, 16.
Ewi wãwen dri Kristian ro rej jumae men ko renana? Jud ej je: “Ro jera, komin kememej men eo emwij an ri jilõk ro an ad Iroij Jesus Christ kar jiroñ kom kake ilo ien ko remotlok.” Ej bareinwõt ba: “Bed wõt ilo yokwe eo an Anij.”—Jud 17-21, UBS.
Emwij Uaki Kajitõk ko Rej Berber ion Baibel:
3, 4—Etke Jud ear rejañ dri Kristian ro bwe ren “kate [ir] kin tõmak”? Kinke ‘jet armij r’ar dreloñtok ilo etino iloan congregation eo.’ Armij rein ‘rej ukot joij an Anij ñõn ejej.’
20, 21, UBS—Ewi wãwen jemaroñ “bed wõt ilo yokwe eo an Anij”? Jemaroñ kõmõn men in ilo jilu wãwen ko: (1) ikijen ar kalek kij mõke “kin tõmak eo [ar] eo ekanuij kwojarjar” ilo ar niknik katak Nan in Anij im kijejeto ilo ar bõk kunar ilo jerbal in kwalok nan, (2) ikijen ar jar kin “Jitõb Kwojarjar,” ak kõtlok bwe en tel kij; im (3) ikijen ar tõmak ilo men eo ej kõmõn bwe jen maroñ mour in drio, katok in binmour eo an Jisõs Kraist.—Jon 3:16, 36.
Tokjen Katak ko ñõn Kij:
5-7. Ro renana remaroñ ke deor jen ran in ekajet eo an Jeova? Ekkar ñõn wanjoñok in kakkõl ko jilu Jud ear kõlajraki, rejjab maroñ.
8-10. Jej aikwij lor joñok eo an arkenjel eo Maikeel im kwalok koutiej ñõn ro Jeova ear lelok maroñ ñõn ir.
12. Dri buñ jen tõmak ro retao rej kauwatata ñõn tõmak eo ar einwõt an wõd ko renojak iomin dren kauwatata ñõn wa ko ilojet im ro rej aõ. Dri kaki ro rewan remaroñ einwõt ñe rejoij, ak rej einwõt kõro ko im ejelok dren iloir kinke rejjab katakin kin mol eo. Rein rej einwõt wijki ko remij im ejelok leir ilo ien rak. Renaj joko einwõt wijki ko emwij kõtepi jen okrair. Ej menin meletlet bwe jen kejbãrok jen ro rar buñ jen tõmak im ilok jen Anij.
22, 23. Dri Kristian ro rej drike men eo enana. Ilo air kate ir ñõn lomoren “ro rej berre” jen kijeek in kokkure eo ej ñõn in drio, ro reridto ilo jitõb ilo congregation eo, elaptata elder ro rej jibõñ ir ilo jitõb.
[Pija ko ilo peij 28]
Dren, bõtõktõk, im jitõb rar kennan bwe “Jisõs e Nejin Anij”