Ejaake Bokake Ke Ien Jemlokin Ej Ebaktok

“Ñõn ien [Shiloh] ej itok; im armij rõn re naj bokake.”​—JENESIS 49:10.

1. (a) Ilo ien ko remotlok, ta eo ekkã melelen ñan bokake Jehovah? (b) Ta kanan eo kin bokake Jacob ear kõmmane?

BOKAKE Jehovah kar melelen bokake ro rej jutak ikijen. Rein ear koba enjel ro, ri patriarch ro, ri ekajet ro, priest ro, ri kanan ro, im king ro. Meñe throne eo an king ro an Israel kar naetan throne an Jehovah. (1 Kronikel 29:23) A ekaburomõjmõj, bwe elõñ ian iroij ro an Israel rar jab bokake Anij, im bõktok jorrãn ioir make im armij ro air. Ak Jehovah ear jab ellok jen ro rar tiljek ñan e im ear jab ejelok air kejatdikdik; ear kainemõn ir kin juõn kallimur ñan kajutak juõn king eo ejjab nana, eo ro rewãnik renaj mõnõnõ in bokake. (Aiseia 9:​6, 7) Ri patriarch eo Jacob eo ear ebak an mij ear kanan kin iroij in an ran ko rej itok, ke ej ba: “Septer e jamin ilok jen Juda, ak jokwõnõn iroij jen ikõtan neen, ñõn ien Shailo ej itok; im armij rõn re naj bokake.”​—Jenesis 49:10.

2. Ta eo ej melelen “Shiloh,” im ta eo ilo an iroij enaj bõke?

² “Shiloh” ej juõn kajin Hebrew melelen “E Eo ej An.” Aet, Shiloh enaj kar jolete likieo in jimwe eo ñan jerbal in iroij, einwõt an alikar ilo nan in septer, im kajur eo ñan maroñ in konono einwõt eo ej jutak ilo etan im ej tel ro rej jerbal iumin tel eo an. Bareinwõt, iroij eo an etiljek enaj kobaik, ejjab ro wõt bwijjin Jacob, ak aolep “armij ro.” Menin ej errã ibben kallimur eo an Jehovah ñan Abraham: “Im ineõm e naj bõk kejem an ro rej kijrãte. Im ilo ineõm dri ailiñ otemjej i lõl re naj jerammõn.” (Jenesis 22:17, 18) Jehovah ear kamol “ine” in ilo 29 C.E. ke ear kabit Jesus Ri Nazareth kin jitõb kwojarjar.​—Luk 3:​21-​23, 34; Dri Galetia 3:​16.

Ailiñ eo Jinointata An Jesus

3. Ta jerbal in iroij eo Jesus ear bõke ke ear wanliñlok ñan lañ?

³ Ke Jesus ear wanliñlok ñan lañ, ear jab mõkaj im jino an iroij ion armij ro ilo lal. (Sam 110:1) Bõtab, ear bõk juõn “ailiñ” eo armij ro ie rar bokake. Ri jilek Paul ear kile ailiñ in ke ear je: “Im E ar [Anij] kõtlok kij [Christian ri kabit ro ilo jitõb] jen kajur in marok, im bõklok kij ñõn loan ailiñ eo an Nejin jitenburu iben.” (Dri Kolosse 1:​13) Kõtlok in ear ijjino ilo Pentecost 33 C.E. ke jitõb kwojarjar ear lutõklok ion ri kalor ro retiljek an Jesus.​—Jerbal 2:1-4; 1 Piter 2:9.

4. Ilo wãwen et ko ri kalor ro jinoin an Jesus rar kalikar air bokake, im ewi wãwen an Jesus kar kile ir einwõt juõn kumi?

⁴ Einwõt “dri keañ kin Kraist,” ri kalor ri kabit ro ilo jitõb rar bokake im aintok ro jet ro renaj erom “jimdron” ilo ailiñ eo ilo jitõb. (2 Dri Korint 5:​20; Dri Epesõs 2:​19; Jerbal 1:8) Bareinwõt, rein rar aikwij bed wõt im “ejelok jibil iolapemi; a bwe komin jimor wãppenlok ilo juõn lemnok im juõn bebe” ñan lañliñ kin melim eo an King eo air Jesus Christ. (1 Dri Korint 1:​10) Einwõt juõn dolul, rar ejaake juõn “ri karejar etiljek im meletlet,” ak juõn class in ri karejar etiljek.​—Matu 24:45; Luk 12:42.

Jerammõn kin Bokake “Ri Karejar” eo An Anij

5. Jen ien ko etto, ewi wãwen an Jehovah kar katakin armij ro an?

⁵ Jehovah ien otemjej ear lelok ri kaki ro ñan armij ro an. Ñan wanjoñok, elikin an Ri Jew ro jeblak jen Babylon, Ezra im maan ro jet tellokiir rar jab baj konono wõt Kien eo an Anij ñan armij ro, a rar kamelele tibdikin ilo “alikar” kien eo, ‘likit melelen na ie im lelok melele eo kin Nan in Anij.​—Nihimaia 8:⁠8.

6, 7. Ewi wãwen an kumi in ri kamakoko eo letok ilo jejjet in ien mõñã ko ilo jitõb ikijen Governing Body eo an, im etke lelok kij ñan kumi in ejimwe?

⁶ Ilo buki yiõ ko jinoin jen ien eo Christ ear lotak, ke menin konono eo kin mwijmwij ear jarjar ilo 49 C.E., governing body eo an class in ri karejar eo jinoin ear jar kin ialin tel im ear tõbar juõn jemlok eo ear bedbed ion im errã ibben Jeje ko. Ke rar kejelã kin bebe eo air ilo letter, congregation ko rar bokake ialin tel eo kar lelok im rar lañliñ kin jerammõn eo elap an Anij. (Jerbal 15:​6-​15, 22-​29; 16:​4, 5) Eindeinlok ilo ran kein, ri karejar eo etiljek ikijen Governing Body eo an ear kamelele im kalikarlok aorõkin menin konono rot in einwõt Christian neutrality (jab bõk kunan ilo jabdewõt wãwen ñe ej wõr idaptõk nae kien ko an Anij), kokwojarjar bõtõktõk, im kajerbal unokan kadõk ak jikka. (Aiseia 2:4; Jerbal 21:25; 2 Dri Korint 7:1) Jehovah ej kajerammõn armij ro an kin air bokake Nan eo an im ri karejar eo etiljek.

⁷ Ilo air lelok ir ñan class in ri karejar eo, armij ro an Anij rej bareinwõt kwalok air kõttãik ir ñan Master eo, Jesus Christ. Kõttã rot in elaplok aorõkin ilo ran kein kin wõt maroñ eo an Jesus emwij an laplok, einwõt an kar Jacob kanan kake ilo bed eo an ke ej bojak in mij.

Shiloh Ej Erom Iroij eo Ewõr An Jimwe ilo Lal

8. Ewi wãwen im ñããt eo maroñ eo an Christ kar erakelok?

⁸ Kanan eo an Jacob ear kanan bwe Shiloh enaj kaiñ “armij ro rej bokake.” Alikar, iroij eo an Christ enaj ellãlok jen Israel eo ilo jitõb. Ta eo enaj kitibuj? Reveles̃õn 11:15 ej uak: “Ailiñ an lõl emwij an erom ailiñ an am Iroij, im an Kraist eo An, im E naj kiñ in drio im in drio.” Bible ej kalikar bwe Jesus ear bõk maroñ in ilo jemlokin kanan eo kin “jiljilimjuõn ien ko”​—“ien ko an dri ailiñ ko”​—ilo 1914.a (Daniel 4:​16, 17, NW; Luk 21:24) Ilo yiõ in, “bed” eo an Christ jejjab lo kin mejed einwõt King Messiah ear ijjino, einwõt kar ien eo an ñan an “iroij ilo bwiljin ro [an] dri kijirãt.”​—Matu 24:3; Sam 110:2.

9. Ta eo Jesus ear kõmmane ke ear bõk Ailiñ eo an, im ta eo ear jelet armij ilo an jab kajju, elaptata ñan ri kalor ro an?

⁹ Men eo moktata Jesus ear kõmmane elikin an bõk kajur eo an king kar jolok armij eo elaplok jelã kake jen jabdewõt armij kin jab bokake eo an​—Satan​—kar jolok e “ñan lal” koba enjel ro an na ibben. Jen ien eo, jitõb rein renana rar kõmman jorrãn ko rej jelet armij im ejañin kar wõr einwõt mokta, ijellokin rej kõmmane juõn mejatoto eo ej kõmman bwe bokake Jehovah en juõn men eo ekanuij in bin. (Reveles̃õn 12:​7-​12; 2 Timote 3:​1-5) Ilo mol, kajjeroro eo elaptata ilo tarinae eo an Satan ilo jitõb ekitibuj ri kabit ro an Jehovah, “ro rej kejbãrok kien ko an Anij, im kennan an Jisõs ibeir,” im “sheep ro jet” rejetair.​—Reveles̃õn 12:17; John 10:⁠16, NW.

10. An jejjet kitien kanan ko ilo Bible ta eo menin ej kamole kin likjap in tarinae eo an Satan nae Christian ro remol?

¹⁰ Bõtab, enaj likjap kõtõbar in an Satan, kinke eñin “ran eo ran in Iroij,” im ejelok jabdewõt men emaroñ kabõjrak Jesus jen an ‘kadedelok an bõk anjo.’ (Reveles̃õn 1:​10; 6:​2) Ñan wanjoñok, e naj kõtõbrak seal eo eliktata an 144,000 Ri Israel ro ilo jitõb. E naj bareinwõt kejbãrok “juõn jar elap, eo ejelok armij ej maroñ in bwinir, jen ailiñ otemjej, im ian bwij otemjej, im driloabjen otemjej, im konono otemjej.” (Reveles̃õn 7:​1-4, 9, 14-​16) Bõtab, ilo air jab einwõt ri kabit ro rejetair, rein renaj oktak im armij in lal ro an Jesus rej bokake. (Daniel 7:​13, 14, NW) Bed eo air ion lal rainin ededelok an letok menin kamol eo ealikar loe kin Shiloh bwe emol ej Iroij in “ailiñ an lõl.”​—Reveles̃õn 11:15.

Eien Kiõ ñan “Bokake News eo Emõn”

11, 12. (a) Wõn ro wõt renaj ellã im mour ilo jemlokin jukjuk im bed in? (b) Ta kadkad ko rej ejaak ibben ro rej bõk “jitibõn lal in”?

¹¹ Ro otemjej rej kõnan mour indio rej aikwij katak bokake, bwe ealikar ilo an Bible eo ba bwe “ro rejjab jelã Anij im ro rejjab bokake news eo emõn kin ad Iroij Jesus” rejamin ellã jen ran in idenwõne eo an Anij. (2 Thessalonians 1:​8, NW) Bõtab, jukjuk im bed in enana ilo tõre in im jitõb in jumae eo an nae kien ko im nan in kaiñi ko ilo Bible ej kõmman bwe en bin ad bokake news eo emõn.

¹² Bible ej kwalok kin jitõb in jumae Anij in einwõt “jitõb õn lõl.” (1 Dri Korint 2:​12) Ilo an kameleleik kin an jelet armij, ri jilek Paul ear jeje ñan Christian ro ilo Ephesus ilo ebeben eo kein kajuõn, im ba: “Ilo ir kom kin etetal ilo ien eo lok lor ial in lõl in, lor iroij in kajur ko in mejatoto, jitõb eo ej jerbal ilo ro dri kiblia. Ibeir bareinwõt kij otemjej kin ber im mour ilo mõm ko an kõniek, im kajejit kõnan in kõniek im lemnok ko, im kij kin biktoker ro nejin illu, einwõt ro jet.”​—Dri Epesõs 2:​2, 3.

13. Ewi wãwen an Christian ro maroñ jumae “jitibõn lal in”, im kin ta tokjen ko remõn rej walok?

¹³ Ekamõnõnõ, bwe Christian ro ilo Ephesus rar jab bed wõt im kamakoko ñan jitõb in jab bokake in. Ak, rar oktak im ajiri ro rej bokake nejin Anij ilo air lelok ir ñan jitõb eo an im jeor ine eo an elap im ekouwa. (Dri Galetia 5:​22, 23) Eindein rainin, jitõb eo an Anij​—kajur eo elaptata ijoko otemjelok​—ej jibañ million armij ñan air oktak im bokake Jehovah, kin tokjen eo bwe emaroñ wõr ibbeir “obrõk in kejatrikrik, aet ñõn jemlokõn.”​—Dri Hibru 6:​11; Zechariah 4:​6, NW.

14. Ewi wãwen an Jesus kar kakkõl aolep Christian ro rej mour ilo ran ko eliktata kin men ko renaj melejoñe bokake eo air?

¹⁴ Bareinwõt, kememej, bwe ewõr ibbed jutaklik eo ekajur an Shiloh, kobalok ibben Jemen im rejamin kõtlok bwe ejelok ri kijirãt​—dimon ak armij⁠—en melejoñe bokake eo ad ellãlok jen joñan ad maroñe. (1 Dri Korint 10:13) Ilo mol, ñan jibañ kij ilo tarinae eo ad ejjab ilo kanniek nae jitõbõn lal in, Jesus ear kwalok oran abañ ko jenaj jelmaiki ilo ran kein eliktata. Ear kõmman eindein ikijen jiljilimjuõn letter ko, ear lilok ilo juõn vision ñan ri jilek John. (Reveles̃õn 1:​10, 11) Ñan lukkun jelã kaki, ebed ie nan in kakabilek eo elap tokjen ñan Christian ro ilo ien eo, ak jerbal eo air elaptata ej ñan “ran eo ran in Iroij,” jen 1914. Kin menin, ejejjet im jimwe, bwe jen lale ennan kein!b

Bõprae an Ejelok Itoklimo, Mour Etton, Arõk Mweiuk

15. Etke jej aikwij kejbãrok nae abañ eo ear jelet congregation eo ilo Ephesus, im ewi wãwen ad maroñ kõmmane menin? (2 Piter 1:​5-​8)

¹⁵ Letter eo moktata an Jesus ñan congregation eo ilo Ephesus. Elikin an nebar congregation eo kin kijenmij eo an, Jesus ear ba: “A men in iba ej notam, bwe kw’ar illok jen am yokwe mokta.” (Reveles̃õn 2:​1-4) Rainin, einlok wõt bwe jet Christian juõn ien rar kijejeto rar luji yokwe eo ear wõr ibbeir mokta im ear kajur ñan Anij. Juõn luuj eo einwõt in emaroñ kamõjnoiklok kõtan eo an juõn ibben Anij im ej aikwij mõkaj im wõr konono kake. Kain yokwe rot in ewi wãwen an maroñ bar bõk kakajur? Ikijen ekkeini katak Bible, bed ilo kwelok ko, jar, im kalmenlokjen. (1 Jon 5:3) Emol, menin ej aikwij wõr “kanuij kate” ie, ak emol ewõr aorõkin. (2 Piter 1:​5-8) Elañe etale eo emol an juõn armij make ej kalikar bwe yokwe eo am emololok, inem mõkaj im kajimwe wãwen eo, ilo bokake nan in kõketak eo an Jesus: “Inem kwon kememej ijo kw’ar buñ jen e, im ukwelok ibõm, im kõmõnmõn jerbal ko mokta.”​—Reveles̃õn 2:5.

16. Ta kareelel eo ekauwatata ilo jitõb ear bed ilo congregation ko ilo Pergamum im Thyatira, im etke nan ko an Jesus ñan ir rejejjet rainin?

¹⁶ Christian ro ilo Pergamum im Thyatira kar nebar ir kin tiljek, kijenmij im kijejeto eo air. (Reveles̃õn 2:​12, 13, 18, 19) Ak, rar reel ibben jet ro rar kalikar jitõb nana eo an Balaam im Jezebel, ro kin kõmman eo air kin mour in lũñ im kabuñ ñan Baal ear einwõt kareelel nana ilo Israel eo etto. (Bwinbwin 31:16; 1 Kiñ Ro 16:30, 31; Reveles̃õn 2:​14, 16, 20-​23) Ak ta kin ien kein ad​—“ran eo ran in Iroij”? Ejja kain kareelel ko wõt renana rej alikar ke? Aet, bwe mour etton ej men eo ej kõmman an wõr bukwelok ibwiljin armij ro an Anij. Kin menin, elap tokjen, bwe jen bõprae ad kobalok ibben aolep kajjojo armij ro​—iloan im ilikin congregation eo​—ro rej einwõt juõn kareelel enana in mour etton! (1 Dri Korint 5:​9-​11; 15:33) Ro rekõnan bwe ren armij ro rej bokake an Shiloh renaj bareinwõt kejbãrok ir jen air etal ilo menin kamõnõnõ ko rejjab ekkar ñan kien ko reutiej kin mour erreo bareinwõt pija in kelwan ilo pija im ilo Internet.​—Amos 5:​15, NW; Matu 5:​28, 29.

17. Ewi wãwen kar eñjake im lemnak eo an ro ilo Sardis im Laodicea ñe keidi ibben lemnak eo an Jesus kin wãwen eo rar bed ie ilo jitõb?

¹⁷ Ijellokin wõt jejjo armij ro, congregation eo ilo Sardis ear jab bõk nebar ñan jidik. Ear “buñbuñ,” etan ak baotokin, bwe ej mour, ak ear ejelok an itoklimo ilo men ko ilo jitõb im menin ñan Jesus kar “mij.” Bokake news eo emõn ear einwõt juõn men bajjek wõt. Juõn menin naruõn! (Reveles̃õn 3:​1-3) Congregation eo ilo Laodicea ear bed ilo juõn wãwen eo einlok wõt. Ear kemjãje kin mweie kin mweiuk, ke ej ba, “Ij mweie,” ak ñan Christ ear “nanatõmmõm im dri ememlokjen, im jeramel, im bilo im kelwan.”​—Reveles̃õn 3:​14-​17.

18. Ewi wãwen an juõn maroñ bõprae an oktak im mõjno ilo jitõb ilo mejen Anij?

¹⁸ Rainin, jet Christian ro rar tiljek ilo juõn ien emwij air bareinwõt wõtlok ñan loan ejja joñok eo wõt in jab bokake. Bõlen rar kõtlok bwe jitõb in lalin en kamõjnoiklok eñjake in ekaiuriur ilo mour ko air, im kin menin ejaake juõn eñjake in lemnak eo emõjno ilo jitõb kin katak Bible, jar, kwelok ko an Christian, im jerbal in kwalok nan. (2 Piter 3:​3, 4, 11, 12) Elap tokjen bwe kain armij rot in en bokake Christ ikijen an kajerbal tokjen ko remõn ñan ran ko rej itok mweie ko ilo jitõb​—aet, “wia iba [Kraist] gold emwij karreoik e ilo kijeek”! (Reveles̃õn 3:​18) Kain mweie rot in emol ekoba ‘mweie ilo jerbal ko remõn, anemkwoj, bojak ñan bõk kunan.’ Ad wia mweied ilo mweiuk kein emol air aorõk ilo jitõb, jej ‘kaorõk ñan kij make ilo ejelok uõta juõn bedbed eo emõn ñan ran ko rej itok, bwe jen bõk juõn debdeb eo emejojo ion mour eo emol.’​—1 Timote 6:​17-​19.

Nebar kin Bokake eo Air

19. Ta nan in nebar im kõketak ko Jesus ear lelok ñan Christian ro ilo Smyrna im Philadelphia?

¹⁹ Congregation ko ilo Smyrna im Philadelphia ear emõn air jenolok einwõt wanjoñok ko ilo bokake, bwe ilo letter eo an Jesus ñan ir ear ejelok nan in kauwe ie. Ñan ro ilo Smyrna, ear ba: “I jela am jorran im jeramel​—a kwoj mweie.” (Reveles̃õn 2:9) Juõn oktak eo einjuõn ñe keidi ñan ro ilo Laodicea, ro rar kemjãje kin mweie in lalin ak ilo mol rar jeramel! Bwebõta, Devil eo ear jab mõnõnõ in lo an jabdewõt kwalok air tiljek im bokake Christ. Kin menin, Jesus ear kakkõl: “Kwon jab lelñoñ kin men ko kwo naj iñtan kaki: lo, devil e naj jolok jet iami na iloan prisõn bwe en melejoñ kom, im jorran e naj ibemi iomin joñoul ran. Kwon tiljek ñõn mij im I naj lewoj ñõn kwe belin eo belin mour.” (Reveles̃õn 2:​10) Eindeinlok, Jesus ear nebar ro ilo Philadelphia, im ba: “Kwar kejbãrok nan eo aõ [ak, bokake iõ] im kwar kamol am jab likjap ñan ãt eo eta. Ij iwij mõkaj. Kwon drebij wõt men eo ibõm bwe ejelok en maroñ bõk crown eo am.”​—Reveles̃õn 3:​8, 11.

20. Ewi wãwen million armij ro rainin rar kejbãrok nan eo an Jesus, jekdon ta wãwen ko?

²⁰ Ilo ran eo “ran in Iroij,” jino ilo 1914, juõn bwen ri karejar eo etiljek im sheep ro mõttair, kiõ orair ej million, rar bareinwõt kejbãrok nan eo an Jesus ilo air kijejeto im bõk kunair ilo jerbal in kwalok nan eo im ilo air debij wõt tiljek eo air. Einwõt ro jeiir im jatiir ilo (100 yiõ ko jinoin jen ien eo Jesus ear lotak) rar bõk eñtan kin bokake eo air ñan Christ, meñe kar jolok ir ñan loan prison ko im camp in kalbuj ko. Ro jet rar kejbãrok wõt nan eo an Jesus ilo air debij wõt juõn ‘mej elamwan,’ meñe mweie im kõnan eo etarjen joñan ñan mweie ear bed ibelakiir. (Matu 6:​22, 23) Aet, ilo jabdewõt belak ko im ilo jabdewõt wãwen, Christian ro remol, ikijen bokake eo air, rej etal wõt im kalañliñ buruen Jehovah.​—Jabõn Kennan Ko 27:11.

21. (a) Ta eddo eo ilo jitõb kumi in ri kamakoko eo enaj etal wõt im kajejjet kitien? (b) Ewi wãwen ad maroñ kwalok bwe emol ad kõnan bokake Shiloh?

²¹ Ke jej ebaklok eñtan eo elap, “dri korijer e tiljek im meletlet” ej bed wõt ilo an jab ebbururu ilo bokake eo an ñan Master eo, Christ. Menin ekitibuj keboj ilo jejjet in ien mõñã eo ilo jitõb ñan ro ilo mweo imõn Anij. Inem jen etal wõt im kwalok ad kamolol kin theocratic dolul eo emõn an Jehovah im kin men eo ej letok ñan kij. Ilo wãwen in, jej kalikar ad lelok kij ñan Shiloh, eo enaj lelok jinekjej ñan armij ro an otemjej rej bokake kin mour indio.​—Matu 24:45-​47; 25:40; Jon 5:​22-​24.

[Kamelele ko itulal]

Kwoj Kememej Ke?

• Ta jerbal eo Jesus ear kõmmane einwõt kar kanan kake ilo kanan eo ilo jikin babu in mij eo an Jacob?

• Ewi wãwen ad kamol kin Jesus einwõt Shiloh, im ta jitõb eo jej aikwij bõprae?

• Ta nan in kakabilek eo ej jerbal ñan ran kein ad ebed ilo letter ko ñan jiljilimjuõn congregation ko ilo Revelation?

• Ilo wãwen et ko jemaroñ kajeoñe ro ilo congregation ko ilo Smyrna im Philadelphia ko etto?

[Pija ko ilo peij 26]

Jehovah ej kajerammõn armij ro an kin bokake eo air ñan “ri karejar” eo etiljek

[Pija eo ilo peij 27]

Kareelel eo an Satan ej kõmman an bin ñan bokake Anij

[Pija ko ilo peij 29]

Juõn kõtan jimjera eo ekajur ibben Anij ej jibañ kij ñan bokake e