Ta Eo Jehovah Ej Kajitõk Bwe Jen Kõmmane Rainin
“Ainiken jen kõro eo, e ba, E in Nejiõ jitenburu iba, I buñburuõ kake; komin eoroñ E.”—MATU 17:5.
1. Ñããt eo Kien eo ear kajejjet karõk eo an?
JEHOVAH ear lelok Kien eo ñan ailiñ in Israel, kin elõñ wãwen ko ie. Ikijir, ri jilek Paul ear je: “Rej men in kaiñi ekar ñõn kõniek, men ko emwij likiti ñõn ter eo ien kõkal.” (Dri Hibru 9:10) Ke Kien eo ear tel juõn bwe in Ri Israel ro ñan bõk Jesus einwõt Messiah eo, ak Christ, men in ear kajejjet karõk eo an. Kin men in, Paul ear keañ: “Bwe Kraist e jemlokõn kien.”—Dri Rom 10:4; Dri Galetia 3:19-25; 4:4, 5.
2. Wõn ro rar bed iumin Kien eo, im ñããt eo kar kõtlok ir jen e?
2 Ej melelen ke bwe jejjab bed iumin Kien eo rainin? Ilo mol, jarlepju in armij ro rar jab bed iumin Kien eo, einwõt ri jeje psalm ear kamelele: “Ej [Jehovah] kwalok An in nan ñõn Jekõb, kien ko An im ekajet ko An ñõn Israel, E ar jab kõmõn einwõt ñõn jabrewõt ailiñ; im ekajet ko An r’ar jab jelakajeir.” (Sam 147:19, 20) Ke Anij ear kajutak bujen eo ekãl ion bedbed in katok eo an Jesus, ailiñ Israel make ear jab aikwij lor Kien eo. (Dri Galetia 3:13; Dri Epesõs 2:15; Dri Kolosse 2:13, 14, 16) Inem, elañe jejjab bed iumin Kien eo, ta eo Jehovah ekõnan bwe ro rekõnan karejar ñan e rainin ren kõmmane?
Ta eo Jehovah Ej Kajitõk
3, 4. (a) Ta eo Jehovah ekõnan bwe jen kõmmane rainin? (b) Etke jej aikwij lor buñten nee ko neen Jesus?
3 Ilo yiõ eo eliktata in jerbal in kwalok nan eo an Jesus, ri jilek Peter, James, im John rar etal ibben ñan juõn tol eutiej, bõlen ilo juõn jikin ettã lok ilo Tol Hermon. Ijo rar lo juõn vision kin Jesus ilo aibujuij eo an im rar roñ ainikien Anij ej keañ: “E in Nejiõ jitenburu iba, I buñburuõ kake; komin eoroñ E.” (Matu 17:1-5) Eñin men eo Jehovah ej kajitõkin kij bwe jen kõmmane—ñan ad bokake Nejin im ñan lor joñok im katak ko an. (Matu 16:24) Kin men in, ri jilek Peter ear je: “Kraist e ar iñtan kin kom, im likit joñok ñõn kom, bwe komin anõke jenkwõn ne ko neen.”—1 Piter 2:21.
4 Etke jej aikwij lor jenkwon nee ko neen Jesus? Kinke ilo ad kajeoñe e, jej kajeoñe Jehovah Anij. Elap an Jesus jelã kajjen Jemen, kin an kar bed ibben iumin elõñ billion yiõ ko ilañ mokta jen an kar itok ñan lal. (Jabõn Kennan Ko 8:22-31; Jon 8:23; 17:5; Dri Kolosse 1:15-17) Ke ear bed ion lal, Jesus ear binej jenkwon Jemen ilo tiljek. Ear kamelele: “Einwõt Jema e ar katakin Iõ, men kein Ij konono.” Ilo mol, joñan an jejjet an Jesus kajeoñe Jehovah ear maroñ ba: “Eo e ar lo Ña, e ar lo Jema.”—Jon 8:28; 14:9.
5. Christian ro rej bed iumin kien et eo, im ñããt eo kien eo ear jino jerbal?
5 Ta eo ej koba ilo ad bokake Jesus im kajeoñe e? Ej melelen ke bwe jej aikwij bed iumin juõn kien? Paul ear je: “I jab iomin kien.” Ear konono kin “kalimur eo mokta,” bujen Kien eo kar kõmmane ibben ri Israel ro. Paul ear kamol bwe ear bed “iomin kien Kraist.” (1 Dri Korint 9:20, 21; 2 Dri Korint 3:14) Ke ear jemlok bujen Kien eo, juõn “bujen ekãl” ear jino jerbal ekoba “kien Kraist” me ri karejar otemjej an Jehovah rainin rej aikwij bokake.—Luk 22:20; Dri Galetia 6:2; Dri Hibru 8:7-13.
6. Ewi wãwen jemaroñ kamelele kin “kien Kraist,” im ewi wãwen jej bokake e?
6 Jehovah ear jab kõmman “kien Kraist” einwõt juõn lajrak in kien, im karõke ekkar ñan kajjojo mõttan, einwõt kar kõmmane iumin bujen Kien eo mokta. Kien in ekãl an ri kalor ro an Christ ejjab koba juõn lajrak eaetok in men ko kwomaroñ kõmmani im men ko kwo jab maroñ kõmmani. Bõtab, ilo Nan eo an, Jehovah ear kejbãrok emen bwebwenato ko kin mour im katak ko an Nejin. Bareinwõt, Anij ear kakõrmole jet ri kalor ro jinoin an Jesus ñan letok nan in tel ko emwij je kin mwilid, makitkit ko an congregation eo, mwil ko ilo dolul in family, im men ko jet. (1 Dri Korint 6:18; 14:26-35; Dri Epesõs 5:21-33; Dri Hibru 10:24, 25) Ñe jej ukõt mour ko ad ekkar ñan joñok im katak ko an Jesus Christ im bokake nan in kakabilek ko an ri jeje Bible ro rekakõrmol an Anij ilo ebeben eo kein kajuõn, jej bokake “kien Kraist.” Jehovah ej kajitõkin men in jen ri karejar ro an rainin.
Aorõkin Yokwe
7. Ewi wãwen Jesus ear kalikar melele eo kin kien eo an ilo Kwojkwoj in Kijone eo eliktata ibben ri jilek ro an?
7 Ke ear aorõk yokwe iumin Kien eo, ej bedbed in, ak kadkad eo eaorõktata, iumin kien Christ. Jesus ear kalikar men in ke ear kwelok ibben ri jilek ro an ñan kememe Kwojkwoj in Kijone eo ilo 33 C.E. Ekkar ñan bwebwenato eo ekadu an ri jilek John kin ta eo ear walok ilo boñin eo, nan ko an Jesus jen buruen ear koba an konono kin yokwe 28 alen. Men in ear kalikar ñan ri jilek ro kin aorõkin, ak melele eo, kin kien eo an. John ear ijjino bwebwenato eo an kin boñ in eaorõk ilo an ba: “Kin an Jisõs jela bwe auõ eo An e mottok bwe En ilok jen lõl in ñõn Jemen; E ar yokwe ro dron rej ber i lol im Ej yokwe ir ñõn jemlokõn.”—Jon 13:1.
8. (a) Ta eo ej kwalok bwe ear wõr juõn akwel ej wõnmanlok wõt ibwiljin ri jilek ro? (b) Ewi wãwen Jesus ear katakin ri jilek ro an kin ettã buru?
8 Jesus ear yokwe ri jilek ro an, meñe ear ejelok tõbrak ilo an kajeoñ in jibañ ir ñan anjo ion kõnan eo air kin kajur im utiej. Elõñ alliñ ko mokta jen air tõkeãktok ilo Jerusalem, ‘r’ar akwaile dron, kin wõn iair elaptata.’ Im mokta lok jidik jen air itok ñan jikin kwelok eo ñan kememe Kwojkwoj in Kijone eo, akwel eo kin wõn utiejlok ear bar walok. (Mark 9:33-37; 10:35-45) Bwe abañ in kar juõn eo ear walok manlok ej alikar ilo ta eo ear walok jidik wõt ien elikin an ri jilek ro deloñ ilo room eo ñan kememe Kwojkwoj in Kijone eo air eliktata ibben don. Ilo ien eo ejelok juõn iair ear bõk ien eo ñan kõmman manit in karuwainene eo ñan kwal neen ro jet. Ñan katakin ir kin ettã buru, Jesus make ear kwal neiir.—Jon 13:2-15; 1 Timote 5:9, 10.
9. Ewi wãwen Jesus ear jerbale wãwen eo ear walok elikin Kwojkwoj in Kijone eo eliktata?
9 Jekdon rar bõk katak in, elikin air kememe Kwojkwoj in Kijone eo im Jesus ear kajutak Kwojkwoj in mij eo an, lale ta eo ear walok. Bwebwenato eo ilo Gospel eo an Luk ej ba: “Juõn akwail ej walok ibeir, wõn iair e naj laptata.” Ear jab illu ibben ri jilek ro im kauweik ir, ilo joij Jesus ear kakabilek ir kin aikwij eo ñan air oktak jen iroij ro an lal in me rekõnan bwe ren utiej. (Luk 22:24-27) Inem ear lelok ta eo jemaroñ naetan bedbed in kien Christ, ilo an ba: “Kien ekãl Ij lewoj ñõn kom, Komin yokwe dron; einwõt I ar yokwe kom, komin bareinwõt yokwe dron.”—Jon 13:34.
10. Kien ta eo Jesus ear lelok ñan ri kalor ro an, im ear kitibuj ta?
10 Tokelik ilo boñin eo Jesus ear kalikar en ewi joñan lapin yokwe eo an Christ. Ear ba: “Eñin kien eo Aõ, Bwe komin yokwe dron, einwõt I ar yokwe kom. Ejelok yokwe iben armij elap jen yokwe in, bwe armij en lelok an mour kin ro jeran.” (Jon 15:12, 13) Nan ko an Jesus rej melelen ke bwe ri kalor ro an rej aikwij mõnõnõ in mij kin ri tõmak ro mõttair elañe ewõr juõn aikwij? Eñin kar melele eo an John, juõn ri kamol ilo ien eo, bwe ear je tokelik: “Ilo men in je jela yokwe, bwe E [Jesus Christ] ar likit mour eo An kin kij: im emõn jen likit ar mour kin ro jeer im jãter.”—1 Jon 3:16.
11. (a) Ewi wãwen jej kajejjet kien Christ? (b) Joñok ta eo Jesus ear letoke?
11 Inem, jejjab kajejjet kien Christ ilo ad baj katakin wõt ro jet kin e. Jej aikwij bareinwõt mour im jerbal einwõt an kar Jesus kõmmane. Emol, Jesus ear kajerbal nan ko raibujuij ilo katak ko an. Ak, ear bareinwõt katakin ikijen joñok eo an. Meñe Jesus ear juõn jitõb ekajur ilañ, ear bõk ien ko remõn ñan kajejjet ankil an Jemen ion lal im ñan kwalok kin ewi wãwen jej aikwij mour. Ear ettã buruen, joij, im ear lemnak kin ro jet, im jibañ ro re iten ebwer. (Matu 11:28-30; 20:28; Dri Pilippai 2:5-8; 1 Jon 3:8) Im Jesus ear rejañ ri kalor ro an ñan yokwe don, einwõt ear yokwe ir.
12. Etke jemaroñ ba bwe kien Christ ejjab kadiklok aikwij eo ñan yokwe Jehovah?
12 Ewi aorõkin yokwe Jehovah—kien eo elaptata ilo bujen Kien—ilo kien Christ? (Matu 22:37, 38; Dri Galetia 6:2) Kein karuo? Jab ñan jidik! Yokwe Jehovah im yokwe Christian ro mõttad rej ekkejel ibben don. Juõn armij ejjab maroñ mol an yokwe Jehovah ilo an jab yokwe jein im jatin bareinwõt, bwe ri jilek John ear je: “Elañe armij ej ba, Ña ij yokwe Anij, im ej kijirãte jein im jãtin, e dri riõp: bwe eo e jab yokwe jein im jãtin eo e ar lo e, ej ban yokwe Anij eo e ar jab loe.”—1 Jon 4:20; keidi 1 Jon 3:17, 18.
13. Tokjen ta eo ear walok ke ri kalor ro rar bokake kien eo ekãl an Jesus?
13 Ke Jesus ear lelok ñan ri kalor ro an kien in ekãl ñan yokwe don einwõt ear yokwe ir, ear kwalok kin ewi tokjen eo enaj walok. “Ilo men in armij otemjej re naj jela bwe komij dri kalora,” ear ba, “elañe komij yokwe dron.” (Jon 13:35) Ekkar ñan Tertullian, eo ear mour elõñlok jen jibuki yiõ ko elikin an kar Jesus mij, yokwe eo an Christian ro jinoin ear walok ilo tokjen in. Tertullian ear elij nan ko an ro rejjab Christian ikijen ri kalor ro an Christ: ‘Lale wãwen eo rej yokwe don im rej bojak meñe ñan mij kin don.’ Jemaroñ kajitõkin kij make, ‘Ij kwalok ke yokwe rot in ñan Christian ro mõtta me ej kamol bwe ña ij juõn ian ri kaloran Jesus?’
Ewi Wãwen Jej Kamol Ad Yokwe
14, 15. Ta eo emaroñ kõmman bwe en bin ad bokake kien Christ, ak ta eo emaroñ jibañ kij kõmmane?
14 Eaorõk bwe ri karejar ro an Jehovah ren kwalok yokwe einwõt Christ ear yokwe. Ak kwoj lo ke bwe ebin yokwe Christian ro mõttad me rej kwalok jitõb in kibbon? Eokwe, einwõt jemaroñ lo, ri jilek ro rar akwel im kajeoñ in kowõnmanlok kõnan ko air make. (Matu 20:20-24) Ri Galetia ro bareinwõt rar akwele don. Elikin an kwalok bwe yokwe ri turid ej kajejjet Kien eo, Paul ear kakkõl ir: “A elañe komij kiji im kõñi dron, kejbãrok bwe komin jab lot iben dron.” Elikin an keidi jerbal ko an kanniek ibben leen jitõb an Anij, Paul ear kobaik nan in kakabilek in: “Jen jab dri kimjãje wan, dri kaillu dron, dri junmare dron.” Inem ri jilek eo ear rejañ ir: “Komin bõk men in erro ko an dron, in ein drein komin kajejit kien Kraist.”—Dri Galetia 5:14–6:2.
15 Ilo ad aikwij bokake kien Christ, Jehovah ej kajitõk ke juõn men ellã jen ad maroñe? Meñe emaroñ bin ñan ad kwalok joij ñan ro rar kwalok nan ko rekañ ñan kij im kõmetak eñjake ko ad, jej aikwij “dri kajeoñwe Anij, einwõt ajiri re jitenburu; Im etetal ilo yokwe.” (Dri Epesõs 5:1, 2) Jej aikwij wõnmanlok wõt im kalimjek joñok eo an Anij, eo ear “kwalok karkarin An yokwe ñõn kij, ilo men in, ke j’ar dri jerawiwi, Kraist e ar mij kin kij.” (Dri Rom 5:8) Ilo ad emmakit ñan jibañ ro jet, ekoba ro rar kokkure kij, jemaroñ juburu in jelã bwe jej kajeoñe Anij im jej bokake kien Christ.
16. Ewi wãwen jemaroñ kamol yokwe eo ad ñan Anij im Christ?
16 Jej aikwij kememej bwe jej kamol yokwe eo ad ikijen men eo jej kõmmane, jab men eo jej baj ba wõt. Meñe Jesus ear lo an bin bõk juõn wãwen kõmanmõn ankil an Anij kin men ko kar kitibuje. “Jema elañe Kwo kõnan, Kwon bõklok kõp in jen Iõ,” Jesus ear jar. Ak ilo mõkaj ear koba: “A en jab ankil Aõ a Am wõt.” (Luk 22:42) Jekdon ta aolep men ko Jesus ear aikwij eñtan kaki, ear kõmanmõn ankil an Anij. (Dri Hibru 5:7, 8) Bokake ej juõn men in kamol yokwe eo ad im ej kwalok bwe jej kile bwe wãwen Anij ej wãwen eo emõntata. “Bwe eñin yokwe Anij,” Bible ej ba “bwe jen kejbãrok kien ko An.” (1 Jon 5:3) Im Jesus ear jiroñ ri jilek ro an: “Elañe komij yokwe Iõ, kom naj kejbãrok kien ko Aõ.”—Jon 14:15.
17. Kien et eo ejej uan Jesus ear lelok ñan ri kalor ro an, im ewi wãwen jej jelã ej jerbal ñan kij rainin?
17 Ijellokin an kakien ri kalor ro an ñan yokwe don, bar ta kien eo ejej uan Christ ear lelok ñan ir? Ear kakien ir bwe ren kõmman jerbal in kwalok nan eo ear kamineneik ir kake. Peter ear ba: “Im E ar jiroñ kim bwe kimin kwalok ñõn armij rõn.” (Jerbal 10:42) Jesus ear kakien ilo jejjet: “Inem komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; Im katakin ir bwe ren bokake nan ko otemjej I ar jiroñ kom.” (Matu 28:19, 20; Jerbal 1:8) Jesus ear kalikar bwe nan in jiroñ rot kein renaj bareinwõt jerbal ñan ri kalor ro an kiõ ilo “jemlokin ien eo,” bwe ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Daniel 12:4, New World Translation; Matu 24:14) Emol, ej ankil an Anij bwe jen kwalok nan. Ak, jet remaroñ lemnak bwe men in me Anij ej kajitõk bwe jen kõmmane ellã jen ad maroñe. Ak ej ke?
Etke ej Einwõt Bin Kõmmane
18. Ta eo jej aikwij kememej kake ñe jej eñtan kin men eo Jehovah ekõnan bwe jen kõmmane?
18 Einwõt jaar loe, Jehovah ear kajitõk bwe armij ren bokake elõñ kain men in aikwij ko ilo bwebwenato in armij. Im einwõt men in aikwij kein rar oktak jen don, eindein ear oktak melejoñ ko rar iioni. Nejin eo ejitenburu ibben Anij ear iion melejoñ ko relukkun bin, im eliktata rar mõn e ilo wãwen eo elaptata an lej kin an kõmman men eo Anij ear kajitõk bwe en kõmmane. Ak ñe jej eñtan kin ad kõmman men eo Jehovah ekõnan bwe jen kõmmane, jej aikwij kememej bwe e eo ejjab bõk eddon melejoñ ko ad. (Jon 15:18-20; Jemes 1:13-15) Jumae eo an Satan ear bõktok jerawiwi, eñtan, im mij, im e eo ear kajutak wãwen ko me ekkã an kõmman an bin ad kõmanmõn ankil an Jehovah.—Job 1:6-19; 2:1-8.
19. Etke ej juõn jerammõn ñan kõmman men eo Anij ear kajitõkin kij bwe jen kõmmane ikijen Nejin?
19 Ikijen Nejin, Jehovah ear kwalok bwe ilo ien in ebak ñan jemlokin, ri karejar ro An ren keañ ibelakin lal bwe iroij eo an Ailiñ eo ej mejelan eo wõt kin eñtan an armij otemjej. Kien in an Anij enaj jolok aolep abañ ko ion lal—tarinae, kowadoñ, jeramel, rittolok, nañinmij, im mij. Ailiñ eo enaj bareinwõt bõktok juõn paradise eaibujuij ion lal, ilo eo ro remij renaj jerkakbiji. (Matu 6:9, 10; Luk 23:43; Jerbal 24:15; Reveles̃õn 21:3, 4) Ej juõn jerammõn elap ñan keañ kin news eo emõn kin men rot kein! Inem, ealikar bwe ejjab eddo men eo Jehovah ej kajitõk bwe jen kõmmane. Jej iion jumae, ak Satan Devil eo im lal eo an rej bõk eddon men in.
20. Ewi wãwen jemaroñ anjo ion jabdewõt aitwerõk Devil eo ej bõkmantak kake?
20 Ewi wãwen jemaroñ anjo ion jabdewõt aitwerõk ko Satan ej bõkmantak? Ilo ad kememej nan kein: “Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.” (Jabõn Kennan Ko 27:11) Jesus ear lelok ñan Jehovah juõn uak ñan nan in kinaklok eo an Satan ilo an ilok jen jikin eo ejelok uwõta ie in mour ie ilañ ñan an kõmanmõn ankil an Jemen ion lal. (Aiseia 53:12; Dri Hibru 10:7) Einwõt juõn armij, Jesus ear kijenmij kin jabdewõt melejoñ ear iioni, meñe mij ilo alal in kaeñtan eo. Elañe jej lor e einwõt eo ej Joñok eo ad, kij bareinwõt jemaroñ kijenmij ilo eñtan ko im kõmman men eo Jehovah ekõnan bwe jen kõmmane.—Dri Hibru 12:1-3.
21. Ewi lemnak eo am ikijen yokwe eo Jehovah im Nejin rar kwaloke?
21 Elap an Anij im Nejin kwalok yokwe ñan kij! Ikijen katok in binmour eo an Jesus, armij ro rekiblie ewõr air kejatdikdik eo kin mour indio ilo Paradise. Inem jen jab kõtlok bwe jabdewõt men ren kõmman an binjak kejatdikdik eo ad. Jen an eindein, jen bõk ñan buruõd men eo Jesus ear kamaroñe, einwõt Paul ear kõmmane, eo ear ba: “Nejin Anij . . . e ar yokwe iõ, im mõke lelok E kin iõ.” (Dri Galetia 2:20) Im jen kwalok kamolol jen buruõd ñan Anij eo ad ej yokwe, Jehovah, eo ejjab kajitõkin kij ellã jen joñan men eo je maroñe.
Ewi Wãwen Kwonaj Kar Uak?
◻ Ta eo Jehovah ekõnan bwe jen kõmmane rainin?
◻ Ilo boñen eo eliktata ear bed ibben ri jilek ro an, ewi wãwen Christ ear kalikar aorõkin yokwe?
◻ Ewi wãwen jemaroñ kamol bwe jej yokwe Anij?
◻ Etke ej juõn jerammõn ñan kõmman men eo Jehovah ej kajitõkin kij bwe jen kõmmane?
[Pija eo ilo peij 23]
Ta eo Jesus ear katakin kake ke ear kwal neen ri jilek ro an?
[Pijaeo eo ilo peij 25]
Meñe ewõr jumae, jaketo-jaketak news eo emõn ej juõn jerammõn ekalañliñ