Katak 18

Kõmman Bwe Am Karejar Ñan Anij Indio En Mejenkajjik Eo Am

1, 2. Ta menin aikwij eo ijellokin ad bõk jelãlokjen eo kin Anij?

BAJ ANTONELOK WÕT am jutak iman juõn kejam ekiilek eo ej tel ñan juõn room im ewõr mweiuk ko relap ie. Jen ba juõn eo im maroñ ej ibben ear lewõj key eo im ear jiroñ yuk bwe kwon bõk ekkar ñan am kõnan mweiuk kein reaorõk. Ejamin wõr tokjen key eo elañe kwojjab kajerbale. Ejja einwõt, kwonaj aikwij kajerbal jelãlokjen eo bwe en wõr tokjen ñan yuk.

² Elap an mol men in kin jelãlokjen eo an Anij. Ilo mol, jelãlokjen eo emol kin Jehovah Anij im Jesus Christ ej melelen mour indio. (Jon 17:3) Bõtab, kejatdikdik in e ban jejjet meñe ewõr jelãlokjen in ibbam. Einwõt am naj kajerbal juõn key eaorõk kwoj aikwij jerbale jelãlokjen eo kin Anij ilo mour eo am. Jesus ear ba bwe ro rej kõmanman ankil an Anij renaj “dreloñtok ilo ailiñ in lõñ.” Armij rot kein renaj jerammõn in karejar ñan Anij ñan indio!​—Matu 7:21; 1 Jon 2:17.

3. Ta ankil an Anij kin kij?

³ Elikin an juõn katak kin ta ankil an Anij, eaorõk bwe en kõmmane. Ilo am lemnak ta ankil an Anij kin kwe? Emaroñ jejjet ilo nan kein: Kajeoñe Jesus. Juon Piter 2:21 ej jiroñ kij: “Im emwij kir kom ñõn men in: bwe Kraist e ar iñtan kin kom, im likit joñok ñõn kom, bwe komin anõke jenkwon ne ko neen.” Inem, ñan kõmanman ankil an Anij, kwonaj aikwij lukkun anõke joñok eo an Jesus ilo joñan am maroñ. Eñin wãwen am kajerbal jelãlokjen eo kin Anij.

WÃWEN JESUS EAR KAJERBAL JELÃLOKJEN EO KIN ANIJ

4. Etke elap an Jesus jelã kin Jehovah, im ewi wãwen an kajerbal jelã in?

⁴ Jelãlokjen kin Anij elaplok ibben Jesus Christ jen ibben ro jet. Etto an kar jokwe im jerbal ibben Jehovah Anij ilo lañ, mokta jen an kar itok ñan lal in. (Dri Kolosse 1:15, 16) Im ta eo Jesus ear kõmmane kin aolepen jelãlokjen in? Ear jab mõnõnõ wõt kin an bed wõt ibben. Jesus ear mour kake. Eñin unin an lukkun joij, meanwõd, im jerbal ibben armij ro mõttan ilo yokwe. Jesus ilo wãwen in ear kajeoñe Jemen ilañ im ear mour ekkar ñan jelãlokjen eo kin wãwen im kadkadin Jehovah.​—Jon 8:23, 28, 29, 38; 1 Jon 4:8.

5. Etke Jesus ear baptais, im ewi wãwen an mour ekkar ñan melelen baptais eo an?

⁵ Jelãlokjen eo ibben Jesus ear bar kamakit e bwe en kãlet juõn buñten ne elap. Ear itok jen Galilee ñan River Jordan, ijo John ear baptais e ie. (Matu 3:13-15) Ta kakõllan baptais eo an Jesus? Einwõt juõn Ri Jew, ear lotak ilo juõn ailiñ emwij aje ñan Anij. Kin men in, emwij ajelok Jesus jen ien eo ear lotak. (Exodus 19:5, 6) Ilo an kar baptais, ear jutak iman Jehovah bwe en kõmanman ankil an ekwojarjar kin e ilo ien eo. (Dri Hibru 10:5, 7) Im Jesus ear mour ekkar ñan melelen baptais eo an. Ear kamaat an ilo jerbal eo an Jehovah, im lelok jelãlokjen eo kin Anij ñan ro jet aolep ien. Jesus ear lañliñ in kõmanman ankil an Anij, im ear bar ba bwe ej einwõt mõñã ñan e.​—Jon 4:34.

6. Ewi wãwen an kar Jesus karmijete e make?

⁶ Jesus ear lukkun melele bwe an kõmmane ankil an Jehovah enaj elap wõnãn​—eo im enaj nawõnãn kin mour eo an. Meñe eindein, Jesus ear karmijete e make, im likit aikwij ko an make kein karuo. An kõmmane ankil an Anij kar men eo moktata aolep ien. Ilo wãwen in, en ewi wãwen ad maroñ lor joñok eo an Jesus e wãppen?

BUÑTEN NEE KO REJ TEL ÑAN MOUR INDIO

7. Ta buñten nee ko juõn ej aikwij bõki bwe en tellokin baptais?

⁷ Einjuõn jen Jesus, kij jejjab wãppen im maroñ tõbar ien in eaorõk kin baptais en elikin wõt ad bõk buñten nee ko im reaorõk. Ej ijjino ad eindein ñe jej bõk jelãlokjen eo ejimwe kin Jehovah Anij im Jesus Christ ilo buruõd. Ad kõmmane men in enaj kamakit kij bwe jen jerbale tõmak eo im bõk juõn yokwe elap kin Anij. (Matu 22:37-40; Dri Rom 10:17; Dri Hibru 11:6) Ad bokake kien ko an Anij, nan in kaiñi im joñok in mour ko an en kar kamakit kij ñan ukwelok, im kwalok ad buromõj kin jerawiwi ko ad remotlok. Men in ej tel ñan ad oktak, einwõt, ellok jen ak karmijete jabdewõt ial ebwid im je kin lor e ke ejañin wõr jelã eo kin Anij ibbed. (Jerbal 3:19) Ealikar, elañe jej noje wõt jerawiwi ko ad rittino im jab kõmmane men ko rewãnik, inem ilo mol jejañin lukkun ukwelok, im je ban mone Anij. Jehovah ej kile jelã mon otemjej.​—Luk 12:2, 3.

8. Kwon et ñe emwij am bõk juõn kõnan in jerbal im kwalok nan kin Ailiñ eo?

⁸ Kiõ ke emwij am bõk jelãlokjen eo kin Anij, ejjab ekkar ke bwe kwon make lemnak kin men ko lor jitõb? Bõlen ewõr am mõnõnõ in jiroñ ro nukõm, ro jeram, im ro jet kin men ko kwoj katak kake. Ilo mol, bõlen emwij am kõmmane men in, einwõt an kar Jesus kwalok news eo emõn ibben ro jet ijoko jet. (Luk 10:38, 39; Jon 4:6-15) Kiõ kwo kõnan kalaplok ijo kunam. Christian elder ro renaj mõnõnõ in kennan ibbam ñan air maroñ kile elañe kwoj tellokin im maroñ keini ien am bõk kunam kin jerbal an Ri Kennan ro an Jehovah im kwalok nan kin Ailiñ eo. Elañe kwoj tellokin, elder ro renaj karõk ien am kwalok nan ibben juõn Ri Kennan. Ri kaloran Jesus rar lor nan in katak ko an bwe en melak air jerbal in kwalok nan. (Mark 6:7, 30; Luk 10:1) Kwonaj bõk tokjen ko renañin einwõt ilo am kwalok nan kin Ailiñ eo jen em ñan em ilo wãwen ko jet.​—Jerbal 20:20, 21.

9. En ewi wãwen an juõn ajelok an mour ñan Anij, im ewi wãwen ajelok ej jelet mour eo an armij in?

⁹ Kwalok kin news eo emõn ñan armij otemjej ilo bukwon eo an congregation eo ej juõn wãwen ñan kabukõt ro im ewãnik burueir im ej mõttan jerbal ko remõn im rej kamol bwe ewõr am tõmak. (Jerbal 10:34, 35; Jemes 2:17, 18, 26) Am keini ien bed ilo kwelok ko an Ri Christian im bõk kunam elap ilo jerbal in kwalok nan rej bar jet wãwen ko ñan kalikar am ukwelok im oktak im kiõ ewõr am kate in mour ekkar ñan jelãlokjen eo an Anij. Naj ta lajrakin tok juõn im ekkar? Ej ñan am ajelok am mour ñan Jehovah Anij. Melelen am jar im jiroñ Anij jen buruõm, kin am mõnõnõ im kin juõn buru eyu kwoj bojak in lelok mour eo am ñan e ñan kõmanman ankil an. Eñin ej wãwen ajelok kwe make ñan Jehovah im ñan bõk ine in joij eo an Jesus Christ.​—Matu 11:29, 30.

BAPTAIS​—TA MELELEN ÑAN YUK

10. Etke kwon kar baptais mwijin am ajelok am mour ñan Jehovah?

¹⁰ Ekkar ñan Jesus, ro otemjej rej erom ri kaloran rej aikwij baptais. (Matu 28:19, 20) Etke eaorõk men in elikin am ajelok mour eo am ñan Anij? Ke kwar ajelok kwe make ñan Jehovah, e jelã am yokwe e. Ak ejelok bere kin am kõnan bar bõk kunam in kõjelãik ro jet kin yokwe eo am ñan Anij. Eokwe, baptais ej kabellok juõn ien emõn ñan kalikar am kar ajelok am mour ñan Jehovah Anij iman ro jet.​—Dri Rom 10:9, 10.

11. Ta melelen baptais?

¹¹ Melele ko remũlal rej walok ilo kakõllan baptais. Ilo ien eo naj door, ak “katulok,” yuk iumin den, ej einwõt am kar mij jen wãwen mour eo am mokta. Ien eo kwoj walokliñtak jen den eo, ej einwõt am bõk juõn mour ekãl, eo ankil an Anij enaj beek im jab kwe. Alikar, ejjab melelen bwe kwoban bar bwid, ke kij aolep jejjab wãppen im unin ad naj jerawiwi wõt ran otemjej. Bõtab, einwõt ri karejaran Jehovah, eo emwij ajelok im baptais, kwonaj deloñ ilo juõn bed eaorõk ibben. Kin am ukwelok im make kõttãik ilo am baptais, Jehovah enaj mõnõnõ in jolok jerawiwi ko am ion bedbedin katok in binmour eo an Jesus. Ilo wãwen in baptais ej tel juõn bwe en bõk juõn bõklikit erreo iman Anij.​—1 Piter 3:21.

12. Ta melelen an juõn baptais (a) ‘ilo etan Jemen’? (b) ‘ilo etan Nejin’? (c) ‘ilo etan jitõb kwojarjar’?

¹² Jesus ear kakien ri kalor ro an bwe ren baptais ri kalor ro rekãl “ilo etan Jema im Nejin im Jitõb Kwojarjar.” (Matu 28:19) Ta melelen ibben Jesus? Baptais ‘ilo etan Jemen’ ej kalikar bwe eo ej baptais ej liki Jehovah Anij einwõt Ri Kõmanman eo im Iroij Bõtata ijoko otemjej kin aolepen buruen. (Sam 36:9; 83:18; Ekklisiastis 12:1) An juõn baptais ‘ilo etan Nejin’ ej melelen ej kile tokjen Jesus Christ​—im elaptata, katok in binmour eo An​—ej ial eo wõt ñan bok lomor jen Anij. (Jerbal 4:12) Baptais ‘ilo etan jitõb kwojarjar’ ej kakõllan bwe eo ej baptais ej kile tokjen jitõb kwojarjar an Jehovah, ak kajur eo ej jerbal, einwõt kein jerbal eo an Anij ñan kõtõbrak karõk ko An im ñan kakajur ri karejaran bwe ren kõmman ankil An ewãnik ibben dolul eo An eo ej tel kin jitõb.​—Jenesis 1:2; Sam 104:30; Jon 14:26; 2 Piter 1:21.

KWOJ BOJAK IN BAPTAIS KE?

13, 14. Etke jen kar jab mijak in kãlet ad karejar ñan Jehovah Anij?

¹³ Ke melelen baptais elap an aorõk im ej juõn ien emake wõt lap ilo mour an juõn armij, jokãlet in en juõn men in kamijak ke? Jaab! Ke bebe in ñan baptais ejjab juõn men edik tokjen ejelok bere bwe ej bebe eo e meletlet tata an juõn maroñ kõmmane.

¹⁴ Am baptais ej juõn kein kamol jokãlet eo am in karejar ñan Jehovah Anij. Lemnak kin armij ro im kwo jelã kajjiir. Ilo juõn wãwen, ejjab ir kajjojo rej jerbal ñan juõn iroij ke? Jet rej jerbal kin mweiuk ko. (Matu 6:24) Ro jet reniknik in jibadõk air job ak kõnan ko air make ilo air likit kõnan ko air einwõt men eo eaorõk tata ilo mour eo air. Ak ro jet rej karejar ñan anij wan ko. Ak kwar kãlet in karejar ñan Anij eo emol, Jehovah. Ejelok en ej kwalok joñan joij, tiriamo, im yokwe. Anij ej kautiej armij ro kin juõn jerbal im ej tel ir ñan bõk lomor. Ej nawõnãn ri karejaran ro an kin mour indio. Emol, am lor wõt joñok eo an Jesus im ajelok mour eo am ñan Jehovah ejjab juõn ial in mijak kake. Ilo mol, ej jokãlet eo wõt im ej kabuñburuen Anij im ewãppen.​—1 Kiñ Ro 18:21.

15. Ta jet ian abañ ko ekkã an walok ñe juõn ej baptais?

¹⁵ Ijokwe, an juõn baptais en jab walok kin an bar juõn jibed e. Jokãlet in en ikõtam im Jehovah wõt. (Dri Galetia 6:4) Ilo am wõnmanlok wõt ilo jitõb, kwomaroñ kar lemnak: “Ta ej bõprae iõ bwe in jab baptais?” (Jerbal 8:35, 36) Kwomaroñ kajitõk ibbam make, ‘Jumae jen family eo aõ ej kautameik iõ ke? Ij bo wõt ke ibben manit ko im jerbal ko rej nae jeje ko im rej menin jerawiwi? I maroñ ke bo kin mijak ro ilo bukwon eo aõ?’ Eñin mõttan un ko kwonaj aikwij kalmenlokjen kaki, ak kwon joñe men kein ilo mol.

16. Ewi wãwen am naj lo tokjen kin am karejar ñan Jehovah?

¹⁶ Ad joñe men in eban mol elañe jejjab keidi tokjen ko jej bõk kin ad karejar wõt ñan Jehovah. Ñan kõkkar, lemnak kin jumae ko rej walok jen ro nukid. Emwij an Jesus kallimur ñan ri kalor ro an bwe meñe remaroñ likit ro nukiir kin air kãlet in lor e, renaj bõk juõn family elaplok ilo jitõb. (Mark 10:29, 30) Ri tõmak rein mõttad renaj kwalok ñan yuk yokwe in jimjãn jimjatin, im jibañ yuk bwe kwon kijenmij iumin matõrtõr, im rejetake yuk ilo ial in mour. (1 Piter 5:9) Elaptata elder ro ilo congregation eo remaroñ jibañ yuk kin abañ ko im ñan wõnmaik abañ ko jet kin jerammõn. (Jemes 5:14-16) Ak kin am maroñ luji jimjera an lal in, emõn am kajitõk ibbam make, ‘Ta eo imaroñ keidi ibben aõ kabuñburuen Ri Kõmanman eo in ijoko otemjej, bwe en mõnõnõ kin jokãlet eo aõ ilo mour in?’​—Jabõn Kennan Ko 27:11.

MOUR EKKAR ÑAN AJELOK IM BAPTAIS EO AM

17. Etke kwon kar watõk baptais einwõt juõn ien ñan ijjino im ejjab melelen jemlokin?

¹⁷ Eaorõk ñan kememej bwe baptais ejjab jemlokin wõnmanlok eo am ilo jitõb. Ej jinoin am jerbal ñan Anij toan am mour einwõt juõn ri kwalok emwij kowãppene im juõn ian Ri Kennan ro an Jehovah. Meñe elap an aorõk ad baptais, ejjab kein kamol bwe jenaj bõk lomor. Jesus ear jab ba: ‘Aolep ro rej baptais renaj mour.’ Ak, ear ba: “A eo e naj kijinmij ñõn jemlokõn, e in e naj mour.” (Matu 24:13) Kin men in, elap an aorõk bwe kwon kabukõt Ailiñ in Anij mokta ilo am likite einwõt men eo eaorõktata ilo mour eo am.​—Matu 6:25-34.

18. Elikin baptais, ta jet ian mejenkajjik ko kwon kar jibadõki?

¹⁸ Bwe kwon kijenmij ilo jerbal eo am ñan Jehovah, kwonaj kõnan karõki mejenkajjik ko lor jitõb ñan kwe make. Juõn mejenkajjik emõn ej bwe kwon kalaplok wõt jelãlokjen eo am kin Anij ikijen am keini ien am make katak kin Nan eo an. Karõk ien am konono Bible eo aolep ran. (Sam 1:1, 2) Keini ien kwelok ko an Ri Christian, bwe kamao ko ie renaj jibañ yuk ñan bõk kajur ilo jitõb. Ñan ijo kunam, etke kwojjab kõmman juõn am mejenkajjik in uak ilo kwelok ko an congregation eo im ilo wãwen in kaibujuij Jehovah im kalek ro jet? (Dri Rom 1:11, 12) Bar juõn mejenkajjik emaroñ ñan kakõmanmõnlok wãwen jar ko ad bwe en emõnlok wõt.​—Luk 11:2-4.

19. Ta kadkad ko jitõb kwojarjar emaroñ jibañ yuk kake ñan kwalok?

¹⁹ Bwe kwon mour ekkar ñan melelen baptais eo am, kwonaj aikwij niknik in lale wãwen am jerbal, im kõtlok bwe jitõb kwojarjar eo an Anij en jebar im elle kadkad ko kadkadin einwõt yokwe, lañliñ, ainemõn, meanwõd, joij, lejokmen, tiljek, inemõn, im jatõr. (Dri Galetia 5:22, 23; 2 Piter 3:11) Kememej, bwe Jehovah ej lelok jitõb kwojarjar eo an ñan aolep ro im rej jar kake im bokake e einwõt ri karejaran ro an retiljek. (Luk 11:13; Jerbal 5:32) Inem jar ñan Anij kin jitõb eo an im kajitõk kin jibañ ñan kwalok kadkad kein rej kabuñburuen. Kadkad ko kein renaj alikarlok ilo wãwen am kennan im mwilõm ilo am errã ibben jitõb eo an Anij. Ealikar, bwe armij ro kajjojo ilo congregation eo an Ri Christian renaj kate in kalaplok wãwen “armij ekãl” bwe ren einwõt Christ. (Dri Kolosse 3:9-14) Kajjojo iad naj jelmaik kajo abañ ko ilo ad kõmmane men in kinke lajrak in ad wõnmanlok ilo jitõb e kajo wãwen. Kinke kwojjab wãppen, kwonaj aikwij kate in kõnak kadkadin Christ. Ak kin men in jab ebwer, kinke maroñ enaj walok kin jibañ jen Anij.

20. Ilo wãwen et ko kwomaroñ kajeoñe Jesus ilo kwalok nan?

²⁰ Ian mejenkajjik ko am ikijen men ko lor jitõb en kar ilo am lukkun kalimjek im kalaplok am kajeoñe joñok in lañliñ an Jesus. (Dri Hibru 12:1-3) Ear lap an yokwe jerbal in kwalok nan. Elañe ebellok jerammõn eo ñan bõk kunam ilo kwalok nan kin Ailiñ eo, inem en jab erom juõn jerbal bajjek. Lo mõnõnõ eo ej itok jen ad katakin ro jet kin Ailiñ in Anij einwõt kar Jesus. Kajerbal katak ko me congregation eo ej litoki bwe en kalaplok maroñ eo am einwõt juõn ri kaki. Im liki bwe Jehovah emaroñ lewõj kajur eo bwe kwon kajejjet jerbal eo am ñan kwalok nan.​—1 Dri Korint 9:19-23.

21. (a) Ewi wãwen ad jelã bwe Jehovah ej kaorõk kajjojo ro emwij air baptais im retiljek? (b) Ta eo ej kalikar bwe baptais e aorõk ñan ad bok lomor ilo ien Anij enaj jerbale ekajet eo an ion jukjuk im bed in enana?

²¹ Juõn eo emwij ajelok an mour im baptais im etiljek an kate in lor Jesus, elap an aorõk ibben Anij. Jehovah ej turi buruen aolep billion armij im ejelã joñan an jeja ellolo kajjojo ro rej eindein. Ej watõk rein einwõt “men ko raorõk.” (Haggai 2:7, New World Translation) Kanan ko ilo Bible eo rej kwalok wãwen an Anij watõk rein einwõt emwij kakõlleiki bwe ren ellã jen ien eo enaj ekajete jukjuk im bed in enana kiõkiõ wõt. (Ezekiel 9:1-6, NW; Malachi 3:16, 18, NW) Kwoj ke ian ro im “ejimwe burueir kin mour indio”? (Acts 13:48, NW) Emol ke kõnan eo am bwe kwon bõk kakõlle eo einwõt juõn eo ej karejar ñan Anij? Ajelok im baptais rej mõttan kakõlle in, im raorõk ñan bõk lomor.

22. Ta kejatdikdik eo ro ian “jar eo elap” renaj maroñ reimanlok kake?

²² Elikin Ibwijleplep eo an lal, Noah im family eo an rar diojlok jen wa eo ñan loan juõn lal emwij karreoike. Enañin einwõt rainin, “juõn jar elap” ro im rej kajerbal jelãlokjen eo an Anij ilo mour eo air im bõk buñburu eo an Jehovah ewõr air kejatdikdik in deod jen jemlokin jukjuk im bed in enana im lo mõnõnõ kin mour indio ion juõn lal emwij karreoike ñan indio. (Reveles̃õn 7:9, 14) Enaj ewi wãwen mour eo?

ETALE JELÃLOKJEN EO AM

Ewi wãwen an Jehovah kõnan bwe kwon kajerbal jelãlokjen eo am kin e?

Ta jet ian buñten nee ko rej tel ñan baptais?

Etke baptais ejjab jemlokin ak ej jinoin?

En ewi wãwen ad mour ekkar ñan ajelok im baptais eo ad?

[Pija eo ilo peij 172]

Emwij ke am ajelok yuk ñan Anij ilo jar?

[Pija ko ilo peij 174]

Ta eo ej kautameik yuk ñan baptais?