Ro Rejitõnbõro Ippam̦ me Remej Renaaj Bar Mour

1-3. (1) Ta eo ej kõm̦m̦an an armej bũrom̦õj? (2) Etke Baibõl̦ eo wõt emaroñ kaenõm̦m̦an kõj?

ÑE JUON eo ejitõnbõro ippãd ej mej, ekanooj l̦ap ad bũrom̦õj. Men in ear wal̦o̦k jãn iien ko etto im ej jelõt aolep armej. Ñe ej itok ñan mej, aolep armej rej joñan wõt juon. Im ejjel̦o̦k juon emaroñ el̦l̦ã jãn men in. Rũm̦weiie ro im ruutiej ro ejjel̦o̦k aer maroñ ñan kõjepl̦aaktok mour ko an ro remej. Im rũmmãlõtlõt ro rejjab maroñ uwaak im kõmel̦el̦e kõn unin an armej mej. Ro rekajoor im ro rem̦õjn̦o̦ jim̦or rej jañ ñe juon eo ejitõnbõro ippãer emej. Bõtab, jej m̦õn̦õn̦õ bwe ewõr juon Eo el̦ap an kajoor im ej kallim̦ur bwe enaaj jipañ kõj.

² Wõn in? Ej Jeova Anij. Jeova ej Rũlo̦mo̦o̦r eo ad im elõñ men ko ear kõm̦m̦ani me rej kaalikkar bwe ewõr an maroñ ñan jol̦o̦k mej. Bareinwõt, em̦õj an kallim̦ur bwe enaaj jol̦o̦k mej ñan indeeo. Baibõl̦ ej kõkkar kõn mej ãinwõt juon rũkõjdat. Ej ba: “Rũkõjdat ãliktata im enaaj jako, mej.” (1 Korint 15:26) Ad jel̦ã men in ej lukkuun kaenõm̦m̦an kõj!

³ Jen kiiõ etale ta eo ej wal̦o̦k ñan kõj ñe juon eo ejitõnbõro ippãd ej mej. Ad kõm̦m̦ane men in enaaj jipañ kõj ñan mel̦el̦e kõn juon iaan kallim̦ur ko an Anij me enaaj kam̦õn̦õn̦õik kõj. Ta kallim̦ur in? Ej bwe ro remej renaaj bar mour. (Aiseia 26:19, UBS) Eñin ej kallim̦ur eo an Anij kõn ro remej.

ÑE JUON EO EJITÕNBÕRO IPPAM̦ EJ MEJ

4. (1) Ta eñjake eo an Jijej ke ear lo an ro jet bũrom̦õj kõn ro rejitõnbõro ippãer me rar mej, im etke jejel̦ã bwe ãindein bar eñjake eo an Jeova? (2) Wõn ro Jijej ear epaake er?

⁴ Ewõr ke juon eo el̦ap am̦ yokwe im em̦õj an jako jãn eok? El̦aññe aet, ejjel̦o̦k pere bwe el̦ap am̦ kar bũrom̦õj ke ear mej. Ilo iien rot in, naan ko an Anij ilo Baibõl̦ remaroñ jipañ im kaenõm̦m̦an eok. (Riit 2 Korint 1:3, 4.) Baibõl̦ ej kõmel̦el̦eik kõj kõn eñjake ko an Jeova im Jijej kõn mej. Eñjake ko an Jijej rej ejja wõt eñjake ko an Jemãn, Jeova. Kõn men in, aolep men ko ear ba im kõm̦m̦ani rar bar kaalikkar eñjake ko an Jemãn. Jijej ear mel̦el̦e kõn eñjake ko an ro ekar mej ro rejitõnbõro ippãer. Etke? Kõnke men in ear bar wal̦o̦k ñane. (Jon 14:9) Ke Jijej ear pãd ilo Jerusalem, ekõn lol̦o̦k Meri, Marta, im Lazerõs ilo juon bukwõn etan Betani. Kõn men in, ear lukkuun epaake rein m̦õttan. Baibõl̦ ej ba: “Jijej ej yokwe Marta, im jatin kõrã, im Lazerõs.” (Jon 11:5) Bõtab ãinwõt ad kar katak ilo katak eo l̦o̦k, Lazerõs ear mej tokãlik.

5, 6. (1) Ta kar eñjake eo an Jijej ke ear pãd ippãn ro rar bũrom̦õj kõn Lazerõs? (2) Etke men in ej kaenõm̦m̦an kõj?

⁵ Kar ta eñjake eo an Jijej ke ear mej Lazerõs? Baibõl̦ ej ba bwe Jijej ear etal ippãn baam̦le eo an Lazerõs im ro m̦õttan ilo iien in. Im ke ear lo er “ear eddo bũruon kõn an l̦ap an bũrom̦õj,” innem “ear jañ.” (Jon 11:33, 35, UBS) Ke Jijej ear bũrom̦õj, mel̦el̦ein ke bwe ear jab l̦õmn̦ak bwe Lazerõs enaaj bar mour? Jaab. Ilo m̦ool, ekar jel̦ã bwe juon men ekanooj em̦m̦an ej pojak in wal̦o̦k ilo iien in. (Jon 11:3, 4) Meñe ear jel̦ã men in, ak ear kwal̦o̦k an bũrom̦õj kõnke ear loe joñan an kabũrom̦õjm̦õj ñe ej mej juon eo el̦ap ad yokwe.

⁶ Ad jel̦ã kõn men in ej kaenõm̦m̦an kõj. Etke? Kõnke ej katakin kõj bwe Jijej im Jemãn relukkuun dike mej. M̦õttan jidik Jeova Anij enaaj jol̦o̦k mej ñan indeeo! Jen kiiõ lale ta eo Anij ear kõmaroñe Jijej ñan kõm̦m̦ane.

“LAZERÕS, KWÕN DIWÕJTOK!”

7, 8. Etke armej ro rar l̦õmn̦ak bwe Lazerõs eban bar mour, ak ta eo Jijej ear kõm̦m̦ane?

⁷ Kar likũt ãnbwinnin Lazerõs ilo juon ro̦ñ me ej pãd itõrerein juon tol̦. Jijej ear kajjitõk bwe ren kadãpill̦o̦k dekã eo imejãn ro̦ñ eo. Ak Marta ear jab kõn̦aan bwe ren kõm̦m̦ane men in kõnke el̦o̦k de emãn raan im em̦õj an ãnbwinnin Lazerõs jino kõt. (Jon 11:39) Kõn men in, armej ro rar l̦õmn̦ak bwe Lazerõs eban bar mour.

⁸ Ãlikin aer kar kadãpill̦o̦k dekã eo jãn mejãn ro̦ñ eo, Jijej ear lam̦õj im ba: “Lazerõs, kwõn diwõjtok!” Innem, ta eo ear wal̦o̦k? “L̦eo ear mej ear diwõjtok.” (Jon 11:43, 44, UBS) Ejjel̦o̦k pere bwe baam̦le ko an, ro m̦õttan, im ro jet rar lukkuun m̦õn̦õn̦õ. Aolepen armej rein rar jel̦ã bwe Lazerõs ear mej im kiiõ ebar mour. Rar kanooj bwilõñ im l̦o̦kjenaer. Im ejjel̦o̦k pere bwe elõñ iaaer rar jiburlepe joñan aer kar lukkuun m̦õn̦õn̦õ. Men in ej kaalikkar bwe Jeova ekajoorl̦o̦k jãn mej!

9, 10. (1) Ewi wãween an kar Jijej kaalikkar bwe Jeova eo ear lel̦o̦k kajoor ñane bwe en kõmour Lazerõs? (2) Ta tokjãn ad riiti bwebwenato ko ilo Baibõl̦ kõn ro jet me kar kõmour er ke rar mej?

⁹ Jijej ear jab kõm̦m̦ane menin kabwilõñlõñ in kõn kajoor eo an make. M̦okta jãn an kar kũr Lazerõs bwe en diwõjtok, ear jar ñan Jeova. Alikkar bwe Jeova eo ear lel̦o̦k kajoor ñane bwe en kõmour em̦m̦aan in me ekar mej. (Riit Jon 11:41, 42.) Ejjab iien eo de in Jeova ear kõjerbal kajoor eo an ñan kõmour ro remej. Naanin Anij ej kwal̦o̦k bwe ebar wõr ralitõk armej ro rar mej im bar mour ãinwõt kar Lazerõs.a (Lale kõmel̦el̦e eo itulal̦.) Ñe jenaaj riiti bwebwenato ko kõn armej rein, men in enaaj kõkajoor kõj. Bwebwenato kein rej katakin kõj bwe Anij ejjab kalijekl̦o̦k, kõnke ear jab baj kõmour wõt em̦m̦aan ro ak ear bar kõmour kõrã im ajri ro. Bareinwõt, ear jab kõmour armejin Israel wõt ak ekar bar kõmour armej ro jãn aelõñ ko jet. L̦õmn̦ak m̦õk kõn joñan an kar l̦ap m̦õn̦õn̦õ ilo iien eo armej rein rar bar mour! Ñan waanjoñak, ke Jijej ear kõmour juon leddik me ear mej, jemãn im jinen rar kanooj bwilõñ im m̦õn̦õn̦õ. (Mark 5:42) Jeova ear kõm̦m̦an bwe iien in en juon iaan iien ko rekalañlõñ me reban mel̦o̦kl̦o̦ke.

¹⁰ Jejel̦ã bwe armej ro Jijej ear kõmour er rar bar mej tokãlik. Ak mel̦el̦ein ke bwe ear ejjel̦o̦k tokjãn an kar kõmour er? Ejjab ñan jidik. Bwebwenato kein ilo Baibõl̦ rej katakin kõj m̦ool eo kõn ta eo ej wal̦o̦k ñan ro remej, im rej kam̦oole kallim̦ur eo an Anij bwe juon iien ro remej renaaj bar mour.

MEN KO JEJ KATAK JÃN BWEBWENATOON RO RAR MEJ IM BAR MOUR

11. Ewi wãween an bwebwenatoun Lazerõs kam̦oole naan ko ilo Ekklisiastis 9:5?

¹¹ Baibõl̦ ej ba bwe ro “remej ejjel̦o̦k aer jel̦ã” ñan jidik. (Ekklisiastis 9:5) Rejjab mour im ejjel̦o̦k jikin en̦ rej ilo̦k ñane ãlikin aer mej. Bwebwenatoun Lazerõs ej kam̦oole men in. Ke Lazerõs ear bar mour, ear ke bwebwenato ñan armej ro kõn joñan an em̦m̦an wãween kar mour ilañ? Ear jab. Ear ke ba ñan armej ro im kaamijak er kõn an kar lo el̦ ak jikin eo rej tile im kaeñtaan rinana ro ie? Ear jab. Ejjel̦o̦k juon eoon ilo Baibõl̦ me ej kwal̦o̦k kõn an kar Lazerõs kõnnaan kõn men kein. Ilo aolepen raan ko emãn ear mej, ear ‘ejjel̦o̦k an jel̦ã’ kõn men ko rej wal̦o̦k. Ear ãinwõt ñe ej kiki im joñan an ettoñ, eñakl̦o̦kjen̦. Kõn men in, ear lukkuun mej im ear jab ilo̦k ñan bar juon jikin.​—Jon 11:11.

12. Ta eo ej kam̦ool bwe bwebwenato eo kõn an Lazerõs bar mour ejjab juon bwebwenato bajjek?

¹² Bwebwenato eo kõn Lazerõs ejjab juon bwebwenato bajjek. Men ko ilo iien in rar lukkuun wal̦o̦k im rej kam̦ool bwe ewõr an Anij maroñ ñan kõmour ro remej. Jijej ear kõmour Lazerõs im̦aan mejãn elõñ armej. Rũkaki ro an kabuñ eo an RiJu ro me rar lukkuun dike Jijej, rar bar loe men in. Bõtab, rar jab ba bwe ej juon menin kabwilõñlõñ eriab. Joñan rar ba: “Jej et kiiõ? Ekanooj lõñ jerbal ko rel̦l̦ap l̦ein ej kõm̦m̦ani.” (Jon 11:47, UBS) Elõñ armej rar lol̦o̦k Lazerõs. Ke rar loe bwe ebar mour, elõñ iaaer rar likũt aer tõmak ilo Jijej. Rar kile bwe men eo ear wal̦o̦k ñan Lazerõs ej kam̦ool bwe Anij ear jilkintok Jijej. Joñan an kar buñbuñ ennaan eo kõn Lazerõs, rũkaki ro an kabuñ eo an RiJu ro rar pepe in m̦ane Jijej im Lazerõs jim̦or.​—Jon 11:53; 12:9-11.

13. Etke jemaroñ tõmak bwe Jeova enaaj bar kõmour ro remej?

¹³ M̦ool ke bwe ro remej renaaj bar mour? Aet. Jijej ear katakin armej ro bwe m̦õttan jidik “ro otemjej rej pãd ilo lõb ko” renaaj jerkak jãn mej. (Jon 5:28) Ewi wãween an naaj men in wal̦o̦k? Eokwe, keememej bwe Jeova ear kõm̦anm̦an men otemjej. Ear kõm̦anm̦an armej ro, im ewõr an maroñ ñan kõm̦m̦an bwe ren bar mour. Jemaroñ ke tõmake men in? Jeova emaroñ ke keememej aolep armej ro remej? Ekkar ñan Baibõl̦, Anij emaroñ keememej aolep iju ko ilañ me joñan aer lõñ jejjab maroñ bwini. Joñan, em̦õj an kõm̦m̦an etan iju kein kajjojo! (Aiseia 40:26, UBS) El̦aññe Jeova emaroñ keememej aolepen iju kein, emaroñ ke keememej aolep armej ro rejitõnbõro ippãd im remej? Aet! Jeova Anij ej keememej kajjojo iaaer im aolep wãween ko ippãer, im m̦õttan jidik enaaj kõm̦m̦an bwe ren bar mour.

14, 15. Ewi wãween an kar Job kaalikkar eñjake eo an Jeova kõn iien eo ro remej renaaj bar mour?

¹⁴ Ta eñjake eo an Jeova kõn ro remej? Baibõl̦ ej ba bwe Jeova ekõn̦aan bwe ro remej ren bar mour. Em̦m̦aan eo etiljek etan Job ear kajjitõk: “El̦aññe juon armej emej, enaaj bar mour ke?” Job ear jel̦ã bwe ñe enaaj mej, Anij enaaj keememeje. Ear ba ñan Jeova: “El̦aññe Kwõnaaj kũr, innem inaaj uwaak Eok; Kwõnaaj kõn̦aan men in kõm̦m̦an an Peim̦.”​—Job 14:13-15.

¹⁵ Kõl̦mãnl̦o̦kjen̦ m̦õk kõn men in! Jeova ej kijoororetok iien eo enaaj kõjepl̦aaktok ro remej bwe ren bar mour. Kwõjjab ke m̦õn̦õn̦õ kõn men in? Ak kiiõ, wõn ro renaaj bar mour? Im ia eo renaaj mour ie?

“RO OTEMJEJ REJ PÃD ILO LÕB KO”

16. Enaaj ewi wãween lal̦ in ñe ro remej renaaj bar mour?

¹⁶ Bwebwenato ko ilo Baibõl̦ kõn armej ro rar mej im bar mour, rej kaalikkar ta eo Anij enaaj kõm̦m̦ane ilo raan ko rej pãd im̦aan. Ke armej rein rar bar mour, rar m̦õn̦õn̦õ kõnke rar maroñ bar pãd ippãn ro rejitõnbõro ippãer. Enaaj ãindein ilju im jekl̦aj ñe ro remej renaaj bar mour. Ãinwõt ad kar katak kake ilo Katak 3, ej ankilaan Anij bwe aolepen lal̦ in en juon pedetaij. Innem, ro remej renaaj l̦ak bar mour, reban bar jokwe ilo juon jikin ewõr kowadoñ, tarin̦ae, im nañinmej. Ak renaaj mour ñan indeeo ioon lal̦ in im jokwe ilo juon jikin eaiboojoj me enaaj l̦ap m̦õn̦õn̦õ im aenõm̦m̦an ie.

17. Wõn ro renaaj jerkak im mour?

¹⁷ Ak kiiõ, wõn ro renaaj bar mour? Jijej ear ba bwe “ro otemjej rej pãd ilo lõb ko, renaaj roñ ainikien, im naaj diwõjtok.” (Jon 5:28, 29) Bokin Revelesõn 20:13 ej bar ba: “Lo̦meto ear lel̦o̦k ro remej me rar ilo e, im Mej im Hedis rar lel̦o̦k ro remej me rar ilo er.” (Lale Kõmel̦el̦e ko Jet im katak eo etan “Ta in Sheol im Hedis?”) Elõñ pilien armej ro em̦õj aer mej. Bõtab, rein aolep me rej pãd ilo lõb ko libwier renaaj diwõjtok im renaaj bar mour. Rijjilõk Paul ear ba: “Armej otemjej, ro rem̦m̦an im ro renana, renaaj jerkak jãn mej.” (Jerbal 24:15, UBS) Ta mel̦el̦ein men in?

18. (1) Wõn “ro rem̦m̦an” im renaaj bar mour? (2) Im ta l̦õmn̦ak eo am̦ kõn men in?

¹⁸ “Ro rem̦m̦an” ekitibuj aolep ro jaar katak kake er ilo Baibõl̦ me rar mour m̦okta jãn an kar Jijej itok ñan lal̦. Jet iaan rein ej Noa, Ebream, Sera, Moses, Rut, Ester, im ebar lõñ ro jet. Kwõmaroñ katak kõn jet iaan em̦m̦aan im kõrã rein me rar tiljek ñan Anij ilo Hibru jebta 11. “Ro rem̦m̦an” ebar kitibuj armej ro doon Jeova me rar mej ilo raan kein. Jej lukkuun kam̦m̦oolol Anij kõn kõjatdikdik in ear letok kõnke ej jipañ kõj bwe jen jab mijak in mej.​—Hibru 2:15.

19. (1) Wõn armej “ro renana”? (2) im ta eo Anij enaaj lel̦o̦k ñan er?

¹⁹ Ak ta kõn aolep armej “ro renana” im rar jab jerbal ñan Jeova kõn aer kar jaje kõn e? Jeova eban mel̦o̦kl̦o̦k rein meñe emaroñ kar nana men ko rar kõm̦m̦ani. Renaaj bar mour ñan aer katak kõn Anij eo em̦ool bwe ren maroñ oktak im erom armej ro doon. Ium̦win 1,000 iiõ, ro remej renaaj bar mour im Jeova enaaj lel̦o̦k iien ñan aer kobal̦o̦k ippãn ro rem̦m̦an im jerbal ñane. Baibõl̦ ej n̦aetan iien in Raanin Ekajet eo an Anij.b (Lale kõmel̦el̦e eo itulal̦.) Iien in eban juon iien ekaamijak ak enaaj juon iien ekalañlõñ.

20. Ta in Kena, im wõn ro rej etal ñan Kena?

²⁰ Mel̦el̦ein ke bwe aolep ro remej renaaj bar mour? Ejjab. Baibõl̦ ej ba bwe jet armej rar mej im rej pãd ilo Kena. (Luk 12:5) Ta in “Kena”? Kena ej etan juon jikin jo̦kpej me ekar pãd inabõjin Jerusalem ilo iien ko etto. Ilo tõre ko an Jijej, rekõn tũli kwõpej ko im ãnbwinnin rimej ro ilo jikin in. Kar jo̦kpeje im tile ãnbwinnin armej ro me RiJu ro rar l̦õmn̦ak bwe joñan aer nana, ejekkar kalibwin er im bwe ejjel̦o̦k aer kõjatdikdik ñan bar mour. Kõn men in, Kena ej kõkkar kõn mej ñan indeeo. Meñe Jijej eo enaaj ekajete ro remour im ro remej, bõtab Riekajet eo el̦aptata ej Jeova. (Jerbal 10:42) Jeova ejãmin kõmour ro remej me ej ekajet er im lo bwe er armej nana im rar jab kõn̦aan oktak jãn kõm̦m̦an ko aer.

RO RENAAJ JERKAKPEJE ÑAN MOUR ILAÑ

21, 22. (1) Ta kõjatdikdik eo juon ñan ro remej? (2) Wõn eo m̦oktata Anij ear kõjerkakpejeiki ñan mour ilañ?

²¹ Baibõl̦ ej kwal̦o̦k kõn bar juon kõjatdikdik ñan ro remej. Kõjatdikdik in ej ñan ro renaaj jerkakpeje im mour ilañ. Im rein renaaj erom enjel̦. Ewõr juon wõt armej me Baibõl̦ ej kwal̦o̦k kõn an kar jerkakpeje im etal ñan lañ. Armej in ej Jijej Kũraij.

²² Meñe rar m̦an Jijej ke ear pãd ioon lal̦ in, ak Jeova ear jab kõtl̦o̦k bwe Nejin en mej wõt im pãdwõt ilo lõb. (Sam 16:10; Jerbal 13:34, 35) Anij ear kajerkakpeje Jijej, bõtab ejjab ilo ãnbwinnin armej. Rijjilõk Piter ear ba bwe Kũraij ear “mej ilo ãnbwin, ak ear mour ilo jetõb.” (1 Piter 3:18, UBS) Men in ear juon menin kabwilõñlõñ el̦ap. Anij ear kajerkakpeje Jijej bwe en bar mour ãinwõt juon enjel̦ ekajoor ilañ. (Riit 1 Korint 15:3-6.) Jijej eo m̦oktata me ear bõk jeraam̦m̦an eo ñan jerkakpeje im etal ñan lañ. Bõtab, kwaar jel̦ã ke bwe ebar wõr jet renaaj jerkakpeje im mour ilañ?​—Jon 3:13.

23, 24. Wõn ro rej uwaan ‘bwij eo edik’ an Jijej, im jete oraer?

²³ M̦okta jãn an kar Jijej mej, ear ba ñan rũkal̦oor ro an retiljek bwe enaaj ilo̦k im ‘kõppooj jikier’ ilañ. (Jon 14:2) Jijej ear ba bwe ro renaaj jerkakpeje ñan mour ilañ rej ãinwõt juon “bwij edik.” (Luk 12:32) Jete oran armej ro im rej pãd ilo kumi in edik? Baibõl̦ ej letok uwaak eo. Rijjilõk Jon ear ba ilo Revelesõn 14:1: “Iar lale, im lo, L̦aam̦ eo [Jijej Kũraij] ear jutak ioon tol̦ Zaion, im ippãn 144,000, em̦õj je etan im etan Jemãn ioon dem̦aer.”

²⁴ Aolep Kũrjin rein 144,000 me ebar kitibuj rijjilõk ro retiljek an kar Jijej, rej bõk kõjatdikdik eo ñan jerkakpeje im mour ilañ. Ñããt eo armej rein renaaj jerkakpeje ñan mour ilañ? Rijjilõk Paul ear ba bwe men in enaaj wal̦o̦k ilo tõre eo Jijej enaaj jino an irooj ilo Aelõñ eo an Anij. (1 Korint 15:23) Ilo am̦ naaj katak ilo Katak 9, kwõnaaj kile bwe jej mour ilo tõre in. Rainin, ewõr jet wõt uwaan 144,000 me rej mour wõt ijin ioon lal̦. Ñe bween rũkkapit rein rej kiil l̦o̦k mejãer im mej, rej kajju jerkakpeje im mour ilañ. (1 Korint 15:51-55) Ak ta kõn ro jet? Eokwe, enañin aolep ro remej rej kõttar ñan iien eo renaaj jerkak im mour indeeo ilo Pedetaij ijin ioon lal̦.

25. Ta eo jenaaj etale ilo katak eo tok juon?

²⁵ Jeova enaaj jol̦o̦k mej ñan indeeo! (Riit Aiseia 25:8, UBS.) Ak ta kõn ro me renaaj mour ilañ? Ta eo renaaj kõm̦m̦ane ilañ? Eokwe, renaaj kobal̦o̦k ippãn Kũraij im tõl ippãn ilo Aelõñ ak kien eo ilañ. Jenaaj katak kõn kien in ilo naaj katak eo tok juon.