E Meletlet Kiñ Solomon

SOLOMON ej juõn likao ilo ien eo ej erõm kiñ. Ej yokwe Jeova, im ej bokake nan in katak ko remõn me Devid jemen e ar lelok ñõn e. E buñburuen Jeova kin Solomon, im kin men in juõn boñ ej ba ñõn e ilo juõn tõnõk: ‘Solomon, ta eo kwo kõnan bwe in lewõj ñõn yuk?’

Solomon ej uak im ba: ‘Jeova aõ Anij, Ña I lukkun drik im I jaje kilen iroij im tel. Inem kwon letok ñõn iõ meletlet, bwe en jimwe aõ iroij ion armij ro am.’

E buñburuen Jeova kin kajitõk eo an Solomon. Kin men in Ej ba: ‘Kin am kar kajitõk men in, meletlet, im kw’ar jab kajitõk ñõn yuk mour e aitok, ak mweiuk ko ñõn yuk, I naj lewõj bwe kwon meletlet jen jabrewõt ro mokta jen yuk ak elikõm. Im I naj bareinwõt lewõj men ko kw’ar jab kajitõk kaki, mweiuk im ñiãjo.’

Elikin jirik ien, ruo kõra rej itok ñõn iben Solomon kin juõn abañ elap. ‘Kimro kõra in kimij jokwe ilo juõn wõt im,’ juõn iair ej kamelele. ‘I ar keutak juõn nejiõ ladrik, im elikin ruo ran e ar bareinwõt keutak juõn nejin ladrik. Inem juõn boñ e ar mij ladrik eo nejin. Ak ke I ar kiki, e ar dror ladrik en nejin e mij ituriõ im bõk ladrik eo nejiõ. Ke I ar ruj im lo ajiri eo e mij, I ar jela bwe ejjab nejiõ.’

Ke e ar ba men in, kõra eo juõn ej ba: ‘Jaab! Ajiri eo e mour ej nejiõ, im eo e mij ej nejin!’ Kõra eo mokta ej uak im ba: ‘Jaab! Ajiri en e mij ej nejõm, im eo e mour ej nejiõ!’ Im eindrein an limaro akwaili dron. Solomon e naj et kiõ?

Ej ba bwe ren bõktok juõn jãji, im ke rej bõktok, ej ba: ‘Ren karãjete niñniñ eo ilo ruo mõttõn, im kajojo lok mõttõn ko ñõn kõra ro.’

‘Jaab!’ lukkun jinen ajiri eo ej lamij. ‘Kwon joij im jab mõn niñniñ ne. Lelok e ñõn lio!’ Ak kõra eo juõn ej ba: ‘Ejelok en naj nejin iarro; kwon etal wõt im karãjete.’

Ilo ien in Solomon ej konono im ba: ‘Komin jab mõn ajiri ne! Lelok e ñõn kõra eo mokta. Lukkun jinen ne.’ Solomon e jela bwe lukkun jinen eo kinke ej mõnõnõ in lelok e ñõn kõra eo juõn bwe ren jab mõne. Ke armij ro rej roñ kin wãwen an kar Solomon ekajete men in, rej mõnõnõ bwe eor juõn air kiñ e meletlet.

Ilo ien eo Solomon ej iroij, Anij ej kajerammõn armij ro ilo an kõmõn bwe brij en kadrek elap wit im barli, grep im fig, im ekõn ko jet. Armij ro rej kõnõk nuknuk ko remõn im jokwe ilo mokko remõn. E kanuij bwe men otemjej ñõn aolep.