Kein Jipañ ñan Kein Katak eo Ad, Jerbal eo Ad im Wãween Ad Mour
Eprõl̦ 2-8
KATAK KO RAORÕK JÃN NAANIN ANIJ | MATU 26
“Kwõjkwõjin Kijoone im Kwõjkwõjin Keememej Mej eo an Jesus—Men ko Reãinl̦o̦k Wõt Juon im Men ko Reoktak”
nwtsty-E pija eo
Kwõjkwõjin Kijoone
Men ko raorõk kar kõbwebwein Kwõjkwõjin Kijoone eo ej: (1) juon koon in jiip em̦õj jinkadoole (ejjel̦o̦k juon diin menninmour in eaikuj bwilo̦k); (2) pilawã ejjab kauwe; im (3) bõlõk ko remeo. (Ex 12:5, 8, UBS; Bõn 9:11) Ekkar ñan juon bokin kien an RiJu etan Mishnah, bõlõk ko remeo remaroñ kar lettuce, chicory, pepperwort, endive, im dandelion. Aer meo̦ ear kakeememej er kõn aer kar lukkuun eñtaan ke rar kõm̦akoko ilo Ijipt. Jesus ear kõkkar kõn bread eo ejjab kauwe ñan ãnbwin eo ãnbwinnin eweeppãn. (Mt 26:26, UBS) Im rijjilõk Paul ear n̦aetan Jesus “ad lamb in Kijoone.” (1Ko 5:7, UBS) Im ilo kar raan ko an Jesus, (4) wain, ej m̦õttan men ko rekõn kõpooji im idaak ilo Kwõjkwõjin Kijoone eo. Jesus ear kõkkar kõn wain eo ñan bõtõktõkin, eo enaaj kar to̦o̦rl̦o̦k ãinwõt juon menin katok.—Mt 26:27, 28, UBS.
nwtsty-E kõmel̦el̦e ko kõn eoon eo ilo Mt 26:26, UBS
Men in [ej kõkkar kõn, NW]: Naan eo ilo kajin Grik ej e·stinʹ (mel̦el̦ein “ej” ilo ukok eo kõn naan kõn naan) ak ilo eoon in emaroñ mel̦el̦ein “ej kõkkar kõn, ej mel̦el̦ein, ej jutak kõn.” Rijjilõk ro rar mel̦el̦e ta mel̦el̦ein naan kein an Jesus kõnke ãnbwin eo eweeppãn ãnbwinnin Jesus im bread eo ejjab kauwe rar jim̦or pãd im̦aan mejãer. Kõn men in, bread eo ejjab jitõñl̦o̦k ñan lukkuun ãnbwinnin im kanniõkin Jesus. Kar kõjerbale ejja naanin Grik in wõt ilo Mt 12:7, im elõñ ukokin Baibõl̦ ko rel̦ak ukote rej ba, “ej kõkkar kõn.”
nwtsty-E kõmel̦el̦e ko kõn eoon eo ilo Mt 26:28, UBS
bõtõktõkũ, eo ej kapene bujen eo an Anij: Bujen eo ekããl, me ikõtaan Jeova im rũkkapit ro, ear jino an jerbal ke Jesus ear mej im katok kõn mour eo an. (Hi 8:10, UBS) Ilo ijin, Jesus ej kõjerbal ejja naan ko wõt Moses ear kõjerbali ilo iien eo ear juon rũkõllaajrak ikõtaan Jeova im aelõñin Israel im ear ejaak bujen eo kõn Kien Moses, ilo kar Tol̦ Sainai. (Ex 24:8, UBS; Hi 9:19-21) Ãinwõt an bõtõktõkin koon in kau im ko̦o̦t ko kar kapene bujen eo kõn Kien Moses me ikõtaan Anij im aelõñin Israel, bõtõktõkin Jesus ear kapene bujen eo ekããl me Jeova ear kõm̦m̦ane ippãn Israel an Anij. Im bujen in ear jino jerbal ilo raanin Pentekost eo ilo 33 C.E.—Hi 9:14, 15.
Kal̦apl̦o̦k Am̦ Mel̦el̦e
nwtsty-E kõmel̦el̦e ko kõn eoon eo ilo Mt 26:17, UBS
Ilo raan eo m̦oktata in Kwõjkwõjin Bread Ejjab Kauwe: Ear jinoe Kwõjkwõjin Bread Ejjab Kauwe ilo Nisan 15 raan, raan eo ãlikin Kwõjkwõjin Kijoone eo (ak Nisan 14 raan), im 7 raan kar aetokan. (Lale bok jidikdik eo etan Kein Jipañ ñan Katak Naanin Anij, M̦õttan 19.) Bõtab, kõn an raan eo me rej kõm̦m̦ane Kwõjkwõjin Kijoone eo lukkuun epaake kwõjkwõj in, ilo iien ko an Jesus rar kobaikl̦o̦k Nisan 14 raan ilo iien in el̦ap im kõm̦m̦ane ium̦win 8 raan. Eñin unin jet iien rar bar n̦aetan Kwõjkwõjin Kijoone eo bwe ej “Kwõjkwõjin Bread Ejjab Kauwe.” (Luk 22:1, UBS) Ilo eoon ko iturin eoon in, rej kaalikkar bwe naan kein “ilo raan eo m̦oktata in,” emaroñ bar mel̦el̦ein “ilo raan eo m̦okta jãn.” (Keidi Jon 1:15, 30, me rar ukote naanin Grik eo ej mel̦el̦ein “m̦oktata” [proʹtos] ñan “m̦okta jãn.” Eoon in ej ba “ear m̦okta jãn [proʹtos] eõ.”) Kõn men in, naanin Grik eo im m̦anit eo an RiJu, rej kaalikkar bwe rũkal̦oor ro an Jesus rar kwal̦o̦k kajjitõk eo aer ilo kar Nisan 13 raan. Ke ear raan wõt ilo kar Nisan 13, rũkal̦oor ro rar kõpooje men ko rar aikuji ñan Kwõjkwõjin Kijoone eo, im tokãlik rar kõm̦m̦ane ke “ejota,” eñin iien eo ej jino Nisan 14 raan.—Mk 14:16, 17, UBS.
nwtsty-E kõmel̦el̦e ko kõn eoon eo ilo Mt 26:39
en ilo̦k kab in jãn Eõ: Ilo Baibõl̦, ekkã an kõjerbal “kab” ñan kõkkar kõn ankilaan Anij, im “m̦õttan eo kar lel̦o̦k kun̦aan” juon armej. Ejjel̦o̦k pere bwe Jesus ear lukkuun inepata ñe mej eo an enaaj kananaik etan Anij kõn aer kar liaakel̦o̦k im ba ej blaspim im ej juon rinana. Men in ear kõm̦akũti bwe en jar ñan Anij im ba bwe en bõk “kab” in jãne.
Eprõl̦ 9-15
KATAK KO RAORÕK JÃN NAANIN ANIJ | MATU 27-28
“Ilo̦k im Kõm̦m̦an Rũkal̦oora—Etke, Ia, im Ewi Wãween?”
‘Komin Illok Im Kõmman Ri Kalor Ro’
4 Jesus ewõr an maroñ ion congregation eo an, im jen 1914 mantak ear kajur ion Ailiñ eo ekãl Anij ear kajutake. (Dri Kolosse 1:13; Reveles̃õn 11:15) Ej archenjel eo im kin men in ej kajur ion elõñ buki million enjel ro ilañ. (1 Dri Tessalonika 4:16; 1 Piter 3:22; Reveles̃õn 19:14-16) Jemen ear kamaroñ e bwe en kokkure “kajur otemjej an iroij rõn kab kieir im air maroñ otemjej” rej jumae kien ko rewãnik. (1 Dri Korint 15:24-26; Dri Epesõs 1:20-23) Kajur eo an Jesus ejjab jelet ro remour wõt. Ej Dri Ekajet ro remour im ro remij” bareinwõt ewõr kajur eo me Anij ear leloke ñan kajerkakbijeik ro rar mij. (Jerbal 10:42; Jon 5:26-28) Emol bwe jej aikwij watõk juõn kien jen Eo ewõr kain kajur rot in einwõt juõn kien elap an aorõk. Eñin unin, jej mõnõnõ in kautiej im bokake kien eo an Christ ñan ‘illok im kõmman dri kalor ro.’
nwtsty-E kõmel̦el̦e ko kõn eoon eo ilo Mt 28:19, UBS
kõm̦m̦an bwe ren rũkal̦oora: Ilo kajin Grik ej ma·the·teuʹo im emaroñ mel̦el̦ein “katakin” ñe juon ej katakin juon armej bwe en l̦oore buñtõn neen ak bwe en rũkal̦ooran. (Keidi wãween an Mt 13:52 kõjerbale naan in, me kar ukote ñan “katak.”) Naan kein “peptaiji” im “katakin” rej kwal̦o̦k ta ko juon ej aikuj kõm̦m̦ani ñan pokake kien eo ñan ‘kõm̦m̦an rũkal̦oor.’
armej otemjej ijoko jabdewõt: Ukok eo kõn naan kõn naan ej “aelõñ otemjej,” bõtab eoon ko iturin eoon in rej kwal̦o̦k bwe naan kein rej jitõñl̦o̦k ñan kajjojo armej jãn aelõñ otemjej, kõnke naan eo ilo kajin Grik me kar ukote ñan peptaiji er ej jitõñl̦o̦k ñan armej ro, im jab “aelõñ ko.” Kien in me ej ñan tõpar “armej otemjej ijoko jabdewõt,” ear juon kien ekããl. M̦okta jãn an kar Jesus kõm̦m̦ane jerbalin kwal̦o̦k naan eo an, Baibõl̦ ej kwal̦o̦k bwe riaelõñ ko rar ruwainene ñan Israel el̦aññe rar itõm kabuñ ñan Jeova. (1Kñ 8:41-43) Bõtab, kien in an Jesus bwe rũkal̦oor ro an ren kwal̦o̦k naan ñan armej otemjej im jab RiJu ro wõt, ej kaalikkar bwe jerbalin kõm̦m̦an rũkal̦oor ej aikuj pãdjaake lal̦ in.—Mt 10:1, 5-7; Rev 7:9.
nwtsty-E kõmel̦el̦e ko kõn eoon eo ilo Mt 28:20, UBS
katakin er: Naanin Grik eo kar ukote “ñan katakin” ej kitibuj lel̦o̦k naanin jiroñ, kõmel̦el̦e, kõjerbal naan ko renaaj kareel bũruon armej, im lel̦o̦k kein kam̦ool ko. (Lale nwtsty-E kõmel̦el̦e ko kõn eoon ko ilo Mt 3:1; 4:23, ilo Kein Jipañ ñan Kein Katak eo Ad an Jãnwõde 2018.) Aer katakin er ñan pokake naan ko otemjej an Jesus enaaj kar juon men ej wõnm̦aanl̦o̦k wõt, me ekitibuj katakin armej ro men ko ear katakin er kaki, l̦oore katak ko an, im anõke joñak eo an.—Jon 13:17; Ep 4:21; 1Pi 2:21.
Kal̦apl̦o̦k Am̦ Mel̦el̦e
nwtsty-E kõmel̦el̦e ko kõn eoon eo ilo Mt 27:51, UBS
roñõl nuknuk eo ej toto: Ak katiiñ eo. Katiiñ in eaiboojoj me ear ettoto ilo tampel̦ eo ekar kõjepel Jikin eo Eokkwõjarjar Otem Kwõjarjar jãn Jikin eo Eokkwõjarjar ilo tampel̦ eo. Ekkar ñan m̦anit im bwebwenato ko an RiJu ro, rej kwal̦o̦k bwe joñan an katiiñ eo eddo im kilep ekar 60 ne aetok, 30 ne depakpak, im 2.9 inij mijel. Ilo an kar potak ñan ruo m̦õttan, Jeova ear kwal̦o̦k joñan an kar lukkuun illu ippãn ro rar m̦an Nejin im ear bareinwõt kaalikkar bwe kõjjem̦ eo ñan del̦o̦ñ ilañ epel̦l̦o̦k kiiõ.—Hi 10:19, 20.
tampel̦: Ak lokatok. Naanin eo ilo kajin Grik ej na·osʹ im ej jitõñl̦o̦k ñan jikin eo iol̦apl̦ap me ruum̦ in Jikin eo Eokkwõjarjar im Jikin eo Eokkwõjarjar Otem Kwõjarjar rej pãd ilowaan.
nwtsty-E kõmel̦el̦e ko kõn eoon eo ilo Mt 28:7
kõnnaanek ro rũkal̦ooran em̦õj An jerkakpeje: Kõrã rein rej rũkal̦oor ro m̦oktata me kar jiroñ er bwe em̦õj an Jesus jerkakpeje. Ejjab men in wõt, ak kar bar jiroñ er bwe ren ilen kõnnaanek rũkal̦oor ro jet. (Mt 28:2, 5, 7) Ekkar ñan m̦anit eo an RiJu me ejjab pedped ioon kien ko an Anij, ejjab mãlim an juon kõrã jutak im̦aan jikin ekajet im kõnono. Bõtab, enjel̦ eo an Jeova ear kautiej kõrã ro ilo an kar lel̦o̦k jerbal in ekalañlõñ bwe ren ilen kõnnaanek rũkal̦oor ro jet.
Eprõl̦ 16-22
KATAK KO RAORÕK JÃN NAANIN ANIJ | MARK 1-2
“Em̦õj Jeorl̦o̦k Jerawiwi ko Am̦”
jy-E 67 pãr. 3-5
“Em̦õj Jeorl̦o̦k Jerawiwi ko Am̦”
Ke Jesus ej pãd ilo juon ruum̦ eobrak kõn armej im katakin er, emãn em̦m̦aan rar bõktok juon armej eakã me ej babu ioon juon kein ekkotaak rinañinmej. Rekõn̦aan bwe Jesus en kõmour em̦m̦aan in m̦õttaer. Bõtab, kõn an obrak ijo kõn armej, rejjab maroñ in ‘kepaakel̦o̦k ñan Jesus.’ (Mark 2:4, UBS) L̦õmn̦ak m̦õk kõn aer bũrom̦õj im inepata kõn men in. Innem, rej tallõñ ñan bõrwajin m̦weo me ebũl̦ããt (flat) ioon im jino aer tũm̦wi rã ko ie bwe en pel̦l̦o̦k jidik bõrwaj eo. Ãlikin rej doorlal̦l̦o̦k l̦eo kõn men eo ej babu ioon.
Jesus ej ke illu kõn aer itok im ko̦kkure iien an bwebwenato ippãn armej ro? Ejjab ñan jidik! Elukkuun m̦õn̦õn̦õ ke ej lo joñan tõmak eo aer im ej ba ñan em̦m̦aan eo eakã: “Em̦õj jeorl̦o̦k jerawiwi ko am̦.” (Matu 9:2) Bõtab, Jesus emaroñ ke lukkuun jeorl̦o̦k jerawiwi ko an armej? Eokwe, ke skraib im Parisi ro rej roñ men in, rej ba ilo bũrueer: “Enañin maroñ kõnono n̦ae Anij joñan dein! Ejjel̦o̦k juon armej emaroñ jeorl̦o̦k jerawiwi ko, ak Anij wõt!”—Mark 2:7, UBS.
Kõn an Jesus jel̦ã l̦õmn̦ak ko aer, eba ñan er: “Etke kom̦ij l̦õmn̦ak rot kein? Ewi in epidodol̦o̦k ba ñan riakã in, ‘Em̦õj jeorl̦o̦k jerawiwi ko am̦’ ak ba ‘Jerkak, bõk kiniõm̦ im etetal’?” (Mark 2:8, 9, UBS) Aet, Jesus emaroñ jeorl̦o̦k jerawiwi ko an armej ikijjeen katok in mour eo an me ejjabto jãn iien in, enaaj ajel̦o̦k ñan Anij.
nwtsty-E kõmel̦el̦e ko kõn eoon eo ilo Mk 2:9, UBS
Ewi in epidodol̦o̦k: Epidodol̦o̦k an juon armej ba bwe emaroñ jeorl̦o̦k jerawiwi ko an armej kõnke ejjab aikuj in kõm̦m̦an jabdewõt ñan kam̦ool ñan ro jet bwe ren lukkuun tõmake. Bõtab ñan ba, Jerkak . . . im etetal, men in ekitibuj juon menin kabwilõñlõñ ñan kaalikkar ñan aolep bwe ewõr an Jesus maroñ ñan jeorl̦o̦k jerawiwi ko. Bwebwenato in im eoon eo ilo Ais 33:24 (UBS), rej kwal̦o̦k bwe nañinmej ej wal̦o̦k jãn jerawiwi eo jaar bõdañe jãn Adam.
Kal̦apl̦o̦k Am̦ Mel̦el̦e
nwtsty-E kõmel̦el̦e ko kõn eoon eo ilo Mk 1:11
ainikien ej itok jãn lañ: Eñin iien eo jinointata iaan iien ko jilu ilo bokin Gospel ko, me ej kwal̦o̦k bwe Jeova make ear kõnono lal̦tak ñan armej ro.
Kwe Nejũ: Ke Jesus ear juon jetõb ilañ, ear Nejin Anij. (Jon 3:16) Im jãn iien eo ke ear l̦otak ãinwõt juon armej, ear “nejin Anij” ãinwõt kar Adam ilo jinoin ke ear weeppãn. (Luk 1:35; 3:38) Bõtab, naan kein an Anij ijin rejjab ñan kaalikkar wõt bwe Jesus ej Nejin. Ilo an kar Anij ba naan kein im an kar jetõb kwõjarjar itok ioon Jesus, Anij ear kwal̦o̦k bwe ej bõk Jesus bwe en Nejin ilo jetõb. Ewi wãween? Ej ilo an Jesus “bar l̦otak” im bõk kõjatdikdik eo ñan jepl̦aak im mour ilañ im ilo an jetõb kwõjarjar kapiti bwe en Kiiñ eo Anij ear kããlõte im bwe en Bũrij L̦apl̦ap.—Jon 3:3-6, UBS; 6:51; keidi Luk 1:31-33; Hi 2:17; 5:1, 4-10, UBS; 7:1-3.
Ij m̦õn̦õn̦õ kake Eok: Ak “ebuñbũruõ kõn eok; el̦ap aõ lañlõñ kake eok.” Kar kõjerbal ejja naan kein wõt ilo Mt 12:18, me kar quote tok jãn Ais 42:1 kõn Messaia eo kar kallim̦ur kake, ak Christ. An kar jetõb kwõjarjar itok ioon Jesus im an kar Anij kõnono ñan Nejin, rar kaalikkar bwe Jesus ej Messaia eo kar kallim̦ur kake.
nwtsty-E kõmel̦el̦e ko kõn eoon eo ilo Mk 2:28
Irooj in Jabõt: Jesus ear jitõñl̦o̦k naan kein ñan e make (Mt 12:8; Luk 6:5), ke ear kwal̦o̦k bwe ewõr an maroñ ioon raanin Jabõt ñan kõm̦m̦ane jerbal eo Jemãn ilañ ear jiroñe bwe en kõm̦m̦ane. (Keidi Jon 5:19, UBS; 10:37, 38.) Ilo raanin Jabõt, Jesus ear kõm̦m̦ane jet iaan menin kabwilõñlõñ ko rel̦l̦ap, me ekitibuj an kar kõmour ro renañinmej. (Luk 13:10-13, UBS; Jon 5:5-9; 9:1-14, UBS) Men in ear annañel̦o̦k men ko Jesus enaaj kõm̦m̦ani ñe enaaj tõl ilo Aelõñ eo an Anij, eo me enaaj ãinwõt juon raanin Jabõt ak raanin kakkije.—Hi 10:1.
Eprõl̦ 23-29
KATAK KO RAORÕK JÃN NAANIN ANIJ | MARK 3-4
“Kõmour ilo Raanin Jabõt”
jy-E 78 pãr. 1-2
Ta eo Emãlim ilo Raanin Jabõt?
Ke ebar raanin Jabõt, Jesus ej etal ñan im̦õn kabuñ eo, emaroñ ilo Galili. Ilo ijin, ej loe juon em̦m̦aan emej pein ianbwijmaroñ im nokjek addiin pein. (Luk 6:6, UBS) Skraib im Parisi ro rej reilo̦k im kalimjeke Jesus. Etke? Rej make kaalikkar un eo ilo aer kajjitõk ippãn im ba: “Emãlim kõmour ilo raan in Jabõt ke?”—Matu 12:10.
Rũtõlin kabuñ ro an RiJu rej ba bwe wãween eo wõt emãlim ñan kõmour rinañinmej ro ilo raanin Jabõt ej ñe mour eo an armej ro elukkuun pãd ilo kauwõtata. Ñan waanjoñak, ilo raanin Jabõt ejjab mãlim ñan korake neen juon armej ñe eiñrõk ak kajim̦we diin, kõnke wãween kein rejjab lukkuun kauwõtata ñan mour eo an. Innem alikkar bwe unin an skraib im Parisi ro kajitũkin Jesus ejjab kõnke rekõn̦aan jipañ em̦m̦aan eo me eñtaan kõn nañinmej eo an. Ak kõnke rej kajjioñ kappok ruõn Jesus bwe ren kinaakl̦o̦k.
jy-E 78 pãr. 3
Ta eo Emãlim ilo Raanin Jabõt?
Bõtab, Jesus ejel̦ã unin aer kwal̦o̦k kajjitõk in ñane. Ej lo bwe rũtõlin kabuñ rein rar kobaiktok jet l̦õmn̦ak ko rebõd im rejjab pedped ioon l̦õmn̦ak ko an Anij kõn kien eo ñan jab jerbal ilo raanin Jabõt. (Exodus 20:8-10) Ej kab m̦õj aer kar kananaiki kõn men ko rem̦m̦an ear kõm̦m̦ani ilo raanin Jabõt. Im kiiõ Jesus ej itõn bar lale ta eo renãj ba ilo an jiroñ em̦m̦aan eo emej pein im ba: “Kwõn wõnm̦aantak ñan ije im̦aan.”—Mark 3:3, UBS.
nwtsty-E kõmel̦el̦e eo kõn eoon eo ilo Mk 3:5, UBS
ear illu ke ear kalimjekl̦o̦k er, bõtab ear bareinwõt bũrom̦õj: Mark wõt ear jeje im kwal̦o̦k kõn eñjake eo an Jesus ke ear loe an rũtõlin kabuñ ro pen bũrueer. (Mt 12:13; Luk 6:10) Piter, kar juon eo em̦wilal̦ eñjake ko an, emaroñ kar e eo ear kwal̦o̦k ñan Mark kõn eñjake ko an Jesus ilo iien in.—Lale pija eo etan, Mel̦el̦e ko kõn Bokin Mark.
Kal̦apl̦o̦k Am̦ Mel̦el̦e
nwtsty-E kõmel̦el̦e ko kõn eoon eo ilo Mk 3:29
blaspim n̦ae Jetõb Kwõjarjar: Blaspim ej jitõñl̦o̦k ñan kananaik, ba naan ko reddo, im kõnono n̦ae Anij ak men ko rekkwõjarjar. Kõnke jetõb kwõjarjar ej itok jãn Anij, an juon wõnm̦aanl̦o̦k im jum̦aiki ak kõjekdo̦o̦ne wãween an jerbal ejjel̦o̦k oktak jãn ñe ej jum̦ae Anij. Ilo Mt 12:24, 28 im Mk 3:22 rej kwal̦o̦k bwe rũtõlin kabuñ ro an RiJu ro, rar loe bwe jetõb eo an Anij ear jerbal ippãn Jesus ke ear kõm̦m̦ani menin bwilõñ ko, bõtab rein rar ba bwe kajoor in ear itok jãn Setan Tepil̦ eo.
ewõr ruõn indeeo: Ej jitõñl̦o̦k ñan jerawiwi rot eo juon ej wõnm̦aanl̦o̦k wõt im kõm̦m̦ane ilo an jel̦ã ke enana, me ejjel̦o̦k jeorl̦o̦k bõd ñan indeeo; jerawiwi rot in ejjel̦o̦k menin katok enaaj maroñ kalbubuuki.—Lale kõmel̦el̦e ko kõn blaspim n̦ae Jetõb Kwõjarjar ilo eoon in.
Kwõjel̦ã Ke Mel̦el̦ein “Jeje Ko”?
6 Ta eo jemaroñ ekkatak jãn waanjoñak in? Kein kajuon, jej aikuj kile bwe ejjel̦o̦k ad maroñ ñan kam̦õkaj an juon rũkkatak kõm̦m̦an wõnm̦aanl̦o̦k. Meñe el̦ap ad kate kõj ñan jipañe, ak jejjab aikuj in iuuni bwe en peptaij. Jen kwal̦o̦k kautiej ñan rũkkatak eo im kile bwe e wõt ej aikuj make kããlõt el̦aññe ekõn̦aan ajel̦o̦k mour eo an ñan Anij. El̦aññe juon ej ajel̦o̦k mour eo an ñan Jeova, ak ejjab kõnke ej yokwe E, eokwe, Jeova eban m̦õn̦õn̦õ kake.—Sam 51:12; 54:6; 110:3.
7 Ta men eo kein karuo jej ekkatak jãn waanjoñak in? Ej bwe jen jab ebbeer ñe jejjab lo tõprak ilo ad katakin juon armej ilo iien eo jinointata jej katak ippãn. Jej aikuj kijenmej wõt. (Jemes 5:7, 8, UBS) Ñe jaar kate kõj ñan jipañ rũkkatak ro ak ejjel̦o̦k wõnm̦aanl̦o̦k rej kõm̦m̦ani, ejjab mel̦el̦ein bwe jejaje kilen katak ippãn armej ro. Armej ro wõt Jeova ej kõtl̦o̦k aer epaakel̦o̦k e, ej ro ettã bũrueer me rekõn̦aan ukot mour ko aer. (Matu 13:23) Innem, en jab nana ad mour ñe eiiet armej jej jipañ er bwe ren peptaij. Ippãn Jeova, tõprak ko jej kõm̦m̦ani ilo jerbalin kwal̦o̦k naan ejjab wawa ioon oran armej ro jej jipañ er ñan kõm̦m̦an wõnm̦aanl̦o̦k. Men eo eaorõktata ippãn ej ñe jej kate kõj joñan wõt ad maroñ.—Riit Luk 10:17-20; 1 Korint 3:8.
8 Men eo kein kajilu jej ekkatak jãn waanjoñak in ej bwe jemaroñ jab jel̦ã kõn bũruon armej im oktak ko rej kõm̦m̦ani. L̦õmn̦ak m̦õk kõn bwebwenato in. Ewõr ruo rippãlele rar katak ippãn juon mijinede. Rippãlele rein rar kajjitõk ippãn bwe ren erom rukwal̦o̦k naan. Innem, ke mijinede in ear ba bwe erro ej aikuj m̦okta jol̦o̦k kõbaatat, erro kar ba bwe rar bõjrak wõt jet allõñ remootl̦o̦k. Mijinede in ear lukkuun bwilõñ. Rippãlele rein ruo rar jel̦ã bwe Jeova enaaj baj loe wõt aerro kõbaatat jekdo̦o̦n ñe rej n̦ooje jãn jabdewõt. Erro kar bar jel̦ã bwe Jeova edike armej etao. Kõn men in, erro kar pepe ñe renãj etal wõt im kõbaatat m̦aan mejãn mijinede eo ak ñe erro nãj bõjrak. Aerro yokwe Jeova ear l̦apl̦o̦k meñe mijinede eo ear jab loe. Im yokwe eo aerro ñan Jeova ekar jipañ erro ñan kããlõte pepe eo ejim̦we.
Eprõl̦ 30–Mãe 6
KATAK KO RAORÕK JÃN NAANIN ANIJ | MARK 5-6
“Ewõr an Jesus Maroñ ñan Kõjerkakpeje Ro Rejitõnbõro Ippãd me Remej”
nwtsty-E kõmel̦el̦e ko kõn eoon eo ilo Mk 5:39
ejjab mej, a ej kiki: Ilo Baibõl̦, ekkã an keidi mej ñan kiki. (Sam 13:3; Jon 11:11-14; Jrb 7:60; 1Ko 15:51; 1Te 4:13) Ilo iien in, Jesus ej pojak in tõn kõmour ledik eo emej. Innem emaroñ kar ba naan kein ñan kaalikkar bwe ro remej remaroñ bar jepl̦aak im mour ãinwõt an juon armej me ear kiki im ettoñ, ruj ñe rej ko̦ruji. Kajoor eo ippãn Jesus ñan kõmour ledik eo ear itok jãn Jemãn, “eo Ej kõmour ro remej, im n̦aetan men ko rejjab pãd, ãinwõt el̦aññe rej pãd.”—Rom 4:17.
jy-E 118 pãr. 6
Juon Ledik Ej Bar Mour!
Jet iien m̦oktal̦o̦k, Jesus ear jiroñ ro ekar kõmour er bwe ren jab ba ñan jabdewõt kõn men eo ear kõm̦m̦ane ñan er. Ear bar ba men in ñan jinen im jemãn ledik in. Ak joñan an jinen im jemãn ledik in im armej ro jet lukkuun em̦m̦õn̦õn̦õ kõn men in ekabwilõñlõñ ear wal̦o̦k, rar kajeeded nuuj in “ñan aolepen aelõñ eo.” (Matu 9:26, UBS) El̦aññe kwaar loe aer kõmour juon eo ejitõnbõro ippam̦ me ear mej, alikkar bwe joñan am̦ nãj kar lukkuun m̦õn̦õn̦õ kwoban kar ikõñ wõt ak kwõnaaj kar karoñ ro jet kake. Eñin iien eo kein karuo Jesus ear kõjerkakpejeik ro rar mej.
Kal̦apl̦o̦k Am̦ Mel̦el̦e
nwtsty-E kõmel̦el̦e ko kõn eoon eo ilo Mk 5:19
kõnnaanek er: Iien in eoktakl̦o̦k jãn iien ko jet me Jesus ear jiroñ armej ro bwe ren jab kõnnaan kõn menin kabwilõñlõñ ko ear kõm̦m̦ani (Mk 1:44; 3:12; 7:36), kõnke ear ba ñan em̦m̦aan in bwe en ilo̦k im kõnnaanek ro nukũn kõn men eo ear wal̦o̦k. Bõlen unin an kar Jesus ba men in ej kõnke armejin ijo rar kajjitõk bwe en etal jãn jikin eo, im kõn men in eban maroñ kwal̦o̦k naan ñan er. Bareinwõt, men in enaaj kar kõm̦m̦an bwe en dikl̦o̦k an armej ro illu ñe renaaj roñ kõn piik ko nejier rejako.
nwtsty-E kõmel̦el̦e ko kõn eoon eo ilo Mk 6:11, UBS
jol̦o̦k bũñalñalin neemi: An rũkal̦oor ro kõm̦m̦ane men in ej ãinwõt ñe rej ba bwe enaaj ejjel̦o̦k rueer ñe Anij enaaj ekajete armej ro. Ejja naan kein wõt rej wal̦o̦k ilo Mt 10:14; Luk 9:5. Bõtab, Mark im Luk rej kobaik naan kein, menin kõnnaan ñan [ak “n̦ae”] er. Bareinwõt Paul im Barnebas rar ba bwe rũkal̦oor ro ilo Pisidia Antiok ren jol̦o̦k bũñalñalin neer (Jrb 13:51), im ãlikin an kar Paul kõm̦m̦ane juon men ãinl̦o̦k wõt men in ilo Korint ilo an pikpikũri nuknuk ko an, ear ba naan kein: “Bõtõktõkũmi en ioon bõrami! Ña irreo.” (Jrb 18:6) M̦anit kein ãinwõt, jol̦o̦k bũñalñalin neer im pikpikũr nuknuk ko aer, ear wõr an rũkal̦oor ro jel̦ã im mel̦el̦e kaki, kõnke RiJu ro me rar itoitak ñan ãne ko ãneen Riaelõñ ko rekõn pikpikũr ak jol̦o̦k jabdewõt men rej loe ke ettoon ilo juuj ko aer, m̦okta jãn aer juur ioon bwidejin aelõñ eo an RiJu ro. Bõtab, eoktak mel̦el̦e eo an Jesus ke ear jiroñ rũkal̦oor ro an bwe ren kõm̦m̦ane men in.