KATAK 6

Lukkuun Kaalikkar Boin eo ilo Juon Eoon

Jon 10:33-36

ILO TUKADU: Jab riit wõt eoon im kajju wõnm̦aanl̦o̦k ñan bar juon boin. Em̦m̦anl̦o̦k ñe kwõj lukkuun kaalikkar ñan armej ro kõn wãween an eoon eo ekkejell̦o̦k ñan boin eo kwõj kajjioñ kwal̦o̦ke.

KILEN AM̦ KÕM̦M̦ANE:

Kaalikkare naan ko raorõk. Ãlikin am̦ riiti juon eoon, kwal̦o̦k naan ko raorõk ilo eoon eo me rej ekkejell̦o̦k ñan boin eo kwõj kajjioñ kwal̦o̦ke. Kwõmaroñ kõm̦m̦ane men in ilo am̦ ãliji naan ko raorõk, ak kwõmaroñ kwal̦o̦k kajjitõk ko bwe armej ro ren loe naan ko raorõk ilo eoon eo.

El̦aññe kwõj kõjerbal naan ko reoktak jãn naan ko ilo eoon eo ñan ãliji mel̦el̦e eo ilo eoon eo, lale bwe en alikkar wõt naan ko raorõk ilo eoon eo im wãween an ekkejell̦o̦k ñan boin eo kwõj kajjioñ kwal̦o̦ke.
Lukkuun kõmeejl̦o̦k boin eo. El̦aññe kwaar kaalikkar boin eo ilo eoon eo kwõj itõn riiti, innem em̦m̦an el̦aññe kwõj kõmel̦el̦eiki wãween an naan ko raorõk ilo eoon eo ekkejell̦o̦k ñan boin eo.

Ilo iien eo kwõj kõmel̦el̦eiki eoon eo, em̦m̦an ñe Baibõl̦ eo am̦ ej pel̦l̦o̦k kõnke enaaj pidodo an armej ro lo an naan ko am̦ jejjet ippãn eoon eo ej kab m̦õj l̦o̦k am̦ riiti.
Kõmel̦el̦e ilo juon wãween epidodo. Kõjparok bwe kwõn jab kobaiktok mel̦el̦e ko rejjab menin aikuj im reban kaalikkare boin eo eaorõk. Lale ta eo em̦õj kadede an armej ro jel̦ã kake kõn katak eo bwe kwõn kããlõt ta mel̦el̦e ko jet kõn katak eo emenin aikuj ñan am̦ kwal̦o̦ki bwe kwõn jipañ armej ro ñan mel̦el̦e boin eo eaorõk.