Ãlikin an Adam im Iv diwõjl̦o̦k jãn jikin kallib Iden, ekar lõñ nejierro ajri. Etan l̦adik eo erũttotata nejierro in Kein. Kein ear juon rũkallib. Im etan l̦adik eo kein karuo nejierro in Ebel. Ebel ear juon rũlale jiip.

Juon raan Kein im Ebel rar lel̦o̦k menin katok ko aerro ñan Jeova. Kwõjel̦ã ke ta in menin katok? Menin katok ej juon menin lel̦o̦k ñan Anij. Jeova ear m̦õn̦õn̦õ kõn menin katok eo an Ebel, ak ear jab m̦õn̦õn̦õ kõn menin katok eo an Kein. Men in ear kõm̦m̦an bwe Kein en lukkuun illu. Jeova ear ba ñan Kein bwe en jol̦o̦k an illu bwe ñe ejjab, enaaj jujen kõm̦m̦ane juon men enana. Ak Kein ear jab roñjake.

Kein ear ba ñan Ebel: ‘Itok ippa ñan mel̦aaj en̦.’ Ke erro ej make iaaerro ilo mel̦aaj eo, Kein ear m̦ane l̦adik in jatin im emej. Kiiõ ta eo Jeova ear kõm̦m̦ane? Jeova ear kaje Kein ilo an kar jilkinl̦o̦ke ñan juon jikin ettol̦o̦k jãn baam̦le eo an. Im ear jab bar maroñ ro̦o̦ll̦o̦k.

Ta eo jemaroñ katak jãn bwebwenato in? Eokwe, jemaroñ jino illu ñe ejjab jejjet men ko ekkar ñan kõn̦aan ko ad. El̦aññe jej jino eñjake ad illu, ak ñe ro jet rej kile ad illu im rej ba jen jol̦o̦k ad illu, jen m̦õkaj im jol̦o̦k ad illu m̦okta jãn ad oktak im jujen kõm̦m̦ani men ko rejjab em̦m̦an.

Kõnke Ebel ear yokwe Jeova im kõm̦m̦ani men ko rejim̦we, Jeova enaaj keememej wõt e. Anij enaaj bar kõmouri Ebel ñe Enaaj kõm̦m̦an bwe lal̦ in en juon pedetaij.

Tokãlik, ear lukkuun lõñ armej ioon lal̦ in, im eitõn aolepeer rar nana. Jet iaan enjel̦ ro ilañ rar bar oktak im nana. Rar etal jãn ijo jikier ilañ im wanlal̦tak ñan lal̦ in. Kwõjel̦ã ke etke rar kõm̦m̦ane men in? Kõnke ren erom armej im pãlele ippãn kõrã ro ioon lal̦ in.

Innem, ear wõr nejin enjel̦ rein ippãn kõrã ro. Im ke l̦adik ro nejier rar rũttol̦o̦k, rar ineea im lukkuun dipen, im rar kam̦õrõ im kaamijak ro jet. Jeova ear jab kõn̦aan kõtl̦o̦k an men kein renana wõnm̦aanl̦o̦k wõt. Kõn men in, ear pepe in bõktok juon ibwijleplep ñan ko̦kkure rinana ro.

Ak ekar wõr juon em̦m̦aan ear oktak jãn aolep. Em̦m̦aan in ear yokwe Jeova. Etan in Noa. Ear wõr juon pãleen kõrã im jilu nejin l̦addik. Etaer in Shem, Ham, im Jepet, im kajjojo iaaer ear wõr pãleer. Jeova ear jiroñ Noa bwe en jek juon wa kileplep bwe e im baam̦le eo an ren maroñ uwe ie ñe eitok Ibwijleplep eo. Wa eo ear ãinwõt juon bo̦o̦k kileplep kõm̦m̦an jãn al̦al̦ im emaroñ eppepe ioon dãn. Jeova ear bar jiroñ Noa ñan bõktok bwijin kain menninmour ñan lowaan wa eo bwe ren maroñ bar el̦l̦ã im mour.

Noa im baam̦le eo an rar m̦õkaj im jino jek wa eo. Emaroñ kar bõk 50 iiõ ñan aer kõm̦m̦ane wa in. Rar l̦oore aolep men ko Jeova ear ba kõn kilen aer kõm̦m̦ane. Ilo iien in, Noa ear bareinwõt kakkõl armej ro kõn Ibwijleplep eo. Ak ejjel̦o̦k juon ear roñjake e.

Ãliktata, ear jejjet iien aer del̦o̦ñ ilowaan wa eo. Jen kiiõ lale ta eo ej wal̦o̦k.