Kõnono Ãinwõt Ñe Kwõj Bwebwenato

Men eo Pilip Ear Kõm̦m̦ane

PIJAIN ALWÕJ: Philip Preaches to the Ethiopian Eunuch

1. Alwõje PIJAIN ALWÕJ EO, ak riiti Jerbal 8:​30, 31. Innem etale kajjitõk kein:

1. Ewi wãween an kar Pilip jino bwebwenato ippãn ri-Itiopia eo?

2. Etke ear em̦m̦an wãween an kar Pilip jino bwebwenato ippãn em̦m̦aan in, im ta ko rar wal̦o̦k tokãlik?

Ta eo Jej Katak jãn Pilip?

2. El̦aññe jej bõk ad iien im roñjake armej eo im kõnono ãinwõt ñe jej bwebwenato, emaroñ pidodol̦o̦k an armej eo jej bwebwenato ippãn m̦õn̦õn̦õ in kwal̦o̦k l̦õmn̦ak ko an im roñjake ennaan eo jej kwal̦o̦k kake.

Anõke Pilip

3. Lale iturin mejãn armej eo im wãween an eñjake. Elõñ men ko kwõmaroñ katak kõn juon armej itok wõt jãn am̦ etale paotokin, wãween an m̦akũtkũt, im turin mejãn. Armej eo ej ke m̦õn̦õn̦õ in bwebwenato ippam̦? Kwõmaroñ jino kwal̦o̦k juon katak ilo Baibõl̦ ilo am̦ baj kajjitõk wõt im ba, “Kwaar jel̦ã ke bwe . . . ?” Ñe kwõj kile bwe armej eo ejjab kon̦aan bwebwenato, eokwe jab booje bwe en bwebwenato ippam̦.

4. Kwal̦o̦k kijenmej. Jab l̦õmn̦ak bwe kwõj aikuj kajju kõnnaan kõn Baibõl̦. Kõttar ñan iien eo ekkar im ejejjet ñan am̦ kwal̦o̦k kõn katak ko ilo Baibõl̦. Jet iien, men in emaroñ mel̦el̦ein bwe kwõj aikuj kõttar ñan iien eo tok juon ñe kwõnaaj bar jepl̦aak im bwebwenato ippãn armej eo.

5. Jel̦ã ukoktak. Armej eo emaroñ jino bwebwenato kõn juon men kwaar jab kõtmãne kake. Kõn men in, jekõn̦aan m̦õn̦õn̦õ in bwebwenato kõn juon men me eaorõk im ekkar ñan armej eo, meñe emaroñ mel̦el̦ein bwe komiro naaj bwebwenato kõn juon katak ilo Baibõl̦ me kwaar jab pojak in kõnono kake.