Debij Juõn Lemnak Ejokkin Wõt Juõn Kin Den In Kadõk
“Wain ej dri kajirere, dren in karek ej dri akwail; im jabrewõt eo ej bwir kake, e jab meletlet.” —JABÕN KENNAN KO 20:1.
1. Ewi wãwen ri jeje sam ear kwalok an kamolol kin jet ian men in letok ko remõn jen Jehovah?
“MEN in letok emõn im wãppen otemjelok re jen lõñ, im wõnlõltak jen Jemen maram ko,” ri kalor eo James ear je. (Jemes 1:17) Kin an buruen emmakit kin kamolol kin men in letok ko remõn im relõñ jen Anij, ri jeje sam ear al: “Ej kadreklok ujoij ñõn kiru ko, im mar ko in jibõñ armij, bwe en bõktok kijen jen lõl. Im wain ej kamõnõnõ buruen armij, im oil in kejatõltil turin mejen, im bred ej kakajur buruen armij.” (Sam 104:14, 15) Wine im den in kadõk ko jet, einwõt men in eddek ko, bread, im oil rej men in letok ko remõn jen Anij. Ewi wãwen jej aikwij kajerbali?
2. Ta kajitõk ko jenaj etale ikijen idak den in kadõk?
2 Juõn men in letok ekamõnõnõ ej juõn men emõn ñe ekkar wãwen am kajerbale. Ñan wanjoñok, honey ej “emõn wõt” ak “e jab emõn mõña elõñ hõnni.” (Jabõn Kennan Ko 24:13; 25:27) Ke idak “jirik wain” emaroñ ekkar, kajerbal den in kadõk le jen joñan ej juõn abañ elap. (1 Timote 5:23) “Wain ej dri kajirere,” Bible eo ej kakkõl, “dren in karek ej dri akwail, im jabrewõt eo ej bwir kake, e jab meletlet.” (Jabõn Kennan Ko 20:1) Bõtab, ewi wãwen jemaroñ kamelele kin ta melelen bwid kake den in kadõk?a Ewi joñan den in kadõk eo jemaroñ watõke ele jen joñan? Ta lemnak eo ejokkin wõt juõn kin men in?
“Bwir Kake” Den in Kadõk —Ewi Wãwen?
3, 4. (a) Ta eo ej kwalok bwe Bible ej kananaik kadõk? (b) Ta jet ian kakõlle ko kin kadõk?
3 Ilo Israel eo etto, rar aikwij kade ñan mij juõn nejin maan eo ebroklip im ri kadõk. (Duteronomi 21:18-21) Ri jilek Paul ear kakabilekleke Ri Christian ro: “Komin jab kõmao iben juõn armij elañe naetan jimjãn jimjãten im e dri lũñ, ak dri ankwõnak, ak dri kabuñ ñõn ekjõp, ak dri kajirere, ak dri karek, ak dri koaroñ; emõn jab mõña iben juõn einwõt.” Alikar, Jeje ko rej kananaik an juõn idak ñan joñan eo ej kadõk.—1 Dri Korint 5:11; 6:9, 10.
4 Ilo an kwalok kin ta kakõllan kadõk, Bible eo ej ba: “Kwon jab reilok ñõn wain ñe e kilmir, ke ej makõtkit ilo kõp in irak, ke emõn wõt warõñlok e. Ilo jemlokõn ej kiji einwõt juõn serpent, im ej wie einwõt juõn adder. Mejõm re naj lo men in bwilõñ, im buruõm e naj konono nan ko re ankeke.” (Jabõn Kennan Ko 23:31-33) Le jen joñan idak ej kiji einwõt juõn serpent, im kõmman nañinmij, bwok, im jajelokjen bareinwõt. Juõn ri kadõk emaroñ lo “men in bwilõñ” ko ilo an ettõnak. Emaroñ bareinwõt jaje debij lemnak ko rejakkar im kõnan ko ekkã an kar jibede.
5. Ilo wãwen et eo idak den in kadõk ele jen joñan ekauwatata?
5 Ta elañe juõn ej idak den in kadõk ak ej kejbãrok bwe en jab lap an idak ñan joñan eo ro jet rej kile an kadõk? Jet armij ejjab alikar air kadõk meñe elap air kar idak. Bõtab, ñan an juõn lemnak bwe manit rot in ejjab kauwatata ej juõn wãwen mone e make. (Jeremiah 17:9, NW) Jidik kin jidik, juõn armij emaroñ jino atartar ion den in karõk im erom “dri karek kin wain.” (Taitõs 2:3) Ikijen wãwen eo ñan erom juõn ri kadõkdõk (alcoholic), ri jeje eo Caroline Knapp ej ba: “Ej juõn lelkan in buñten nee ko rerumij im ej walok jidik kin jidik.” Le jen joñan idak den in kadõk emol ej juõn aujid elap an etao!
6. Etke juõn armij ej aikwij bõprae an tõr kin bõk den in kadõk im bareinwõt mõñã?
6 Lemnak bareinwõt kin nan in kakkõl eo an Jesus: “A komin kejbãrok kom ñe ab obrõk buruemi kin dõr, im karek, im inebata ko an lõl in, im emõkõj an ran eo itok iomi einwõt jen. Bwe ein drein e naj itok ion ro otemjej rej jokwe ion mejen aolepen lõl.” (Luk 21:34, 35) Idak den in kadõk ejjab aikwij tõbar joñan eo juõn armij ej kadõk ñan kõmman bwe en mejki im jowan—ilo enbwin im bareinwõt ilo jitõb. Ta elañe ran eo an Jehovah ej itok im ej bed ilo wãwen rot in?
Ta eo Le Jen Joñan Idak Den in Kadõk Emaroñ Tellok ñan e
7. Etke bõk den in kadõk ele jen joñan ej idaptõk ibben nan in jiroñ eo ilo 2 Dri Korint 7:1?
7 Kajerbal den in kadõk ele jen joñan ej tellok ñan elõñ jorrãn ko—ilo enbwin im ilo jitõb jimor. Jet ian nañinmij ko rej walok jen bõk den in kadõk ko ele jen joñan rej cirrhosis in aj eo, alcoholic hepatitis, im jorrãn in nerve ko einwõt delirium tremens (wũdiddid in enbwin eo ej walok jen bõk alcohol ele jen joñan). Ñe etto kajerbal alcohol ilo jakkar emaroñ bareinwõt kõmman cancer, diabetes (tõñal) im nañinmij ko kin menono im lojen. Alikar bwe kajerbal alcohol ele jen joñan ejjab errã ibben nan in jiroñ eo ilo Bible eo: “Jen mõke karreoik kij jen etton otemjej in kõniek kab ar, im kowãppen kwojarjar ilo mijõk Anij.”—2 Dri Korint 7:1.
8. Ekkar ñan Jabõn Kennan Ko 23:20, 21, ta eo emaroñ walok jen bõk den in kadõk ele jen joñan?
8 Le jen joñan kajerbal den in kadõk emaroñ kokkure jããn, im kwomaroñ bareinwõt luji jerbal eo am. King Solomon ilo Israel in etto ear kakkõl: “Kwon jab ber iben ro rej irak wain; iben ro re kejo dreka.” Etke? Ear kamelele: “Bwe dri karek im dri mãtia re naj jeramel wõt; im mijki e naj naballin juõn armij kin kanmutõrtõr.”—Jabõn Kennan Ko 23:20, 21.
9. Etke e men in meletlet ñan jab idak den in kadõk elañe juõn armij enaj kattõr juõn wa?
9 Ilo an kwalok kin bar juõn jorrãn, The Encyclopedia of Alcoholism ej ba: “Ekkatak ko rej kwalok bwe den in kadõk ej kautameik maroñ eo ñan kattõr wa, ekoba joñan mõkaj in an emmakit, kamakit enbwin ilo emõn, bojak ilo lemnak, im emõn in an reito-reitak im kwalok lolokjen.” Tokjen ko renana rej walok ñe juõn armij ej kattõr wa ñe ej kadõk. Ilo United States wõt, elõñ thousand armij rej mij im elõñ buki thousand rej jorrãn kajjojo yiõ jen jidimkij ko rej walok ñe ri kattõr eo ej kadõk. Jorrãn in elaptata an jelet jodikdik ro, ro edik iminene eo air ñan kattõr im bareinwõt ñan idak. Jabdewõt armij elikin an kar idak den in kadõk emaroñ ke kattõr wa im ilo ejja ien eo wõt ba bwe ej kautiej mour einwõt juõn men in letok jen Jehovah Anij? (Sam 36:9) Ilo an juõn lemnak kin kwojarjar in mour, emõn bwe juõn armij en jab idak ñan jidik jabdewõt den in kadõk ñe ej aikwij kattõr wa.
10. Ewi wãwen den in kadõk emaroñ jelet, lemnak eo ad, im etke men in ekauwatata?
10 Idak den in kadõk ele jen joñan ej kokkure armij ejjab ilo enbwin wõt ak bareinwõt ilo jitõb. “Wine im wine etõñal rej men ko rej ukõt lemnak ko remõn,” Bible ej ba. (Hosea 4:11, NW) Alcohol ej jelet lemnak eo. “Ñe juõn armij ej idak,” juõn book an U.S. National Institute on Drug Abuse ej kamelele, “alcohol eo ej deloñ ilo ial in bõtõktõk ikijen lojen im emõkaj an tõbar kamelij eo. Ej jino karumijlok an jerbal mõttan in kamelij eo me ej jelet lemnak im eñjake ko. Armij eo ej eñjake an beranlok, an anemkwoj.” Ilo wãwen rot in, ekkã ad maroñ ‘bwir’ im kwalok mwil jakkar, im enaj kajedwawaik kij ñan elõñ men in kabo ko.—Jabõn Kennan Ko 20:1.
11, 12. Ta jorrãn eo ilo jitõb emaroñ walok jen bõk den in kadõk ele jen joñan?
11 Bareinwõt, Bible eo ej kakien: “Elañe komij mõña ak irak ak kõmõn jabrewõt, komin kõmõn men otemjej ñõn aibujuij an Anij.” (1 Dri Korint 10:31) Idak elap den in kadõk enañin ke kar kaibujuij Anij? Juõn Ri Christian enaj kõnan bõprae bwe en jab bõk juõn ãt einwõt juõn eo elap an idak. Juõn ãt rot in enaj katton, jab kaibujuij, etan Jehovah.
12 Ta elañe an juõn Ri Christian idak ilo tõr ej kalõkatip juõn ri tõmak mõttan, bõlen juõn ri kalor eo ekãl? (Dri Rom 14:21) “A jabrewõt eo e naj lõkatipe juõn ian rein redrik rej liki Ña,” Jesus ear kakkõl, “emõn ñõn e ñe rej lukwoj dreka irir elap na i kenwan im kõtalke ijo imlõl i lojit.” (Matu 18:6) Le jen joñan idak emaroñ kõmman bwe juõn en luji jerammõn ko an ilo congregation eo. (1 Timote 3:1-3, 8) Bar juõn tokjen enana ej walok jen kadõk ej abañ ko me kajerbal alcohol ele jen joñan emaroñ kõmmani ilo family eo.
Bõprae Men in Kauwatata ko —Ewi Wãwen?
13. Ta eo eaorõk ikijen bõprae bõk den in kadõk ele jen joñan?
13 Juõn key ñan bõprae men in kauwatata ko kin kajerbal alcohol ilo jakkar ej ilo ad kile oktak eo, jab ikõtan ele jen joñan idak im kadõk, ak ikõtan emõn joñan im ele jen joñan. Wõn eo emaroñ beek kin kõtan in ñan kwe? Kinke ej kitibuj elõñ men ko, ejelok juõn rule ak kien ikijen jete oran cup in den in kadõk ko rej watõki elap jen joñan. Kajjojo armij ej aikwij make jelã ewi joñan eo emõn ñan e im en jab le jen joñan in. Ta eo enaj jibañ yuk ñan bebe kin ewi joñan eo elap ñan kwe? Ewõr ke juõn nan in kaiñ me emaroñ tel yuk?
14. Ta nan in kaiñi eo enaj jibañ yuk ñan jelã kõtan eo ikõtan joñan eo emõn im ele jen joñan?
14 Bible eo ej ba: “Kwon drebij lemnok emõn im lemnok jime. Ein drein re naj men in mour ñõn am, im men in kalitlit ñõn kenwam.” (Jabõn Kennan Ko 3:21, 22) Inem, nan in kaiñ eo jen lore ej eñin: Jabdewõt joñan den in kadõk eo me ej kautameik lolokjen eo am im kadiklok maroñ eo am ñan lemnak elap ñan kwe. Ak kwoj aikwij mol ñan kwe make ñan am kile ta joñan eo emõn ñan kwe!
15. Ñããt eo emaroñ juõn men in meletlet ñan ad jab idak ñan jidik?
15 Jet ien, emaroñ men in meletlet bwe jen jab idak meñe juõn wõt. Ilo an lemnak kin uwõta eo ñan juõn niñniñ, juõn kõrã ebõroru emaroñ kãlet bwe en jab idak ñan jidik. Im ejamin juõn men in joij ke ñan ad jab idak iman juõn armij eo ear wõr an abañ kin kadõk mokta ak juõn eo me bõklikit eo an ej kananaik idak den in kadõk? Jehovah ear kakien ro rej kõmmane jerbal in priest ilo imõn kabbed eo: “Komin jab irak wain, ak dren in karek . . . ñe komij dreloñ iloan imõn kwelok eo, bwe komin jab mij.” (Livitikõs 10:8, 9) Kin men in, kwon jab idak den in kadõk mokta jen am bed ilo kwelok ko an Christian, ñe kwoj bõk kunam ilo jerbal in kwalok nan, im ñe kwoj lale eddo ko jet ilo jitõb. Bareinwõt, ilo ailiñ ko ijo emo idak den in kadõk ie ak ewõr joñan dettan ro emelim air idak, Ri Christian ro rej aikwij lor kien ko an ailiñ eo.—Dri Rom 13:1.
16. Ewi wãwen kwon bebe kin ta eo kwonaj kõmmane ñe juõn armij ej lewõj juõn den in kadõk?
16 Ñe rej lewõj juõn den in kadõk, kajitõk eo moktata kwon kajitõk kake ej: ‘In idak ke?’ Elañe kwoj idak, ej aikwij alikar ilo lemnak eo am kin ewi joñan, im kwon jab le jene. Kwon jab kõtlok bwe juõn armij ejoij en ukõt lemnak eo am. Im kwon kejbãrok yuk jen open bar (jikin idak) ilo ien kwojkwoj in belele ijo ejelok joñan den ko kwomaroñ bõki. Ilo elõñ jikin ko, emelim an ajiri ro bõk den in kadõk. Ej eddo eo an ro jemen im jinen ñan katakin ro nejiir kin bõk den in kadõk im ñan lolorjake makitkit ko air ikijen men in.—Jabõn Kennan Ko 22:6.
Kwomaroñ Kamadmõde Abañ eo
17. Ta eo emaroñ jibañ yuk ñan jelã elañe ewõr juõn abañ ibbam kin kajerbal den in kadõk ele jen joñan?
17 Bõk wine im den in kadõk ko ele jen joñan ej ke juõn abañ ibbam? Kwon jelã, elañe kajerbal den in kadõk ele jen joñan ej juõn jerawiwi ilo ittino, juõn ien enaj jelet yuk. Inem kwon lukkun etale yuk make. Kajitõk kajitõk kein rej etale buruõm make: ‘Elaplok ke an makijkij aõ idak jen mokta? Ekajurlok ke den ko ij idak? Ij kajerbal den in kadõk ke ñan ko jen inebata ko im abañ ko? Juõn uan family eo ak juõn jera ear kwalok ke an inebata kin aõ idak? Abañ ko rar walok ke ilo family eo aõ kin aõ idak? Ij lo ke bwe ebin aõ jab idak iumin juõn week, juõn alliñ, ak elõñ alliñ? Ij noje ke joñan wine ak den in kadõk ko ij idak?’ Ta elañe uak eo ej aet ñan jet ian kajitõk kein? Kwon jab einwõt juõn emaan eo ej ‘lo mejen ilo kapjur im emõkaj an meloklok ie ein.’ (Jemes 1:22-24) Bõk buñten nee ko ñan kajimwe abañ in. Ta eo kwomaroñ kõmmane?
18, 19. Ewi wãwen kwomaroñ kabõjrak am bõk den in kadõk ele jen joñan?
18 Ri jilek Paul ear rejañ Ri Christian ro: “Komin jab karek kin wain, ijo eor dõr, a komin obrõk kin Jitõb.” (Dri Epesõs 5:18) Beek kin ewi joñan eo elap ñan yuk, im likit joñan ko rekkar. Bebe ilo buruõm bwe kwon jab le jen joñan in; kwalok jatõr. (Dri Galetia 5:22, 23) Ewõr ke ro mõttam me rej jibed yuk bwe en le jen joñan am idak? Kwon ekkõl. “Kwon etetal iben ro dri meletlet, inem kwo naj meletlet,” Bible eo ej ba, “a eo ej komao iben ro dri bwebwe, e naj jorran kake.”—Jabõn Kennan Ko 13:20.
19 Elañe kwoj kajerbal den in kadõk ñan am ko jen juõn abañ, jelmaik abañ eo. Kwomaroñ kamadmõde abañ ko ilo am jerbale nan in kakabilek ko ilo Nan eo an Anij. (Sam 119:105) Kwon jab abwin bukõt jibañ jen juõn Christian elder. Kwon kortokjen men in letok ko jen Jehovah ñan kalek mour in jitõb eo am. Kakajurlok kõtan eo am ibben Anij. Kwon keini am jar ñan e—elaptata kin mõjno eo am. Kajitõk ibben Anij ñan ‘melejoñ lemnak ko am im buruõm.’ (Sam 26:2) Einwõt kar bwebwenato kake ilo katak eo lok, kwon kate yuk ñan etetal ilo ial in tiljek.
20. Ta karõk ko kwomaroñ aikwij kõmmane ñan kamadmõde abañ eo kin bõk den in kadõk ele jen joñan?
20 Ta elañe abañ eo kin le jen joñan am idak ej wõnmanlok wõt meñe kwoj kate yuk ilo jibadbad ko am? Inem kwoj aikwij lor nan in kakabilek eo an Jesus: “Elañe peõm ej katibñil yuk, kwon bukwe: emõn ñõn yuk bwe kwon dreloñ iloan mour im jibikbik, jen ruo peõm, im kwoj ilok ñõn jikin nana, iloan kijeek e jamin kwũn in drio.” (Mark 9:43) Uak eo in: Kwon jab idak ñan jidik. Eñin men eo juõn kõrã jenaj naetan Irene ear bebe ñan an kõmmane. “Elikin enañin ruo im jimettan yiõ in aõ jab idak,” lio ear ba, “Iar jino lemnak bwe ejamin wõr jorrãn elañe ij bõk juõn wõt, ñan baj lale elañe I maroñ kajur ion. Ak ien eo wõt ej walok lemnak in, I ar mõkaj im jar ñan Jehovah. Emwij aõ beek ilo buruõ bwe ijamin idak den in kadõk mae jukjuk im bed eo ekãl—bõlen ijamin idak ilo ien eo bareinwõt.” Jab idak ñan jidik ejjab juõn wõnãn elap ñan kõllã ñan bõk mour ilo lal eo ekãl im wãnik an Anij.—2 Piter 3:13.
“Komin Etõr Einwõt Bwe Komin Tõbrõk”
21, 22. Ta abañ eo emaroñ bõprae ad tõbar jemlokin iaikwij eo kin mour, im ewi wãwen jemaroñ kejbãrok kij jen e?
21 Ilo an keidi ial in mour eo an juõn Christian ñan juõn iaikwij, ri jilek Paul ear ba: “Kom jab jela ke bwe ro rej etõr ilo iaikwij, ir otemjej rej etõr a juõn wõt ej bõk mejenkajik? Komin etõr einwõt bwe komin tõbrõk. Im jabrewõt armij eo ej iaikwij kin mejenkajik e jadõr ilo men otemjej. Ir rej kõmõn men in bwe ren jibarek rojenbõr e mor mõkõj; a kij eo e jamin mor. Inem ein drein ña ij etõr, jab einwõt I toñõñ; ein drein ij jekanunõk, im jab einwõt dreñlok kõto: A ij jekanunõk enbwiniõ, im kamakokoik e, bwe ilo jabrewõt, mõjen aõ kwalok gospel ñõn ro jet, ña in jab joko.”—1 Dri Korint 9:24-27.
22 Remaroñ lelok mejenkajjik eo ñan ro wõt im rej lo tõbrak ilo iaikwij eo. Ilo iaikwij in mour, idak den in kadõk ele jen joñan emaroñ bõprae kij jen ad tõbar jemlokin. Jej aikwij kwalok jatõr. Ñan ettõr ilo liki jej aikwij jab “irak wain” ele jen joñan. (1 Piter 4:3) Ilo oktak, jej aikwij kwalok jatõr ilo men otemjej. Ikijen idak den in kadõk, ej men in meletlet bwe jen “karmijete jerawiwi im mõm ko an lõl, im bwe jen mour im jadõr im jimewõt.”—Taitõs 2:12.
[Kamelele ko itulal]
a Einwõt kar kajerbale ilo katak in, “den in kadõk” ej jerbal ñan beer, wine, im den in kadõk ko rekajurlok.
Kwoj Kememej ke?
• Ta melelen bõk den in kadõk ele jen joñan?
• Ta jorrãn ko rej walok jen bõk den in karõk ele jen joñan?
• Ewi wãwen kwomaroñ bõprae jorrãn ko rej walok jen bõk den in kadõk ilo jakkar?
• Ewi wãwen juõn armij emaroñ anjo ion abañ eo kin bõk den in kadõk ilo jakkar?
[Pija eo ilo peij 27]
Wine “ej kamõnõnõ buruen armij”
[Pija eo ilo peij 28]
Jej aikwij jelã ewi joñan eo emõn ñan kij make im jab le jene
[Pija eo ilo peij 29]
Bebe lok iman kin ñããt eo kwon bõjrak
[Pija eo ilo peij 30]
Kwon keini am jar ñan Jehovah kin mõjno ko am
[Pija eo ilo peij 31]
Ewõr eddo eo ibben ro jemen im jinen ñan katakin ro nejiir kin bõk den in kadõk