KATAK 13
Timote Ear Kõn̦aan Jipañ Armej
Timote kar juon l̦addik eo me ekõn̦aan jipañ armej. Elõñ jikin ko ear etal ñani. Im ear lukkuun m̦õn̦õn̦õ im em̦m̦an mour eo an. Kokõn̦aan ke jel̦ã kõn Timote?—
Jinen Timote im jibwin rar katakin e kõn Jeova
Timote ear dik im rũttol̦o̦k ilo jikin eo etan in Listra. Etan jinen in Lois im etan jibwin in Eunis. Erro kar jino katakin Timote kõn Jeova jãn ke ear dik. Im ke Timote ear rũttol̦o̦k, ear kõn̦aan jipañ armej ro bwe ren jel̦ã kõn Jeova.
Ke Timote ear rũttol̦o̦k im juon jodrikdrik, Paul ear kajjitõk ippãn bwe en etal erro kwal̦o̦k naan ilo jikin ko jet. Ta eo Timote ear ba? Ear ba: ‘Em̦m̦an!’ Timote ear pojak in etal im jipañ armej ro jet.
Timote ear etal ippãn Paul ñan jikin eo etan, Tessalonika, ilo aelõñ in Masedonia. Elukkuun ettol̦o̦k jikin in. Im erro kar aikuj etetal l̦o̦k, innem uwe ilo tim̦a bwe ren tõpare. Ke rar tõpar ijo, erro kar jino jipañ armej ro bwe ren jel̦ã kõn Jeova. Ak ear wõr jet armej rar illu ippãn Paul im Timote. Im rar bar kajjioñ in m̦an erro. Kõn men in, rar aikuj etal ñan bar jikin ko jet im kwal̦o̦k naan ie.
Timote ear lukkuun m̦õn̦õn̦õ im ear em̦m̦an mour eo an
Allõñ ko tok jet, Paul ear kajjitõk ippãn Timote bwe en bar ro̦o̦l ñan Tessalonika. Etke? Bwe Timote en lale ejet an ri tõmak ro ijo mour. Timote ear aikuj peran wõt ñan an bar ro̦o̦l ñan jikin in elukkuun kauwõtata. Timote ear etal kõnke ear l̦õmn̦ak kõn armej ro ijo. Im ke ear bar ro̦o̦ll̦o̦k ñan ippãn Paul, ear kwal̦o̦k ñan e bwe em̦m̦an an Ri Tessalonika ro mour!
Elõñ iiõ in an Timote jerbal ippãn Paul. Juon iien Paul ear jeje im ba bwe elukkuun em̦m̦an Timote. Im ekõn̦aan bwe Timote en etal im jipañ armej ro ilo eklejia ko. Kwõjel̦ã ke etke? Kõnke el̦ap an Timote yokwe Jeova im armej ro.
Kwõj ke yokwe armej ro im kõn̦aan jipañ er bwe ren jel̦ã kõn Jeova?— Ñe aet, eokwe kwõnaaj lukkuun m̦õn̦õn̦õ im em̦m̦an mour eo am̦ ãinwõt kar Timote!