KATAK 25

Ta Karõk eo an Anij ñan Kõj?

Printed Edition

Baibõl̦ ej kwal̦o̦k kõn mour an armej im ba bwe “reiiet wõt raan ko an, im rej obrak kõn jorrããn.” (Job 14:1) Eñin ke lukkuun men eo Anij ekõn̦aan ñan kõj? El̦aññe jaab, ta karõk eo an ñan kõj? Enaaj ke jejjet karõk eo an? Lale uwaak ko jãn Baibõl̦ me el̦ap an kaenõm̦m̦an.

1. Kain mour rot eo Jeova ekõn̦aan ñan kõj?

Jeova ekõn̦aan bwe jen mour ilo wãween eo em̦m̦antata. Ke ear kõm̦anm̦ane armej ro ruo m̦oktata, Adam im Iv, ear likũt erro ilo juon pedetaij eaiboojoj, etan jikin kallib in Iden. Innem, “Anij ear kõjeraam̦m̦an er, im Anij ear ba ñan er, ‘Kom̦win timmon im orl̦o̦k, im koobrak lal̦, im kajoor jãne.’” (Jenesis 1:28) Jeova ear kõn̦aan bwe en wõr nejier, ren kõm̦m̦an bwe aolepen lal̦ in en juon pedetaij, im bwe ren lale menninmour ko. Kar karõk eo an bwe aolep armej ren ãjmour im mour ñan indeeo.

Meñe ear jab jejjet karõk in an Anij,a ak ejjañin oktak karõk eo an ñan kõj. (Aiseia 46:10, 11) Ekõn̦aan wõt bwe armej ro rej pokake ren mour ñan indeeo ilo juon lal̦ ejjel̦o̦k apañ im jorrããn ie.—Riit Revelesõn 21:3, 4.

2. Ewi wãween ad maroñ m̦õn̦õn̦õ kiiõ kõn juon mour elukkuun em̦m̦an im l̦ap tokjãn?

Jeova ear kõm̦anm̦an kõj bwe jen “aikuji tõl eo an,” mel̦el̦ein bwe en wõr ippãd juon kõn̦aan ñan jel̦ã kõn e im kabuñ ñane. (Riit Matu 5:3-6.) Ekõn̦aan bwe en wõr juon ad jem̦jerã epaak ippãn, ñan ‘etetal ilo ial̦ ko An, im bwe [jen] yokwe E,’ im karejar ñane ‘kõn aolepen bũruod.’ (Duteronomi 10:12; Sam 25:14, UBS) Ñe jenaaj ãindein, jenaaj m̦oolin m̦õn̦õn̦õ meñe ewõr ad apañ. Ilo ad kabuñ ñan Jeova, jej eñjake an l̦ap tokjãn mour eo ad kõnke jej mour ilo wãween eo Jeova ekõn̦aan bwe jen mour.

KAM̦WILAL̦L̦O̦K AM̦ MEL̦EL̦E

Katak kõn yokwe eo el̦ap Jeova ear kwal̦o̦ke ke ear kõpooje lal̦ in ñan kõj im ta eo Naan eo an ej katakin kõj kõn unin ad mour.

Adam im Iv rej lale jikin kallib eo eaiboojoj me eobrak kõn leen keinikkan ko im menninmour ko.

3. Ewõr juon an Jeova karõk elukkuun em̦m̦an ñan armej ro

Kõjoe PIJAIN ALWÕJ eo, innem bwebwenato kake kajjitõk in:

PIJAIN ALWÕJ: Etke Anij ear Kõm̦anm̦an Lal̦ In?—Jidikin (1:41)

Etke Anij ear kõm̦anm̦ane lal̦ in eaiboojoj?

Riit Ekklisiastis 3:11, innem bwebwenato kake kajjitõk in:

Ta eo men in ej katakin eok kõn Jeova?

4. Ejjañin oktak karõk eo an Jeova

Riit Sam 37:11, 29 im Aiseia 55:11, innem bwebwenato kake kajjitõk in:

Etke jejel̦ã bwe karõk eo an Jeova ñan kõj ejjañin oktak?

A. El̦ap an jorrããn juon em̦. Bõrwaj eo ejorrããn, wũntõ ko rerup, im el̦ap kõbij ilo mel̦an m̦weo. — Ñe juon em̦ ej oktak im jorrããn, ewõr maroñ ñan bar kõkããle. Ejja ãindeinl̦o̦k wõt, meñe lal̦ in em̦õj an jorrããn itok wõt jãn an armej jab kõjparoke, ak Anij enaaj bar kõkããle ñan ro rej yokwe e

B. Ejja m̦weo eo wõt em̦õj kõkããle, el̦ap an aiboojoj im mel̦an m̦weo elukkuun erreo im kon̦. — Ñe juon em̦ ej oktak im jorrããn, ewõr maroñ ñan bar kõkããle. Ejja ãindeinl̦o̦k wõt, meñe lal̦ in em̦õj an jorrããn itok wõt jãn an armej jab kõjparoke, ak Anij enaaj bar kõkããle ñan ro rej yokwe e

5. Ad kabuñ ñan Jeova ej kõm̦m̦an bwe en lukkuun l̦ap tokjãn mour ko ad

Ad jel̦ã kõn unin ad mour emaroñ bõktok el̦ap m̦õn̦õn̦õ. Kõjoe PIJAIN ALWÕJ eo, innem bwebwenato kake kajjitõk in:

PIJAIN ALWÕJ: I Learned the Purpose of Life (5:03)

Ilo an kar Terumi katak kõn unin mour, ewi wãween an kar men in jipañe?

Riit Ekklisiastis 12:13, UBS, innem bwebwenato kake kajjitõk in:

Kõnke elukkuun lõñ men ko Jeova ear kõm̦m̦ani ñan kõj, ta eo jej aikuj kõm̦m̦ane ñan kwal̦o̦k ad kam̦m̦oolole?

JUON EMAROÑ KAJJITÕK: “Ta unin ad mour?”

Enaaj ewi wãween am̦ uwaak?

TARLEP IN KATAK EO ILO TUKADU

Jeova ekõn̦aan bwe jen m̦õn̦õn̦õ kõn juon mour eweeppãn ñan indeeo ilo juon lal̦ ak jukjukun pãd eweeppãn. Ñe jej kabuñ ñan e kõn aolepen bũruod, enaaj l̦ap tokjãn mour ko ad kiiõ im ilju im jekl̦aj.