KATAK 28
Kwal̦o̦k Am̦ Kam̦m̦oolol kõn Men eo Jeova im Jesus Rar Kõm̦m̦ane ñan Kwe
Ewi wãween am̦ eñjake ñe juon m̦õttam̦ ej lewaj juon menin lewaj eaiboojoj ak elukkuun em̦m̦an? Ejjel̦o̦k pere ekõm̦m̦an am̦ m̦õn̦õn̦õ im kokõn̦aan kwal̦o̦k ñan eo m̦õttam̦ bwe el̦ap am̦ kam̦m̦oolol kõn menin letok eo. Jeova im Jesus rar letok menin letok eo em̦m̦antata. Ta eo, im ewi wãween jemaroñ kwal̦o̦k ad kam̦m̦oolol kake?
1. Ta juon wãween jemaroñ kwal̦o̦k ad kam̦m̦oolol kõn men eo Anij im Jesus rar kõm̦m̦ane ñan kõj?
Baibõl̦ eo ej kallim̦ur bwe “jabdewõt eo ej kwal̦o̦k an tõmak ilo [Jesus]” emaroñ mour ñan indeeo. (Jon 3:16) Ta mel̦el̦ein ñan kwal̦o̦k ak jerbale tõmak eo ad? Ej mel̦el̦ein bwe jen jab baj tõmak wõt ilo Jesus, ak jej aikuj in bar kwal̦o̦k ak jerbale tõmak eo ad ikijjeen jokãlõt ko ad im men ko jej kõm̦m̦ani. (Jemes 2:17) Ñe jej kwal̦o̦k ad tõmak ikijjeen men ko jej ba im kõm̦m̦ani, jej kõkajoor jem̦jerã eo ad ippãn Jesus im eo Jemãn, Jeova.—Riit Jon 14:21.
2. Iien ta eo ejejuwaan me ej jipañ kõj ñan kwal̦o̦k ad kam̦m̦oolol kõn men eo Jeova im Jesus rar kõm̦m̦ane?
Ilo jo̦teenin raan eo m̦okta jãn an kar mej, Jesus ear ba ñan ri-kal̦oor ro an kõn bar juon wãween remaroñ kwal̦o̦k aer kam̦m̦oolol kõn katok eo an. Ear ba bwe ren kõm̦m̦ane juon iien ejejuwaan me Baibõl̦ ej n̦aetan “Kõjota eo an Irooj,” ak juon bar ãt ej Kwõjkwõjin Keememej Mej eo an Jesus. (1 Korint 11:20) Jesus ear kõm̦m̦ane iien in bwe rijjilõk ro an—im aolep Kũrjin ro rem̦ool tokãlik—ren keememej bwe ear aje mour eo an kõn kõj. Ikijjeen ememej in, Jesus ear jiroñ im ba: “Kom̦win wõnm̦aanl̦o̦k wõt im kõm̦m̦ane men in ilo ememej eõ.” (Luk 22:19) Ñe kwõj pãd ilo iien Kwõjkwõj in, kwõj kaalikkar am̦ kam̦m̦oolol kõn yokwe eo el̦ap an Jeova im Jesus ñan kõj.
KAM̦WILAL̦L̦O̦K AM̦ MEL̦EL̦E
Etale wãween ko jet ñan kwal̦o̦k am̦ kam̦m̦oolol kõn yokwe eo el̦ap Jeova im Jesus rar kwal̦o̦ke. Lale aorõkin Kwõjkwõjin Keememej Mej eo an Jesus.
3. Ta ko jemaroñ kõm̦m̦ani ñan kwal̦o̦k ad kam̦m̦oolol?
Pijaikl̦o̦k m̦õk an kar juon armej lo̦mo̦o̦ren eok jãn am̦ mal̦oñ. Kwõnaaj ke kajju mel̦o̦kl̦o̦k ta eo armej in ear kõm̦m̦ane ñan kwe? Ak kwõn kar ke pukot wãween ko ñan kwal̦o̦k am̦ kam̦m̦oolole kõn men eo ear kõm̦m̦ane?
Jem̦uri kõn mour ko ad ñan Jeova. Riit 1 Jon 4:8-10, innem bwebwenato kake kajjitõk kein:
Etke katok in mour eo an Jesus ej juon menin letok ejejuwaan?
Ewi wãween am̦ eñjake kõn men eo Jeova im Jesus rar kõm̦m̦ane ñan eok?
Ewi wãween jemaroñ kwal̦o̦k ad kam̦m̦oolol Jeova im Jesus kõn men eo rar kõm̦m̦ane ñan kõj? Riit 2 Korint 5:15 im 1 Jon 4:11; 5:3. Ãlikin am̦ riiti kajjojo iaan eoon kein, bwebwenato kake kajjitõk in:
Ekkar ñan eoon in, ta eo jemaroñ kõm̦m̦ane ñan kwal̦o̦k ad kam̦m̦oolol?
4. Anõke Jesus
Bar juon wãween jemaroñ kwal̦o̦k ad kam̦m̦oolol ej ikijjeen ad anõke Jesus. Riit 1 Piter 2:21, innem bwebwenato kake kajjitõk in:
Ilo wãween et kwõmaroñ kanooj anõke jenkwan neen Jesus?
Jesus ear yokwe im kaorõk Naanin Anij, ear kwal̦o̦k kõn ennaan eo em̦m̦an, im ear jipañ ro jet
5. Pãd ilo iien Kwõjkwõjin Keememej Mej eo an Jesus
Ñan lale ta ko rar wal̦o̦k ilo iien eo jinoin kar kõm̦m̦ane Kõjota eo an Irooj, riit Luk 22:14, 19, 20. Innem bwebwenato kake kajjitõk kein:
Ta ko rar wal̦o̦k ilo iien Kõjota eo an Irooj?
Bũreet im wain eo rej kõkkar kõn ta?—Lale eoon 19 im 20.
Jesus ear kõn̦aan bwe ri-kal̦oor ro an ren kõm̦m̦ane Kõjota eo an Irooj juon alen kajjojo iiõ ilo raan eo ear mej. Kõn men in, Ri-Kõnnaan ro an Jeova rej koba ippãn doon kajjojo iiõ ñan keememej mej eo an Christ ilo wãween eo ear jiroñ kõj ñan kõm̦m̦ane. Ñan kal̦apl̦o̦k am̦ mel̦el̦e kõn kweilo̦k in ekanoojin aorõk, kõjoe PIJAIN ALWÕJ eo. Innem bwebwenato kake kajjitõk in:
Ta eo ej wal̦o̦k ilo iien Kwõjkwõjin Keememej Mej eo an Jesus?
Bũreet im wain eo rej menin kõkkar. Bũreet eo ej kõkkar kõn ãnbwinnin Jesus me eweeppãn im ear ajel̦o̦k ãinwõt juon menin katok kõn kõj. Im wain eo ej kõkkar kõn bõtõktõkin Jesus
JET ARMEJ REJ BA: “Men eo wõt kwõj aikuj kõm̦m̦ane ñan bõk lo̦mo̦o̦r ej tõmak ilo Jesus.”
Ewi wãween am̦ maroñ kõjerbale eoon kein ilo Jon 3:16 im Jemes 2:17 ñan kaalikkar bwe ejabwe wõt ñan ad ba bwe jej tõmak ilo Jesus?
TARLEP IN KATAK EO ILO TUKADU
Jej kwal̦o̦k ad kam̦m̦oolol kõn men eo Jesus ear kõm̦m̦ane ñan kõj ilo ad jerbale tõmak eo ad ilo e im ilo ad pãd ilo iien Kwõjkwõjin Keememej Mej eo an.
Ãlij
Ta mel̦el̦ein ñan kwal̦o̦k ak jerbale tõmak eo ad ilo Jesus?
Ewi wãween kokõn̦aan kwal̦o̦k am̦ kam̦m̦oolol ñan Jeova im Jesus kõn men eo rar kõm̦m̦ane ñan eok?
Etke elukkuun aorõk ñan pãd ilo iien Kwõjkwõjin Keememej Mej eo an Jesus?
KAL̦APL̦O̦K AM̦ MEL̦EL̦E
Ta eo mej eo an Jesus ej kõm̦akũt kõj ñan kõm̦m̦ane?
Kal̦apl̦o̦k am̦ jel̦ã kõn ta mel̦el̦ein tõmak im wãween am̦ maroñ jerbale.
“Kwal̦o̦k Am̦ Tõmak ilo Kallim̦ur ko an Jeova” (Naan in Keeañ, Oktoba 2016)
Ilo bwebwenato eo etan “I Feel Clean, Alive, and Whole,” lale wãween eo an kar juon kõrã katak kõn katok in mour eo an Jesus, lukkuun jelõt mour eo an.
Lale unin an jejjo wõt armej m̦õñã bũreet im idaak wain ilo iien Kwõjkwõj eo.