Ewi Wãween Aer Kwal̦o̦k Naan kõn Ennaan eo Em̦m̦an?

Mõttan wõt jidik Jeova enaaj kõjerbal Aelõñ eo an ñan jol̦o̦k aolep apañ ko jej iiooni. Joñan an em̦m̦an nuuj in, jejjab kõn̦aan dãpiji ippãd make. Jesus ekõn̦aan bwe ri-kal̦oor ro an ren kwal̦o̦k kõn ennaan in em̦m̦an ñan aolep! (Matu 28:19, 20) Ewi wãween an Ri-Kõnnaan ro an Jeova em̦m̦akũt ñan naanin jiroñ eo an Jesus?

1. Ewi wãween an jejjet kũtien Matu 24:14 ilo raan kein?

Jesus ear kanaan im ba: “Naaj kwal̦o̦k ennaan eo em̦m̦an kõn Aelõñ eo ipel̦aakin lal̦ in.” (Matu 24:14) Ri-Kõnnaan ro an Jeova rem̦õn̦õn̦õ in bõk kun̦aaer ilo jerbal in eaorõk. Kõmij kwal̦o̦k naan kõn ennaan in em̦m̦an ilo pel̦aakin lal̦ in ilo elõñl̦o̦k jãn 1,000 kajin ko! Jerbal in el̦ap ej bõk el̦ap iien im maroñ, im ej aikuj laajrak. Jerbal in eban kar wõnm̦aanl̦o̦k wõt ñe ear jab kõn jipañ eo an Jeova.

2. Ta ko kõmij kate kõm ñan kõm̦m̦ane bwe kõmin maroñ kwal̦o̦k naan ñan armej ro?

Kõmij kwal̦o̦k naan ilo jabdewõt jikin kõm maroñ ellolo armej ie. Ãinwõt Kũrjin ro ilo jinoin, kõmij kwal̦o̦k naan “jãn em̦ ñan em̦.” (Jerbal 5:42) Ilo ammim kõm̦m̦ane wãween in elõt, kõm maroñ tõpar elõñ milien armej ro kajjojo iiõ. Kõnke ejjab aolep iien armej ro rej pãd ilo m̦õko im̦weer, kõmij bareinwõt kwal̦o̦k naan ilo̦bwilej. Aolep iien kõmij pukot wãween ko repel̦l̦o̦k ñan kwal̦o̦k naan ñan ro jet kõn Jeova im karõk ko an.

3. An wõn eddo eo ñan kwal̦o̦k naan kõn nuuj eo em̦m̦an?

Aolep Kũrjin ro rem̦ool ewõr aer eddo ñan kwal̦o̦k naan kõn ennaan eo em̦m̦an ñan ro jet. Kõmij lukkuun kate kõm ñan kajejjete jerbal eo ammim. Kõmij kwal̦o̦k naan joñan wõt ammim maroñ kõnke kõm jel̦ã bwe jerbal in emaroñ lo̦mo̦o̦ren mour ko an armej. (Riit 1 Timote 4:16.) Kõmij jab bõk on̦ããn jerbal in kõnke Baibõl̦ ej ba: “Kar lewaj ñan kom̦ ilo ejjel̦o̦k on̦ããn, kõn men in kom̦win lel̦o̦k ilo ejjel̦o̦k on̦ããn.” (Matu 10:7, 8) Ejjab aolep rekõn̦aan roñjake ennaan eo ammim. Bõtab kõmij wõnm̦aanl̦o̦k wõt im kõm̦m̦ane jerbal in kõnke jerbalin kwal̦o̦k naan ej m̦õttan ammim kabuñ im ej kam̦õn̦õn̦õik Jeova.

KAM̦WILAL̦L̦O̦K AM̦ MEL̦EL̦E

4. Kõmij lukkuun kate kõm ñan tõpar aolep armej

PIJAIN ALWÕJ: Preaching in “the Most Distant Part of the Earth” (7:33)

• Ta eo em̦m̦an ippam̦ kõn wãween ko Ri-Kõnnaan ro an Jeova kate er ñan kwal̦o̦k naan?

Riit Matu 22:39 im Rom 10:13-15, innem bwebwenato kake kajjitõk kein:

• Ewi wãween an jerbalin kwal̦o̦k naan eo ammim kwal̦o̦k bwe kõmij yokwe ro ri-turid?

• Ewi wãween an Jeova watõk ro rej kwal̦o̦k naan kõn ennaan eo em̦m̦an?​—Lale eoon 15.

5. Kõmij ri-jerbal ippãn Anij

Elõñ bwebwenato ko rej kaalikkar bwe Jeova ej tõl jerbal eo ammim. Ñan waanjoñak, ilo raelepen juon raan ilo New Zealand juon jeim im jatim em̦m̦aan etan Paul ear iioon juon kõrã ke ear jerbal jãn em̦ ñan em̦. Ilo jibboñõn ejja raan eo wõt, kõrã eo ear jar ñan Anij im kõjerbale ãt eo etan, Jeova, im ear kajjitõk bwe juon en lol̦o̦ke. Paul ej ba: “Jilu awa tokãlik, iar pãd im̦aan kõjãm eo an.”

Riit 1 Korint 3:9, innem bwebwenato kake kajjitõk in:

• Ewi wãween an bwebwenato ko ãinwõt an eo jeim im jatim ilo New Zealand kwal̦o̦k bwe Jeova ej tõl jerbalin kwal̦o̦k naan?

Riit Jerbal 1:8, innem bwebwenato kake kajjitõk in:

• Etke kõmij aikuji jipañ eo an Jeova bwe kõmin maroñ kajejjete jerbalin kwal̦o̦k naan eo ammim?

Kwaar jel̦ã ke?

Kajjojo wiik ilo kweilo̦k ko ammim ilo lukwõl̦pãn wiik, kõmij bõk kamminene ko ñan jipañ kõm ilo jerbalin kwal̦o̦k naan. El̦aññe em̦õj am̦ pãd ilo juon iaan kweilo̦k kein, ta am̦ l̦õmn̦ak kõn kein kamminene ko kar kwal̦o̦ki?

6. Kõmij pokake naanin jiroñ eo an Anij ñan kwal̦o̦k naan

Ilo tõre ko an rijjilõk ro, ri-jum̦ae ro rar kajjioñ kabõjrake ri-kal̦oor ro an Jesus jãn aer kwal̦o̦k naan. Kũrjin ro jinoin rar jojomare jim̦we im maroñ eo aer ñan kwal̦o̦k naan ikijjeen aer kar “pãd im̦aan ri-utiej ro ñan kõm̦m̦an bwe en wõnm̦aanl̦o̦k wõt ennaan eo em̦m̦an.” (Pilippai 1:7) Ri-Kõnnaan ro an Jeova rej kõm̦m̦ane ejja men in wõt ilo raan kein.a

PIJAIN ALWÕJ: Legally Defending the Good News (2:28)

Riit Jerbal 5:27-42, innem bwebwenato kake kajjitõk in:

• Etke kõm ban bõjrak jãn ammim kwal̦o̦k naan?​—Lale eoon 29, 38, im 39.

TARLEP IN KATAK EO ILO TUKADU

Jesus ear jiroñ ri-kal̦oor ro an ñan kwal̦o̦k naan kõn ennaan eo em̦m̦an ñan aolep aelõñ ko. Jeova ej jipañe armej ro an ñan kõm̦m̦ane jerbal in.

Ãlij

• Ewi wãween ammim kwal̦o̦k naan kõn ennaan eo em̦m̦an ipel̦aakin lal̦ in?

• Ewi wãween an jerbalin kwal̦o̦k naan eo ammim kwal̦o̦k bwe kõmij yokwe ro ri-turid?

• Ilo am̦ l̦õmn̦ak, jerbalin kwal̦o̦k naan emaroñ ke kõm̦m̦an bwe jen m̦õn̦õn̦õ? Etke?

KAL̦APL̦O̦K AM̦ MEL̦EL̦E

Lale ewi wãween an Ri-Kõnnaan ro an Jeova kwal̦o̦k naan ñan armej ro ilo bukwõn ko rel̦l̦ap.

Special Metropolitan Public Witnessing in Paris (5:11)

Ta ko Ri-Kõnnaan ro an Jeova rej kõm̦m̦ani ñan jipañ ro rar aikuj in ko jãn aelõñ ko aer?

Satisfying Spiritual Thirst Among Refugees (5:59)

Lale ewi wãween an juon kõrã kõmel̦el̦e etke ear lo m̦õn̦õn̦õ ilo an kõjerbale mour eo an ñan kwal̦o̦k naan.

Glad I Chose This Career (6:29)

Lale jet pepe ko raorõk im̦õn ekajet ko rar kõm̦m̦ani me rar kowõnm̦aanl̦o̦k jerbalin kwal̦o̦k naan kõn ennaan eo em̦m̦an.

“Kingdom Preachers Take Their Case to Court” (God’s Kingdom Rules!, chapter 13)