KATAK 38
Kwal̦o̦k Kam̦m̦oolol kõn Menin Letok eo kõn Mour
Elõñ men ko rem̦m̦an im rekãitoktoklimo jemaroñ kõm̦m̦ani kõnke jej pãd im mour. Im meñe jemaroñ iioon apañ ko, ak emaroñ wõr wõt men ko jemaroñ m̦õn̦õn̦õ kaki ilo mour ko ad. Ewi wãween jemaroñ kwal̦o̦k ad kam̦m̦oolol kõn menin letok eo kõn mour? Im ta un eo eaorõktata unin ad kwal̦o̦k ad kam̦m̦oolol kõn mour?
1. Etke eaorõk ñan ad kwal̦o̦k kam̦m̦oolol kõn mour?
Eaorõk ñan ad kwal̦o̦k kam̦m̦oolol kõn mour kõnke ej juon menin letok jãn Jemãdwõj eo el̦ap yokwe ippãn, Jeova. E eo ej “unin mour” kõnke ear kõm̦anm̦an men otemjej. (Sam 36:9, UBS) “E eo ear letok mour, menono, im men otemjej ñan aolep armej.” (Jerbal 17:25, 28) Jeova ej letok ñan kõj men ko jej aikuji bwe jen mour. Bõtab ejjab baj letok wõt men ko jej aikuji, ak elõñ bar men ko ej litok ñan kõj ñan kõm̦m̦an ad lo m̦õn̦õn̦õ ilo mour.—Riit Jerbal 14:17.
2. Ewi wãween jemaroñ kwal̦o̦k ad kam̦m̦oolol kõn menin letok eo kõn mour?
Jãn iien eo kõrã eo jinem ear jino bõro̦ro kõn kwe, Jeova ear kea kake eok. Ilo juon jar me Jeova ear likũti ilo Naan eo An, juon iaan ri-karejar ro an, Devid, ear ba: “Kwaar lo eõ m̦okta jãn aõ kar l̦otak.” (Sam 139:16, UBS) El̦ap an Jeova kaorõk mour eo am̦. (Riit Matu 10:29-31.) Enaaj l̦ap an kõmetake ñe juon ej kããlõt ñan bõk mour eo an bar juon armej, ak mour eo an make.a (Exodus 20:13) Enaaj bareinwõt kabũrom̦õj Jeova el̦aññe jej likũt mour ko ad ilo kauwõtata ak jab bõk buñtõn ne ko ñan kõjparok mour ko an ro jet. Ñe jej lukkuun kõjparok mour ko ad im kautiej mour ko an ro jet, jej kaalikkar ad kaorõk im kam̦m̦oolol kõn menin letok eo kõn mour.
KAM̦WILAL̦L̦O̦K AM̦ MEL̦EL̦E
Lale jet wãween ko kwõmaroñ kwal̦o̦k am̦ kam̦m̦oolol kõn menin letok eo kõn mour.
3. Kõjparok ãjmour eo am̦
Kũrjin ro me em̦õj aer ajel̦o̦k mour ko aer ñan Jeova, rej kõjerbale aolepen mour eo aer ñan karejar ñan E. Ej ãinwõt ñe rej lel̦o̦k ãnbwinnier ãinwõt juon menin katok ñan Anij. Riit Rom 12:1, 2, innem bwebwenato kake kajjitõk kein:
Ta eo ej aikuj kõm̦m̦akũt eok ñan kõjparok ãjmour eo am̦?
Ta jet iaan wãween ko kwõmaroñ kõm̦m̦ane men in?
4. Bõk buñtõn ne ko ñan kõjparok bwe ejjel̦o̦k juon en jorrããn ak mej
Baibõl̦ eo ej rõjañ kõj ñan jab kõm̦m̦ani men ko rekauwõtata. Kõjo̦e PIJAIN ALWÕJ eo ñan katak kõn jet iaan wãween ko kwõmaroñ kõm̦m̦ani ñan kõjparok kwe im ro jet.
Riit Jabõn Kõnnaan 22:3, innem bwebwenato kõn wãween eo kwe im ro jet kom̦ maroñ kwal̦o̦k kõjparok . . .
ilo m̦weo im̦õm̦.
ilo jikin jerbal.
ñe kwõj iukkure.
ñe kwõj kattõr ak uwe ilo wa.
5. Kautiej mour eo an juon ajri ejjañin l̦otak
Devid ear kõmel̦el̦e bwe el̦ap an Jeova kea im itoklimo kõn mour eo an juon niñniñ me ejjañin l̦otak. Riit Sam 139:13-17, innem bwebwenato kake kajjitõk in:
Im̦aan mejãn Jeova, mour eo an juon niñniñ ej ke jinoe ilo iien eo ej l̦otak ak ilo iien eo jinen ej jino bõro̦ro kake?
Kien ko an Jeova ñan ri-Israel ro ilo iien ko etto rar kõjparok ro jinen im ajri ro nejier me rejjañin l̦otak. Riit Exodus 21:22, 23, innem bwebwenato kake kajjitõk kein:
Ewi wãween an Jeova watõk juon armej me ear jirilo̦k im m̦an lo̦jien juon kõrã ebõro̦ro?
En kar ewi wãween An eñjake ñe juon armej ej kããlõt ñan kõm̦m̦ane men in?b
Ewi wãween am̦ eñjake kõn l̦õmn̦ak in an Anij?
Meñe juon kõrã ej kile aorõkin mour ak emaroñ l̦õmn̦ak bwe an m̦ane lo̦jien ej men eo wõt emaroñ kõm̦m̦ane. Riit Aiseia 41:10, innem bwebwenato kake kajjitõk in:
El̦aññe juon kõrã ej iioon ijjiped ñan m̦ane lo̦jien, wõn eo ej aikuj reilo̦k ñane ñan bõk jipañ, im etke?
JET ARMEJ REJ BA: “Ewõr an juon kõrã jim̦we im maroñ ñan kããlõt ñan m̦ane lo̦jien—ej ãnbwinnin im an make pepe.”
Ta eo ej kaalikkar ñan eok bwe Jeova ej kaorõk mour eo an juon jinen ekoba ajri eo nejin me ejjañin l̦otak?
TARLEP IN KATAK EO ILO TUKADU
Baibõl̦ ej katakin kõj ñan yokwe, kautiej, im kõjparok mour, juon menin letok jãn Jeova. Men in ej kitibuj mour ko ad make im mour ko an ro jet.
Ãlij
Etke elukkuun aorõk mour ko an armej ippãn Jeova?
Ewi wãween an Jeova eñjake ñe juon armej ej kããlõt ñan bõk mour eo an bar juon armej ak mour eo an make?
Ta eo kwõj kam̦m̦oolol kake kõn menin letok eo kõn mour?
KAL̦APL̦O̦K AM̦ MEL̦EL̦E
Ewi wãween jemaroñ kam̦m̦oolole Jeova kõn menin letok eo kõn mour?
Pukot uwaakin kajjitõk in, Anij enaaj ke jeorl̦o̦k bõd eo an juon kõrã me ear m̦an lo̦jien?
“What Does the Bible Say About Abortion?” (Katak eo ilo online)
Ad katak bwe Anij ej lukkuun kaorõk mour, ewi wãween an men in aikuj jelõt jokãlõt ko ad kõn menin kam̦õn̦õn̦õ ko?
“‘Extreme Sports’—Should You Take the Risk?” (Awake!, October 8, 2000)
Ta el̦aññe juon armej ej l̦õmn̦ak in bõk mour eo an make? Lale ewi wãween an Baibõl̦ eo maroñ jipañ.
“I Want to Die—Can the Bible Help Me When I Have Suicidal Thoughts?” (Katak eo ilo online)
a El̦ap an Jeova kea kõn ro erup bũrueer ak ro rej bũrom̦õj. (Sam 34:18) Emel̦el̦e kõn l̦õmn̦ak im eñjake ko rekõmmetak me remaroñ tõll̦o̦ke juon armej ñan kõn̦aan bõk mour eo an make, im ekõn̦aan jipañ er. Ñan lale ewi wãween an Anij maroñ jipañ kõn l̦õmn̦ak im eñjake rot kein, jouj im riiti katak eo etan “I Want to Die—Can the Bible Help Me When I Have Suicidal Thoughts?” me ej wal̦o̦k ilo katak in ium̦win m̦õttan eo ej ba Kal̦apl̦o̦k Am̦ Mel̦el̦e.
b Ro rar m̦an lo̦jieer ejjab aikuj l̦e jãn joñan an nana bõklõkõt eo aer—Jeova emaroñ jeorl̦o̦k aer bõd. Ñan bõk mel̦el̦e ko jet, lale katak eo etan, “What Does the Bible Say About Abortion?” ium̦win m̦õttan eo ej ba Kal̦apl̦o̦k Am̦ Mel̦el̦e ilo katak in.