KATAK 34
Ewi Wãween Jemaroñ Kwal̦o̦k Yokwe eo Ad ñan Jeova?
Kwõj ke eñjake am̦ epaakel̦o̦k Anij jãn ke kwaar jino katak Baibõl̦? Kokõn̦aan ke wõnm̦aanl̦o̦k wõt im kõkajoore jem̦jerã eo am̦ ippãn? El̦aññe aet, keememej bwe ñe Jeova ej loe an l̦apl̦o̦k im eddekl̦o̦k yokwe eo am̦ ñane, enaaj l̦apl̦o̦k an yokwe im kea kake eok. Ewi wãween am̦ maroñ kwal̦o̦k bwe kwõj yokwe e?
1. Ewi wãween ad kwal̦o̦k ñan Jeova bwe jej yokwe e?
Jej kwal̦o̦k yokwe eo ad ñan Jeova ilo ad pokake e. (Riit 1 Jon 5:3.) Ejjab iuuni jabdewõt ñan pokake e. Ijello̦kun an ãindein, ej letok ñan kõj maroñ eo ñan kããlõt el̦aññe jenaaj pokake e ak jaab. Etke? Kõnke Jeova ekõn̦aan bwe jen “pokake . . . jãn [bũruod].” (Rom 6:17) Mel̦el̦ein bwe, ekõn̦aan bwe kwõn pokake e, ejjab kõnke kwõj aikuj in kõm̦m̦ane, ak kõnke kwõj yokwe e. Kar kõm̦m̦ane M̦õttan 3 im 4 ilo bok in ñan jipañ eok kwal̦o̦k yokwe eo am̦ ñan Jeova ikijjeen am̦ kõm̦m̦ani men ko rej kabuñbũruon im ñan jum̦ae men ko rej kabũrom̦õje.
2. Etke emaroñ pen ñan kwal̦o̦k yokwe eo ad ñan Jeova?
‘Elõñ eñtaan ko an ro rem̦m̦an.’ (Sam 34:19) Kõj aolep jej kate wõt kõj kõn m̦õjn̦o̦ im likjab ko ad meñe epen. Im jemaroñ bar iioon apañ kõn jããn, jab ekajet jim̦we, im wãween ko jet reppen. Ñe jej iioon wãween ko reppen, emaroñ jab pidodo ñan kõm̦m̦ani men ko Jeova ej kajjitõk ippãd. Unin ej kõnke emaroñ pidodol̦o̦k ñan l̦oore ial̦ eo ebõd. Bõtab ñe kwõj tiljek ilo am̦ kõm̦m̦ane men eo Jeova ej kajjitõk ippam̦ ñan kõm̦m̦ane, kwõj kwal̦o̦k bwe kwõj yokwe e ilõñin jabdewõt men. Im kwõj kaalikkar ñane bwe kwõj tiljek ñane. Ilo am̦ ãindein, enaaj bareinwõt tiljek ñan kwe. Ejjãmin ilo̦k jãn eok.—Riit Sam 18:25.
KAM̦WILAL̦L̦O̦K AM̦ MEL̦EL̦E
Etale im lale etke am̦ pokake ej juon men eaorõk ippãn Jeova, im katak ta eo emaroñ jipañ eok ñan dãpij wõt am̦ tiljek ñane.
3. Juon aitwerõk me ej kitibuj eok
Ekkar ñan Baibõl̦ eo ilo bokin Job, Setan ear n̦aruon em̦m̦aan in Job im bareinwõt aolep armej ro rekõn̦aan karejar ñan Jeova. Riit Job 1:1, 6–2:10, innem bwebwenato kake kajjitõk kein:
Ekkar ñan Setan, etke Job ear pokake Jeova?—Lale Job 1:9-11.
Ta eo Setan ej ba kõn aolep armej ro ekoba kwe?—Lale Job 2:4.
Riit Job 27:5b, innem bwebwenato kake kajjitõk in:
Ewi wãween an kar Job kam̦ool bwe elukkuun m̦ool yokwe eo an ñan Jeova?
Job ear kaalikkar yokwe eo an ñan Jeova ilo an kar dãpij wõt an tiljek ñane
Jej kaalikkar yokwe eo ad ñan Jeova ilo ad dãpij wõt ad tiljek ñane
4. Kam̦õn̦õn̦õik bũruon Jeova
Riit Jabõn Kõnnaan 27:11, innem bwebwenato kake kajjitõk in:
Ewi wãween an Jeova eñjake ñe kwõj kwal̦o̦k am̦ mãlõtlõt im pokake e? Etke kwõj ba men in?
5. Kwõmaroñ tiljek ñan Jeova
Yokwe eo ad ñan Jeova ej kõm̦akũt kõj ñan kwal̦o̦k kõn E ñan ro jet. Ad tiljek ñane ej kõm̦akũt kõj ñan kõm̦m̦ane men in meñe ejjab pidodo. Kõjo̦e PIJAIN ALWÕJ eo, innem bwebwenato kake kajjitõk kein:
Enañin ke wõr iien me epen ñan am̦ kwal̦o̦k ñan ro jet kõn Jeova?
Ilo pijain alwõj eo, ta eo ear jipañ Grayson ñan anjo̦ ioon an mijak?
Epidodol̦o̦k ad tiljek ñan Jeova ñe jej yokwi men ko ej yokwi im dike men ko ej diki. Riit Sam 97:10, innem bwebwenato kake kajjitõk kein:
Ekkar ñan men ko em̦õj am̦ katak kaki, ta jet iaan men ko Jeova ej yokwi? Ta jet iaan men ko ej diki?
Ewi wãween am̦ maroñ katak ñan yokwe men ko rem̦m̦an im dike men ko renana?
6. Jej bõk tokjãn ñe jej pokake Jeova
Aolep iien ad pokake Jeova ej men eo em̦m̦antata. Riit Aiseia 48:17, 18, innem bwebwenato kake kajjitõk kein:
Kwõl̦ak lale jemaroñ ke lõke bwe aolep iien Jeova ejel̦ã ta eo em̦m̦antata ñan kõj? Etke kwõj ba men in?
Jãn jinoin am̦ katak Baibõl̦ im katak kõn Anij eo em̦ool, Jeova, ewi wãween am̦ bõk tokjãn jãn men in?
JET ARMEJ REJ BA: “Anij ejjab lukkuun kea kake men ko ij kõm̦m̦ani.”
Eoon ta eo kwõmaroñ kõjerbale ñan kaalikkar bwe kõm̦m̦an ko ad rej jelõt eñjake ko an Jeova?
TARLEP IN KATAK EO ILO TUKADU
Kwõmaroñ kwal̦o̦k yokwe eo am̦ ñan Jeova ilo am̦ pokake e im ilo am̦ dãpij wõt am̦ tiljek ñan e meñe ewõr wãween ko rej kõm̦m̦an bwe en pen.
Ãlij
Ta eo kwaar katak jãn waanjoñak eo an Job?
Enaaj ewi wãween am̦ kam̦ool yokwe eo am̦ ñan Jeova?
Ta eo enaaj jipañ eok ñan tiljek wõt ñan Jeova?
KAL̦APL̦O̦K AM̦ MEL̦EL̦E
Lale ewi wãween kwõmaroñ tiljek ñan Jeova im eklejia eo.
Kal̦apl̦o̦k am̦ jel̦ã kõn men ko Setan ej ba n̦ae armej ro.
“Job Keeps His Integrity” (The Bible—What Is Its Message? section 6)
Lale ewi wãween an ro reddik im jo̦dikdik ro maroñ bareinwõt kwal̦o̦k yokwe eo aer ñan Jeova.
Ewi wãween an jo̦dikdik ro me rej iioon ijjiped ko jãn jo̦dikdik ro jet maroñ dãpij aer tiljek ñan Anij?