KATAK 50
Ewi Wãween bwe Baam̦le eo Am̦ En Maroñ Lo M̦õn̦õn̦õ?—Baat 2
Ajri ro rej menin letok jãn Jeova. Ej kõtmãne bwe jemãn im jinen ajri ro ren lukkuun lale im kõjparok menin letok in. Jeova ej letok naanin tõl ko remãlõtlõt ñan jipañ jemãn im jinen ajri ro ñan kõm̦m̦ane men in. Naanin tõl ko an remaroñ bar jipañ ajri ro bwe ren bõk kun̦aaer ñan kõm̦m̦an bwe baam̦le eo en m̦õn̦õn̦õ im lo tõprak.
1. Ta naanin tõl ko Jeova ej lil̦o̦k ñan jemãn im jinen ajri ro?
Jeova ej kõtmãne bwe jemãn im jinen ajri ro ren yokwe ajri ro nejier im jol̦o̦k el̦ap iien ippãer joñan wõt aer maroñ. Ej bareinwõt kõn̦aan bwe jemãn im jinen ajri ro ren kõjparok ajri ro nejier jãn jorrããn im ñan kõjerbal naanin kakapilõk ko ilo Baibõl̦ ñan katakin im kammineneik er. (Jabõn Kõnnaan 1:8) Jeova ej ba ñan ro jemãn ajri ro: “Kom̦win kõkkaajiririik [ajri ro nejimi] ilo kauwe im kõn naanin kakapilõk ko an Jeova.” (Riit Epesõs 6:4.) Jeova ej m̦õn̦õn̦õ ñe jemãn im jinen ajri ro rej l̦oor naanin tõl ko an ñe rej kõkkaajiririik ajri ro nejier im jab lel̦o̦k eddo in ñan bar juon.
2. Ta naanin tõl ko Jeova ej lil̦o̦k ñan ajri ro?
Jeova ej ba ñan ajri ro: “Kom̦win pokake jememi im jinemi.” (Riit Kolosse 3:20.) Ñe ajri ro rej kautiej im pokake jemãer im jineer, rej kõm̦m̦an bwe Jeova im jemãer im jineer ren m̦õn̦õn̦õ. (Jabõn Kõnnaan 23:22-25) Jesus ear likũt juon joñak em̦m̦an ke ear juon ajri. Meñe ear weeppãn, ak ear pokake im kwal̦o̦k an kautiej jemãn im jinen.—Luk 2:51, 52.
3. Ewi wãween kwõmaroñ ruwaakl̦o̦k ñan Anij ãinwõt juon baam̦le?
El̦aññe kwõj juon jemãn ak juon jinen, ejjel̦o̦k pere bwe kokõn̦aan bwe ajri ro nejũm̦ ren bar yokwe Jeova ãinwõt bar kwe. Ewi wãween am̦ maroñ katõprak mejãnkajjik in? Ilo am̦ kõm̦m̦ane men eo Baibõl̦ ej ba: “Kwõn kanooj katakin ro nejũm̦ [naan ko an Jeova], im kwõn kõnono kaki ñe kwõj jijet ilo m̦weo im̦õm̦, im ñe kwõj etetal ilo ial̦.” (Duteronomi 6:7) Naan in “katakin” ej kwal̦o̦k mel̦el̦e eo bwe ej aikuj ikkutkut ad bar ãliji juon men. Ejjel̦o̦k pere, kwõjel̦ã bwe ekkã am̦ aikuj ãliji juon men bwe ajri ro nejũm̦ ren keememeje. Innem, eoon in ej mel̦el̦ein bwe kwõj aikuj ekkeini am̦ kappukot iien ñan am̦ kõnono ippãn ajri ro nejũm̦ kõn Jeova. Ej juon men em̦m̦an ñan kõm̦m̦an iien kajjojo wiik ñan kabuñ ñan Anij ãinwõt juon baam̦le. El̦aññe ejjel̦o̦k nejũm̦ ajri, ej wõr wõt tokjãn ko komiro eo pãleem naaj bũki ilo amiro kõm̦m̦an iien ñan katak naanin Anij kajjojo wiik.
KAM̦WILAL̦L̦O̦K AM̦ MEL̦EL̦E
Lale men ko kwõmaroñ kõm̦m̦ani me rej kõm̦m̦an am̦ lo m̦õn̦õn̦õ im jokwane ilo mourin baam̦le eo am̦.
4. Katakin im kammineneik ajri ro nejũm̦ ilo yokwe
Emaroñ pen ñan katakin im kammineneik juon ajri. Ewi wãween Baibõl̦ eo emaroñ jipañ eok? Riit Jemes 1:19, 20, innem bwebwenato kake kajjitõk kein:
Ewi wãween ro jemãn im jinen ajri ro remaroñ kwal̦o̦k yokwe ilo aer kõnono ippãn ajri ro nejier?
Etke juon jemãn ak juon jinen ejjab aikuj kauwe ajri eo nejin ilo iien eo ej illu?a
5. Kõjparok ajri ro nejũm̦
Ñan kõjparok ajri ro nejũm̦, ekanooj in aorõk ñan kõnnaan ippãer kajjojo kõn an ruo armej babu ippãn doon. Emaroñ pen im kajjookok ñan kõm̦m̦ane men in. Kõjo̦e PIJAIN ALWÕJ eo, innem bwebwenato kake kajjitõk kein:
Etke epen an jet jemãn im jinen ajri ro kõnnaan ippãer kõn an ruo armej babu ippãn doon?
Ewi wãween an jet jemãn im jinen ajri ro kõmel̦el̦eik ro nejier kõn an ruo armej babu ippãn doon?
Ãinwõt kar kanaan kake, lal̦ in an Setan elukkuun l̦apl̦o̦k wõt an nana. Riit 2 Timote 3:1, 13, innem bwebwenato kake kajjitõk in:
Jet iaan armej ro renana me eoon 13 ej kwal̦o̦k kake, rej ko̦kkure ajri ro. Kõn men in, etke elukkuun aorõk ñan an jemãn im jinen ajri ro katakin ro nejier kõn an ruo armej babu ippãn doon im wãween aer maroñ kõjparok er make jen ro me remaroñ ko̦kkure er?
Kwaar Jel̦ã Ke?
Ri-Kõnnaan ro an Jeova rar kõm̦m̦an elõñ bok im pijain alwõj ko ñan jipañ jemãn im jinen ajri ro ñan katakin ro nejier kõn an ruo armej babu ippãn doon, im bareinwõt ñan kõjparok er jãn ro me remaroñ ko̦kkure er. Ñan lo jet waanjoñak ko, jouj im lale:
Protect Your Children (pijain alwõj)
“Teaching Your Child About Sex” (Awake! No. 5 2016)
6. Kautiej jem̦am̦ im jinem
Ajri im jo̦dikdik ro remaroñ kwal̦o̦k kautiej ñan jemãer im jineer ikijjeen wãween aer kõnnaanl̦o̦k ñan er. Kõjo̦e PIJAIN ALWÕJ eo, innem bwebwenato kake kajjitõk kein:
Etke ewõr tokjãn ñan an juon ajri ak jo̦dikdik kwal̦o̦k kautiej ilo an kõnnaan ippãn jemãn im jinen?
Ewi wãween an juon ajri ak jo̦dikdik maroñ kõnono ilo juon wãween ej kwal̦o̦k kautiej ñan jemãn im jinen?
Riit Jabõn Kõnnaan 1:8, innem bwebwenato kake kajjitõk in:
Ewi wãween juon ajri ak jo̦dikdik ej aikuj em̦m̦akũt ñe jemãn im jinen rej lel̦o̦k naanin tõl ko ñane?
7. Kabuñ ñan Jeova ãinwõt juon baam̦le
Baam̦le ko me rej Ri-Kõnnaan ro an Jeova rej kõm̦m̦an juon iien kajjojo wiik ñan kabuñ ñan Jeova ippãn doon. Ta ko rej kõm̦m̦ani ilo iien kabuñ an baam̦le? Kõjo̦e PIJAIN ALWÕJ eo, innem bwebwenato kake kajjitõk kein:
Ewi wãween juon baam̦le emaroñ ekkeini aer kõm̦m̦ane iien Kabuñ an Baam̦le eo kajjojo wiik?
Ta eo juon jemãn ak jinen emaroñ kõm̦m̦ane bwe iien kabuñ an baam̦le eo en lem̦õn̦õn̦õ im wõr tokjãn?—Lale pija eo ilo jinoin katak in.
Ta eo emaroñ kõm̦m̦an bwe en pen ami katak ippãn doon?
Ilo Israel eo etto, Jeova ear kõtmãne bwe baam̦le ko ren ekkeini aer kõnono kõn Jeje ko. Riit Duteronomi 6:6, 7, innem bwebwenato kake kajjitõk in:
Ewi wãween am̦ maroñ jerbale naanin kakapilõk in?
Jet wãween ko ñan kõm̦m̦ane iien kabuñ an baam̦le:
Kõppojak ñan iien kweilo̦k ko.
Riit im kõnono kake juon bwebwenato ilo Baibõl̦ me enaaj em̦m̦an ippãn baam̦le eo am̦.
El̦aññe ewõr nejũm̦ ajri, kwõmaroñ taunl̦out ak bũriini juon iaan kein katak ko ñan ajri ilo jw.org.
El̦aññe ewõr nejũm̦ jo̦dikdik, kwõmaroñ bwebwenato kake jet iaan kein katak ko ñan jo̦dikdik ro ilo jw.org.
Kõm̦m̦an tieta im arin armej ro ilo bwebwenato ko ilo Baibõl̦ ippãn ajri ro nejũm̦.
Alwõj im bwebwenato kake juon pijain alwõj ilo jw.org.
JET ARMEJ REJ BA: “Jelukkuun poub ilo jerbal, ejjel̦o̦k ad iien ñan katakin ajri ro nejid kõn Baibõl̦ eo.”
Ta eo kwõnaaj kar ba?
TARLEP IN KATAK EO ILO TUKADU
Jeova ekõn̦aan bwe jemãn im jinen ajri ro ren yokwe, kammineneik, im kõjparok ro nejier; ekõn̦aan bwe ajri ro ren kwal̦o̦k kautiej im pokake jemãer im jineer; im ekõn̦aan bwe baam̦le ko ren kabuñ ñane ippãn doon.
Ãlij
Ewi wãween jemãn im jinen ajri ro remaroñ kammineneik im kõjparok ro nejier?
Ewi wãween an ajri ak jo̦dikdik ro maroñ kwal̦o̦k kautiej ñan jemãer im jineer?
Ta tokjãn ko kwõmaroñ loi ilo am̦ kõm̦m̦an iien kajjojo wiik ñan kabuñ ippãn doon ãinwõt juon baam̦le?
KAL̦APL̦O̦K AM̦ MEL̦EL̦E
Ta katak ko me renaaj kõpooj ajri ro nejũm̦ ñe renaaj rũtto?
Katak im lale naanin kakapilõk ko Baibõl̦ ej litok ñan ro rej lale rũtto ro jemãer im jineer.
“What Does the Bible Say About Caregiving for Elderly Parents?” (Katak eo ilo online)
Lale wãween eo juon em̦m̦aan me ear jaje kilen kõkkaajiriri kar oktak im erom juon jemãn me ear lo el̦ap tõprak.
Lale wãween eo ro jemãn baam̦le ko remaroñ kõkajoor kõtaan eo aer ippãn l̦addik ro nejier.
“How Can Fathers Stay Close to Their Sons?” (The Watchtower, November 1, 2011)
a Ilo Baibõl̦ eo, naan in “kauwe” ej jitõñl̦o̦k ñan katakin, tõl, im kajim̦we. Ejjab mel̦el̦ein ñan kwal̦o̦k wãween ko rellãj ñan jidik.—Jabõn Kõnnaan 29:17.