Kajededlok News eo Emõn Ilo Jikin ko Reutiej Ilo Tol Andes
KIMEAÑ aolep 18 kar kiki ion lal meñe etton. Ke kimij wũdiddid iloan bããk in kiki ko am kin an lukkun molo, kimar roñ ainikien wũtmijeljel ion bõrwoj in mweo. Kin joñan jorrãn in em jidikdik in, kimar lemnak ibbem make elañe kimar ro moktata kar jokwe ie.
Etke armij rein 18 rar kõnan lolok jikin in? Uak eo ej bedbed ion kõnan eo ad ñan jerbale nan in kakien eo an Jesus ñan kwalok kin news eo emõn “ñõn eneo etolok tata i lõl.” (Jerb. 1:8; Mat. 24:14) Kimar etal im kwalok nan ilo jikin eo ettolok ilõñin Tol Andes ilo Bolivia.
Abañ eo ñan Jikrõklok Andes
Abañ eo jinointata kar ñan jikrõklok jikin eo. Kimar lo bwe waan bõkto bõktak eo ñan jikin in ettolok ear jab kajejjet karõk ak schedule in ettõr ko an. Ke ear tõkeãktok bus eo, ear dik jen joñan eo kimar kõtmene kake, inem jet ian ro mõttam rar aikwij in jutak wõt. Bõtab kimar tõbraklok ijo kimar jibadõke.
Kõtõbar eo am in bwe kimin kwalok nan ilo jikin ko ilõñin Andes ilo Bolivia. Inem elikin am uwe ilo bus eo im itoitak, armij ro ilo kumi eo am, rar kanuij kejbãrok air etetal ilokan don ilo ial eo itõrerein tol eo kin air obrak kin mweiuk ko.
Meñe bukwon ko rar dik, moko rar lukkun etolok jen don, inem ear bõk elõñ awa ko ñan lolok kajjojo bukwon. Jekdon ewi aetokin am etetal, ekkã an wõr wõt moko iman. Elõñ alen kimij jebwãbwe kin an lõñ ial ko rekabwokbwok ilo melaj ko.
“Etke Kom ar Jab Itok Mokta?”
Kin an juõn kõrã lukkun bwilõñ kin aetokin am kar etetal, ear kõtlok bwe kimin kajerbal jikin kõmat eo an im alal ko ñan am kõmat kijim mõñã in raelep ie. Ke juõn emaan ear katak kin ta eo Bible eo ej katakin ikijen mij, ear kajitõk, “Etke kom ar jab itok mokta?” Joñan an kar itoklimo, ke ear ien am emmakit jen bukwon eo an, ear itok ibbem tok ilo ial eo am lok bwe en kwalok elõñlok kajitõk ko. Bar juõn emaan eo ejañin kar roñ kin Ri Kennan ro an Jehovah ear kwalok an itoklimo kin book ko ad. Ear lap an kamolol kim kin am kar itok im ear letok key in juõn imõn kakonkon mweiuk bwe kimin maroñ bed ie ilo boñin eo.
Juõn boñ, joñan an kar lukkun marok kimar jab jelã bwe kimar kajutak em nuknuk ko am ion juõn jikin me elõñ kallep ko ie. Emõkaj air kar kwalok air abõnõnõ ikijen air kiji kim. Ak kim ear lukkun mõk ñan emmakit, im jej kamolol bwe ejjabto tokelik rar bõjrak.
Ilo jinoin ekin metak enbwinim kin am kiki ion lal, ak ilo boñ kimij jino iminene. Bõtab jabdewõt metak ko rar jako jen lemnak ko am ilo jibboñ ke kimar kalimjek im lo komlal ko me kõdo ko rej emmakit lõñlok jidik kin jidik im tol ko rettolok im raibujuij kin air libobo kin snow ko. Ekar ejelok keroro ijellokin wõt ainikien den ke ej toor jen river eo im an bao ko al.
Elikin am kar tutu ilo river eo, kim ear etale jeje ko ilo Bible ibben don, mõñã in jibboñ, im jino wanliñlok ilo ial eo am ñan jibadõk bukwon ko jet rettolok. Ear lap an wõr tokjen am kar wanliñ. Kim ar iion juõn lellab eo ear jañ ke ear jelã bwe etan Anij, Jehovah, ebed ilo Bible. Im ear lukkun mõnõnõ. Kiõ ej kajerbal etan Anij ilo jar ko an!
Juõn lõllab ear ba bwe Anij emaroñ kar kememej e, im ej jino al kin juõn al eo me ej ba bwe enjel ro rar jilkintok kim. Bar juõn emaan, eo ear lukkun nañinmij im ear jab maroñ emmakit jen mweo imõn, ear jiroñ kim bwe ejelok juõn ilo bukwon eo an make ear kõmman ien ñan lolok e. Ke ear jelã bwe kimar itok jen La Paz ear lukkun bwilõñ. Im bar juõn emaan ear lukkun bwilõñ bwe Ri Kennan ro an Jehovah rej lolok armij ro ilo moko imwiir, ak kabuñ ko jet rej kir armij ñan imõn jar ko ilo air kajañ bell ko.
Aolep moko ilo melaj eo ejelok air jarom, inem armij rej jino kiki ñe ejokmarok im jerkak ilo ien al ej tak. Kin men in, kimij jino jibadõk armij jiljino awa jibboñtata. Kinke armij renaj jako bwe rej illok ñan jikin jerbal ko air. Inem tokelik, ro emwij air jino jerbal rar mõnõnõ in kabõjrak air jerbal im roñjake ennan eo am jen Nan in Anij, bõlen kõtlok bwe ox ko ren kakije jen air kabidodo bũdej ko. Elõñ ro kimij iion ir ilo moko rej likit kilin sheep ko bwe kimin jijet ioir im rej kirtok aolepen family eo ñan air roñjake. Jet ri kallip ro rar kane bag kilep ko kin maize (einwõt corn) tarrin kamolol eo air kin book ko kimar likit ibbeir me rej bedbed ion Bible.
“Kwar Jab Meloklok Iõ”
Emol bwe, ñan an armij maroñ wõnmanlok im bõk jelãlokjen eo emol ilo Bible eo, ej aikwij emakijkij ad lolok ir. Elõñ rar akwelap ñan kim bwe kimin bar jeblaklok ñan wõnmanlok im katak ibbeir. Kin men in, kimar bar kõmman jet trip ko ñan jikin in ilo Bolivia.
Ilo trip eo tokelik, juõn lellab ear mõnõnõ ke kimar bar jeblak, ej ba: “Kom einwõt ajiri ñan iõ. Kom ar jab meloklok iõ.” Juõn emaan ear kamolol kim kin jerbal eo am im karuwaineneik kim ñan bed ilo mweo imõn ilo ien eo kim naj bar jeblak. Bõlen tõbrak eo elaptata ear walok jen kate eo am kar bwe juõn kõrã me ekkã am iione ilo ien lolok ko am mokta ear emmakit ñan jikin kwelok eo im kiõ ej kwalok kin news eo emõn.
Ilo ran eo eliktata in trip eo am, ear maat kaan in lamp ko am im mõttan jidik emaat mõñã ko kijim. Kimar kamaati aolep mõñã ko ewõr ibbem ion kijeek, im jino jeblak. Kimar bed ijo ettolok jen bukwon eo jikin bus eo ej bed ie. Eliktata kimar tõbarlok jikin eo ilo boñ.
Jeblak ñan Kabijuknen
Ilo ien eo kimar jeblak ear jorrãn bus eo. Bõtab tokelik, kimar maroñ uwe ilo lokan juõn truck eobrak kin armij ro.
Ilo ial eo am ñan kabijukneõm ear letok juõn ien emõn ñan kwalok nan ñan armij ro jet rej iuwe ilo wa eo me rar kõnan jelã etke kimar bed ijo. Meñe rar armij ejookok, rar lukkun emõn im joij.
Elikin ruatimjuõn awa in am kar bed lokan truck eo, kimar jikrõktok kabijuknen eo am—lukkun tutu im bio. Ak, trip eo am ear jab jettokjen. Ilo ial eo tok, kimar maroñ in karõk ñan katak Bible ibben juõn kõrã eo ej jokwe ilo jikin kwelok eo.
Ekar juõn jerammõn elap ñan kwalok kin news eo emõn ibben armij ro ilo jikin ko rettolok. Kimar kwalok ilo emen bukwon ko relap im elõñ bukwon ko redik. Kimar lemnak kin nan kein: “Re nañin wõlio ilo tol ko neen eo ej bõktok nan emõn, ej kwalok ainemõn, ej kennantok kin emõn, ej kwalok men in lomor.”—Ais. 52:7; Rom. 10:15.
[Pija eo ilo peij 17]
Bojak ñan kwalok kin news eo emõn