Juõn Karõk Elukkun Aorõk

EWÕR juõn aõ karõk elukkun aorõk. In kamelele ta eo ear kamakit iõ ñan kõmmane karõk in, juõn jinen jen Spain ear ba.

Ainemõn im burukuk ear diklok ilo mweo imõn jinõ im jema. Family eo am rar obrak kin buromõj ke ladik eo ediktata jatiõ ear mij ilo juõn lanwõtwõt ekanuij nana ke ear emen wõt an yiõ. Bareinwõt, manit ko renana an jema rar kõmman bwe en bin an jinõ lo mõnõnõ ilo mour in mare eo airro. Bõtab, men in ebin ear jab bõprae jinõ jen an katakin kimro ladik eo jeiõ kin mwil ko remõn.

Tokelik, leo jeiõ ear mare im ña bareinwõt iar mare. Elikin jet ien, jinõ ear bõk nañinmij in cancer, me ilo jemlokin ear mij kake. Ak mokta jen an kar mij, ear letok juõn menin aorõk ñan kimro.

Juõn kõrã ear jelã kajjen ear konono ibben kin kejatdikdik eo kin jerkakbiji ilo Bible eo, im jinõ ear mõnõnõ im katak Bible ibben. Ilo jemlokin lok ien mour eo an, kejatdikdik eo ilo Bible ear lelok juõn men ñan an reimanlok ñane im ear jibañ e lo mõnõnõ.

Ke kimar lo wãwen eo emõn ennan eo ilo Bible ear jelet e, kimro leo jeiõ ar bareinwõt jino katak Nan in Anij. Iar baptais einwõt juõn ian Ri Kennan ro an Jehovah juõn alliñ mokta jen an kar lotak ajiri eo kein karuo nejiõ, juõn ledik edeeo me kimar naetan Lucía.

Ran eo iar baptais ear lukkun aorõk ñan ña. Juõn un, ear kinke kiõ ij an Jehovah, ilo aõ kar wujleplok mour eo aõ ñan jerbal ñan e ñan indio. Bar juõn un, ear kinke imaroñ kar kwalok tõmak eo aõ ibben ladik eo im ledik eo nejiõ rejitenburu ibba.

Bõtab, un eo kein karuo me ear kamõnõnõik iõ ear bõjrak tokelik. Ke Lucía ear emen an yiõ, ear jino wõr metak ko relap ilo lojen. Elikin air kar kõmman jet kakõlkõl ko, radiologist (doctor eo ej kõmman pija ak X-ray) eo ear kamelele bwe juõn tumor joñan wõt juõn orange ear koba ilo ajin Lucía. Doctor eo ear kamelele bwe Lucía ear bõk juõn nañinmij ekauwatata etan neuroblastoma, juõn tumor emõkaj an mõñãñe ilo enbwin eo. Kin men in, Lucía ear jino tarinae nae nañinmij in cancer iumin jiljilimjuõn yiõ, me ear kitibuj elõñ ran ko in an bed ilo hospital.

Juõn Jitõbõn Karmijete Emake

Iumin yiõ kein rebin, ekkã an kar Lucía rejañ iõ kin atbokwõj ko re okmãnãn im mejenma ko rekõketak. Wãwen eo ear kijenmij kin nañinmij eo an ear bareinwõt jelet ri jerbal ro ilo hospital ilo juõn wãwen emõn. Ear mõnõnõ in jerbal ibben ri jerbal ak nurse ro aolep ien, ilo an jibañ ir bõklok mõñã ko einwõt yogurt, juice, im men ko jet ñan ajiri ro rar deloñ ilo hospital ilo ward eo an ajiri. Ri jerbal ro rar bareinwõt lelok ñan Lucía juõn nuknuk emouj me doctor ro rej kõnaki im juõn card jidikdik ñan kõnake ibben nuknuk eo ñan kalikar bwe ej juõn ri jibañ ñan nurse eo.

“Lucía ear kamakit buruõ,” juõn ri jerbal in hospital ej kememej. “Ear juõn ajiri emõn ibben jerbal, ekabel, im emõn ibben jiña pija ko. Ear jab jook in kalikar lemnak ko an im eritto an lemnak, ear makitkit einwõt juõn ritto.”

Lucía ear bõk kajur im kainemõn jen Nan in Anij. (Hib. 4:​12) Ear tõmak bwe ilo lal eo ekãl, “e naj ejelok bar mij, im re jamin bar liãjlol, ak jõñ, ak iñtan,” einwõt an Nan in Anij kallimur. (Rev. 21:4) Ear itoklimo kin ro jet, im ear kajerbal ien ko rebellok ñan kwalok nan kin Bible eo. Kejatdikdik eo ebin an Lucía ilo jerkakbiji eo ear jibañ e ñan debij eñjake ko an im mõnõnõ wõt meñe ear wõr jidik wõt an kejatdikdik ñan mour jen nañinmij eo an. (Ais. 25:8) Ear debij wõt lemnak in mae ien eo ear mij kin nañinmij in cancer.

Eñin kar ran eo me iar kõmmane karõk eo elukkun aorõk. Lucía ear jab maroñ kabellok mejen. Jemen ear jibwe pã eo juõn pein im iar jibwe pã eo rãjet. “Jab inebata, iban etal jen yuk,” iar jiroñ e. “Kwon jab mijak. Ñe kwoj ruj ilo jerkakbiji eo kwonaj ejmour. Kwoban bar eñtan, im inaj bed ibbam.”

Kiõ ij aikwij kejbãrok karõk eo iar kõmmane. Ijelã bwe ien kõttar eo kin jerkakbiji eo an eban bidodo. Ak ij bareinwõt jelã bwe elañe ij kõttar ilo aõ liki Jehovah im debij wõt aõ tiljek ñan e, inaj bed ñe Lucía enaj jeblak ilo ien jerkakbiji eo.

Juõn Menin Jolet Jen Lucía

Joñok eo eberan an Lucía, im bareinwõt jibañ eo jen congregation eo, ear jelet buruen im lemnak eo an leo ibba, me ejjab juõn ian Ri Kennan ro an Jehovah. Ran eo Lucía ear mij, ear ba ñan ña bwe ej aikwij etale lemnak ko an. Jejjo week ko tokelik, ear kajitõk ibben juõn elder ilo congregation eo ñan an katak Bible ibben. Tokelik leo ibba ear jino bed ilo kwelok ko. Kin jibañ eo an Jehovah ear bõjrak an kõbatat, men eo me mokta ear jab maroñ bõjrak jene.

Buromõj eo kin jako eo an Lucía ejañin lukkun jako jen iõ, ak ij lukkun kamolol Jehovah kin menin jolet eo Lucía ear likiti. Kimro leo ibba kimij kainemõn don kin kejatdikdik eo eaibujuij kin jerkakbiji eo, im kimij pijaik ilo lemnak ko amro ien eo ñe kim naj bar lo Lucía​—mej ko mejen re dolul im emmourur im libwetõr ko an ion jeben ñe ej ettõñdikdik.

Wãwen eo ekaburomõjmõj ear walok ñan ledik eo nejiõ ear bareinwõt lap an jelet juõn armij ilo bukwon eo. Ilo juõn jibboñin Saturday ke ear wũt, juõn kõrã me ladik eo nejin ear bed ilo ejja school eo wõt an Lucía ear itok ñan mweo imõmro. Ear bar luji ladik eo juõn nejin ke ear 11 an yiõ kin ejja nañinmij eo wõt. Ke ear roñ kin men eo ear walok ñan Lucía, kõrã eo ear bukõt ia eo kimij jokwe ie im itok ñan lotok kim. Ekar kõnan jelã ewi wãwen iar kijenmij kin jako eo an Lucía im kwalok lemnak eo an bwe kimro en ejaake juõn kumi in jibañ ñan kainemõn ro jinen me rej bed ilo ejja wãwen eo amro.

Iar kameleleik e bwe emwij kadede aõ lo kainemõn eo emol ilo juõn ian kallimur ko ilo Bible, me elaplok an kajur jen jabdewõt kainemõn armij emaroñ letok. Mejen ear romak ilo kejatdikdik ke iar readi lok ñan e nan ko an Jesus kar jei ilo Jon 5:​28, 29. Ear mõnõnõ in katak Bible im tokelik ear jino eñjake “ainemõn jen Anij, eo ej elã jen jela otemjej.” (Pil. 4:7) Ñe kimro ej katak Bible ibben don, ekkã wõt amro bõjrak jidik im pijaiki kimro make ilo lal eo ekãl, im karuwaineneiki tok ajiri ro nejimro rejitenburu ilo ien jerkakbiji eo.

Aet, ien mour eo ekadu an Lucía ear likit juõn menin jolet me eban jako ñan indio. Tõmak eo an ear jibañ ñan kaburukuk family eo am ilo am karejar ñan Anij, im ear kabinlok bebe eo aõ ñan jutak bin wõt ilo tõmak. Ilo mol, kij aolep me jaar luji ro rejitenburu ibbed ilo mij me remaroñ jerkakbiji ewõr ibbed juõn karõk elukkun aorõk.

[Pija eo ilo peij 20]

Pija in paradise eo me Lucía ear jiñaiki