Ro Rej Readi Book ko Ad Rej Kajitõk
Ibwijleplep Eo Ilo Ran Ko An Noah Ear Lukkun Walok Ke Ibelakin Lal?
Ibwijleplep eo ilo ran ko an Noah ear walok elõñlok jen 4,000 yiõ ko remotlok. Inem ejelok jabdewõt armij me ear lo ien eo ej mour kiõ im emaroñ in bwebwenato ibbed kake. Bõtab, ewõr juõn book me ej bwebwenato kin jorrãn in im ej kwalok bwe den ko rar kalibubuik tol eo eutiejtata ilo ien eo.
Jeje in bwebwenato eo ej kwalok: “Ej ibij liplip ion lõl iomin eñoul ran . . . Im dren ko rar kanuij kajur ion lõl; im tol ko otemjej re utiej iomin aolepen lõñ rar likjõp. Ilo joñoul lailim kubit, [enañin 22 nee] dren ko rar kajurliñlok; im tol ko rar likjõp.”—Jenesis 7:17-20.
Jet remaroñ lemnak elañe bwebwenato eo kin an kar den kalibubuik aolepen lal ej juõn inoñ ak ej baj juõn kalaplap wõt. Ejjab! Emol men in bwe, elap wõt an lal in kalibubu kin den. Lometo ej kalibubuik enañin 71 percent in lal in. Inem ilo mol den ko jen ibwijleplep eo rej bed wõt ñan kiõ. Im elañe en kar unlok ice ko relap ilo ijoko remolo, den ko ilo lojet renaj laplok im kalibubuik jikin kwelok ko einwõt New York im Tokyo.
Geologist (ro rej katak kin lal, melan, im wãwen an kar ejaak) ro me rej katak kin ene ko ilo tu eañ turilik in America rej tõmak bwe iumin juõn ien eaetok ear wõr elõñlok jen 100 jorrãn ko kin ibwijleplep rar kalibubu jikin in. Juõn ian ibwijleplep kein ear mõkaj an walok im joñan utiejen den eo kar 2,000 nee, im joñan mõkaj in an toor kar 65 mile ilo juõn awa. Kin an walok ibwijleplep kein ilo ailiñ ko jet, men in ej kamol ñan scientist ro bwe juõn ibwijleplep ear maroñ walok ibelakin lal.
Bõtab, ñan ro rej tõmak bwe Bible eo ej Nan eo an Anij, rejjab bere bwe juõn ibwijleplep ear walok ibelakin lal. Emol bwe ear walok. Jesus ear ba ñan Anij: “Am in nan mol eo.” (Jon 17:17) Ri jilek Paul ear jeje bwe ej ankilan Anij bwe en “lomoren armij otemjej, im bwe ren item jela mol.” (1 Timote 2:3, 4) Ewi wãwen Paul ear maroñ katakin ri kalor ro an Jesus kin Anij im karõk eo an elañe ewõr bwebwenato ko ilo Nan eo an Anij me rej inoñ bajjek?
Jesus ear jab tõmak kin Ibwijleplep eo wõt, ak ear bareinwõt tõmak bwe ear walok ibelakin lal. Ilo kanan eo an elap kin bed eo an im jemlokin jukjuk im bed in, ear keidi men kein renaj walok ñan ien ko an Noah. (Matu 24:37-39) Ri jilek Peter ear bareinwõt jeje kin ibwijleplep eo ilo ran ko an Noah: “Kin men kein lõl, e kar ilo ien eo, ke dren ej kalibubu e, e ar joko.”—2 Piter 3:6.
Elañe Noah im ibwijleplep eo me ear walok ibelakin lal ej juõn inoñ bajjek, nan in kakkõl ko an Peter im Jesus ñan ro rej bed ilo ran ko eliktata renaj ejelok tokjeir. Jen an jerbal einwõt juõn nan in kakkõl, lemnak rot kein renaj kabwok melele eo an juõn armij kin nan in kakkõl eo an Bible im kokkure an maroñ ellã im mour jen juõn eñtan elaplok jen Ibwijleplep eo ilo kar ran ko an Noah.—2 Piter 3:1-7.
Ilo an konono kin tiriamo eo an me ejjab jemlok an kwalok ñan armij ro an, Anij ear ba: “Bwe einwõt I ar kanõjnij bwe dren ko an Noa re jamin bar torlok ion lõl, ein drein I ar kanõjnij bwe ijamin illu ñõn kwe, ak enoik yuk.” Einwõt ejelok bere bwe Ibwijleplep eo ilo ran ko an Noah ear kalibubuik lal in, eindein yokwe im joij eo an Anij enaj bed ibben ro rej liki e.—Aiseia 54:9.