Jorrãn eo ej Buñõt Ailiñ in Solomon Islands
Ilo Monday, April 2, 2007, juõn makitkit lal ekanuij in kajur ear kamakitkit mõttan ene ko ilo Solomon Islands, juõn ailiñ itueañ in Australia. Elikin jejjo wõt minute ko, no ko relap, jet iair kar antonelok bwe rar 30 nee utiejiir, rar buñõt ene ko ilo Western Province, im mõn 52 armij im kõmman bwe 6,000 en ejelok mwiir.
Ibwiljin jikin ko me elap air kar jorrãn ej Gizo, juõn bukwon ebake lojet im 7,000 armij ro rar jokwe ilo ene in etan Ghizo Islands, me ej 28 mile ko jen iolaplap in makitkit lal eo. Juõn congregation edik an Ri Kennan ro an Jehovah ilo Gizo rar reimanlok ñan kõmmane Kwojkwoj in Kememej mij eo an Jesus ilo joten eo. (1 Dri Korint 11:23-26) Ruj lokin ran eo ear emõn lañ, ear tak al im lae lojet. Inem, ilo 7:39 a.m. jibboñ, ear jino makitkit lal.
Makitkit Lal!
Ron Parkinson, juõn elder ilo congregation eo, im lio belen, Dorothy, rar kebojak mõñã in jibboñ ke makitkit lal eo ear walok. “Mweo imwem etto an bed ear ellãle manlok im liktak einwõt ñe ear juõn wijki ni ak mweo ear jutak wõt elikin makitkit lal eo,” Ron ej ba. “Ainikien makitkit lal eo ear lukkun kabwilõñlõñ joñan an lap. Pããntõre ko, men ko kõbwebweien loan mweo, kõnno ko, piano eo, im mweiuk ko jet ebidodo kamakiti rar wõtlok ñan lal. Kimar lukkun kate kim bwe kim in dioj jen mweo. Ear mwijmwij neen Dorothy kin bato ko rerup kin an kar jintõb.”
Tony im Christine Shaw, missionary ro, me rar jokwe ebake kim, rar bareinwõt kaiur nabõj lok. “Joñan an kar lap an makitkit lal, iar buñ ion bũdej im iar jab maroñ jutak,” Christine ej ba. “Moko rar ebbebe ion lojet. Juõn no kileplep ear totake moko jen bedbediir. Armij ro ilo kõrkõr ko rar kate ir aõnõn ibwiljin menoknok ko ke rar bukõt ro remour. Inem bar juõn makitkit lal ekanuij lap ear walok—im tokelik bar juõn. Makitkit lal ko jet rar wõnmanlok wõt im walok iumin lalem ran. Elukkun kar kamijak!”
Inem ear Itok Tsunami Eo
Patson Baea ear bed ilo eneo enen ilo Sepo Hite, bõlen emen mile ko rettolok jen Gizo, ke makitkit lal eo ear walok. Ta eo ear walok ñan Patson im family eo an ilo ien jorrãn in?
Patson ej kememejtok ien in ekaeñtanan ear iione: “Iar ettõr ibarijet lok ñan ibben lio ibba, Naomi, im ajiri ro emen nejimro. Rar buñ ion bũdej kin makitkit lal eo bõtab rar jab jorrãn. Ajiri ro rar lukkun wũdiddid, im jet iair rar jañ. Kimro Naomi kar mõkaj im kainemõn ir.”
“Iar kile an oktak wãwen an lojet makitkit. Men in ear kalikar bwe juõn tsunami ej iten walok. Ene jidikdik eo enem enaj kar bojak in bed iumin den. Jinõ, Evalyn, eo ear jokwe ilo juõn ene jidikdik ebak, ear bareinwõt bed ilo kauwatata. Iar mõkaj im ba ñan family eo am bwe ren iuwe ilo kõrkõr eo waam, me ewõr juõn an engine, im kimar ettõrlok im lomoren e.
“Elikin am kar ettõr meto lok jidik, juõn no kileplep ear ettõrtok iumin wa eo waam im etal wõt. Lojet ear lukkun limajnono. Ke kimar tõbar jinõ, ear bwilõñ im lokjenan im ear lukkun lelñoñ in tuwaak ilo den eo. Naomi im Jeremy, ladik eo nejimro 15 an yiõ, rar tulok ilo aet eo im jibañ jinõ aõ tok ñan kõrkõr eo. Inem, iar kõmaat joñan engine eo im kimar wõnmetolok ñan meto.”
“Kiõ lojet ear bããtlok, im joñan an kar bããt mõnaknak ewalok wõd ko rej kabole tõrerein ene ko. Ilo idiñ, juõn no ekanuij in kilep ear ettõrtok im kalibubu ene ko jimor kin den. Mweo imõn ri lotok ro am iturin lojet ear rup jen bedbedin im lukkun bedakilkil. No eo ear deloñ ilo mweo imwem, im kokkure men ko mweiem. Ke ear emõnlok lojet, kimar etal im bõk Bible ko im book in al ko am jen mweo imwem ejorrãn im etal ñan Gizo.”
Ekanuij in kar lõñ men ko rar jorrãn rej bed itõrerein barijet, im elõñ armij rar mij. Ijo ear laptata jorrãn ie kar ilo rilikin Ghizo Island. Ewõr joñan in 13 bukwon ko im rar jako kin no eo elap me kar antonelok bwe ej 15 nee utiejen!”
Boñin eo, 22 armij rar kwelok ibben don ilo Kingdom Hall eo an Ri Kennan ro an Jehovah ilo Gizo ñan kememe Kwojkwoj in Kememej mij eo an Jesus. Ekamõnõnõ bwe ejelok juõn uan rein ear kinejnej jen jorrãn eo. “Ekar ejelok jarom, im lamp ko amuij rar rup,” Ron, eo kar ba kake moktalok ej ba. “Inem Brother Shaw ear kajerbal juõn teeñki ke ear kwalok katak eo an. Kimar al kin al in kamolol ñan Jehovah ibulen marok, kin ainikien ko relaj im emejaja.”
Menin Jibañ Ko
Ke armij ro ilo Honiara, jikin kwelok eo elap, rar roñ news eo kin jorrãn eo ear walok, ra eo an Ri Kennan ro an Jehovah ijo rar emmakit ilo mõkaj ñan jilkinlok menin jibañ ko ñan ro me tsunami eo ear jelet ir. Office eo ilo ra eo ear telephone lok ñan jikin ko jorrãn eo ear walok ie im rar maroñ kamol bwe enañin aolep Ri Kennan ro ijo rejjab jorrãn. Kar jilkinlok jet armij ro rar liki ir ñan bukõt juõn Ri Kennan ej jokwe ilo juõn jikin ettolok ilo Choiseul Island. Ilo jemlokin kar lo bwe liin ear emõn an mour im ear bed ilo juõn jikin ejjab bed ilo kauwatata. Kar bareinwõt jilkinlok money ko ñan Gizo ñan wiaik aikwij ko air ilo ien jorrãn eo.
Ruo brother rar etal ikijen ra eo im rar jikrõklok ion Gizo ilo Thursday eo ilo balun eo jinointata. “Kimar bõklok jet box ko kin mweiuk in jibañ ko ibbem,” Craig Tucker ej ba, juõn ian kumi in Branch Committee eo ak ro rej lolorjake ra eo. “Balun eo ear jab ektake jet ian mweiuk ko an ri uwe ro jet kinke ear jab maroñ kelok kake aolepeir, ak kimar lukkun kamolol ke kimar lo bwe aolep box ko am rar tõbrak. Rar bed ibwiljin mweiuk in jibañ ko moktata rar tõbartok jikin eo jorrãn eo ear walok ie. Mweiuk ko jet rar tõbartok ruo ran tokelik ilo juõn booj.”
Ilo ejja ien eo wõt, Tony Shaw im Patson Baea, im brother ro jet jen Gizo, rar itoitak kin kõrkõr eo ñan etal im jibañ Ri Kennan ro rej jokwe ilo ene eo etan Ranongga. Kajur in makitkit lal eo ear bõkliñlok ene in, me ej 20 mile aetokin im 5 mile debakbakin, elõñlok jen 6 nee utiej jen lojet! Makitkit in den ko itõrerein eneo ear kõmman bwe en walok tsunami eo me ear kajorrãn ene ko jet ibelakin.
“Ro uan congregation eo rar obrak kin lañliñ ke rar lo kim,” Tony ear ba. “Rar jab jorrãn im rar jokwe inabõj kin air mijak kin makitkit lal jidik ko rar walok elikin makitkit lal eo elap. Wa eo waam ear wa eo moktata ear bõktok menin jibañ ko. Mokta jen am kar emmakit, kimar koba ibben don kin juõn jar in kamolol ñan Jehovah.”
Patson ej ba: “Jet ran ko tokelik, kimar bar jeblak ñan Ranongga ñan bõklok menin aikwij ko jet im ñan bukõt juõn family ej jokwe ilo juõn jikin emake ian ilo jabõn tata in ene eo. Eliktata kimar lo Matthew Itu im family eo an rej jokwe ilo bukin wijki ko. Rar jañ kin air lañliñ, kin air jelã bwe kimar jab meloklok ir! Makitkit lal eo ear kokkure mweo imwiir ekoba enañin aolep moko relap ilo bukwon eo air. Bõtab, men eo elaptata air kar inebata kake ej bwe ren bar bõk Bible ko rekãl ñan kajjojo uan family eo kinke Bible ko air rar jako ilo jorrãn eo.”
Nan in Nebar Jen Armij Ro
Yokwe in an Ri Christian ro ear alikar ñan armij ro. “Juõn ri jeje newspaper me ear kwalok nan in kõrraat kin jibadbad ko ñan bõklok menin jibañ ko ear ilbõk im bwilõñ ke ear jelã bwe Ri Kennan ro an Jehovah rar kabwe lok aikwij ko an ro uan kabuñ eo air kin mõñã ko, tabolõn ko, im menin aikwij ko jet iloan jejjo wõt ran ko elikin makitkit lal eo,” Craig Tucker ej ba. “Armij ro ilo bukwon eo ilo Ranongga rar kwalok nan in nebar ko kin an kar mõkaj am lelok menin jibañ ko im rar aol kin an jabwe jibañ jen imõn jar ko air make,” Patson ej kakobaba. Juõn kõrã ear lamõj im ba, “Dolul eo ami ear mõkaj an itok im jibañ!”
Ri Kennan ro rar bareinwõt bõk kunair ñan jibañ ro ri turiir. “Ke kimro ar etal ñan juõn hospital rar mõkaj air kaleke ilo ien jorrãn eo ilo Gizo, kimar lo ri belele ro me kimij kab iion ir jejjo ran ko remotlok,” Christine Shaw ear ba. “Erro jimor ar ikkinejnej im lukkun jorrãn. Ajiri eo jibwin kõrã eo ear rõlok jen pein ilo tsunami eo im ear maloñ. Kimro ar jeblak ñan mweo ilo mõkaj ñan bõktok kijeir mõñã im air nuknuk. Rar lukkun kamolol.”
Emol bwe, ro rej jorrãn jen jorrãn ko rej walok rej aikwiji juõn men elaplok jen menin jibañ ko ilo kanniek. Elaptata air aikwiji kainemõn eo me Nan in Anij wõt emaroñ letoke. “Jet ian ri kaki in kabuñ ko rar ba bwe Anij ear kajeik armij ro kin air jerawiwi,” Ron ej ba. “Ak kimar kwalok ñan ir jen Bible eo bwe Anij ejamin unjen nana otemjej. Elõñ rar kamolol kim kin am kar kwalok kainemõn in ilo jitõb ñan ir.”—2 Dri Korint 1:3, 4; Jemes 1:13.
[Diagram/Mab ko ilo peij 13]
(Ñan lale pija eo, jouj im lale ilo bok eo)
Choiseul
Ghizo
Gizo
Ranongga
HONIARA
AUSTRALIA
[Pija eo ilo peij 15]
Family eo an Baea ilo kõrkõr engine eo wair
[Pija eo ilo peij 15]
Jorrãn jen tsunami eo ilo Gizo
[Pija eo ilo peij 15]
Kingdom Hall in ear mweo wõt ear jutak ilo Lale ilo Ranongga Island