Juon Kein Kam̦ool Ej Kwal̦o̦k kõn an Jejjet im M̦ool Kanaan ko ilo Baibõl̦

Ilo dekã eo eutiej me ej Kein Kakeememej kõn Titus, ewõr ruo pija ak annañ ko rekilep em̦õj jiñaiki im rej kwal̦o̦k kõn men ko rar wal̦o̦k ilo kar juon tarin̦ae ebuñbuñ ilo bwebwenato ko an armej. Meñe dekã in ebuñbuñ ippãn armej ak rejjab lukkuun jel̦ã bwe bwebwenato eo ilo dekã in ej kajejjet men eo Baibõl̦ ear kwal̦o̦k kake. Dekã in me ej kein kakeememej Titus ej kam̦ool juon kanaan ekabwilõñlõñ ilo Baibõl̦.

JUON JIKIN KWEILO̦K KAR BA BWE RENAAJ KO̦KKURE

Ilo raan ko an kar Jesus, Aelõñ eo an Rom ear ererakl̦o̦k wõt jãn Britian im Gaul (kiiõ ej France) ñan Ijipt, im jikin ko rar pãd ium̦win kien eo an Rom rar lukkuun lo jokwane im jeraam̦m̦an. Bõtab ewõr juon jikin el̦ap an kar jum̦ae im dike RiRom ro, ej Judia.

Bok eo ej kwal̦o̦k kõn bwebwenatoon RiRom ro etto (Encyclopedia of Ancient Rome) ej ba: “Jet wõt iaan jikin ko me rar pãd ium̦win kien eo an Rom rar lukkuun dike kien in im kien in ear bar dike er, el̦aptata jikin eo etan Judia. RiJu ro rar kõjdate rũtõl ro aer jãn aelõñ ko jet me rejjab kea kõn m̦anit ko aer, im RiRom ro rar kaeñtaan RiJu ro kõn an pen im utiej bũrueer.” Elõñ RiJu rar kõjatdikdik bwe Messaia eo enaaj itok im lo̦mo̦o̦ren er jãn aer eñtaan ium̦win pein RiRom ro im bar kajutak aelõñin Israel. Bõtab ilo kar iiõ eo 33, ãlikin Christ, Jesus Christ ear ba bwe juon jorrããn ekanooj in l̦ap enaaj wal̦o̦k ñan Jerusalem.

Jesus ear ba kõn Jerusalem: “Bwe raan ko rej itok wõt ñe ro rej kõjdate eok renaaj kõm̦m̦an wõrwõr im kaapool̦ eok im baare pel̦aakũm̦. Renaaj lukkuun ko̦kkure eok kab armej ro rej pãd ilowaan wõrwõr eo am̦; ejjel̦o̦k juon dekã enaaj pãdwõt ijo ear pãd ie.”​—Luk 19:43, 44, UBS.

Ke rũkal̦oor ro an Jesus rar roñ an ba naan kein, rar bwilõñ kõnke rar jab mel̦el̦e. Innem, ruo raan tokãlik ke rej erreilo̦k ñan Jerusalem, juon iaaer ear ikkũrl̦o̦k ñan Jesus im ba: “Rũkaki, kwõn lale dekã kein im m̦õkein raiboojoj!’’ Em̦ool aer kar ba men in kõnke joñan an kilep im utiej jet iaan dekã ko ilo tampel̦ eo, ewõr 36 ne aetokier, 16 ne depakpakier, im 10 ne utiejier! Bõtab, Jesus ear uwaak im ba: “Men kein otemjej kom̦ij loi, iien eo ej itok wõt im ejjel̦o̦k juon iaan dekã kein enaaj pãd ijo ej pãd ie, aolepeer renaaj wõtlo̦k.”​—Mark 13:1; Luk 21:6, UBS.

Innem, Jesus ear wõnm̦aanl̦o̦k wõt im ba ñan er: “Ñe kom̦ naaj lo jarin rũttarin̦ae ro rej kaapool̦ Jerusalem, innem kom̦ naaj jel̦ã epaak kajeepepl̦o̦ke. Innem ro rej pãd i Judia ren ko ñan tol̦ ko: im ro rej pãd eol̦apen ren diwõjl̦o̦k; im ro rej pãd iãne ko iturin ren jab del̦o̦ñ ilowaan.” (Luk 21:20, 21) Ear m̦ool ke naan kein an Jesus?

JEEPEPL̦O̦K EO AN JIKIN KWEILO̦K EO

Emootl̦o̦k de 33 iiõ ak Judia ekabde pãd ilo an eñtaan ium̦win pein RiRom. Bõtab ilo iiõ eo 66, ãlikin Christ, juon rijerbal eutiej an Rom me ej jokwe ilo Judia etan Gessius Florus, ear etal im bõk jããn ko jãn jikin m̦ani eo an tampel̦ eo. Men in ear kõm̦m̦an an RiJu ro lukkuun illu im jab maroñ dãpijl̦o̦k wõt aer kijenmej. Ejjabto jãn iien eo, RiJu ro rejel̦ã ire im rekajoor rar m̦aaj ñan Jerusalem. Innem rar m̦an rũttarin̦ae in Rom ro rej waje jikin in im kwal̦o̦k bwe rej jenolo̦k jãn kien eo an Rom im kajutak juon aer make kien.

Enañin 3 allõñ tokãlik, rũtõlin jarin tarin̦ae eo etan Cestius Gallus, ear tõl elõñl̦o̦k jãn 30,000 rũttarin̦ae ro an Rom im m̦aaj ñan Jerusalem bwe ren ilen m̦an rijum̦ae ro. Ear m̦õkaj an RiRom ro del̦o̦ñe jikin kweilo̦k in im jino rupe wõrwõr eo ej pãd nabõjin tampel̦ eo. Ak ilo ejjel̦o̦k unin, jarin tarin̦ae eo an Rom ear bõjrak im ro̦o̦l. RiJu ro me rar jum̦ae rar lukkuun m̦õn̦õn̦õ im rar m̦õkaj im kõpel̦ er. Ilo iien eo jarin rũttarin̦ae kein rej tarin̦aeik doon ilo juon jikin ettol̦o̦k, Kũrjin ro rar pokake naanin kakkõl eo an Jesus bwe ren kab ko jãn Jerusalem ñan tol̦ ko im el̦l̦ãl̦o̦k wõt jãn Reba Jordan.​—Matu 24:15, 16, UBS.

Ilo iiõ eo tok juon, Rom ear bar jino an m̦aaj kõn jarin tarin̦ae eo an bwe en ilo̦k im tarin̦aeik Judia. Eo ear tõl jarin tarin̦ae in ej Vespasian im l̦eo nejin etan Titus. Ak ejjabto jãn iien eo, Irooj L̦apl̦ap Nero ear mej ilo iiõ eo 68, ãlikin Christ. Kõn men in, Vespasian ear jepl̦aak ñan Rom bwe en jijet ioon tũroon eo im ear lel̦o̦k bwe l̦eo nejin, Titus, en wõnm̦aanl̦o̦k wõt im tõl jarin tarin̦ae eo me ewõr joñan in 60,000 uwaaer.

Ilo allõñin Juun, ilo iiõ eo 70, ãlikin Christ, Titus ear jiroñ rũttarin̦ae ro an bwe ren jek aolep wõjke ko ilo bukwõn ko ilo Judia bwe ren kõm̦m̦ane juon wõrwõr ekkañ bõran im kaapool̦e Jerusalem. Joñan aetokan wõrwõr in ej 4.5 m̦ail̦. Jilu allõñ tokãlik, RiRom ro rar anjo̦ ioon jikin kweilo̦k in im rar tile aolep m̦õko im tampel̦ eo. Bareinwõt, rar rupe im ukõj aolep dekã ko ãinwõt an kar Jesus kanaan bwe enaaj wal̦o̦k. (Luk 19:43, 44) Ekkar ñan aer an̦to̦o̦nel̦o̦k, rej ba bwe oran ro rar mej ilo Jerusalem im aolep bukwõn ko jet ilo Judia, epãd “ikõtaan 250,000 im 500,000.”

ANJO̦ EO AN JUON IROOJ

Ilo iiõ eo 71, ãlikin Christ, Titus ear jepl̦aak ñan Italy im aolepen armejin Rom rar kõm̦m̦ane juon pojak el̦ap ñan karwaineneiki. Aolep ro ilo jikin kweilo̦k eo rar kobal̦o̦k ilo iien in ekam̦õn̦õn̦õ ke Titus im rũttarin̦ae ro an Rom rej m̦aaj ñan capital in aer im jepl̦aaktok jãn aer kar bõk anjo̦ ilo tarin̦ae eo.

Jarlepju in armej ro rar kanooj in bwilõñ kõn joñan m̦weiuk ko rũttarin̦ae rein rar jepl̦aaktok kaki im m̦aaj kaki ilowaan ial̦ ko ilo Rom. Rar lukkuun al̦l̦añ kõn waan ejjerakrõk ko rar bũktok jãn aer kar anjo̦ ilo tarin̦ae eo. Rar bar al̦l̦añ kõn jiña killep ko me rej kwal̦o̦k kõn an rũttarin̦ae ro kar ire ilo tarin̦ae eo, im bareinwõt kõn m̦weiuk ko rar bũki jãn tampel̦ eo ilo Jerusalem.

Titus ear pinej jenkwan jemãn im jino an irooj ilo Rom ilo iiõ eo 79, ãlikin Christ. Bõtab ruo iiõ tokãlik, ear mej ilo jidimkij. L̦eo jatin etan Domitian, ear bõk jikin im ear m̦õkaj im kajutak dekã in eutiej ñan keememej Titus im tarin̦ae eo ear bõk anjo̦ ie.

DEKÃ EO EUTIEJ ILO RAAN KEIN

Rainin, elõñ to̦ujin armej rej jam̦bol̦o̦k ñan Rom kajjojo iiõ ñan alwõje dekã in me ej Kein Kakeememej Titus. Jet rej watõke ãinwõt juon iaan jerbal ko rekabwilõñlõñ an ro rekapeel im jel̦ã jiña, ro jet rej kaorõke kõnke ej kwal̦o̦k kõn irooj ro rekajoor an kar Rom, ak ñan jet ej juon dekã me ej kwal̦o̦k kõn aer kar ko̦kkure Jerusalem im tampel̦ eo ie.

Bõtab ippãn ro rej riiti Baibõl̦, el̦apl̦o̦k an aorõk dekã in. Ej juon kein kam̦ool me ej kwal̦o̦k bwe ejejjet im m̦ool kanaan ko ilo Baibõl̦ im bwe kanaan kein rar itok jãn Anij.​—2 Piter 1:19-21, UBS.