«Эре лийшаш олам» вучыза

1. Иисусын мутшо почеш Иерусалим дене мо лийшаш ыле?

ИИСУС ХРИСТОС колымыж деч икмыняр кече ончыч тунемшыж-влаклан ончылгоч каласен: икана Иерусалим войска-влак дене авырен налме лиеш (Лук. 21:20). Иисусын каласымыже почеш, кунам нуно тиде войска-влакым ужыт, нунылан Иудей гыч вигак куржаш кӱлеш ыле (Лук. 21:21, 22).

2. Апостол Павел Иудейыште да Иерусалимыште илыше христиан-влакым лийшаш событий-влаклан кузе ямдылен?

² Иерусалимым римысе войска-влакын авырен налмышт деч икмыняр ий ончыч апостол Павел Иудейыште да Иерусалимыште илыше христиан-влаклан серышым возен. Таче ме тудым Еврей-влаклан серыш семын палена. Тушто Павел иза-ака-влаклан кӱлешан кӱштымаш-влакым пуэн, кудышт нуным лийшаш событийлан ямдыленыт. Мо нуным вучен? Иерусалим пытарыме лийшаш ыле. Весе-влак дене пырля колаш огыл манын, христиан-влаклан тиде олам коден кайыман ыле. Тиде теве мом ончыктен: нунылан пӧртыштым да пашаштым кодаш кӱлын. Павел Иерусалим нерген возен: «Эре лийшаш олана тыште уке». Варажым ешарен каласен: «Ончыкылык олам кычалына» (Евр. 13:14).

3. Мо тыгай «пеҥгыдын негызлыме ола», да молан ме тудым вучена?

³ Иерусалимым да Иудейым коден кайыше христиан-влак шке нерген мыскылымым да титаклымым колыныт докан. Но нунын решенийышт илышыштым утарен. Меат таче тыгайрак ситуацийыште улына. Мемнам ушдымо еҥ маныт, вет ме оксалан ӱшаным она пыште да еҥ-влак тӱнясе проблемыштым шке вийышт дене сеҥен кертыт манын она келше. Молан ме тыге шонена? Ме палена: тиде осал тӱня вашке пытарыме лиеш. Сандене ме вучена «пеҥгыдын негызлыме олам», «ончыкылык олам», — Юмын Кугыжанышыжымa (Евр. 11:10; Матф. 6:33). Умбакыже тиде статьяште ме ончен лектына: 1) кузе Павелын серышыже икымше курымысо христиан-влаклан «ончыкылык олам» вучаш полшен, 2) кузе Павел нуным лийшаш событий-влаклан ямдылен да 3) тудын каҥашыже-влак мыланна таче мо дене пайдале улыт.

ИЕГОВАЛАН ӰШАНЫМ ПЫШТЫЗА, ВЕТ ТУДО ТЕНДАМ НИГУНАМАТ ОГЕШ КОДО

4. Молан Иерусалим христиан-влакын илышыштышт кугу рольым модын?

⁴ Иерусалим христиан-влакын илышыштышт кугу рольым модын. Тиде олаште мемнан эран 33 ийын христиан погынымаш чумыралтын. Эше тушто вуйлатыше совет лийын. Тыгак христиан-влак гыч шукыштын тиде олаште пӧртышт да моло погышт лийын. Но Иисус тунемшыж-влакым шижтарен: нунылан Иерусалим гыч гына огыл, тыгак Иудей гычат куржман (Матф. 24:16).

5. Кузе Павел христиан-влакым Иерусалим дене мо лийшашлан ямдылен?

⁵ Иерусалимым коден кайымылан ямдылашлан Павел христиан-влаклан умылаш полшен, мом Иегова тиде ола нерген шонен. Апостол нунылан шарныктен: Юмо Иерусалимысе храмым, священствым да надыр-влакым кондымым святойлан уже шотлен огыл (Евр. 8:13). Тиде олан илыше-влак гыч шукышт Иисус Мессий улеш манын ӱшанен огытыл да тудым пуштыныт. Сандене еҥ-влаклан Иеговалан кумалашлан Иерусалимыш кошташ уже кӱлын огыл. Иерусалим ден храм пытарыме лийшаш ыльыч (Лук. 13:34, 35).

6. Еврей-влаклан 13:5, 6 почеламут-влакыште возымо Павелын каҥашыже молан пайдале лийын?

⁶ Кунам Павел еврей-влаклан серышым возен, Иерусалимыште сай илышлан чылажат лийын. Ту жапысе римысе историк Иерусалимым уло эрвел мландыште эн палыме олалан шотлен. Тӱрлӧ эл гыч еврей-влак тушко кажне ийысе пайремыш толыныт, да тидлан кӧра ола экономический шотышто тӱзланен шоген. Мутат уке, тиде христиан-влаклан шуко оксам ыштен налаш йӧным пуэн. Очыни, садланак Павел нунылан каласен: «Оксам йӧратыше ида лий, мо улыда дене серлагыза». А вара тудо Иегован мутшым конден, кудыж дене Юмо кажне служитлышыжым ӱшандара: «Тыйым ом кодо, тыйым ом кудалте» (Еврей-влаклан 13:5, 6 лудын лекса; Втор. 31:6; Пс. 117:6). Иерусалимыште да Иудейыште илыше христиан-влаклан тиде каҥаш пеш пайдале лийын. Молан? Молан манаш гын, нунылан лишыл жапыште пӧртыштым, сай пашаштым да погыштым кодаш кӱлын. Нунылан палыдыме верыште у илышым тӱҥалаш логалын.

7. Молан мыланна уже кызыт Иеговалан ӱшаным пышташ тунемман?

⁷ Мыланна урок. Вашке могай событий-влак лийыт? Кугу орлык да тиде тӱнян пытымыже (Матф. 24:21). Сандене мыланна икымше курымысо христиан-влаклан гаяк ӱшанле кодаш да ту жаплан ямдылалташ кӱлеш (Лук. 21:34—36). Кугу орлык годым мыланна, очыни, уло погынам кодаш логалеш. Поснак ту жапыште мыланна Иегован тендам ом кодо манын сӧрымыжлан ӱшанаш кӱлеш лиеш. Но Иеговалан уже кызытак ӱшаным пыштыман. Шке деч йодса: «Мыйын решением-влак да ончыкылык илышлан целем-влак мо нерген ойлат? Нунын гыч оксалан огыл, а Иеговалан ӱшаным пыштымем коеш мо?» (1 Тим. 6:17). Икымше курымысо христиан-влакын примерышт мыланна кугу орлык годым ӱшанле кодаш полшен кертеш. Но ончычсо христиан-влакын нелылыкышт дене таҥастарымаште кугу орлык моткоч нелырак лиеш. Кушеч вара ме палаш тӱҥалына, мом мыланна кугу орлык годым ыштыман?

ШКЕ ӰМБАК ВИКТАРЫМАШЫМ НАЛШЕ-ВЛАКЫМ КОЛЫШТСА

8. Иисус тунемшыж-влаклан мом ышташ кӱштен?

⁸ Христиан-влакын Павел деч серышым налме деч вара икмыняр ий эртен, да нуно ужыныт, кузе римысе войска-влак Иерусалимым авырен налыныт. Кунам тиде лийын, христиан-влак умыленыт: Иерусалим да Иудей гыч куржаш жап шуын, вашке ола пытарыме лийшаш (Матф. 24:3; Лук. 21:20, 24). Но куш куржаш? Вет Иисус тидым гына каласен: «Иудейыште улшо-влак тунам тек курыкыш куржыт» (Лук. 21:21). Иерусалим йыр шуко курык лийын. Могайышкыже нунылан куржаш кӱлын?

9. Молан христиан-влак аптыранен кертыныт, могай курыкыш куржаш? (Тыгак картым ончыза.)

⁹ Теве кушко христиан-влак куржын кертыныт: Самарийысе курыклаш, Галилейысе курыклаш, Ермон курыкыш, Ливан курык-влакыш да тыгак Иордан вес могырысо курык-влакыш. (Картым ончыза.) Нине курык-влакыште верланыше южо ола-влак шылашлан пеш сай вер лийыныт. Мутлан, Гамла кӱкшӧ тура курыкышто верланен ыле, да тушко миен шуаш куштылго лийын огыл. Южышт шонен кертыныт, пуйто тиде олаште шылаш пеш сай лиеш ыле. Но варажым римлян-влак тиде ола ӱмбак кержалтыныт да тудым пытареныт, да тушто илыше-влак гыч шукышт коленытb.

10, 11. а) Иегова христиан-влаклан кӱлешан кӱштымашым, очыни, кузе пуэн? (Еврей-влаклан 13:7, 17, УТ). б) Молан христиан-влаклан шке ӱмбак виктарымашым налше-влакым колышташ кӱлын? (Тыгак сӱретым ончыза.)

¹⁰ Иегова христиан-влаклан кӱлешан кӱштымашым шке ӱмбак виктарымашым налше иза-влак гоч пуэн докан. Евсе́вий Памфи́л лӱман историк варажым тиде жап нерген возен. Тудын возымыж дене келшышын, Юмо Иерусалимысе южо иза-влаклан почмашым пуэн, кудыжо почеш христиан-влак Иерусалимым коден кайышаш да Перейысе Пелла олаш кайышаш ыльыч. Пелла пеш сай вариант лийын. Тудо Иерусалим деч мӱндырнӧ лийын огыл, да тушко миен шуаш тынар чот йӧсӧ лийын огыл. Тыгак Пеллаште илыше-влак гыч шукышт еврей лийын огытыл, да нуно римлян-влак дене кучедалаш тӧчен огытыл. (Картым ончыза.)

¹¹ Христиан-влак, кудышт шке ӱмбак виктарымашым налше-влакым колыштыныт, курыкыш куржыныт. (Еврей-влаклан 13:7, 17, УТ лудын лекса.) Тидлан кӧра нуно илыше кодыныт. Нине иза-ака-влак «пеҥгыдын негызлыме олам» — Юмын Кугыжанышыжым — вученыт, да Иегова нуным коден огыл (Евр. 11:10).

12, 13. Пример-влакым кондыза, кузе Иегова калыкшым неле жапыште вӱда.

¹² Мыланна урок. Иегова калыкшылан шке ӱмбак виктарымашым налше иза-влак гоч кӱштымаш-влакым пуэн шога. Библийыште шуко тыгай пример уло, кунам Иегова пеш неле жапыште шке калыкшым ӱшанле пӧръеҥ-влакым кучылтын вӱден (Втор. 31:23; Пс. 76:21). Тачат ме раш ужына, кузе Иегова калыкшым вӱдашлан шке ӱмбак виктарымашым налше иза-влакым кучылтеш.

¹³ Мутлан, кунам COVID-19 пандемий тӱҥалын, «шке ӱмбак виктарымашым налше-влак» мыланна кӱлешан кӱштымашым пуэныт. Нине иза-влак кугурак иза-влаклан каласеныт, кузе у условийыште вашлиймаш-влакым эртараш да таныклаш. А пандемий тӱҥалме деч вара икмыняр тылзе гыч ме иканаште 500 йылме дене конгрессым эртаренна. Иза-ака-влак тудым интернет гоч, телевизор дене онченыт да радио дене колыштыныт. Тыгай конгресс мемнан нигунамат лийын огыл! Ме духовный кочкышым чарныде налынна. Тиде иктылыкнам аралаш полшен. Ме пеҥгыдын ӱшанена: ончыкыжым кеч-могай нелылык лиеш гынат, Иегова шке ӱмбак виктарымашым налше иза-влаклан уш-акылан решений-влакым лукташ полша. Кугу орлыклан ямдылалташлан да ту неле жапыште уш-акылан лияшлан мыланна Иеговалан ӱшаным пыштыман да шке ӱмбак виктарымашым налше-влакым колыштман. Кугу орлыклан ямдылалташлан мом эше ышташ кӱлеш?

ИКТЕ-ВЕСЫМ ИЗА-ШОЛЬО СЕМЫН ЙӦРАТЫЗА ДА УНАЧЕ ЛИЙЗА

14. Еврей-влаклан 13:1—3 дене келшышын, Иерусалимын пытымыж деч ончыч илыше христиан-влаклан мом ышташ кӱлын?

¹⁴ Кунам кугу орлык тӱҥалеш, мыланна эше чотрак икте-весе дек йӧратымашым ончыкташ кӱлеш лиеш. Ме Иерусалимыште да Иудейыште илыше христиан-влак деч примерым налын кертына. Нуно икте-весыштым эре йӧратеныт (Евр. 10:32—34). Но Иерусалимын пытымыж деч ончыч икмыняр ий жапыште нунылан эше чотрак икте-весым йӧраташ да уначе лияш кӱлын. (Еврей-влаклан 13:1—3 лудын лекса.)c Мыланнат тидым ыштыман, вет тиде тӱнян мучашыже пешак лишне.

15. Иерусалим гыч куржмо деч вара христиан-влаклан икте-весым иза-шольо семын йӧраташ да уначе лияш молан кӱлын?

¹⁵ Римысе войска-влак Иерусалимым авырен налыныт, но вара трук олам коден каеныт. Тидлан кӧра христиан-влакын куржаш йӧнышт лектын. Но нуно пеленышт икмыняр арверым гына налын кертыныт (Матф. 24:17, 18). Садлан Пеллаш кайыме годымат, тушко толмекат, нунылан икте-весыштлан полшаш кӱлын. Шуко иза-акалан кочкыш, вургем да илыме вер кӱлеш лийын. Икте-весышт верч тыршен, христиан-влак ончыктен кертыныт, мыняр чот нуно иза-ака-влакым йӧратат (Тит. 3:14).

16. Кузе ме иза але акалан, кудыштлан полыш кӱлеш, йӧратымашым ончыктен кертына? (Тыгак сӱретым ончыза.)

¹⁶ Мыланна урок. Ме иза-ака-влакым йӧратена. Сандене кунам нунылан полыш кӱлеш, ме ӧрдыжтӧ она код. Мутлан, шуко Таныклан пытартыш жапыште сарлан але пӱртӱс вий ден лийше эҥгеклан кӧра пӧртыштым кодаш логалын. Ме нунылан полшаш вашкена, тыгак духовный да материальный кӱлешлыкышт верч тыршена. Теве мом ик украин ака ойла, кудыжо сарлан кӧра пӧртшым коден каен: «Ме ужынна, кузе Иегова мемнам иза-влак гоч вӱден да мыланна полшен. Чыла вере мемнам иза-акана-влак порын вашлийыныт да мыланна уло кумылын полшеныт: Украиныштат, Венгрийыштат, а ындыжым Германийыште». Кӧ иза-ака-влак верч тырша да уначе улеш, нуно Иегован кидыштыже ӱзгар улыт (Прит. 19:17; 2 Кор. 1:3, 4).

17. Молан мыланна уже кызыт икте-весым иза-шольо семын йӧраташ да уначе лияш тунемаш чот кӱлешан?

¹⁷ Кызытсе жап дене таҥастарымаште кугу орлык годым мыланна икте-весынан полшымыжо чотрак кӱлеш лиеш (Авв. 3:16—18). Сандене Иегова мемнам икте-весым иза-шольо семын йӧраташ да уначе лияш туныкта. Тиде мыланна ту неле жапыште чот кӱлеш лиеш.

МО МЕМНАМ ОНЧЫКЫЖЫМ ВУЧА

18. Икымше курымышто Иерусалимыште да Иудейыште илыше христиан-влак деч ме могай примерым налын кертына?

¹⁸ Христиан-влак, кудышт Иерусалим гыч курыкыш куржыныт, утаралтыныт. Нуно олам коден каеныт, но Иегова нуным коден каен огыл. Могай урокым ме тыште шкаланна ужына? Мо ончыкыжым лиеш, ме чылажымат она пале. Но ме Иисусын мутшым шарнена: «Ямде лийза» (Лук. 12:40). Тыгак ме Еврей-влаклан серыш нерген шонкален кертына. Каҥаш-влак, кудыштым Павел икымше курымысо христиан-влаклан пуэн, тачат пайдале улыт. Эше Иегова мемнам нигунамат огеш кодо да ок кудалте манын ӱшандара (Евр. 13:5, 6). Айста «эре лийшаш оланам» — Юмын Кугыжанышыжым — умбакыжат вучена. Тунам ме курымешлан суапландарыме лийына (Матф. 25:34).