Ngepi sho di tu ghamwene dyango dyokupungweranga mambapira?

Ghuna shana kudimuka ko yoyingi kuhatera Bayibili mukurughana mashano ghamweya ndi? Ghuna shana kudimuka kuhatera matjangwa ghongandji endi munu, dyango, endi thinu ethi ha ghamba muBayibili ndi? Pamweya owe wa kwipura rumweya eshi maÑando ghaNyambi kukona gha kughamwene mumaghukukutu ghoye ndi? Ngeshi kemo, rughanithe dyango edi ha pungweranga mambapira muThikota thoghuFumu.

Dyango edi dya kara noyimbapiratjangwa yokutughamwena. Pamweya mbadi wa kara noyimbapiratjangwa yoyiheya eyi hatjanga Hashupi waJehova mundimi dhenu. Ene kudyango dyomambapira agha hapungura muThikota thoghuFumu kughawana mo. Kukona ghu wane mo matoroko ghokukuthigha-thigha, karo ñandorandathana ndani noghamweya kengeyo. Kukona ghu rughanithe dyango edi kughutho endi kunyima dhomakongano. Ngeshi mwa kara nokompiyuta muThikota thenu kukona ghu rughanithe mayendithitho gha hana toyanga eshi Watchtower Library. Mayendithitho gha ghoWatchtower Library kwa kara noyimbapiratjangwa yoyingi eyi ha tura mo ndani agho ghuredhu kugharughanitha, pathitamenedhi kukona ghu shane matjangwa ghongandji endi yikurumingwa ndani ñando dhongandji.

Mudyo ko wa hana tapanga yighamba muShure dhoGhukareri. Ngeshi nowe kutapa yighamba mushure dho, kukona ghurughanithe dyango edi ha mpungweranga mambapira muThikota thoghuFumu ghu kone kukuroyithera yighamba yoye. Muyendithi ghoshure ne yodiye hana pakeranga thinga dyango dyo. Yodiye gho kukona kutura mo mambapira ghomapya ndani nokugharoyitha. Aye kukona gha kuneghedhe ghoku sho wane maghukenu gha ghuna nyanda endi ghoyu ghuna kuhonganga nendi kukona gha kughamwene. Mbadi yina kutongora eshi kukona ghu shimbe kudighumbo, gha kona kukara muThikota thoghuFumu. Karo ghokutuna kurughanitha mambapira gha, mbadi tu tjange mo ene tughatakamithe thiwana.

Bayibili kuthothonona eshi “mukukuhonga kuhatera kwaNyambi,” twa kona kushana ghudimuki wo kenge yira ‘ghutungi ghokuhoreka.’ (Yisewe 2:​1-⁠5) Dyango edi dyomambapira ghomuThikota thoghuFumu ñanyi dyakukughamwene ghu rughane mashano ghoye.

• Yimbapiratjangwa munye yakara mudyango dyokupungwera mambapira muThikota thoghuFumu?

• Yidye sha kone kukughamwena ghu rughanithe dyango dyo?