Ta krikanka bila

Jehova ra Latwan Kaiki nani Sut ra:

Jisas bui win man nani “kasak tanka ba kaikma; bara kasak tanka ba mita sin pri mai sakbia” (Jan 8:32). Baku win ba, wan kupia kasak bukisa! Kan marikisa “tnata yua nani” na ra kunin bangki iwi ba tilara sin, yawan tanka kasak ba briaia sip sa (2 Timoti 3:1). Baibil tanka kasak ba lan takram dukyara kupiam kraukisma ki? Rait lilia kata!

Tanka kasak ba brih, upla ra wih smalkaia ba tara sa. Ban sakuna, wan rayaka ra sin alki brih daukaia nit sa. Baha dukyara, Gâd latwanka laka ra ban kaia trai munaia sa. Nahki muni ki? Jisas kau pruras las tihmika ba ra, baha tanka ra aisi ai apastilka wapni nani ra naku win: “Man nani lâika bila kat wali dauki kama kaka, yang laitwanka laka ra sin ban kama, sim yang Aisiki lâka wali daukisna bara latwan ai kaiki ba kat sin ban sna ba baku” (Jan 15:10).

Bika! Jisas ai Aisika latwanka laka ra ban kaia dukyara, ai Aisika lâka wali dauki kan. Bara yawan sin, sim sat daukaia sa! Gâd latwanka laka ra ban kaia dukyara, yu bani tanka kasak ba kat brih wapaia sa. Sim tihmika ra Jisas win: “Bamna naha diara nani na tanka brih baha kat sin daukma kaka, lilia kama” (Jan 13:17).

Wan kupia aiskakira ni bila kaikisa tanka kasak ba kat ban alki daukma dukyara bukka na tam baikbia. Baku lika Gâd latwanka laka ra “bila kaiki [kap] raya ban kaia laka ba wankbia” (Judas 21).