Lawana nani wan maisa nihki bara wan smalki ba

BAIBIL bukka kau tara ba sika Lawana Nani. Bahara lawana holikira nani brisa bara 1.000 mani bilara ulban. Naha lawana âiulbra nani ba ai kasakka lukan lâka ba dukiara bîla painkira ulban. Baku sin, daukanka painkira wala nani dukiara ulban, sampla baku, lilia lâka, latwan lâka, tingkika lâka, wan kupia lakaia lâka, Gâd ra mayunaia lâka, bara sari lâka ba dukiara sin ulban. Naha waitnika nani ba Jehova ra latwan kaiki kan bara Witin lamara baku ai dara wali kan. Kaisa kaikaia Lawana Nani bukka ba dîa dukiara aisi ba.

Jehova diara sut purara King aimakisa; Witin ra baman mayunaia sa. Lawana 83:18 ra wisa: ‘Bara mika ai dara walbia, man yakan, man ninam Jehova mâkisma ba, Lai Purara pali sma wan tasba aiska purkara’. (Salmo Lawana Nani, 1960.) Lawana ailal ba Jehova ra kulkanka tara yabisa, kan Witin heven ba, slilma nani, naha tasba ra rayaka sâtka manis bâra ba, wan wîna tara pranakira ba sin paskan sa (Lawana Nani 8, 19, 139 bara 148). Upla ailal ba Jehova ra mayunisa, kan Witin ba ai napakanka nani ra main kaikisa bara swaki sakisa (Lawana Nani 18, 97, 138). Upla wala nani Jehova ra aiwanisa, kan Witin ba kasakka lâka Gâdka kum sa, upla pâtkas nani ra hilp munisa bara saurakira nani ra klala yabisa (Lawana Nani 11, 68 bara 146).

Ya Gâd ra latwan kaiki ba Witin tâ baikisa bara maisa nihkisa. Sip sa wiaia, lawana kau upla nu ba sika: Lawana 23. Nahara Debit Jehova sepad kum wal prakan. Kan Gâd ba ai uplika nani ra sepad kum baku ai sîpka nani ra tâ brisa, main kaikisa bara kan kahbisa. Lawana 65:2 wan kupia kraukisa Jehova ‘wan pura sunra nani ba walisa’. Ya saurka tara daukan ba sin, Lawana Nani 39, 51 wina hilpka kum sakan. Bahara, Debit marikan ai saurka nani wina ai kupia lakan, bara witin kasak luki kan Gâd mita padin munaia sip kan. Lawana 55:22 ra wan kupia bukisa Jehova ra kasak lukaia bara yawan swiaia sa Witin wan wirhika nani twilkaia hilp wan munbia.

Jehova Misaya Kingka lâka bâk tasba raya kum brih balbia. Lawana nani ra Misaya dukiara aima ailal ra aisisa, naha ba sika Gâd mita pramis munan Kingka ba. Sampla baku, Lawana 2 ba dahra aisisa nahki witin ba tasba gabamintka nani sut âpu daukbia. Lawana 72 ba wan marikisa plun wahwan ba, lâ krikanka lâka bara diara saura wala nani sin âpu kabia. Lawana 46:9 ba wan marikisa Gâd ba war aiklabanka ba bara aiklabaia dukia nani sut ba sauhki tikbia. Lawana 37 ba aisisa tasba raya kum bâra kabia. Bahara upla saura âpu kabia bara kasakkira nani ba kupia kumi lâka ra iwbia.

(Lawana Nani bukka wina sakan sa.)