“Man king aimakaia ba yarka balbia”

Jehova pramis munan: “Inaia lâka, latwanka, siknis nani bara prura âpu kabia. Namkra laya dikamna. Piua luan dukia saura nani ba kupiam kraukma apia”.

Jehova, Adam bara Iv Eden giadinka ra lilia, kupia kumi lâka ra iwbia wisi mangkan. Ai aisa heven ra ba mayunaia bara luhpa ailal sahwi tasba banhkaia kan. Adam bara Iv Jehova bîla walras kan, kuna witin dîa daukaia want kan ba chens takras sa. Naha bukka ra yawan kaikan Jehova ai pramiska nani ba piu sut ra daukisa. Ai Kingka Lâka ba tasba ra blisin pranakira nani bri balbia, bara baku Ebraham ra pramis munan ba daukbia.

Tisku Sitan, ai insalka bara upla saura nani âpu kabia. Tasba uplika sut Jehova ra mayunbia. Yawan siknis takbia apia, prubia sin apia, kau pali, yu bani yawan yapisi bubia taim karnika aiska bri kabia bara raya ba mita lilia kabia. Tasba na paradais kum takbia. Plun auhni bara utla pain nani yawan bribia. Upla rau mamunra bara prautkira nani âpu kabia, pain nani kabia. Daiwan wail nani wan sîa bribia apia, yawan pana sin.

Jehova pruan nani sut bukbia taim lilia tara kabia. Piua luan Gâd dukia dadaukra nani Abel, Noa, Ebraham, Sara, Moses, Rut, Ester bara Debit baku yawan yamni balram bîla yabia. Tasba ba paradais kum ra lakaia witin nani hilp wan munbia. Piua sut yawan diara pain nani daukaia bri kabia.

Jehova, paradais ra iwma want sa. Bahara Gâd dukiara diara ailal kau lan takras ba yawan lan takbia. Ba mita, ¡Jehova lamara yu bani yawan kau waia sa, nanara bara ban kaia ra!