Nu Takan Daukisa

◼ Aisa yapti ba ai luhpia sirpi nani ra smalkaia brih wabia taim, ¿nahki muni pain main kaikaia sa?

Aisa yapti kristian ba pain daukisa ai luhpia nani ra smalkaia warkka ra brih wisa bara King lâka sturka upla wala nani ra aisabia dukiara ridi daukisa taim. Sakuna pain kabia ai luhpia sirpi nani ra main kaiki kabia, kan smalkisa pliska ra “trabil takras kabia sin”, sip sa ban wina diara kum takaia. Naiwa piua ra, upla nani ba tuktan nani ra rau sauhkisa bara alki saura munisa. Naha sât daukanka ba kau pâwisa, kan upla nani ba naha “piua karna” nani ra lalah ba uba want sa bara rug lâka ba uba pâwan sa (2 Ti. 3:1-5). Aisa yapti ai luhpia nani ra upla saura nani wina kan kahbaia dukiara tânkira lâka wal daukaia sa. ¿Dîa daukaia sip sa?

Baibil ra wisa aman kaiki uplika kaia sa bara trabil ba kaina manis laki kaikaia (S.L 22:3; Mt. 10:16). Yawan upla ra taibi munaia want apia sa, sakuna smalkaia taki wabia taim, pain kabia aisa yapti kum apia kaka upla almuk kum tuktan nani ra yula kahbia. Smalki tataukra wâl smalki taukisa, bara naha nani ba kau wahma tiara lupia sa kaka, pain kabia aisika yaptika apia kaka upla almuk kum main kaiki kabia. Sakuna, tuktan ba mahka pâwi auya ba ra ban kra marikbia witin yakan taukaia sip sa. Aisa yapti ba laki kaikbia ani pitka kat ai luhpia nani ra main kaiki kaia nit sa sapa (Nuestro Ministerio del Reino wauhkataya, Waupasa kati, 1992 ba ra, La caja de preguntas taki ba laki kaiks).

Baku sin, truk ra apia kaka wapi tauki kabia trabil kum wan takbia apia dukiara aman kaiki kaia sa. Yawan aman kaiki taukisa kaka, aksidint nani, bara trabil nani bribia apia. Baku sin, daktar dimaia dukiara lalah tiki ba, bara lâ pliska nani ra waia ba wina wan kan kahbisa. Kan naha tasba saurakira tilara iwi ba mita, yawan nu sa upla nani ba unsabaia laik sa.

Aitani sa wahma tiara ba Jehova ra mayunbia (Law. 148:12, 13). Witin nani lilia lâka ni upla ra aisi, bara ai daukanka pain nani upla wala ba kaiki tâ iwisa. Bara sim piua Jehova ra kulkanka yabisa. Aisa yapti nani, luhpiam nani ra dîa sip ba kat hilp muns smalkaia warkka ba takaskraskira daukaia, bara sim piua ra trabil nani wina kan kahbaia.