Nu takan daukisa

◼ ¿Spirit lâka ra kauhla takan uplika nani ra nahki hilp munbia kli smalki tataukra kum takaia?

Uba lilia wan daukisa upla kum spirit lâka ra kauhla takan ba marikbia witin kli ai kupia aiska ni Jehova kupia lâka daukaia want sa (Lk. 15:4-6). Ban kra mapara buan lâka bara tasba trabilka nani ba mita silp ai stadika, aidrubanka nani bara smalkaia warkka dauki kan ba swin. ¿Nahki naha sât uplika ra hilpka pain kum yabia spirit lâka ra pâwbia dukiara?

Yawan naha sât uplika ra marikaia sa kristian baku rait pali witin ra latwan kaikisa. Kangrigisan almukka nani ba isti pali spirit lâka ra hilpka pliki yabia (Je. 5:14, 15). Spirit lâka ra kauhla takan ba piua wihka apia sa kaka, ban kra nit kabia smalki tataukra lankira kum hilp munbia. Sakuna, uplika ba piu wihka wina kangrigisan ba swin kaka, hilp ailal nit kabia. Ai kasakka lukan lâka bara kli ai tingkika lâka marikbia dukiara, buk kum wahbi sakan ba wal stadika yabia. Smalkaia warkka pura kakaira ba smalki tataukra lankira kum plikbia kauhla takan uplika ra Baibil stadika kum yabia dukiara (Hib. 5:12-14; Gâd Warkka Dauki wauhkataya, Yahbra kati 1998 ba ra “Sección de preguntas” wi ba kaiks). Naha sât uplika kum ra kakaira sma kaka, kangrigisankam ra smalkaia warkka pura kakaira ba wal aisas.

Upla kum piu wihka wina spirit lâka ra kauhla kan ba wal smalki taki waia dukiara, kainara kangrigisan almukka wâl mita witin ra pat aisan kaia sa. Bara baku witin nani kaikbia uplika ba kli smalki tataukra kum takaia sip sa sapa. Kangrigisan almukka nani ba smalki tataukra raya kum takisa piua ra, ani natka dauki ba baku kauhla takan uplika ra daukbia (Yahbra kati 15, 1988, La Atalaya wauhkataya, wahia 17, ba kaiks). Kauhla takan uplika ba smalkaia warkka daukaia ai brinka kaia sa. Baku sin, Organizados bukka, wahia 79-81 ra taki ba baku daukaia sa bara aidrubanka nani ra bali kaia sa. Spirit lâka warkka nani aihni pali dauki wabia kaka, kauhla takan ba isti pâwbia bara Jehova wal ai pânika lâka ba kli bribia. Bara sip kabia raya ban kaia yabalka ra wapaia (Mt. 7:14; Hib. 10:23-25). Uplika ba kasak trai munbia bara kristian daukanka nani bribia kaka, kli spirit lâka ra kauhla takras kabia (2 Pi. 1:5-8).