Smalkaia ba Spirit laka ra Dutki Wan Sakisa
1. Smalki warkka daukaia ba nahki yamni wan munisa?
1 Smalki warkka ba kau daukuya taim, spirit laka ra kau dutki wan sakisa, bara wan liliaka laka sin pakisa. Wel au, Jehova kupia lilia sakaia want ba mita sika, yawan smalki warkka ba daukisa. Ban sakuna, “uya smalki bas” adarka wanki ba yawan bila waluya taim, Jehova blisinka ba, bara selp tnatka wala nani ra sin yamnika kaikisa (2 Tim. 4:2; Ais. 48:17, 18). Smalkuya taim nahki pali kau dutki, bara kau lilia wan sakisa ki?
2. Smalki warkka ba nahki tnatka ra kau dutki wan sakisa?
2 Blisin, Karnika Sin Wankisa. Smalkaia ba help wan munisa naiwa wan trabilka nani ra lukaia watlika ra, Gâd Kingka laka blisinka nani ra kau lukaia (2 Kor. 4:18). Baibil tanka smalkaia ba, Jehova pramis wan muni dukya sut ra wan kasakka lukan laka kau dutki sakisa, bara tanka kasak ba dukyara wan tingkika laka sin pakisa (Ais. 65:13, 14). Jehova wal kau lamara kaia, bara ‘naha tasba wina saitra kaia’ dukyara upla ra help munuya taim, yawan pali sin saitra kaia wan bapanka laka ba kau dutki takisa (Jan 17:14, 16; Rom 12:2).
3. Smalki warkka ba nahki help wan munisa kristian daukanka nani pakaia?
3 Smalkaia ba help wan munisa kristian daukanka ba pakaia. Luki kais: Upla sut wan walbia yawan trai muni ba help wan munisa bauan laka tara pakaia (1 Kor. 9:19-23). Baku sin, “syîp nani sepadkas baku” “sarikira bara helpkas bangwi” nani ra aisuya taim, upla ra luki kupia swapni kaia lan wan daukisa (Mat. 9:36). Bara upla walan daukras, wan mapara buya, kuna yawan ban smalkisa kaka, bapi bui kaia lan takisa. Wan wîna sakripais dauki upla wala ra help munaia dukyara yus munuya taim wan liliaka sin kau tara takisa (W.n [Wark nani] 20:35).
4. Smalkisma ba dukyara nahki damra walisma ki?
4 Blisin tara kum sa, wan mayunra briaia Kumikira pali ba ra prana yabi ba warkka daukaia! Smalki warkka ba dutki wan sakisa. Bara ya ya ai rayaka aiska ni “sturka painkira upla nani ra witnis aisaia” trai muni ba ra sin blisin munisa (W.n 20:24).