Yawan Smalki ba sika, Gâd ra Latwan Kaiki ba Marikisa
1. Jisas ba Gâd ra latwan kaiki ba mita dia daukan?
1 Latwan laka mita Jisas ra tukban ai warkka ban dauki kaia. Smalkaia warkka ra Jisas dia daukan ba sut, Jehova ra uba latwan kaiki ba marikanka kum sa. Jisas pali win: “Tasba uplika nani kaikbia, yang Aisa ra latwan kaikisna bara witin mita daukamna win ba kat daukisna” (Jan 14:31). Jisas nina blablikra baku, yawan sin smalki tauki pyua ra, Gâd ra latwan tara kaiki ba marikaia sip sa (Mat. 22:37; Epe. 5:1, 2).
2. Yawan Jehova ra latwan kaiki ba, smalkaia warkka ba ra nahki marikisa ki?
2 “Ninam ba Hulikira Kulkan Kabia”. Wan kupia aiska ni pyu banira upla wala ra Jehova bara ai Kingka laka ba dukyara aisisa taim, Gâd ra latwan kaiki ba, bara ai nina sin hulikira kulkan kabia ta baikisa (Lawana 83:18 Miskitu Salmo Lawana nani, 1960; Isi. 36:23; Mat. 6:9). Jisas smalkaia warkka daukan baku, yawan sin daukbia kaka, Jehova nina huli kulkan kabia, bara ai kupia laka sin aimakbia want ba marikisa (Mat. 26:39).
3. Yawan Jehova ra latwan kaiki ba, nahki tnatka ra trabil nani pura luaia help wan munisa?
3 Latwan laka Bri Trabil nani Purak Lubia. Jehova ra wan latwanka laka ba diara sut pura luisa (1 Kor. 13:5, 7). Jisas mapara trabil ailal buan ba, sip kan daukaia smalkaia warkka witin swiaia lukaia. Ban sakuna, trabil tilara kan pyua ra, ai latwanka laka tara ba, bara Jehova kupia laka daukaia brinka ba mita daukan ban karna bapi bui kabia (Mark 3:21; 1 Pita 2:18-23). Yawan sin traika kaikanka tilara sa taim, Gâd ra latwan kaiki ba, pura luaia help wan munaia sip sa. Jisas Kraist tanka tara wankan ba nina bliki, auyapah wan dara wali, wan warkka takaskras ban dauki kabia. Wan taya nani wan mapara bubia kra, siknis nani kra, almuk sa kra, apia kaka upla wan walaia want apia kabia kra sin, yawan Jehova ra latwan kaiki ba marikaia dukyara, bara smalkaia warkka ra dia sip ba kat ban dauki kaia dukyara sin wan takasbia apia.
4. Jehova ra latwan kaiki ba mita, yawan dia blisinka brisa?
4 Latwan laka ba karnika tara brisa. Smalkaia warkka ra yawan Jehova ra latwan tara kaiki ba marikaia sip wan munisa. Baha sika blisin tara kum sa! (1 Kor. 13:13.) Bara Jehova nina ba ban kaiara ban mayunan kabia yua aula ba kaiki, wan pura sunisa “lamtwan laka ba kau kanra manas ban pawi kabia” (Pil. 1:9; Mat. 22:36-38).