Yu bani Jehova ra Mayuns
1. Gâd uplika baku diaura wan kupia bukisa, bara dia muni?
1 King Debit param win “yu banira [...,] ban kaiara” Jehova ra mayunaia want kan (Lawana 145:2, 7, 21). Yawan sin diara ailal tawan yu bani Jehova ra mayunaia sa (Lawana 37:10; 145:14, 18; 2 Pi. 3:13).
2. Nahki sip sa wan watla bilara Jehova ra yu bani mayunaia?
2 Wamtla Bilara. Ulbi sakanka ailal wan mihta ra mangkan ba lika sip wan munisa, yu bani tikska laki kaiki, aidrubanka nani ba ridi dauki, bara Pamali Mayunra dauki taim, Baibil tanka auhnka sut saki aisaia. Pamali ailal sin bara sa yu bani mil kum pan asla iwi pi bangwisa, baku ai auyapah sturi sat sat aisaia sip sa, bara sanska kum yabisa pamali baku Gâd ra mayunaia. Aitani sa aisa-yapti nani ba mahka trai munbia ai pamali wal na’sat aisanka nani daukaia, baku sip kabia ai luhpia nani ra Jehova latwanka laka ra ‘lâ kat wapni smalki pakaia’ (Epe. 6:4; K.smal 6:5-7).
3. Muihni-lakri nani aikuki sa taim, dia daukaia sip sa?
3 Muihni-Lakri nani Aikuki. Aidrubanka nani ra, bara smalki tauki taim, wan muihni-lakri nani aikuki Jehova ra mayunra yabaia sip wan munisa (Sins.l 15:30; Pil. 4:8; Hibru 13:15). Yawan sut Jehova ra latwan kaiki ba mita, pana pana sturi aisi taim Jehova ra wan tingkika laka bila nani ba isi takaia sa (Lawana 106:1).
4. Ani pyua ra sin Jehova ra mayunaia sip sa?
4 Lalukra Apia nani Wal. Yu bani utla utla smalki taukaia sip apia wan muni kabia sin, wark ra, kul watla ra, bara wan lama uplika wal, Jehova dia luki ba dahra bila sirpi kum pan lika aisi ta krikaia sip sma. Baku tnatka ra, ya uplika kupia pain kaka bila kaikanka kum mangki swima (Lawana 27:14; 1 Pi. 3:15). Kristian mairin kum plain ra pâli kan taim, ai lamara iwi kan mairka kum ra witnis aisan. Dia walan ba mita, mairka kata ba lilia luki ai kupia bukan kristian mairin ra ai dairiksanka bara telepon numbika sut yan. Kasak sika, tasba na yu bani ai trabilka nani wal rungwi tiwi auya sin, Jehova uplika ba ya ya walaia want ba ra “sturi yamni brih aula”. Maisapahkanka na daukisa upla ba bila kaikanka kum bribia, bara Jehova ra mayunbia (Ais. 52:7; Rom 15:11).
5. Dia muni Jehova ra mayunaia want sa ki, bara daukbia kaka dia painka bribia?
5 Ai napakanka nani yu bani ai warkka dauki ba kaiki, Jehova kupia ba uba lilia takisa! Tasba kir ra paskanka sut ba yu bani Gâd prana param aisi ba baku, yawan sin wan watla bilara, kangrigisan ra, bara lalukra apia nani wal aisisa taim, yu bani Jehova ra mayunaia sip sa (Lawana 19:1-4).