Baibil yus munaia lan kaia
1. Diakan Baibil ba yus tara brisa?
1 Gâd Bila yus munaia lan kaia ba sip wan munisa tanka kasak ba param smalkaia, bara upla lukanka atia tanka kunin ra smalki ba param ra sakaia (2 Tim. 2:15; 1 Pi. 3:15).
2. Dia help wan munisa Baibil tikska nani pliki lan kaia?
2 Baibil kakaira taks. Tuls kum wal wark taki lan kaia dukyara, tulska ba kau yus munaia nit sma. Ta wina tnata kat Baibil aisi kaikaia ba help mai munbia ai tanka sut param kaikaia. Baku sin, tiks kum anira sa sapa, bara dia wisa sapa sin kau isi kupiam tangh kraukaia help mai munbia. Mihtam bila sat Baibil ba kakaira takma wal baku, ban wina smalkuma taim, apia kaka utla utla smalki tauki kama taim sin, kupiam aiska ni kasak luki smalkaisma (1 Tes. 1:5).
3, 4. a) Baibil yus munaia kau lan kaia wisi ani tnatka kum kum bara sa ki? b) Baibil yus munaia kau lan kaia wisi, help mai munbia tnatka wala kum brisma ki?
3 Aidrubanka nani ra tiks kum wibia taim, mahka tikska ba pliki bas. Selp stadi takisma taim, apia kaka aidrubanka nani dukyara ridi takisma taim sin, Baibil tikska nani dia wi ba aman kaiki nahki alki daukma sapa luki kaiki bas. Upla ailal sin kaikisa, komputadora kum —apia kaka bahamuna satka kum— bri kaka sin, ban kau pain sa ai Baibilka ra tikska nani ba aisi kaikaia. Kan baku dauki ba mita smalki tauki taim Baibil tikska nani sakaia kau isi kaikisa (Jan 14:26).
4 Pamali kum kum dia daukisa luki? Baibil tikska nani lan takaia dukyara, taim saki naku daukisa: Wauhtaya lupia kum klakisa. Wauhkataya sait kum ra Baibil tikska kum ulbisa. Bara sait wala ra tikska ra dia wi ba ulbi brisa. Bara ulbi bri ba yus muni, pana pana trai munisa tiks kum dia wisa sapa, apia kaka anira baku wisa sapa kaikaia. Smalki baku, apia kaka Baibil yus muni upla kum ra ansika yabi baku pulaia ba sin help wan munisa kau lan kaia.
5. Dia muni yawan want sa Baibil yus muni kau lan kaia?
5 Baibil baku buk wala kumi sin apu sa. Baibil ra baman baha ‘sinska laka upla swaki sakaia sip ba’ Ulbanka hulikira nani brisa (2 Tim. 3:15). Wan lama uplika aihkika ba sika, Baibil ra diara prana sut bara ba kakaira apia sa. Baha mita Baibil ra tanka kasak aihwa wanki ba witin nani kaikbia dukyara sin, Baibil yus muni kau lan kaia trai munpi! (Sins.l 2:1-5.)