Kulkanka tara bri warkka ba
1. Smalkaia warkka kulkisa kaka, dia sakripaiska daukaia wilin kabia ki?
1 Dia muni ban wan kupia bukisa smalkaia warkka ra yawan dia bri ba sut, wan taimka, bara wan karnika yus munaia? Kan wark kau tara wala apu sa! Smalkaia warkka ba upla ra nahki help muni ba ra luki kaikisa kaka, wan kupia bukbia naha warkka kli daukras kabia ba kau daukaia (W.n 20:24).
2. Jehova nina huli kulkaia dukyara smalkaia warkka ba nahki help munisa?
2 Jehova nina Huli kulkisa. Smalkaia warkka ba marikisa, Jehova Kingka laka Jisas Kraist mihta ra ba, tasba gabamintka nani sut diki saki, upla sut trabilka nani ba apu daukbia (Mat. 6:9, 10). Param sa Jehova baman siknis bara prura wina swaki wan sakaia sip sa (Ais. 25:8; 33:24). Baku sin, yawan Ai nina brihwi ba mita, liliakira smalkisa. Bara upla nani ba wan daukanka pain nani kaiki Jehova ra mayunaia sip sa (1 Pi. 2:12). Uba lilia wan daukisa tasba aiskara Karnika Sut Bri Gâdka Jehova nina ba smalkaia! (Imp.st 6:2, 3, wahya mina.)
3. King laka sturka ba pain walbia uplika ba dia blisinka bribia ki?
3 Upla rayaka swaki sakisa. Jehova “brin daukras upla kumi kra tanis tiwbia, kuna upla sut ai daukanka saura wina ai kupia lakbia” (2 Pi. 3:9). Ban sakuna, lan daukras kaka, upla ba nahki muni Jehova dia pain, dia saura kulki ba lan takbia ki? (Jona 4:11; Rom 10:13-15.) Upla nani ba sturi yamni ba ai kupia ra dimuya taim, ai rayaka ra diara saura nani dauki kan ba mahka swisa (Mai. 4:1-4). Baku bara, raya ban kaia laka briaia sip kabia. Kasak sika, smalkaia bara lan daukaia warkka ba yawan bara wan wali nani rayaka sin swaki sakisa (1 Tim. 4:16). Rait diara tara kum wan mihta ra mangkan sa!
4. Dia muni yawan sip ba kat King laka smalkaia bara disaipel warkka daukaia sa?
4 Tisku pali, pât tara yua ba, naha tasba saurakira na sauhki tikbia. Sakuna ya ya Jehova ra mayunbia ba swak takbia. Baha mita, smalkaia bara lan daukaia warkka ba naiwa pyua ra kau daukisa, kau tara sa bara kau yamni saki warkka kum sa. Kaisa naha warkka ba pas pali, wan rayaka ra mangkaia! (Mat. 6:33.)