Kristian nani ba wan pura sunaia sa
1. Smalkaia warkka daukaia wisi, dia pali daukaia aitani kabia ki?
1 Silp wan karnika wal baman lika smalkaia warkka ba daukbia apia. Baha warkka daukaia wisi Jehova sika karnika wankisa (2 Kor. 4:7). Upla nani syîp baku bangwi ba ra pliki sakaia help wan munbia dukyara Witin ai insalka nani blikisa (Par.m 14:6, 7). Witin sika baha tanka kasak saumukka yawan mangki bara li laiki ba yan pawisa (1 Kor. 3:6, 9). Baha mita, diara tara kum sa kristian nani ba wan Aisa heven ra ba pura sunra bak ai lamara wabia!
2. Dia dukya nani sin wan pura sunra ra wiaia sip sa ki?
2 Silp wan dukyara makabaia. Pyua bani smalkaia warkka daukisa taim wan pura sunaia sa (Epe. 6:18). Dia dukyara wan pura sunaia sip sa ki? Diara wala nani makabi purkara sin aitani sa smalkaia pliska ra kupia karna laka bara pain luki smalkaia laka makabaia (W.n 4:29). Jehova ra makabaia sip sa upla kupia bauan laka bri bara Baibil tanka walan dauki nani ra wan ta pahkbia. Uplika yawan mita smalki ba makabi walanka kum daukuya taim, Jehova mita ansika sakaia help wan munbia dukyara, wan kupia ra pura sunra kunhku kum daukaia sip sa (Nih. 2:4). Baku sin, smalkaia warkka ba wan rayaka ra taura briaia dukyara sins laka makabaia sip sa (Jems 1:5). Naha warkka daukaia wan paiwan sa ba mita yawan tingki bila nani aisi wisa taim Jehova uba lilia ai dara walisa (Kol. 3:15).
3. Smalkaia warkka ban ai taura wabia dukyara upla wala dukyara wan pura suni ba nahki help munisa ki?
3 Upla wala dukyara sin makabaia. Baku sin, ‘pana, pana upla wala dukyara wan pura suni kap’. Sip kabia taim wan muihni lakri nina nani maki sin makabaia (Jems 5:16; W.n 12:5). Wînam tara uba siknis sa ki? Baha mita, smalkaia warkka ra wiria baman daukisma ki? Baku sa kaka smalki tataukra ai wîna tara yamnika pain bri ba tawan makabi bas. Pyu kumi ra sin puram sunra karnika ba bahki kulkpara! Baku sin, gabamint uplika nani smalkaia warkka pain kaiki kabia, bara wan muihni lakri “rayaka sapkira bara kupia kumi laka bri kabia” dukyara aitani sa baha tawan makabaia (1 Tim. 2:1, 2).
4. Dia muni ban wan pura sunaia sa ki?
4 Tasba aiska ra sturka yamni ba param aisaia ba wark kum tara sa. Sakuna, ‘pyu bani wan pura sunaia laka ba swiras’ kaka, baha warkka daukaia Jehova help wan munbia (Rom 12:12).