Namkra ba pain brisma ki?
1. Dia tanka sa ‘nakra pain kum’ bri kaia?
1 Wan nakra ra kaiki ba, dia dauki ba param takisa, baha mita Jisas dia win ba ra lukaia sa: “Namkra nani ba pain kaka, wînam aiska ba sin ingnika bri kabia” (Mat. 6:22). Spirit laka ra wan nakra “pain” kaka, diara kumi ra baman kaikbia: Gâd kupia laka daukaia. Naha wiaia want sa, Gâd Kingka laka taura mangkisa, bara swiras diara bahki nani bara wark wala nani sin smalkaia warkka ba alki takaskbia.
2. Dia ba wan nakra pain ba tanka wahra daukan kaia sip sa, sakuna dia help wan munbia?
2 Namkra diara sut kaiki ba brin daukisa ki? Diara raya nani apia kaka upla wala dia bri ba ra kaiki uba lukisa kaka, yawan dia rait pali nit ba tanka ba wahra takaia sip sa. Upla sinskas ba diara kum nina bliki, ai taimka, lalah bara ai karnika sut dingkisa. Ban sakuna, upla sinskira ba “pas kulki kaikuya” baha dukya nani sut ba Gâd warkka dauki ba kau yamni takbia, apia kaka saura takbia sapa laki kaikisa (Luk 14:28; Pil. 1:9-11). Smalkaia warkka ba kau daukaia wisi, pyu kum kum ra aitani kabia wan taimka ba laki kaikaia. Baha dukyara wan rayaka ba kau isi iwaia tnatka plikaia sa (2 Kor. 13:5; Epe. 5:10).
3. Kristian mairin kum ai rayaka kau isi daukan ba wina dia lan takisa ki?
3 Kristian mairin kum taura smasmalkra takan taim, kampani ra ban ai warkka ba daukaia want kan, bankra wark sirpi kum taki lalah sakaia sip kan. Witin naku win: “Upla kumi sin dawan wal dukya sip daukras. Brinki nani wal sakripais kum daukri, baku dia nit pali kapri ba wal trai kaikri taiura waia. Yang tainka briri tasba yuyaka nani ba bahki pali sa, bara baha briaia dukyara uba wîni iki kapri”. Witin ra dia takan ba help munan ai rayaka ba kau isi daukaia; wark wala plikan, baku witin sanska pain kum brin taura smasmalkra warkka ra ban kaia.
4. Dia muni aihni pali sa wan nakra pain kum bri kaia?
4 Wan taimka wiria man ba mita nit pali sa wan nakra pain bri kaia. Yu kum bal lui bani ba tanka marikisa tasba saura tnata yua nani ba pat baila sa, bara tasba raya Gâd pramis munan ba ta krikisa (1 Kor. 7:29, 31). Wan nakra nani smalkaia warkka ra mangki brisa kaka, wan rayaka swaki sakbia bara upla nani wan wali bangwi ba sin (1 Tim. 4:16).