Aitani kat daukisna ki?
1. Kristian rait aihwa kum ra dia dukya ba yaka sari takaia sip sa?
1 Pyua kum kum ra damra walram sa diara daukram ba aitani apia kan? Bankra kau almuk takisma, apia kaka wînam tara ba siknis trabilka brisma bara pamalikam nani ra main kaikisma, baha sut ba mita, smalkaia warkka ra dia daukaia want sma ba sip daukras mai munisa, bara saura damra walisma. Kristian mairin kum luhpa yuhmpa bri ba bila ai taimka aiska baha ra yabisa, sim taka mita saura ai dara walisa, kan smalkaia warkka ra karnika bara taim uya apu sa. Naku trabilka kum takisa kaka aitani sa pitka kat laki kaikaia. Nahki tnatka ra?
2. Jehova yawan wina dia bila kaikisa ki?
2 Jehova yawan wina dia bila kaikisa ki? Yawan kumi bani want sa Jehova warkka ba kau daukaia. Sakuna, daukaia want ba wihki daukaia sip ba wal sim dukya apia sa. Bara wiria lupia dauki ba wal marikisa aitani apia sa, kau daukaia want sa. Diara kum lukaia sa, Jehova pain nu sa yawan ani pitka kat sip sa daukaia; Witin kau wan makabras sa yawan sip daukras dukya nani ba daukaia (Lawana 103:13, 14). Nanara, dia wan makabisa ki? Wan kupia aiska ni witin warkka dauki bara diara sut bri ba yabia (Kol. 3:23).
3. Smalkaia warkka ra dia dauki ba nahki laki kaikbia?
3 Nahki nu takamna dia daukaia sip kamna ba? Jehova ra makabaia sa wan rayaka laki kaikaia help wan munbia (Lawana 26:2). Baku sin, Kristian panika pain kum yawan ra wan kaiki bara sibrin apu kira diara rait wan wi ba, wan marikbia dia daukaia ba (Sins.l 27:9). Bara, wan kupia kraukaia sa pyua nani ba sat wala takisa, baha mita, aitani sa pyu kum kum ra wan rayaka ba laki kaikaia (Epe. 5:10).
4. Smalkaia warkka kupia kraukanka nani ba nahki kaikaia sa?
4 Nahki kaikaia sa kupia kraukanka nani ba. Pat kaikram sa pulanka kum ra plapi nani ra wala nani mita ai pura wini ta baikisa? Witin nani ai brinka sa kupia bukaia pain daukbia dukyara, sarka paskaia lika apia. Sim baku takisa wan asla aidrubanka ra bara wan ulbi sakanka nani ba wal, wan kupia kraukisa ‘smalkaia warkka takaskras daukaia’, ai brinka sa wan kupia bukaia, wiras sa yawan dauki ba aitani apia sa (2 Tim. 4:2). Kasak pali sip sa wiaia, smalkaia warkka ba pain daukisa kaka, Jehova ai kupia krauki yamni kaikbia wan ‘warkka bara latwanka laka’ ba sin (Hibru 6:10).