Aihka pranakira kaikbia
1. Jisas Pruan Kupia Kraukanka aisanka walbia nani ra dia daukanka wala sin aihka pranakira kaikbia? Tanka mariks.
1 Ani yua dukyara aisisa? Jisas Pruan Kupia Kraukanka yua ba. Baha mita kasak trai munan sa upla nani ra paiwaia yawan aikuki kabia dukyara. Wabia uplika nani mapara dia walbia ba baman aihka pranakira kaikbia apia. Mairin kum Jisas Pruanka ra paiwan kan, bara dia kaikan ba dukyara win nahki upla kumi bani ba pana pana latwan laka mariki kan, baku sin aidrubanka watla ba klin pali kan, bara baha ra upla wilinkira nani man main kaiki kan. Baha mita, aisanka yabi uplika ba baman witnis aisabia apia, yawan sut mani bani daukaia sa naha yua aihka pranakira pyua ra (Epe. 4:16).
2. Yawan kumi bani ba nahki tnatka ra witnis aisaia sip sa ki?
2 Yamni balan bila pain kum yabaia. Wabia uplika nani ra yamni balanka liliakira yabi witnis aisabia (Jn. 13:35). Bara upla nani wal sturi aisaia karna mai munisa kaka, lamamra iwi uplika wal aisaia sip sma (Hib. 13:1, 2). Ridi kaia sa tringsar uplika nani wal wih aisaia. Ban kra paiwanka nani yabi kan pyua ra witin nani ra yaban. Man makabi walaia sip sma: “Pas trip naha ra aulma ki?” Witin wal iwaia want sma ba wis, bara dia makabi walanka brisa kaka wilinkira ansika yas. Bara kangrigisan wala Asla Aidrubanka Watla ba yus munaia nit sa kaka, uplika ra wiaia sip sma: “Smalkanka yaban ba nahki kaikisma sapa nu takan ai daukisa. Tnatka kum bara sa man wal kli aisaia?”
3. Asla aidrubanka ra waras nani ra nahki pain briaia sip sa?
3 Asla aidrubanka ra waras nani ra help munaia. Muihni lakri nani uya asla taki bangwras ba, bara naha pyua ra baman bali ba sin bara kabia. Baha nani ra yamni balan bila yas, baku sin wis uba lilia damra wali sma witin nani aikuki kaia (Rom. 15:7). Kangrigisan almukka nani ba Jisas Pruan Kupia Kraukanka yua lubia ningkara baha nani ra kupia bukaia dukyara wih kaikaia sip kabia. Yawan want sa wali nani ba Gâd ra mayunanka yabia dia wali ba dukyara baman apia sakuna dia kaiki ba sin, baku ‘witin nani ba wan daukanka pain nani ba kaiki, Gâd ra mayuni kabia’ (1 Pi. 2:12).