Kaisa sandi yua ra smalkaia!

1. Pâl bara ai pânika nani Pilipai taunka ra daukan ba wina yawan dia lan takaia sip sa?

¹ Sabat yua kum ra Ju uplika nani Pilipai taunka ra ris bri bangwi kan. Pâl bara ai pânika nani wal impakanka kum ra tauki, baha taunka ra wan. Witin nani baha yua ra ris brin kata upla nani baha aihka kaikaia apia kan. Sakuna witin nani pain nu kan Ju uplika nani baha yua ra taun wina taki, plis kum ra wih ai pura suni kan bara ris briaia watlika ra witin nani upla ra mahka smalkan. Baha mita Lidia bara ai watla uplika nani sut ba tahbi daukan pyua ra Pâl bara ai pânika nani uba lilia taki bangwan (Ap.St 16:13-15). Naiwa pyua ra upla aihkika ba sandi yua ba ris brisa. Dia muni baha nani ra wih smalkaia dukyara baha yua yus munras sma ki?

2. Muihni lakri ailal sandi yua ra trabil apukira smalkaia dukyara dia trabilka nani pura luaia kan?

² Sandi yua ba smalkaia ba karna sa. Muihni lakri nani sut ra 1927 manka ra kupia bukan sandi yua ba smalkaia. Bara baku daukan ba tawan mapara buan. Miriki Kuntrika ra muihni lakri manis silak ra mangkan, kan wihta nani ba win muihni lakri nani ba sandi yua ra Sabat lâka ba kulkras kan, bara warbanka dauki kan bara baha yua ra adar apu diara wauhwi atki tauki kan. Sakuna baha kristianka nani ai nina ra tauras kan. 1930 manka ra “kangrigisan ailal dakni sirpi” ra, smalkaia taki wi kan, bara smalki tataukra nani ba sim tasbaia piska lamara iwi kan ba mita pliska sut ra smalkaia sip kan. Pyu kum kum ra smalki tataukra uba ailal smalki tauki kan ba mita polis nani ba silak ra sip mangkras kan. Baha mita muihni lakri nani sandi yua ra trabil apukira smalkbia dukyara sakripais daukan ba yawan nahki tnatka ra tingkika yabisa?

3. Dia muni sandi yua ba smalkaia dukyara yua kum pain sa?

³ Smalkaia dukyara yua kum pain sa. Sandi yua ba upla manis ba ai watla ra takaskisa. Baku sin naha yua ra upla nani ba ris brisa. Ban kra sandi yua ra ai rilidianka bri uplika kum ba Dawan bila dukyara kau aisaia want kabia. Bara sandi yua ra aidrubanka bri sma kaka, kau pain sa, kan smalki taki waia dukyara pat ridi sma, baha mita dia muni sandi yua ra aidrubanka kainara apia kaka lubia ningkara smalkaia taki waras? Ban kra dinar pyua ra piaia dukyara plun wiria kum ridi daukaia sip sma.

4. Sandi yua ra smalkaia taki wabia kaka, dia yamnika sakbia ki?

⁴ Sandi yua ra awar kum kum smalkaia taki wabia kaka, sim yua ra ris briaia awarka nit ba sakaia sip kabia. Bara naha warkka hulikira daukan ba tawan yawan pain wan dara walbia (S.L 19:23). Ban kra stadi tatakra pain kum Lidia baku sakbia!