Smalkaia warkka ra wihka bîla kaikan lâka nit sa

1. ¿Jehova nahki wihka bîla kaikan lâka marikan sa upla nani ra?

¹ Wihka bîla kaikaia ba Gâd daukanka kum sa bara Witin upla nani ra marikisa (Imp.St 34:6; Law. 106:41-45; 2 Pi. 3:9). Sampla tara kum ba sika wihka bîla kaikan lâka bara Ai latwanka lâka mita tasba aiska ra Gâd Kingka lâka smalkisa. Jehova upla nani aikuki naha tasba ra 2,000 mani wark takisa, baku sin ban naiwa piua ra upla kupia pain bri ba ai lamara brih balisa (Jn. 6: 44). Smalkisa piua ra, ¿nahki Jehova wihka bîla kaikanka bri ba yawan tnata lukisa?

2. ¿Yawan nahki natka ra wihka bîla kaikanka lâka marikaia sa smalkisa pliska ra?

² Utla utla ra smalkaia. Jehova wihka bila kaikan laka tnata lukaia sa smalkisa piua ra baha mita takaskraskira smalki pîska ra upla kum kum ai brinka apia kabia sin yawan nani ban smalkisa (Ap.St 5:42). Yawan ban wihka bila kaiki smalkisa upla nani ba aihka wan kaikbia kra, wan swira paskbia, bara wan mapara bubia kra sin (Mk.13:12,13). Sakuna yawan ban wihka bîla kaikanka lâka marikisa tânka kasak ba utla utla ra ban smalkisa upla nani ba walaia ai brinka apia kabia sin.

3. ¿Dîa muni nit sa wihka bîla kaikan lâka ba upla ra kli wih kaikaia bara stadika tâ krikaia dukiara?

³ Baibil stadika. Dus kum pâwbia dukiara wihka bîla kaikaia lâka nit sa. Yawan sip sa lî laiki main kaikaia sakuna karnika âpu sa isti yaka pâwaia (Je. 5:7). Spirit lâka ra pâwaia ba sim baku sa, tawa tawa ra pâwisa (Mk. 4:28). Stadi tatakra nani ba karna munisa ai rilidianka lukanka kuninkira ba swiaia bara ai daukanka nani Baibil wina apia ba sin. Sakuna yawan wan stadika ra taibi munaia apia sa spirit lâka ra isti pâwbia, pain sa piu aitani kum wihka bîla kaikanka lâka briaia, baku Gâd ai spiritka holikira bâk stadi tatakra nani ba kupia bukbia bara ai rayaka shins munbia (1 Ko. 3:6, 7).

4. ¿Nahki wihka bîla kaikanka lâka hilp wan munaia sip sa wan taya nani lalukra apia ra kau pain smalkaia?

⁴ Taya nani lalukra apia ba. Ban kra yawan wan brinka kabia wan taya nani tânka kasak ba lan takbia, sakuna kau pain kabia piu aitani kum bîla kaikaia bara smalkaia, baha mita uba diara ailal smalkaia apia sa (Smas. 3: 1, 7). Wan daukanka pain ba marikaia sa, baku sin ban wan kasakka lukan lâka rispik lâka wal witin nani ra aisaia sa (1 Pi. 3:1, 15). Smalki tataukra kum wihka bîla kaikanka lâka marikisa kaka, kau pain smalkbia baku dauki wan Aisika kasbrika purara ba kupia lilia daukbia.