¿Luhpiam nani ba ridi sa?
1. ¿Dîa muni aitani sa luhpiam nani ba ridi kabia?
1 Skul piua ba pat tâ krikan. Luhpiam nani ba traika kaikanka nani brisa. Bara witin nani sin sanska pain kum brisa “diara kasak ba” smalkaia (Jn. 18:37). ¿Witin nani ba ridi sa?
2. Ridi kaia dukiara, ¿luhpiam nani dîa ai tânka briaia sa?
2 ¿Luhpiam nani ba pain ai tânka brisa kuntri mayunanka bara liliaka wala nani kulkanka yabi ba aitani apia sa? Bara, ¿dîa muni baha nani ra aikuki tilara kaia ba pain apia sa? ¿Witin nani ridi sa dîa daukaia upla kum mita skul tara dimaia taibi munisa kaka? Baku sin, kut munaia, druga yus munaia bara rum diaia dukiara, upla kum mita taibi munbia kaka, ¿dîa daukbia ki? ¿Witin nani wibia baha liliaka bara kulkanka nani ba ai rilidianka mapara sa? Kau pain kabia luhpiam nani ba dîa kasak luki ba pain smalkaia lan takbia (1 Pi. 3:15).
3. Aisa yapti nani ba ai luhpia nani ra smalkaia dukiara, ¿Pamali Mayunra Tihmika ba nahki yus munaia sip sa?
3 Pamali mayunra tihmika. Ban kra mani aiska ra luhpiam nani skul dimisa piua ra skul watla ra dîa trabilka nani taki ba dukiara laki kaikisma. Sakuna skul tâ krikras kainara daukma kaka kau pain kabia, baku lika luhpiam nani ba kau pain ai dara walbia. ¿Dîa muni Pamali Mayunra Tihmika kum apia kaka kau yus munras baha daukaia dukiara? Naha daukaia dukiara, luhpiam nani ra makabi wals dîa trabilka ba kau wari takisa skul dimaia ba dukiara. Mani luan nani ra trabilka nani luan ba kli laki kaikaia sip sa nanara witin nani kau almuk takan bara kau pain ai tânka bri ba mita (Law. 119:95). Marikanka kum ra aisa yapti nani ba maestru kum baku takaia sip sa, apia kaka skul tuktika kum baku. Baha wina luhpiam ra smalks nahki Baibil wina ansika kum yabaia bara Razonamiento bukka, apia kaka Los jóvenes preguntan bukka nani ba yus munaia. Aisa kum naha marikanka nani yus munisa ai luhpia nani ra ridi daukaia nahki smalkaia skul piua ba tâ kriki ba ra, baku sin nahki upla ra wiaia witin nani Jehova Witniska sa. (La Atalaya wauhkataya Trisu kati 15 yua 2010 manka, wahia 3 wina 5 ba kat laki kaiks.)
4. ¿Aisa yapti sinskira nani ba dîa daukisa?
4 Kristian wahma tiara nani ba trabil ailal brisa, kan tnata yua nani ba “piua karna” sa (2 Ti. 3:1). Aisa yapti nani ba kaina manas ridi sa trabil nani ba mapara (S.L 22:3). Baha mita, aisa yapti nani skul tâ krikras kainara, luhpiam nani ra lan dauks ban ridi kaia.