Sringkam bripara
1. ¿Dîa muni kupia karna kaia lâka nit sma?
1 ¿Piu kum ra sibri kapram skul watla ra smalkaia upla nani mita swiram paskbia wisi? Uba sringkam sa kaka kupia karna briaia nit sma upla wala nani ra aisaia dukiara. ¿Dîa ba hilp mai munaia sip sa?
2. ¿Dia muni skul watla ra smalkisa piua ra sins lâka pain yus munaia sa?
2 Sins lâka yus muns. Skul watla ra smalkaia ba man mampara isi kabia sin, sakuna tânka apia sa upla sut ra smalkaia sma. Sins lâka pain nani ba yus muns ahkia upla wal aisaia sip sma (Smas. 3:1, 7). Ban kra skul watla ra sanska kum maikbia kaka sip sma tânka kasak ba dukiara aisaia. Skul tuktan wala mita mamkabi walbia dîa muni liliaka nani dauki ba tilara dimras sma. Kristian kum kum ba kau mani bilara skul tâ krikras kainara, maestruka nani ba ra maisa pakisa witin nani Jehova Witniska sa bara wauhkataya nani sin yabisa, baku sin ai kasakka lukan lâka ba dukiara smalkisa. Skul tuktan kum kum ba wauhkataya nani ba ai sirka purara suni swisa bara skul pânika nani ba makabi walanka nani ba daukisa.
3. ¿Dîa muni ridi takaia sa skul watla ra smalkaia dukiara?
3 Ridi bas. Kaina manis ridi takisma kaka sibrin âpukira smalkaia sip kama (1 Pi. 3:15). Luki kaiks dîa sât makabi walanka kum mai daukbia bara man nahki ansika pain kum yama (S.L 15:28). Sip sa kaka, Baibil kum bara wauhkataya kum kum bri kaia, Razonamiento bara Los jóvenes preguntan bukka nani ba sin. Bara ulbanka wala kum paskanka nani dukiara aisi ba sin sip sa yus munaia. Aisikam yaptikam ba ra makabi walaia sip sma pamali mayunra tihmika ba ra marikanka kum kum daukaia.
4. ¿Dîa muni skul watla ra ban smalki kaia sip sma?
4 Daukaia sip sma luks. Lukaia apia sma skul pânika nani ba tânka kasak dukiara aisama taim swiram daukbia. Ban kra kum kum pain mai kaikbia bara sip kabia mai walaia. Sakuna aihka lukpara upla wala nani mai walras kabia sin, Jehova yamni mai kaikbia ban trai kaikisma ba dukiara (Hib. 13:15, 16). Ban Jehova ra puram suni bas ‘smalkaia warkka sibrin âpukira’ daukaia dukiara (Ap.St 4:29; 2 Ti. 1:7, 8). ¡Uba lilia kama upla kum mai walbia kaka! Bara baha uplika ba sip kabia Gâd napakanka kum takaia.