Smasmalkra pain kum ba, ¿ani daukanka tara bri kaia sa?
1. ¿Smasmalkra pain kum ba, ani daukanka tara bri kaia sa?
1 Baibil smalki tataukra pain kum kaia dukiara, ¿dîa daukaia nit sa? ¿Skul tara diman uplika kaia sa? ¿Mani ailal ai rayaka ra diara lan takan uplika kum kaia sa? ¿Smalkaia lankira kaia sa? Sakuna raitka ba latwan lâka ba bri kaia sa, kan naha daukanka wal Lâ aiska ba bîla kumi ra daukan sa. Jisas disaipilka nani tukinka ba latwan lâka sa. Bara Jehova daukanka painkira kau tara ba latwan lâka sa (Jn. 13:35; Gal. 5:14; 1 Jn. 4:8). Param sa, smasmalkra pain kum ba latwan lâka marikisa.
2. ¿Dîa muni upla nani ra latwan kaikaia sa?
2 Upla ra latwan kaikaia. Jisas Smasmalkra Tara ba, upla nani ra latwan kaiki kan, baha mita upla nani witin smalki kan taim wali kan (Lk. 5:12, 13; Jn. 13:1; 15:13). Wan walka ra latwan kaikisa kaka, smalkaia natka plikbia. Upla nani aihka wan kaikbia baku sin wan nina bliki rau wan sauhkbia bara diara wala wan mapara takbia kra sin wan takaskbia apia. Yawan upla nani dîa ai kupia ra bri ba wan wibia taim aman pali walbia bara wan smalkanka ba witin nani nitka wal daukbia. Baku sin yawan wilinkira wan taimka sâkbia upla nani wal Baibil stadi takaia bara saptika nani uplika wal laki kaikbia ba yawan kaina manis ridi takbia.
3. Baibil tânka kasak ba ra latwan kaikaia ba smalkaia warkka ra, ¿nahki hilp wan munisa?
3 Tânka kasak ba latwan kaiks. Jisas ba tânka kasak ba sin latwan kaiki kan, baha mita diara manakira kum baku kaiki kan (Mt. 13:52). Yawan tânka kasak ba latwan kaikisa kaka, liliakira smalkaia warkka ba daukbia bara wan walbia nani ba sim sât daukaia want kabia. Naha latwanka lâka marikbia ba hilp wan munbia sibrin âpu kaia, kan naha bîla nani ba kulkanka tara bri ba tâwan bahara kau luki kabia, sakuna wan wîna swapnika nani ra lika apia.
4. ¿Latwan lâka ba nahki pakisa?
4 Latwan lâka ba nahki pakaia. Yawan upla nani ra latwan kaikisa, kan Jehova bara ai Luhpia ba latwan lâka samplika wan marikan, baku sin upla nani ailal spirit lâka ra pain apia ba kaiki wan kupia bukisa kau latwan lâka ra pâwaia (Mk. 6:34; 1 Jn. 4:10, 11). Baku sin Baibil tânka kasak latwan kaiki ba pakaia dukiara yawan kau stadi takaia sa bara dîa aisi kaiki ba ra lukaia sa. Wan auya tikaia apia sa latwan lâka ba spirit mâ ba natka kum tila wina sa (Gal. 5:22). Baha mita latwan lâka ba pakaia dukiara Jehova ra makabaia sip sa hilp wan munbia bara ai spiritka holikira ba wankbia (Lk. 11:13; 1 Jn. 5:14). Baha mita skul tara diman uplika kabia kra bara mani ailal wan rayaka diara ailal lan takan, apia kaka smalkaia lankira kabia sin, yawan sut ba latwan lâka marikbia kaka Gâd Bîla smasmalkrika pain kum takbia.