Lalah mâ lupia wâl praiska sirpi kan ba

King lâka tâ baikaia natka pain kum ba sika tasba aiska ra smalkaia warkka dauki ba wan prisantka nani ba lalah ra yabaia. ¿Sakuna yawan lalah uya âpu sa kaka?

Yu kum, Jisas kaikan piarka mairin umpira kum tempel ra lalah mangkaika watla ra lalah mâ lupia wâl mangkan. Praiska ba lika tara apia kan. Naha piarka mairin ba Jehova ra uba latwan kaiki kan ba mita ‘ai umpirka lâka ra raya iwaia dukia bri kan ba sut yaban’ (Mk. 12:​41-​44). Jisas naha piarka mairin dukiara aisan ba marikisa witin prisantka ba Jehova mapara uba pain kan. Sampla pain wala bâra ba sika patitara piua wina kristianka nani. Witin nani mapara yuyakira, apia kaka umpira kabia sin, ai prisantka ba Jehova ra yabaia sip kan. Apastil Pal ba Macedonia uplika nani dukiara win “witin nani umpira pali” kan, sakuna ai trabilka tilara “makaban” witin nani ra sanska yabia muihni lakri nani ra hilpka blikaia (2 Ko. 8:​1-4).

Baha mita, lalah mâ wâl baman yabaia sip kabia sin, wan auya tikaia apia sa, lalah wiria kabia sin, sut ba ra kulki sâkbia taim ailal takisa. Wan kupia aiska ni wan prisantka nani yabisa taim, wan Aisa heven ra ba ra kupia lilia daukisa. Kan Witin “latwan kaikisa liliakira ni yabi uplika ra (2 Ko. 9:7).