Nu Takan Daukisa

◼ Prapatikam kum apia kaka sut Jehova asla takanka ra yabaia want sma kaka, kau pruras kainara, ¿dîa daukaia sma?

Upla kum prubia taim, witin danh ai prapatika nani bri kan ba wal sip diara daukras (Smas. 9:5, 6). Baha mita, upla manis ba kau pruras kainara layar kum ra yabisa wauhtaya kum ra ulbia nahki ai prapatika wal dîa daukaia luki ba. Baha wauhkataya ra sin ulbisa ya uplika ba ai prapatika main kaikbia (2 Ki. 20:1). Plis kum kum ra naha sât wauhkataya ba ridi swiras kaka, gabamint mihta ra takaskisa bara witin nani wisa yaura baha prapatika ba yabia. Sakuna Jehova asla takanka ra tâka kum apia kaka sut yabaia lukanka brisma kaka, wauhtaya kum pain tânka mariki ulbi swiaia sma. Baha mita, ya uplika prapatikam main kaikbia want sma ba pain pliki sakaia sma. Prisantka kum wauhkataya kum ra ulbi swiaia dukiara, Betel apiska ra makabi walaia sip sma.

Prapatikam main kaikbia uplika ba wark tara kum brisa. Prapatikam ba uba tara sa kaka, naha uplika ba diara tânka sut sitnika kat laki kaikaia sa bara baha bisniska ra ai taimka ailal tikaia sip sa. Baku sin, gabamint tâ bri uplika nani ba naha warkka nahki daukaia sip ba dukiara tânka kau mai marikaia sip sa. Nu bas, kangrigisan uplika kum kabia sin, tânka apia sa witin ba prapatikam pain main kaikaia sip uplika kum sa. Ani uplika naha warkka daukaia dukiara wahbi sâkma ba lankira kaia sa. Naha warkka dauki uplika ba kuninkira kaia apia sa, bara man dîa wima ba daukaia wilin kaia sa (Trisu kati 8, 1998, ¡Despertad! wauhkataya ra, “Los beneficios de la planificación patrimonial” wi ba laki kaiks).

¿Dîa daukaia sip sma upla kum ai prapatika main kaikaia mamkabisa kaka? Upla kum naha sât warkka daukaia mai makabia kaka, pas ba diara nani sut ba pain luki kaikaia bara pura sunra wal laki kaikaia sma naha warkka tara ba pain daukaia sip sma sapa (Lk. 14:28-32). Prapatika dawanka prubia taim, man nu takaia sma ya uplika —nina nani sut— naha prapatika wina yamnika bribia. Bara naha warkka daukaia karnika brima taim, lâ nani wi ba baku daukaia bara prapatika dawanka nahki ulbi swin ba kat daukaia sma. Upla wala prapatika main kaiki uplika kum ba pain nu kaia sa prapatika sirpi apia kaka tara kabia sin, witin adar âpu sa diara nani briaia bara wauhkataya ba sât wala ulbaia. Dîa prisantka Jehova Witniska nani ra yama ba, sim Jehova asla takanka ra wisa (Lk. 16:10; 21:1-4).