¿Dîa muni lilia kaia sma?
1. ¿Kati lâs ba balan taim, dîa muni lilia wan dara walaia sa?
1 Kati lâs ra wan makabisa smalkaia warkka ra dîa daukan ba ulbi yabia. ¿Man nahki damra walisma? (Gal. 6:4.) Piu aiska smalki tataukra baku 130 awar daukisa, apia kaka 15 minit baman daukaia sip sa, yawan sut want sa lilia kaia. Kan naha warkka ba wan kupia aiska wal Jehova dukiara daukan sa (Law. 100:2).
2. ¿Dîa muni Jehova warkka ra kau pain daukaia sa?
2 Jehova sika karnika sut bri ba Gâdka sa. Baha mita Witin want sa yawan dîa kau pain bri ba yabia (Mal. 1:6). Jehova ra latwan kaiki ba mita, wan rayaka ba Witin ra yaban bara ai kupia lâka daukisa. Baha mita yu bani danh takisa taim, apia kaka kati lâs balan taim, Jehova ra diara kau pain ba yaban kaka, sampla baku, wan taimka, sinska lâka ba, bara wan karnika Witin warkka ra yaban kaka, liliakira wan dara walbia (S.L 3:9). Sakuna, saura wan dara walisa kaka, trai munaia sa wan warkka ba kau pain daukaia (Ro. 2:15).
3. ¿Dîa muni tânkira apia sa upla wala wal praki kaikaia?
3 ‘Upla wala dîa dauki ba dukiara lukaia apia sa.’ Tânkira apia sa upla wala wal praki kaikaia. Baku sin patitara kau wan karnika bri kan kaka, baha piua wal praki kaikaia apia sa. Wan rayaka ba sât wala takisa. Bara upla nani ba sim sât apia sa. Baha mita upla wala wal praki kaikisa kaka, sari wan dara walbia, apia kaka upla wala nani wal kau daukaia want kabia (Gal. 5:26; 6:4). Jisas upla wala wal praki kaikras kan. Kau ni, upla nani ra dîa daukaia sip kan ba kat warkka nani yaban (Mk. 14:6-9).
4. ¿Lalah mâ dukiara Jisas maprika bîla aisan ba wina dîa lan takaia sip sa?
4 Jisas maprika bîla kum aisan. Bahara wark tatakra kumi bani ra Jisas mita lalah mâ nani yaban ‘dîa daukaia sip kan ba kat’ (Mt. 25:15). Dawanka ba balan taim wark tatakra kumi bani ra makabi walan dîa daukan ba. Ya dîa daukaia sip kan ba kat wark karna takan ba, dawanka mita win witin wal lilia kabia (Mt. 25:21, 23). ¡Yawan smalkaia warkka ba ban tâ baikisa kaka, kasak lukaia sa Gâd ba blisin wan munbia bara yawan sin liliakira wan dara walbia!